12. Nahum i tokaut long wanem samting bai kamap gen olsem bipo? Olsem wanem yumi ken ting tok profet bilong em i insait long ol samting bilong Kingdom?

¹² Nahum i tokaut olsem Ninive bai “bagarap tru,” tasol em i tokaut tu olsem “biknem bilong Israel [bai] i kamap gen, olsem bipo.” Na Jehova i salim gutpela tok long lain bilong em: “Lukim. Wanpela man i wokabaut i kam long rot i stap long ples maunten na em i bringim gutpela nius i kam. Em i kam bilong toksave olsem pait i pinis.” Dispela tok long pait i pinis em i insait long ol samting bilong Kingdom bilong God. Olsem wanem yumi save long dispela? Yumi ken ting olsem, long wanem, Aisaia i mekim wankain tok na em i tok moa olsem: “Em man bilong autim tok bilong . . . samting i gutpela moa, em man bilong autim tok long God i kisim bek ol, na em i tokim Saion olsem: ‘God bilong yu em i kamap king pinis!’ ” (Nah. 1:15; 2:2; Ais. 52:⁠7, NW ) Na long Rom 10:​15, aposel Pol i kolim dispela tok bilong makim ol Kristen em Jehova i salim ol i go autim gutpela tok. Ol i “autim dispela gutnius bilong kingdom.” (Mt. 24:14) Olsem nem bilong em i makim, Nahum i mekim gut bel bilong olgeta man i wok long painim bel isi na gutpela sindaun em Kingdom bilong God bai kamapim. Dispela lain olgeta bai save tru olsem, Jehova ‘i save mekim gutpela pasin, na long taim bilong hevi em i save kamap olsem ples hait bilong ol manmeri i go long em.’​—⁠Nah. 1:⁠7.

[Ol Futnot]

Buk Bilong Baibel Namba 35—Habakuk

Man Bilong Raitim: Habakuk

Ples Em i Bin Raitim: Juda

Raitim Pinis: 628 B.C.E. samting (?)

1. Tok profet bilong Habakuk i kamapim wanem ol bikpela tok i tru?

HABAKUK tu em wanpela profet i bin raitim wanpela liklik buk bilong Ol Skripsa Hibru. Tasol driman na ol tok God i givim long Habakuk i no liklik samting long lain bilong God​—⁠em i bikpela samting long ol. Tok profet bilong em i strongim ol wokboi bilong God long taim bilong hevi. Buk i kamapim tupela bikpela tok i tru: God Jehova em i King bilong heven na graun, na ol stretpela man ol i save bilip na wokabaut. Na tok bilong buk em wanpela tok lukaut i go long ol birua bilong ol wokboi bilong God na ol man i giaman na tok ol i lain bilong em. Buk i makim pasin yumi mas bihainim long bilip strong long Jehova, em inap tru long yumi mas litimapim nem bilong em oltaim.

2. Buk i givim wanem save long yumi long Habakuk, em man bilong raitim dispela buk?

² Namba wan tok bilong Buk Habakuk i olsem: “Bikpela i givim dispela tok long profet Habakuk long wanpela samting olsem driman.” (Hab. 1:⁠1) Husat dispela profet Habakuk (tok Hibru, Chavaq·quqʹ), insait bilong nem bilong em i olsem “Holim Strong”? Buk i no stori long papamama, o lain, o sindaun, o indai bilong em. Sapta 3 i tok long “man i bosim musik,” tasol yumi no save tru olsem dispela i makim Habakuk em i wanpela Livai bilong mekim musik long tempel, o nogat.

3. Wanem ol samting i painim ol Juda na i helpim yumi long save long taim Habakuk i bin raitim buk?

³ Habakuk i autim tok profet long wanem taim? Dispela tok long “man i bosim musik” na Jehova “i stap insait long haus bilong en” i makim olsem tempel long Jerusalem i no bagarap yet. (2:20) Dispela samting wantaim ol tok profet Habakuk i autim i makim olsem em i autim tok paslain liklik long taim Jerusalem i bagarap long yia 607 B.C.E. Tasol hamas yia paslain? Ating em i autim tok bihain long taim bilong gutpela King Josaia, em 659-629 B.C.E. Dispela tok profet em i autim i givim save long yumi long dispela samting, long wanem, em i tok profet long wanpela samting i mas kamap na taim ol Juda i harim dispela tok ol i no inap bilipim. Em wanem samting? Jehova bai salim ol Babilon i kam bilong mekim save long ol Juda, long wanem, ol i no bin i stap gut long Em. (1:​5, 6) Dispela i makim stret taim bilong King Jehoiakim i kirap nupela long bosim lain Juda, em i man bilong lotuim ol god giaman. Long dispela taim ol Juda i no bilip na ol i mekim planti pasin nogut. King Neko bilong Isip i putim Jehoiakim i stap king, na ol Juda i stap aninit long strongpela kantri Isip. Olsem na ol bai ting i gat as na ol i no inap bilip olsem ol Babilon bai kam pait long ol. Tasol King Nebukatnesar bilong Babilon i daunim King Neko long Karkemis long yia 625 B.C.E. na pinisim strong bilong Isip. Olsem na Habakuk i mas autim dispela tok profet taim dispela samting i no kamap yet. Em nau, ol samting i makim olsem Habakuk i bin autim tok profet long taim Jehoiakim i kirap mekim wok king (long 628 B.C.E.), olsem na Habakuk i stap long wankain taim olsem Jeremaia.

4. Wanem samting i kamapim klia olsem spirit bilong God i bin kamapim olgeta tok bilong Buk Habakuk?

⁴ Olsem wanem yumi ken save spirit bilong God i bin kamapim olgeta tok bilong dispela buk? Ol olpela lista bilong ol buk bilong Ol Skripsa Hibru i kamapim klia olsem Buk Habakuk em i hap tru bilong Baibel. Ol i no kolim nem bilong dispela buk, tasol taim ol i tok long ‘ol 12-pela liklik buk bilong ol profet,’ Buk Habakuk i mas insait long dispela bambai i gat 12-pela buk. Aposel Pol i luksave olsem dispela tok profet em i hap tru bilong buk bilong God. Em i kolim stret tok bilong Habakuk 1:​5 na em i tok, em samting “bipo ol profet i bin tok long en.” (Ap. 13:​40, 41) Long ol pas bilong em, Pol i kamapim sampela tok bilong Habakuk. Na ol tok Habakuk i mekim long ol Juda na Babilon i kamap tru na dispela i makim stret olsem em i profet tru bilong Jehova​—⁠em i autim tok long nem bilong Jehova na givim biknem long Em.

5. Stori liklik long ol tok bilong Habakuk.

⁵ Buk Habakuk i gat 3-pela sapta. Sapta 1 na 2 i stori long ol tok Habakuk i mekim long Jehova na Jehova i mekim long Habakuk. Ol i stori long kantri Babilon i stap strong moa, tasol ol bikpela hevi bai painim ol lain bilong Babilon, long wanem, ol i save kisim planti samting i no bilong ol yet, na ol i paulim samting bilong ol narapela lain na givim long lain bilong ol yet, na ol i kilim i dai planti man bilong mekim taun bilong ol yet i sanap strong, na ol i lotuim ol god giaman. Sapta 3 i stori long bikpela strong bilong Jehova long mekim pait, na pasin bilong raitim dispela tok i gat strong tru bilong kirapim tingting bilong ol man i ritim. Dispela sapta i olsem wanpela beten ol man i singim long pasin bilong ol singsing sori. Sampela man i tok, “em i wanpela nambawan gutpela song bilong olgeta song Hibru.”a

HELPIM YUMI OLSEM WANEM?

12. Pol i kolim tok bilong Habakuk 2:4 bilong helpim ol man olsem wanem?

¹² Aposel Pol i luksave olsem tok profet bilong Habakuk i gutpela bilong skulim man, olsem na 3-pela taim em i kamapim tok bilong sapta 2, ves 4. Taim Pol i tokaut olsem gutnius em i strong bilong God bilong kisim bek olgeta manmeri i bilip, em i tokim ol Kristen long Rom: “Long gutnius God i soim yumi pasin em i mekim bilong kolim yumi stretpela manmeri. Yumi mas bilip na em i ken kolim yumi stretpela manmeri, long wanem, long rot bilong bilip tasol yumi inap kamap stretpela manmeri long ai bilong God. Em i olsem tok i stap long buk bilong God, ‘Ol manmeri i bilip, bai God i kolim ol stretpela manmeri na ol bai i stap laip.’ ” Taim Pol i raitim pas long ol Galesia em i tokaut strong olsem ol man i bilip ol bai kisim blesing. Em i tok: “Buk bilong God i gat tok olsem, ‘Ol man i bilip, bai God i kolim ol stretpela man na ol bai i stap laip.’ Na dispela tok i soim yumi klia olsem, i no gat rot bilong wanpela man i bihainim lo na God i kolim em stretpela man.” Na long pas Pol i raitim long ol Hibru em i tok ol Kristen i mas i gat strongpela bilip bilong kisim laip, na em i kamapim gen tok Jehova i givim long Habakuk, olsem “stretpela man bilong mi em i bilip, olsem na em bai i stap laip,” na Pol i kolim sampela tok moa bilong em olsem i stap long Baibel Grik Septuagint: “Na sapos em i surik, orait bai mi no amamas long em.” Na bihain Pol yet i tok: “Tasol yumi no man bilong surik na lus. Nogat tru. Yumi ol manmeri bilong bilip na kisim laip.”​—⁠Ro. 1:17; Ga. 3:11; Hi. 10:​38, 39.

13. Tok profet bilong Habakuk long Juda na Babilon i kamap tru na dispela i kamapim klia wanem samting long kot bilong God?

¹³ Ol tok bilong profet Habakuk i helpim tru ol Kristen long nau, long wanem, ol i mas i gat strong. Ol dispela tok i skulim ol long bilip na wetim God, na em i helpim ol long givim tok lukaut long ol man long kot bilong God. Ol tok lukaut bilong Habakuk i skulim yumi olsem: Yumi no ken ting dispela kot bilong God i no inap kamap kwik; “em bai i kamap.” (Hab. 2:⁠3) Tok profet bilong Habakuk long Babilon bai bagarapim Juda, em i kamap tru olgeta, na ol birua i daunim Babilon olsem em i tok pinis. Ol Midia na Persia i kisim dispela taun long yia 539 B.C.E. Dispela em i strongpela tok lukaut bilong givim tingting long yumi, olsem yumi mas bilip tru long ol tok bilong God! Olsem na aposel Pol i kamapim tok bilong Habakuk taim em i givim tok lukaut long ol Juda long taim bilong em, nogut ol i no bilip. Em i tok: “Olsem na yupela lukaut. Nogut dispela samting bipo ol profet i bin tok long en, em i kam long yupela. Ol i bin tok olsem, ‘Yupela man bilong tok bilas, yupela lukluk, na bai yupela i kirap nogut na bai yupela i bagarap. Mi bai mekim narakain samting i kamap namel long yupela. Na sapos wanpela man i tokim yupela long dispela samting mi laik mekim, bai yupela i no inap bilipim.’ ” (Ap. 13:​40, 41; Hab. 1:⁠5) Ol Juda i no bilip, ol i no putim yau long tok bilong Pol, olsem ol i no bin bilipim toksave bilong Jisas long Jerusalem bai bagarap; olsem na ol i kisim nogut taim ol ami bilong Rom i bagarapim Jerusalem long yia 70 C.E.​—⁠Lu. 19:​41-44.

14. (a) Olsem wanem tok profet bilong Habakuk i kirapim ol Kristen bilong nau long holim strong bilip? (b) Ol man i laikim tumas stretpela pasin, bilong wanem ol i ken amamas, olsem tok profet i tok?

¹⁴ Olsem tasol long nau, ol tok profet bilong Habakuk i kirapim ol Kristen long holim strong bilip, maski pasin bilong pait na bagarapim man i pulap long graun. Ol dispela tok i helpim ol long skulim ol man na bekim tok long ol man bilong olgeta hap em ol i askim olsem: God bai mekim save long ol man nogut o nogat? Tingim gen tok profet bilong Habakuk: “I no longtaim na dispela samting . . . em bai i kamap. Yu ting bai em i no inap kamap kwik, tasol yu mas wet liklik na em bai i kamap.” (Hab. 2:⁠3) Maski wanem kain hevi i kamap long graun, liklik hap lain bilong Kingdom ol i stap yet long graun ol i save tingim tok bilong Habakuk long Jehova i bin mekim save long ol man nogut bilong bipo na em i tok: “Yu mekim olsem bilong kisim bek ol manmeri bilong yu wantaim dispela king yu bin makim.” (3:13) Tru tumas, long bipo tru i kam inap long nau Jehova i stap God bilong ol, em i “God bilong mekim gutpela na stretpela pasin olgeta.” Em i olsem “strongpela ston” bilong givim strafe long ol man nogut na givim laip long ol man em i laikim tru ol. Olgeta man i laikim tumas stretpela pasin ol i ken amamas long Kingdom na wok king bilong Jehova, na ol i ken tok: “Bai mi amamas na belgut. Long wanem, Bikpela em i God na em i save kisim bek mi. God, Bikpela bilong mi, em i save givim strong long mi.”​—⁠1:12; 3:​18, 19.