Ol Bot i Kisim Tok Bilong Kingdom i Go Long Planti Wara Bilong Guyana

GUYANA.a Insait bilong dispela tok em “ples bilong planti wara.” Dispela tok i stret long dispela kantri i stap long hap bilong Saut Amerika. Planti wara i brukim dispela kantri; ol i kirap long Hailans Giana na ran i go long hap bilong ol bikbus na i go inap long Solwara Atlantik. Ol dispela wara i helpim planti liklik ples na gaden i stap arere arere long ol dispela wara.

Ol Witnes Bilong Jehova long Guyana ol i save, taim Jisas i tok profet, “bai ol i autim dispela gutnius bilong kingdom bilong God long olgeta hap bilong graun,” ol i mas autim dispela tok long ol man i stap long hap bilong ol wara tu. (Matyu 24⁠:14) Olsem na inap planti yia pinis, ol Witnes, em planti ol i painia, ol i bin mekim wok long ol liklik na bikpela bot bambai ol inap i go long planti wara long Guyana na autim gutpela tok bilong Kingdom.

Bilong helpim dispela wok, Sosaiti Was Taua long Guyana i bin mekim wok long 5-pela bot ol i kolim Kingdom Proclaimers (Bot Bilong Autim Tok Bilong Kingdom). Longpela bilong ol em 7 mita. Wanpela famili Witnes i bin wokim ol dispela bot na ol i save lukautim. Inap planti yia pinis ol i mekim wok long bot namba wan na bot namba 2, tasol nau ol i no mekim wok moa long ol​—⁠ol i mekim wok long bot namba 3 na 4 na 5 tasol long ol wara Pomerun na Mehaika na Demerara.

Long Wara Demerara

Long Inglan na long sampela hap long Yurop, taim ol man i harim dispela tok “demerara,” ating ol i tingim wanpela kain braunpela suga i kam long ol plantesin i stap arere long Wara Demerara. I gat wanpela rot i kirap long nambis na i go long arere bilong dispela wara, tasol rot i pinis long hap ol plantesin i pinis long en. Olsem na sapos ol Witnes i laik autim tok bilong Kingdom long ol man i stap long hap i no gat rot, em ol Hindu na Muslim na ol man i tok ol i Kristen ol i sindaun long en, orait, ol i mas mekim wok long ol dispela bot.

Taim ol i autim tok long Wara Demerara ol i save stap wanpela de o sampela wik​—⁠ol i go long olgeta bris, kirap long moningtaim tru i go inap long taim san i go daun. Sapos ol painia i laik stap long nait, ol i mas kukim kaikai long bot, na tu, ol i mas slip long bot. Taim san i go daun ol i pasim bot long diwai mangro, o long wanpela bris, sapos i gat. Ol bot i no gat rup, olsem na ol i sanapim tupela stik arere arere bilong bot. Ol i pasim wanpela rop i go namel long tupela stik na ol i tromoi bikpela hap sel antap long en. Em nau, bot i gat rup. Ol plang i kamap olsem bet, na blanket na sitbet i kamap olsem matres. Tasol maski ol i no gat gutpela ples slip, ol i save slip gut, long wanem, ol i bin mekim bikpela wok long san na skin i les.

Ol man i askim ol painia olsem: “Yupela save waswas long wara i doti?”

Ol painia i bekim tok olsem: “Nogat. Sapos i gat rot, mipela laik abrusim dispela samting! Taim mipela lukim gutpela wara i stap, mipela i save pulimapim dispela wara long ol botol samting​—⁠em wara bilong dring, na kukim kaikai, na waswas long en.”

Ol i wok strong, olsem na planti gutpela samting i kamap. Wanpela taim wanpela man i kam long bris na lukluk long mipela. Em i lukim nem bilong bot na em i kolim long maus, “Kingdom Proclaimer”! Na em i tok: “Yupela ol Witnes Bilong Jehova, a? Ol Witnes tasol i save mekim kain wok olsem long dispela tok ‘kingdom.’ Yupela i gat Haus Kingdom na nau yupela i gat wanpela bot em Kingdom Proclaimer.”

Lusim Gileat i Go Long Wara Pomerun

Frederik Makalman (Frederick McAlman) i tok, wok autim tok long Wara Pomerun i narapela kain. Em i winim Skul Gileat long 1970, na wanpela yia bihain em i go long liklik ples Sariti, lusim nambis inap 34 kilomita i go insait long Wara Pomerun. Wanpela grup i gat 5-pela pablisa long en i stap long dispela hap.

Brata Makalman i tok: “Inap 5-pela yia mipela raun long bot i no gat ensin long en na i hatwok liklik long pul, tasol bihain mipela kisim wanpela olpela ensin na putim long bot. Mipela larim tait i pulim bot i go na mipela i autim tok long ol man inap long mipela i kamap long Hakni i stap longwe long maus bilong wara inap 11 kilomita. Long Hakni mipela i slip gut long haus bilong Sista DeKambra, em meri bilong helpim ol meri taim ol i karim pikinini. Long moningtaim tru mipela i go moa long wara na bihain mipela i brukim wara i go long hapsait. Orait nau mipela i go bek long Sariti i stap longwe inap 34 kilomita.”

Dispela ensin i stap long bot inap 10-pela yia. Long 1986, mipela i kisim nupela ensin i strongpela moa. Brata Makalman i autim tok long hap bilong Wara Pomerun inap 21 yia. Em i amamas long wok i kamap gutpela tru long ol dispela hap. Long Sariti i gat wanpela nupela Haus Kingdom na 43 pablisa. Inap 60 samting manmeri i save kam long ol miting, na inap 190 i bin kam long Memorial long 1992 bilong tingim i dai bilong Jisas.

Ol i Wok Long Painim “Man Bilong Wastaua”

Long Sariti, Mande em de bilong maket. Olsem na em i gutpela de bilong autim tok, na ol Witnes i go long dispela hap na tilim nius Wastaua na Kirap! Long yia 1972 samting, wanpela meri, nem bilong em Monika Fitsalen, em i lusim liklik ples Warimuri long Wara Moruka na em i kam long maket. Em i kisim tupela nius long Brata Makalman. Taim em i kamap long haus bilong em, em i putim ol nius daunbilo long wanpela bokis bilong putim klos bilong em.

Monika i tingim bek dispela taim na em i tok: “Ol nius i stap long dispela bokis inap tupela yia na mi no kaunim. Tasol mi kisim sik na mi stap long bet inap sampela hap taim. Taim mi orait liklik, mi les, olsem na mi kirap long kaunim olgeta buk samting i stap long haus. Bihain mi tingim tupela nius long bokis na mi kirap long kaunim.” Wantu em i pilim olsem ol tok bilong en i tru.

Taim Monika i orait pinis, em i askim man bilong em, Yujin, long painim wok skin long Pomerun na bai em inap painim dispela man i bin givim tupela nius long em. Yujin i orait long mekim dispela samting. Em inap kisim wok inap wanpela wik tasol long wanpela gaden long Pomerun, kirap long Mande i go inap long belo long Sarere.

Inap long dispela Sarere, Monika i no painim dispela man i bin givim nius long em. Tasol long belo samting em i askim man bilong em, inap ol i pul i go long Sariti bilong painim “man bilong Wastaua,” o tait i strong tumas? Em i tok olsem pinis, na wantu ol i lukim wanpela sista i wokabaut i kam bilong tilim ol nupela nius long ol.

Monika i askim em: “Yu wanpela bilong lain Wastaua?” Bihain em i kamapim planti askim, olsem na dispela sista i mas go bek long bot bilong askim ol brata i kam helpim em. Husat i kam bek wantaim em? Em Brata Makalman!

Ol i stretim rot bilong stadi wantaim dispela meri long pas. Bihain liklik, Monika i salim pas i go long Lotu Angliken bilong ol i ken rausim nem bilong em long lista. Pris i salim pas i kam bek long em i tok olsem: “No ken harim tok bilong ol Witnes. Ol i no gat bikpela save long Baibel. Bihain bai mi kam toktok wantaim yu long dispela samting.” Tasol inap long dispela taim nau, pris i no bin kam. Olsem na Monika i kisim baptais long 1975. Man bilong em Yujin, em i skelim gut ol tok bilong Baibel, na wanpela yia bihain, em tu i kisim baptais. (Aposel 17⁠:​10, 11) Maski ol i mas lusim 12-pela aua bilong pul long kanu na kamap long kongrigesen long Sariti, ol i save autim tok bilong Kingdom i kam inap long dispela taim nau.

Ol Misineri i Go Insait Tru

Inap sampela yia pinis Sosaiti Was Taua i salim ol misineri i go insait tru long ol dispela hap. Long laik bilong ol yet sampela brata sista i go long ol bot i gat ensin na kisim gutpela tok bilong Kingdom i go long ol manmeri i stap long ol gaden na ples bilong wok bisnis long katim diwai, em ol i stap long insait tru bilong bus, long arere bilong ol wara. Ol i go long ol longwe ples na mekim gutpela wok bilong tokim ol man long nem bilong Jehova, em namba wan taim ol man i bin harim dispela tok. (Rom 10⁠:​13-15) Ol brata i mas karim planti hevi​—⁠sampela taim ol i mas stap long bot inap 3-pela de bambai ol inap kamap long ol dispela ples. Tasol ol i amamas long mekim dispela wok, long wanem, ol gutpela samting tru i kamap long dispela wok.

Namba wan taim ol misineri i go long hap bilong Gwabana long Wara Waini, long Julai 1991, ol i toktok wantaim wanpela yangpela man em i bilong lotu Pentikostal. Em i save sindaun klostu long wanpela ples ol i save wok bisnis long katim diwai. Taim ol i go bek gen long mun Oktoba, ol i kirapim Baibel-stadi wantaim dispela man. Em namba wan taim em i lukim nem bilong God, em Jehova, long Baibel bilong em, na em i kisim save olsem Jisas em i no Man I Gat Olgeta Strong, na tok bilong God Triwan i no stap long Baibel. (Song 83⁠:18; 1 Korin 11⁠:⁠3) Bel bilong em i kirap tru long ol samting em i lainim, olsem na taim ol brata i lusim em i go, em i bungim ol wanlotu bilong em na kamapim ol tok i tru bilong Jehova na Krais Jisas long ol long Baibel bilong ol yet. Planti ol i sakim dispela tok i tru, olsem na em i tingting pinis long lusim lotu Pentikostal na lusim “Bikpela Babilon.” (KTH 18⁠:​2, 4) Taim ol brata i kam bek lukim em long Februeri 1992, em i tokim ol long ol samting em i bin mekim na em i tok moa olsem: “Mi laik wok wantaim yupela. Mi laik kamap wanpela Witnes Bilong Jehova. Mi laik lainim ol man long tok i tru!”

Taim ol gutpela samting olsem i painim ol brata, dispela i save strongim ol long mekim yet dispela bikpela wok long autim tok long ol dispela hap. Ol brata i go long ol raun olsem, i mas lusim gutpela sindaun bilong ol, na sik olsem malaria inap painim ol, na i no gat ol samting long bus bilong helpim sindaun bilong ol. Tasol famili bilong ol brata em ol i no bin go long ol dispela raun, ol tu i mas lusim sampela samting, olsem: Ol i no inap lukim ol dispela brata inap sampela wik samting. Na ol kongrigesen i no gat elda na ol yangpela man, na sampela taim wanpela brata tasol i stap bilong lukautim. Tasol taim ol i kam bek, ol i kamapim stori bilong ol long kongrigesen na dispela i mekim ol narapela i amamas na i strongim ol! Olsem na ol samting ol i lusim i olsem liklik samting tasol taim yumi skelim wantaim dispela bikpela amamas ol i kisim.

Ol man i autim tok bilong Kingdom long ol dispela planti wara long Guyana, ol wantaim ol wanwok bilong ol long olgeta hap bilong graun, ol i no pret​—⁠ol i givim bel long autim tok na litimapim nem bilong God, i ‘olsem ofa ol i givim long em.’​—⁠Hibru 13:⁠15.

[Ol Futnot]

[Ol Mep long pes 24]

HONDURAS

NIKARAGUA

KOSTA RIKA

PANAMA

VENESWELA

KOLOMBIA

GUYANA

SURINAM

FRENS GIANA

BRASIL

BOLIVIA

SOLWARA ATLANTIK

[Ol Piksa long pes 26, 27]

Han kais: Autim tok long de bilong maket

Antap: Ol i autim tok bilong Kingdom long Wara Demerara

Antap long han sut: Ol misineri i pul i go bek long kem