long winim ol traim o hevi i painim ol long nau.​—Ais. 41:​10, 13; 1 Pi. 5:7.

Amamas Long Samting God i Mekim Long Nau. Taim yu laik strongim ol brata, stori long ol samting Jehova i mekim long nau. Sapos toktok bilong yu i kamapim olsem ol dispela samting i amamasim yu, dispela bai kirapim wankain tingting long bel bilong odiens.

Tingim ol samting Jehova i save mekim bilong helpim yumi long karim ol hevi bilong olgeta de. Em i soim yumi nambawan gutpela rot bilong bihainim. (Ais. 30:21) Em i kamapim as bilong pasin raskol, pasin i no stret, stap rabis tru, sik, na indai na em i tokim yumi long olsem wanem em bai pinisim ol dispela samting. Em i givim yumi wanpela lain brata ol i save mekim pasin sori. Pasin bilong beten em i wanpela gutpela presen em i givim long yumi. Em i givim gutpela wok long yumi bilong i stap Witnes bilong em. Em i helpim yumi long save olsem Krais i kamap king pinis long heven na pinis bilong dispela taim nogut i kam klostu.​—KTH 12:​1-12.

Ol narapela blesing yumi kisim em ol miting bilong kongrigesen, na ol kibung sekit na kibung distrik. Taim toktok bilong yu i kamapim olsem yu tingim tru ol dispela samting, dispela bai strongim bel bilong ol narapela long ol i no ken sakim pasin bilong bung wantaim ol brata bilong ol.​—Hi. 10:​23-25.

Ol stori i kamapim olsem Jehova i blesim wok bilong yumi long autim tok em i narapela rot long kisim strong. Taim Pol na Barnabas i wokabaut i go long Jerusalem, ol i mekim ol brata i “belgut tru” taim ol i stori long God i bin tanim bel bilong ol manmeri bilong ol arapela lain. (Ap. 15:3) Yu tu inap givim amamas long ol brata taim yu kamapim ol gutpela ekspiriens long ol.

Taim ol brata i save olsem ol samting ol i mekim i bikpela samting, dispela tu bai strongim ol. Tok amamas long wok ol i mekim long autim tok. Tok amamas long ol brata husat i no inap mekim bikpela wok, long wanem, ol i lapun o ol i gat bikpela sik, tasol ol i stap strong na stap gut long God. Tokim ol olsem Jehova i no save lusim tingting long gutpela wok ol i bin mekim. (Hi. 6:10) Man i holimpas bilip maski traim i painim em, dispela em i bikpela samting tru. (1 Pi. 1:​6, 7) Yumi mas kirapim ol brata bilong yumi long tingim dispela samting.

Givim Bel Long Tokaut Long Gutpela Samting Yumi Wetim. Ol tok promis God i mekim long ol samting bai kamap bihain i save strongim tru ol man i laikim tumas God. Ating klostu olgeta long odiens i bin harim ol dispela tok planti taim. Tasol pasin bilong yu long soim olsem yu amamas tru taim yu toktok long ol dispela promis, em inap helpim ol man long save olsem ol dispela promis i samting tru, na i kirapim ol long bilip olsem ol promis bai kamap tru, na i mekim man i tenkyu tru long ol dispela promis. Taim yu bihainim ol tok yu lainim pinis long Skul Tiokratik, dispela inap helpim yu long mekim olsem.

Jehova yet em i Bikpela Man Bilong Strongim Narapela na Man bilong givim strong long lain bilong em. Tasol yu ken wok gut wantaim em long kamapim ol dispela blesing long ol man. Taim yu toktok long kongrigesen, stori gut long ol dispela gutpela blesing.

YU YET yu bin wok long olgeta wan wan hap tok kaunsel bilong dispela program bilong stadi? Yu mekim pinis olgeta eksasais? Yu wok long bihainim olgeta hap tok kaunsel taim yu givim ol tok, maski em long skul o long ol narapela miting, na taim yu mekim wok autim tok?

Wok yet long kisim helpim long Skul Tiokratik Bilong Autim Tok. Maski yu bin mekim ol tok inap planti yia pinis, i gat sampela samting yu ken mekim na bai ol tok bilong yu i ken kamap gutpela moa.