Askim

Yia bilong amamas em Wok Pris sapta 25 i stori long en, em piksa bilong wanem samting?

Lo Bilong Moses i tok: “Long namba 7 yia yupela i mas larim graun i malolo.” Na Lo i tok moa long ol samting ol Israel i mas mekim long dispela yia: “Yupela i no ken planim kaikai na yupela i no ken katim han bilong ol diwai wain bilong yupela. Na sapos wit samting i kamap nating, orait yupela i no ken kisim pikinini bilong en na bungim long haus kaikai. Na sapos ol rop bilong pikinini wain i kamap long ol diwai wain, orait yupela i no ken kisim bilong wokim wain. Larim olgeta i stap, long wanem, [long] dispela yia graun i mas malolo gut.” (Wok Pris 25:​4, 5) Olsem na long olgeta namba 7 yia, graun i mas malolo inap long yia olgeta. Na long olgeta namba 50 yia, bihain long namba 7 taim bilong malolo, ol i mas makim olsem yia bilong amamas. Wanem samting i mas kamap long dispela yia?

Long maus bilong Moses Jehova i tokim ol Israel: “Bai yia namba 50 i stat long dispela de yupela i winim biugel na em i yia bilong mi yet. Na yupela i mas tokaut long olgeta manmeri bai hevi bilong ol i pinis na ol i ken i stap gut. Long dispela yia, ol man i bin baim graun bilong ol arapela man, ol i mas bekim i go bek long papa tru bilong graun o long ol wanlain bilong papa bilong graun. Na ol manmeri i stap wokboi na wokmeri nating, bai ol i ken lusim dispela wok na go bek long famili bilong ol yet. Namba 50 yia em i yia bilong olgeta manmeri i ken sindaun gut na amamas. Na long dispela yia yupela i no ken planim ol kaikai long graun bilong yupela, na yupela i no ken katim na bungim ol wit samting i kamap nating. Na yupela i no ken kisim ol pikinini wain.” (Wok Pris 25:​10, 11) Yia bilong amamas em namba 2 yia bilong graun i mas malolo, long wanem, yia paslain long en​—⁠namba 49 yia⁠—​em tu i yia bilong malolo. Tasol yia bilong amamas em i taim bilong ol Israel i kamap fri. Ol Juda em ol man i bin baim ol olsem wokboi nating, ol i mas kamap fri. Na sapos man i bin kamap rabis na em i mas salim graun bilong em, ol i mas bekim i go bek long famili bilong em. Long Israel bilong bipo, yia bilong amamas i mas i stap olsem yia bilong bekim bek ol samting na larim ol wokboi nating i kamap fri. Dispela yia i makim wanem samting long ol Kristen?

Taim namba wan man, Adam, i bikhet, dispela i mekim na olgeta man i kamap wokboi nating bilong sin. Rot God i wokim bilong helpim ol man long kamap fri long kalabus bilong sin, em ofa bilong Jisas Krais long baim bek ol man.a (Matyu 20:28; Jon 3:16; 1 Jon 2:​1, 2) Wanem taim ol Kristen i kamap fri long lo bilong sin? Aposel Pol i tokim ol Kristen God i bin makim: “Yupela wan wan i bilong Krais Jisas nau, na lo bilong Holi Spirit i save givim laip long yumi, em i mekim yupela i kamap fri, na dispela lo bilong sin na dai em i no bosim yupela moa.” (Rom 8:⁠2) Ol Kristen i bilong kisim laip long heven ol i kamap fri long taim God i makim ol long holi spirit. Tru, ol i bilong graun na ol i gat sin, tasol God i kolim ol stretpela man na em i kisim ol na ol i stap pikinini bilong em long spirit. (Rom 3:24; 8:​16, 17) Long dispela lain, yia bilong amamas bilong ol Kristen i bin kirap long Pentikos 33 C.E.

Orait olsem wanem long “ol arapela sipsip” ol i bilong kisim laip oltaim long graun? (Jon 10:16) Long ol arapela sipsip, dispela Wan Tausen Yia Bilong Krais i Stap King em bai taim bilong kamap gutpela na kamap fri. Long dispela Wan Tausen Yia, em olsem yia bilong amamas, Jisas bai mekim wok long ofa bilong em bilong baim bek ol man bambai em i ken helpim ol manmeri i bilip na rausim ol samting nogut em sin i bin mekim long ol. (KTH 21:​3, 4) Long pinis bilong Wan Tausen Yia, skin bilong ol bai kamap gutpela olgeta, i no gat sin na indai moa long en. (Rom 8:21) Long dispela taim, yia bilong amamas bilong ol Kristen bai i pinis.

[Futnot]

[Piksa long pes 26]

Long Taim Bilong Wan Tausen Yia​—⁠olsem yia bilong amamas​—⁠“ol arapela sipsip” bai kamap gutpela na kamap fri

‘Man i Gat Gutpela Tingting i Save Tingting Gut Pastaim na Mekim Samting’

OL TOK bilong Baibel bilong stiaim wokabaut bilong yumi, em ‘yumi mas laikim moa yet, winim gol.’ (Song 19:​7-10) Bilong wanem? Long wanem, “tok bilong man [God] i gat gutpela tingting na save, em i olsem wara bilong givim laip. Dispela tok inap long helpim man long abrusim ol samting i laik bagarapim em.” (Sindaun 13:14) Taim yumi bihainim tok bilong Baibel, i stap bilong yumi i kamap gutpela moa, na tu, em i helpim yumi long abrusim ol samting i laik bagarapim yumi. Olsem na yumi mas wok long painim save bilong Baibel na bihainim ol tok yumi lainim, a?

Long Sindaun 13:​15-25, King Solomon bilong Israel i givim ol tok long yumi i helpim yumi long bihainim savepasin long mekim ol samting bambai yumi ken i stap gutpela na stap longtaim.a Long rot bilong ol savetok, em i soim yumi long olsem wanem Tok Bilong God i ken helpim yumi na bai ol man i laikim yumi, na yumi stap gut long wok bilong God, na holim stretpela tingting long ol tok yumi kisim bilong stretim yumi, na bihainim gutpela tingting long makim ol poroman. Na em i toktok tu long gutpela tingting bilong man long lusim sampela samting long ol pikinini bilong em taim em i dai, na stretim ol long pasin laikim.

Man i Gat Gutpela Tingting, Ol Man Bai i Laikim Em

Solomon i tok: “Sapos man i gat gutpela tingting, ol man bai i laikim em. Tasol man bilong giaman na brukim promis, em i wokabaut long rot nogut.” (Sindaun 13:15) Wanpela buk i tok, long tok Hibru, dispela tok “gutpela tingting,” i makim pasin bilong “bihainim stretpela tingting, skelim gut ol