Kirap long Septemba, Laip na Wok Autim Tok Miting Wok Buk bai kamapim senis long “Sampela Rot Bilong Autim Tok,” na kolim dispela seksen olsem “Skulim Man Long Tok i Tru.” Bikpela tingting bilong yumi em long yusim wanpela askim na wanpela skripsa bilong kamapim klia wanpela tok i tru bilong Baibel.

Sapos yumi lukim olsem man i amamas, orait yumi ken givim em wanpela nius o soim em wanpela vidio bilong jw.org na stretim rot long mekim gobek. Yumi mas mekim gobek bihain long 2-pela o 3-pela de bambai yumi inap joinim gut toktok i go bek long ol samting yumi toktok long en long namba 1 taim yumi bungim man. Ol tok bilong dispela nupela seksen na ol tok em ol sumatin bai mekim long skul, olgeta bai kam long buk Tru Tru Baibel i Tok Wanem? Long riviu blok bilong ol sapta long buk Baibel i Tok, yumi inap lukim sampela moa skripsa bilong redim yumi bambai yumi inap yusim Baibel tasol long mekim gobek o stadi wantaim man.

I gat wanpela rot tasol bilong kisim laip. (Mt 7:13, 14) Yumi save toktok wantaim ol manmeri bilong kain kain lotu na sindaun, olsem na yumi mas kamapim tok bilong Baibel we inap kirapim tru tingting bilong man. (1Ti 2:4) Taim yumi lain long stori gut long ol narapela narapela topik bilong Baibel, na yumi kamap gutpela moa long “autim na kamapim mining bilong tok i tru,” yumi bai amamas moa yet na skulim gut ol narapela long tok i tru.—2Ti 2:15.

Ol manmeri long olgeta hap i nidim tok bilong helpim ol long i stap bel isi. (Sa 4:1) Long mun Septemba, yumi bai mekim spesel kempein long tilim Wastaua i stori long pasin bilong i stap bel isi. Tilim dispela magasin long olgeta manmeri. Yumi laik toktok wantaim ol manmeri bambai yumi inap mekim ol tok bilong givim bel isi long ol, olsem na yumi no ken lusim ol magasin long ol haus i no gat man.

TOK BILONG MEKIM

“Yumi olgeta i nidim tok bilong mekim yumi i stap bel isi. Tasol yumi inap painim ol dispela tok long wanem hap? [Ritim 2 Korin 1:3, 4.] Dispela Wastaua i stori long olsem wanem God i save mekim isi bel bilong yumi.”

Sapos man i amamas na kisim magasin, orait . . .

SOIM VIDIO WAI NA I GUTPELA LONG STADI LONG BAIBEL?

Invaitim em long mekim Baibel stadi.

STRETIM ROT BILONG MEKIM GOBEK

Kolim wanpela askim em yu bai go bek na bekim, kain olsem, “Bilong wanem God i larim pen na hevi i stap?”