Bilong Wanem Ol Witnes Bilong Jehova i Wok Yet Long Kam Long Yu?

LONG olgeta hap bilong graun, ol man i save olsem ol Witnes Bilong Jehova i save strong tru long autim tok long ol haus. Sampela i laik save, bilong wanem ol Witnes i wok yet long kam long ol, maski pastaim ol i no gat laik long harim tok ol Witnes i autim. Tupela pas i kam long Rasia bai helpim yumi long save long as bilong dispela.

Masha, wanpela yangpela meri bilong Khabarovsk i gat 19 krismas, em i tok: “Mi mas tok tru olsem pastaim mi save abrusim tru ol Witnes Bilong Jehova, olsem wanpela bikpela sik.” Tasol bihain long em i ritim pinis sampela nius ol Witnes i wokim, tingting bilong em i senis. Masha i tok: “Olgeta stori bilong en i gutpela na i kirapim tingting bilong mi, tasol bikpela samting moa, ol tok bilong en i helpim mi long save long ol samting i kamap long graun. Isi isi mi luksave olsem i stap bilong ol man i gat as bilong en.”

Svetlana i stap long biktaun Ussuriysk, olsem 80 kilomita long hap not bilong Vladivostok, em i tok: “I no longtaim i go pinis na mi kirap ritim Wastaua na Kirap! Ol dispela nius ol i samting yumi mas kisim long dispela taim nau. Mi laikim tru olgeta stori bilong en. Tok bilong en i gutpela tru, na i givim save long yumi. Tenkyu! Tenkyu tru long yupela i mekim dispela gutpela wok em ol man i mas kisim.”

Ol Witnes Bilong Jehova long olgeta hap i tingim tru dispela askim bilong aposel Pol bilong kirapim tingting: “Sapos i no gat wanpela i autim tok long ol, olsem wanem bai ol [manmeri] i harim?” (Rom 10:14) Olsem wanem? Long narapela taim ol Witnes i kam long haus bilong yu, yu inap harim tok bilong ol inap sampela minit? Ating yu tu bai amamas long kisim ol tok bilong Baibel i save mekim gut bel bilong ol man.

Yu Laik Bai Wanpela i Kam Lukim Yu?

Long nau i gat planti hevi, tasol yu inap i stap amamas sapos long rot bilong Baibel yu kisim stretpela save long God na long Kingdom bilong em na long ol gutpela samting em i laik mekim bilong helpim ol man. Sapos yu laik kisim sampela save moa, o yu laik bai wanpela i kam lukim yu long haus na lainim yu long ol tok bilong Baibel, no gat pe, orait raitim pas long Jehovah’s Witnesses, P.O. Box 636, Boroko, NCD 111, Papua New Guinea, o lukim atres long pes 2 em i stret long yu.