17. Klostu nau, wanem hap taim bai pinis? Bai yumi tingim wanem ol tok?

¹⁷ Yumi save olsem ol birua bai wok yet long mekim nogut long yumi. Tasol yumi wok yet long autim gutnius​—long ol birua tu. (Mt. 24:​14, 21) Long nau i gat hap taim i stap yet long ol birua i tanim bel na kisim laip, tasol klostu nau dispela haptaim bai pinis. Wok bilong mekim nem bilong Jehova i stap holi i winim wok bilong kisim bek ol man. (Ritim Esekiel 38:23.) Taim ol lain long graun i bung wantaim bilong bagarapim ol manmeri bilong God, olsem Baibel i bin tok profet long en, bai yumi tingim ol tok bilong dispela beten bilong man bilong raitim song: “Mi laik bai yu winim ol na bai ol i pret nogut oltaim. Mekim ol i sem na kilim ol i dai.”​​—Sng. 83:17.

18, 19. (a) Wanem samting i wetim ol man i birua long wok king bilong Jehova? (b) Klostu nau Jehova bai kamapim ples klia olsem i stret em i stap King, na dispela i mekim wanem long yu?

¹⁸ Ol man i birua long wok king bilong Jehova ol bai pinis. Baibel i tok ol man “i no bihainim gutnius”​​—na long dispela as ol i dai long Armagedon​​—ol bai kisim “bagarap i stap oltaim oltaim.” (2 Te. 1:​7-9) Ol bai bagarap, tasol ol man i lotu long Jehova, ol bai abrusim bagarap na i stap laip, na dispela samting bai kamapim ples klia olsem Jehova wanpela tasol em i God tru. Long nupela taim, ol manmeri i no inap lusim tingting long dispela bikpela pait i bin daunim tru ol birua. “God bai i kirapim bek . . . ol stretpela man na ol man nogut wantaim” na ol bai kisim save long dispela bikpela wok bilong Jehova. (Ap. 24:15) Long nupela taim, ol dispela lain bai lukim olsem em savepasin long i stap aninit long wok king bilong Jehova. Na ol man namel long ol i gat pasin daun, kwiktaim ol bai save olsem Jehova wanpela tasol em i God tru.

“Tru Tumas, Dispela Em i Bikpela Nem Holi Bilong God”

Nicholas Bilong Cusa i kolim dispela tok long wanpela tok bilong lotu em i mekim long yia 1430.a Em i gat bikpela laik long kisim save long kain kain samting​—em i stadi long tok Grik, tok Hibru, filosofi, lotu, matematiks, na astronomi. Taim em i gat 22 krismas, em i kisim digri dokta long ol lo bilong misin Katolik. Long 1448 em i kamap kadinal.

Inap olsem 550 yia i go pinis, Nicholas Bilong Cusa i wokim wanpela haus bilong lukautim ol lapun, long Kues, nau ol i kolim Bernkastel-Kues, em wanpela taun i stap 130 kilomita long hap saut bilong Bonn, long Jemani. Bihain ol i bungim ol manuskrip bilong Cusa, winim 310, na putim insait long dispela haus. Wanpela bilong ol dispela manuskrip, em Kodeks Cusanus 220, na long dispela manuskrip yumi inap lukim dispela tok bilong lotu em Cusa i bin mekim long 1430. Long dispela tok, In principio erat verbum (Long Bipo Tru, Tok i Stap), Nicholas Bilong Cusa i raitim nem Jehova long tok Latin olsem Iehoua.b Pes 56 i stori long nem bilong God olsem: “Em nem God i givim long em yet. Ol i raitim long 4-pela leta, ol i kolim Tetragramaton. . . . Tru tumas, dispela em i bikpela nem holi bilong God.” Dispela tok bilong Nicholas Bilong Cusa i wanbel wantaim Ol Skripsa Hibru bilong pastaim we nem bilong God i stap long en.​​—Kis. 6:3.

Dispela kodeks bilong 1430 samting em i olpela tru, winim planti narapela manuskrip i stap yet we ol i tanim Tetragramaton olsem “Iehoua.” Dispela rait “Iehoua” i kamapim klia tru olsem inap planti handet yia ol man i bin raitim nem bilong God kain olsem “Jehova.”