Yes Ol Wanwok Bilong Autim Gutnius:

Em wanpela gutpela blesing tru long yumi stap wanbel long lotuim dispela wanpela God tru, Jehova! Yumi “ol wanwok” bilong em na em i trastim na givim yumi wanpela wok holi bilong autim tok na skulim ol man long gutnius bilong Kingdom bilong em i kirap pinis. Dispela wok bai helpim ol man long kisim laip. (1 Kor. 3:9; Mat. 28:19, 20) Bilong inapim dispela wok long olgeta hap bilong graun, yumi mas stretim gut ol wok na bai bel isi na pasin wanbel i stap.—1 Kor. 14:40.

Dispela buk bai helpim yu long kliagut long olsem wanem Kongrigesen Kristen i wok long nau. Em i stori long ol blesing na ol wok yu gat olsem wanpela Witnes Bilong Jehova. Sapos yu tingim tru ol blesing yu kisim na yu inapim ol wok bilong yu, yu bai “kamap strong moa long bilip.”—Apo. 16:4, 5; Gal. 6:5.

Olsem na mipela i kirapim yu long skelim gut dispela buk. Skelim olsem wanem yu inap bihainim ol dispela tok long sindaun bilong yu. Olsem, sapos yu wanpela pablisa i no baptais, orait yu mas mekim wanem bilong kisim baptais olsem wanpela Witnes bilong Jehova? O sapos yu baptais pinis, yu ken mekim wanem bilong kamap strong long bilip na mekim bikpela wok moa bilong Jehova? (1 Tim. 4:15) Olsem wanem yu ken kamapim bel isi insait long kongrigesen? (2 Kor. 13:11) Painim ol bekim bilong ol dispela askim insait long dispela buk.

Sapos yu wanpela brata i baptais pinis, yu ken mekim wanem bilong winim mak bilong kamap kongrigesen sevan na bihain kamap elda? Planti tausen manmeri i wok long kam insait long oganaisesen bilong God, olsem na i gat bikpela nid long planti moa brata long go pas long mekim wok. Dispela buk bai helpim yu long luksave long samting yu ken mekim bilong winim ol dispela mak long mekim wok bilong God.—1 Tim. 3:1.

Mipela i beten strong olsem dispela buk bai helpim yu long luksave na pilim tru wok bilong yu insait long oganaisesen bilong Jehova. Mipela i laikim yupela tru na mipela i beten olsem bai yupela i ken stap namel long ol lain i amamas long lotuim Papa bilong yumi long heven, Jehova.—Sng. 37:10, 11; Ais. 65:21-25.

LONG olgeta hap bilong graun, i gat planti lotu, wok politik, wok bisnis, na ol narapela oganaisesen em ol i gat ol pasin bilong ol yet, ol samting ol i laik mekim, tingting bilong ol yet long ol samting, na save o bilip bilong ol yet. Tasol i gat wanpela oganaisesen em ol man i luksave olsem em i narapela kain long olgeta arapela oganaisesen. Tok Bilong God i soim klia olsem dispela oganaisesen em Ol Witnes Bilong Jehova.

² Em i gutpela samting olsem nau yu bung wantaim oganaisesen bilong Jehova. Yu save pinis long laik bilong God em i wanem samting, na nau yu bihainim dispela laik. (Sng. 143:10; Rom 12:2) Yu wanpela wokman bilong God i wok wantaim wanpela lain brata i stap long olgeta hap na i gat pasin laikim. (2 Kor. 6:4; 1 Pita 2:17; 5:9) Olsem Baibel i tok promis, dispela i givim amamas na planti gutpela samting tru long yu. (Prov. 10:22; Mak 10:30) Taim yu mekim laik bilong Jehova na stap gut long dispela wok, dispela i redim yu long i stap gut inap oltaim oltaim.—1 Tim. 6:18, 19; 1 Jon 2:17.

³ Bikpela Man Bilong Wokim yumi em i gat narakain gutpela oganaisesen i stap long olgeta hap, na pasin tiokratik i bosim dispela oganaisesen. Dispela i makim olsem Jehova i bosim dispela oganaisesen olsem Het bilong olgeta samting. Yumi bilip tru long em. Em i Jas, Man Bilong Givim Lo, na King bilong yumi. (Ais. 33:22) Em i God bilong stretim gut ol samting, olsem na em i bin stretim rot bilong yumi ken ‘wok wantaim em’ long helpim ol samting em i tingting pinis long mekim.—2 Kor. 6:1, 2.

⁴ Taim pinis bilong pasin nogut bilong dispela graun i wok long kam klostu, yumi mekim wok yet aninit long King God i makim, em Krais Jisas. (Ais. 55:4; Rev. 6:2; 11:15) Jisas i tok profet olsem lain bilong em bai mekim bikpela wok i winim wok em i bin mekim taim em i stap long graun. (Jon 14:12) Ol bai mekim bikpela wok moa, long wanem, lain bilong Jisas bai i go bikpela na mekim wok longpela taim moa na autim tok long teritori i bikpela moa. Ol bai autim gutnius bilong Kingdom long olgeta hap bilong graun.—Mat. 24:14; 28:19, 20; Apo. 1:8.

⁵ Dispela samting i kamap pinis. Tasol olsem Jisas i tokaut klia, wok bilong autim gutnius bai pinis long taim Jehova i makim. Baibel i gat ol tok profet i kamapim klia olsem bikpela de bilong Jehova i kam klostu pinis.—Jol. 2:31; Sef. 1:14-18; 2:2, 3; 1 Pita 4:7.

⁶ Taim yumi kisim save long laik bilong Jehova long dispela taim bilong las de, yumi mas wok strong moa long mekim ol samting God i laik yumi mas mekim. Bilong mekim olsem, yumi mas save gut long hau oganaisesen bilong God i mekim ol samting na wok gut wantaim em. As bilong ol wok bilong oganaisesen em ol stiatok bilong Baibel, ol lo, na ol tok bilong skulim ol man i stap long Tok Bilong God.—Sng. 19:7-9.

⁷ Taim lain bilong Jehova i bihainim ol kain tok olsem bilong Baibel, olgeta i wok wantaim, stap wanbel na bel isi. (Sng. 133:1; Ais. 60:17; Rom 14:19) Wanem samting i strongim pasin bilong yumi long pas gut wantaim ol brata long olgeta hap? Em pasin laikim. Yumi gat pasin laikim na dispela pasin i kirapim yumi long mekim ol