bilong wanem pasin nogut i pulap tru long dispela graun? Pastaim yumi mas stretim wanpela tingting kranki planti man i gat. Planti man i ting God i Gat Olgeta Strong em i bos bilong dispela graun, na em i bosim olgeta samting. Presiden bilong wanpela semineri i tok, “God i save bosim olgeta liklik liklik samting long graun na long ples antap.” Olsem wanem? Baibel i save tok olsem?

Nogat. Planti man i kirap nogut long tok Baibel i mekim long husat i bosim dispela graun. Olsem, 1 Jon 5:19 i tok: “Dispela graun olgeta em i stap aninit long strong bilong Satan.” Jisas Krais i kolim em “hetman i save bosim dispela graun.” (Jon 14:30) Em nau, dispela i kamapim klia as na i gat planti pasin nogut i stap. Satan i mekim nogut tru long ol man na em i man bilong giaman​—⁠em ol dispela pasin i as bilong planti pen na hevi ol man i karim. Tasol bilong wanem God i larim Satan i bosim graun?

Bikpela Tok i Bin Kamap Long Gaden Iden

Gutpela papa o mama bai pilim olsem wanem sapos long ai bilong ol man wanpela man i sutim tok long em olsem em i save giamanim ol pikinini bilong em, mekim wok nogut long wok bos bilong em, na em i no givim ol gutpela samting long ol? Sapos em i paitim dispela man i mekim ol dispela tok giaman, yu ting dispela bai daunim tok bilong em? Nogat, a? Sapos em i mekim olsem ating ol man bai ting tok dispela man i sutim long em i tru.

Dispela tok piksa i helpim yumi long save long pasin bilong God Jehova long stretim dispela tok i bin kamap long gaden Iden. Long dispela hap God i bin tokaut long Adam na Iv long wanpela gutpela wok em i laik bai ol pikinini bilong Em hia long graun i mekim. Ol i mas kamap planti, go sindaun long olgeta hap na bosim olgeta samting bilong graun na mekim dispela graun olgeta i kamap wanpela paradais. (Stat 1:28) Na tu, i gat planti handet milion ensel i laik lukluk long ol samting bai kamap long dispela gutpela wok.​—⁠Jop 38:​4, 7; KTH 5:⁠11.

Jehova em i God bilong givim planti samting long man na em i bin givim Adam na Iv wanpela naispela gaden i gat ol gutpela prut i stap long en. I gat wanpela diwai tasol ol i no ken kisim prut bilong en​—⁠em “diwai bilong givim gutpela save long wanem samting i gutpela na wanem samting i nogut.” Taim Adam na Iv i no kisim prut bilong dispela diwai dispela i soim olsem ol i bilip tru long Papa bilong ol, na ol i luksave olsem i stret em yet i makim wanem samting i gutpela na wanem samting i nogut long ol pikinini bilong em.​—⁠Stat 2:​16, 17.

Tasol, sori tru, wanpela pikinini spirit bilong God i gat laik long ol man i mas lotuim em, olsem na em i tokim Iv sapos em i kaikai dispela prut tambu em i no inap i dai. (Stat 2:17; 3:​1-5) Long dispela rot, dispela ensel nogut, Satan, i tok God em i man bilong giaman! Na Satan i sutim tok long God olsem em i pasim Adam na Iv long kisim gutpela save em ol i mas kisim. Satan i laik tok olsem ol man bilong graun yet i gat rait long makim wanem samting i gutpela na wanem samting i nogut. Satan i sutim tok long God olsem em i no fit long mekim wok Bos na wok Papa, na Satan i laik tok em yet inap mekim gutpela wok moa, winim God.

Long rot bilong ol dispela tok giaman, dispela ensel i kisim nem Satan na Devil. Mining bilong dispela tupela nem i olsem “Birua” na “Man bilong bagarapim gutnem bilong narapela.” Adam na Iv i mekim wanem? Ol i go long sait bilong Satan, na ol i givim baksait long God.​—⁠Stat 3:⁠6.

Jehova inap bagarapim ol dispela bikhetman wantu tasol. Tasol, olsem tok piksa yumi kamapim, man i no inap stretim ol kain bikpela tok long rot bilong bagarapim narapela. Tingim, taim Satan i salensim God, i gat planti milion ensel i stap na harim. Bihain, bikpela namba bilong ol ensel, em yumi no inap save hamas, i bin joinim Satan long bikhet long God. Long dispela rot ol i kamap spirit nogut.​—⁠Mak 1:34; 2 Pita 2:4; Jut 6.

Bilong Wanem God i No Bin Stretim?

Satan i pulim Adam na Iv long makim olsem ol i laik kisim indipendens long Man Bilong Wokim ol. Taim em i mekim olsem, i olsem em i kamapim wanpela famili i no stap fri tru, nogat, em wanpela famili i stap aninit long wok bos bilong em. Maski ol i save long dispela samting o nogat, Satan, “papa” bilong ol, i kirapim dispela famili long makim ol samting ol yet i laik mekim na ol lo ol bai bihainim. (Jon 8:44) Tasol yu ting sapos ol i bihainim kain rot olsem ol bai stap fri tru na amamas oltaim? Jehova i save tru olsem dispela samting i no inap kamap. Tasol em i larim ol dispela

As na Jisas i Bikpela Samting Tru Long Yumi

INAP 2,000 yia nau, planti man i tingim taim mama i bin karim Jisas. Dokta Luk husat i bin stap long taim bilong ol aposel, em i stori long yangpela meri Maria, em wanpela ensel i bin tokim em olsem: “Harim. Yu bai kisim bel na karim wanpela pikinini man. Na yu mas kolim nem bilong en Jisas.” Ensel i stori olsem wanem long Jisas? Em i tok: “Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king,” na “wok king bilong en bai i no inap pinis.”​—⁠Luk 1:​31-​33.

Dispela em i samting ol manmeri i mas kisim​—⁠wanpela stretpela man i bosim ol samting bilong graun long pasin laikim! Tru tumas, paslain tru long taim mama i karim Jisas, Baibel i tok profet olsem: “Wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi, na em bai i gat ol dispela nem, . . . ‘Papa bilong i stap oltaim oltaim’ na ‘King bilong kamapim gutpela sindaun na bel isi.’ . . . Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.”​—⁠Aisaia 9:​6, 7.

Stretpela gavman na bel isi​—⁠em i wanpela gutpela samting tru bilong wetim! Dispela Aisaia 9 ves 7 i tok, wok bilong bosim dispela gavman em wok bilong “King bilong kamapim gutpela sindaun na bel isi,” na i soim olsem King bilong olgeta samting, em God i Gat Olgeta Strong, em i givim dispela wok king long Pikinini bilong Em. Olsem na planti taim Jisas i kolim dispela gavman we em bai stap King bilong en olsem “kingdom bilong God.”​—⁠Luk 9:​27, 60, 62.

Taim Jisas i kirapim wok bilong em long autim tok, em i tok: “Mi mas autim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.” (Luk 4:43) Jisas i lainim ol disaipel bilong em long beten long Kingdom Bilong God i mas i kam. (Matyu 6:​9, 10) Nius Christianity and Crisis i tok, “Kingdom em i nambawan bikpela tok [Jisas] i lainim ol man long en. I no gat narapela samting em i bin tingting tru long en o i bikpela samting tru long tok em i autim. Ol Gutnius i kamapim dispela tok winim wan handet taim.”

Ol Askim Bilong Skelim

Yu gat wanem tingting long Jisas long nau? Long taim bilong Krismas, ol man i save tingim em olsem bebi i slip long bokis kaikai bilong bulmakau. Na tru tumas, inap liklik haptaim em i bin stap olsem wanpela bebi i no gat strong. (Luk 2:​15-​20) Tasol yu ting yumi mas tingim em olsem wanpela bebi? Tingim dispela, Bilong wanem Jisas i kamap olsem man long graun? Tru tru em i husat?

Buk Encarta Yearbook bilong 1996 i mekim dispela askim: “Yu ting Jisas em i Pikinini bilong God, em dispela Mesaia Baibel Hibru i tok promis long en o nogat? Tru, ating em i wanpela gutpela man, tasol em i wanpela man tasol, a?” Yumi mas skelim gut ol kain askim olsem. Bilong wanem? Long wanem, tingting bilong yumi long Jisas na pasin yumi mekim long em, i makim yumi bai kisim laip na stap amamas o nogat. Baibel i tok: “Man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini, em bai i no inap kisim laip.”​—⁠Jon 3:⁠36.

Em i No Wanpela Man Nating

Baibel i stori long ol samting Jisas i mekim long tempel bilong Jerusalem taim em i gat 12-pela krismas, na bihain Baibel i tok em i go bek long ples wantaim Maria na man bilong em Josep, na oltaim “[Jisas] i save bihainim tok bilong tupela.” (Luk 2:​51, 52) Tasol taim Jisas i kamap bikpela, ol samting i kamapim klia olsem em i no wanpela man nating.

Taim Jisas i mekim win i dai na solwara i no meknais liklik, wanpela pren i pret na i tokaut: “Dispela man em i husat tru?” (Mak 4:​41) Bihain, ol man i sutim tok giaman long Jisas na salim em i go long Gavena Pontius Pailat bilong Rom. Pailat i save Jisas i no bin mekim wanpela rong na em i pilim tru gutpela pasin bilong Jisas maski ol man i mekim pasin nogut tru long em, na dispela i kirapim Pailat long amamas long Jisas na kamapim em long ai bilong ol man na tokaut olsem: “Lukim. Em hia dispela man.” Tasol ol Juda i tok: “Mipela i gat wanpela lo, na dispela lo i tok, dispela man i mas i dai. Long wanem, em i bin tok olsem, ‘Mi Pikinini Bilong God.’ ”​—⁠Jon 19:​4-7.

Pailat i pret taim em i harim ol man i kolim Jisas olsem “Pikinini Bilong God.” Paslain long dispela, em i harim olsem meri bilong em i bin driman long Jisas na i kolim em olsem “dispela stretpela man.” (Matyu 27:19) Olsem na Pailat i tingting long Jisas em i husat tru! Em i save Jisas i bilong Galili, tasol Pailat i askim em: “Yu bilong wanem ples?” Taim Jisas i no bekim tok, ol i no toktok moa.​—⁠Jon 19:​9, 10.

Tru, Jisas em i wanpela man, tasol em i narapela kain man, long wanem, bipo em i bin stap olsem wanpela spirit, olsem Tok long heven. Bihain God i wokim mirakel na putim laip bilong em insait long bel bilong Maria. Aposel Jon i tok: “Tok em i bin kamap man, na em i kam i stap namel long mipela.”​—⁠Jon 1:​1, 2, 14, 18; KTH 3:⁠14.

As na God i Salim Pikinini Bilong Em Long Heven i Kam

Paslain long namba wan man, Adam, i kamapim ol pikinini, em i mekim sin. Wanpela bikhet ensel, husat i kisim nem Satan, i kirapim Adam long sakim tok bilong God. Dispela i mekim na Adam i no stap moa olsem pikinini bilong God. God i bin tok dispela samting bai kamap sapos Adam i sakim tok bilong em. Olsem na Adam i karim hevi long dispela samting. Em i kamap man i no gutpela olgeta, em i go lapun, na bihain em i dai.​—⁠Stat 2:​15-​17; 3:​17-​19; KTH 12:⁠9.

Baibel i stori long ol samting pasin bikhet bilong Adam i bin kamapim long yumi olgeta tumbuna pikinini bilong em. Em i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Sori tru, yumi olgeta i bin kisim sin long tumbuna papa bilong yumi, Adam, na ol samting nogut em sin i kamapim, olsem yumi go lapun na yumi dai.​—⁠Jop 14:4; Rom 3:⁠23.

Bilong yumi inap kamap fri long ol dispela samting nogut, i mas i gat wanpela papa i gutpela olgeta, wanpela husat i no bin kisim sin na ol samting nogut em sin i kamapim. Tingim olsem wanem dispela nupela papa​—⁠i wankain olsem Adam i no gat sin​—⁠em i bin kamap.

Nupela Papa i Kamap

Tingim, dispela “King bilong kamapim gutpela sindaun na bel isi,” em i gat narapela nem tu, em “Papa bilong i stap oltaim oltaim.” Baibel i tok profet long rot em bai kamap pikinini long graun. Em i tok: “Wanpela yangpela meri [“meri i no bin slip wantaim man,” NIV] i gat bel, na bai em i karim wanpela pikinini man.” (Aisaia 7:14; Matyu 1:​20-​23) Papa bilong Jisas i no wanpela man bilong graun, na papa bilong Adam tu i no wanpela man bilong graun. Man bilong raitim Baibel, Luk, em i kolim nem bilong ol tumbuna papa bilong Jisas i go inap long taim God i wokim Adam, na em i kamapim klia olsem Adam em i “pikinini bilong God.” (Luk 3:38) Tasol olsem yumi kisim save pinis, Adam i bin lusim dispela gutpela samting bilong i stap olsem pikinini bilong God, na ol lain tumbuna bilong em tu i lus long dispela samting. Olsem na yumi olgeta i mas i gat nupela papa i gutpela olgeta​—⁠wanpela papa i wankain olsem Adam taim God i wokim em.

God i salim Pikinini bilong em i kam long graun bilong kamap olsem nupela Adam bilong kisim ples bilong namba wan Adam. Baibel i tok: “ ‘Namba wan man, Adam, i bin kisim laip.’ Tasol narapela Adam i kamap bihain tru, em i bin kamap spirit bilong givim laip long man. Namba wan Adam em i bilong graun. God i bin wokim em long graun tasol. Namba 2 Adam em i bilong heven.” (1 Korin 15:​45, 47) Jisas em dispela “Adam i kamap bihain tru,” em i wankain olsem “namba wan man, Adam,” olsem Em i gutpela olgeta, na em inap kamapim ol pikinini i no gat sin em ol inap i stap gutpela olgeta long graun inap oltaim oltaim.​—⁠Song 37:29; KTH 21:​3, 4.

Jisas, husat i no bin kamapim ol pikinini, i bin stap gut long God i go inap long em i dai, maski Satan i traim em. Dispela nambawan gutpela laip Jisas i givim olsem ofa, em pe bilong baim bek ol man. Baibel i tok: “Krais i dai pinis bilong baim bek yumi [long sin na dai yumi kisim long Adam], na long blut bilong [Jisas], God i lusim olgeta sin bilong yumi.” Baibel i tok tu: “Wanpela man [Adam] i bin sakim tok, na long dispela pasin bilong em planti manmeri i kamap manmeri bilong mekim sin. Olsem tasol, wanpela man [Jisas] i bihainim tok, na long dispela pasin bilong em planti manmeri bai i kamap stretpela manmeri.”​—⁠Efesus 1:7; Rom 5:​18, 19; Matyu 20:⁠28.

Sapos yumi bilip long Jisas, em bai kamap “Papa bilong i stap oltaim oltaim” na “man God i makim bilong kisim bek” yumi. Em bai mekim wok king bilong em long gutpela pasin tru, taim em i stap King long Kingdom bilong Papa bilong em. Nau yumi ken skelim i stap bilong ol man aninit long dispela Kingdom na yumi ken ting wanem taim ol dispela gutpela samting bai kamap.​—⁠Luk 2:​8-​11.

[Ol Piksa long pes 5]

Yu gat wanem tingting long Jisas long nau?

[Piksa long pes 6]

Bilong wanem Baibel i tok Jisas em i “Adam i kamap bihain tru”?

Bilong Wanem i Gat Planti Rabisman Long Dispela Graun i Gat Planti Mani?

INAP 2 tausen yia i go pinis, Jisas Krais i tok: “Oltaim ol rabisman bai i stap wantaim yupela.” (Matyu 26:11) Kirap long taim bilong Jisas na i kam inap nau, i bin i gat planti manmeri i stap rabis. Tasol bilong wanem planti i stap rabis long dispela graun i gat planti mani tru?

Sampela i ting ol man i kamap rabis, long wanem, ol i no save skelim gut ol samting ol i mekim. Tru, ating sampela taim i olsem. Ol man i laik inapim laik bilong ol long dring planti, kisim drak, pilai laki, olsem na ol inap pinisim kwik olgeta mani bilong ol. Tasol i no olgeta rabisman i bin kamap rabis long ol pasin kranki ol yet i bin mekim, nogat.

Planti man i no gat wok mani moa, long wanem, ol senis i save kamap insait long ol kampani o bisnis. Pe bilong baim dokta na marasin samting i go antap tru na i pinisim mani ol man i bin bungim inap planti yia. Na namel long ol milion milion manmeri i stap rabis long ol kantri i no gat planti wok bisnis samting, em i no asua bilong ol na ol i stap rabis. Planti i stap olsem, long wanem, ol i no gat rot bilong stretim dispela hevi, olsem yumi lukim long ol stori i kam bihain .

Samting i Bin Kamap Bipo

Long 1932 samting, bikpela hevi tru bilong mani i kamap long olgeta hap bilong graun, em ol i kolim ‘taim bilong bikpela hevi bilong mani.’ Long wanpela kantri, ol i pinisim planti milion man long wok mani bilong ol, na planti tausen famili i mas lusim haus bilong ol. Tasol maski planti manmeri i no gat kaikai, ol fama i bin kapsaitim nating planti planti lita susu bilong bulmakau, na gavman i subim ol fama long kilim planti milion bulmakau samting bilong ol.

Bilong wanem ol i bin tromoi nating ol dispela kaikai? Ol gavman i gat lo olsem ol kaikai bilong fama na ol narapela samting ol i salim, i mas i gat winmani long en. Susu, abus, na wit rais samting ol i bikpela samting long ol rabisman. Tasol taim ol fama i no inap salim long pe i gat winmani long en, gavman i tok ol dispela kaikai i no gutpela na ol i tromoi nating.

Long planti taun ol bikpela pait long kaikai i kamap. Sampela man i no inap baim kaikai bilong famili, olsem na ol i hansapim ol man long gan bilong kisim kaikai. Sampela i hangre nogut tru na ol i dai. Ol dispela hevi i bin kamap long Amerika. Taim dispela bikpela hevi bilong mani i kirap, i no longtaim na ol lain bilong bosim mani bilong kantri i putim hevi long ol lain i save kisim liklik pe tasol. Ol lain bilong bosim mani bilong gavman i no tingim kaikai, haus, na wok mani bilong ol manmeri i namba wan bikpela samting, nogat; ol i ting em i namba tu tasol. Namba wan samting ol i tingim, em wok bilong kisim bikpela mani.

Ol Samting Bilong Mani Long Nau

Bihain dispela taim bilong bikpela hevi bilong mani i pinis, na nau i luk olsem planti manmeri i gat mani na gutpela sindaun, winim bilong bipo. Tasol maski i gat planti mani tru long nau, planti rabisman i no gat rot bilong mekim sindaun bilong ol i kamap gutpela. Planti taim yumi harim ripot bilong bikpela hangre na ol man i stap rabis long ol kantri i no gat planti wok bisnis, na planti man i les pinis long ritim ol dispela ripot. Tasol taim woa i mekim na ol refiuji i stap hangre nogut tru, pasin bilong ol lain politik long tingim winmani i mekim na ol kaikai i sting na bagarap, na taim ol i putim pe bilong ol samting i go antap, ol rabisman i no inap baim ol samting ol i mas kisim. Ol dispela samting i soim olsem pasin bilong bosim ol samting bilong mani i no wok gut na i no inap helpim ol rabisman. Long olgeta kantri ol lain bilong bosim ol samting bilong mani i no save tingting long helpim planti milion manmeri i stap rabis.

Tru tumas, ol man bilong graun i no bin kamapim wanpela wok bilong bosim mani em i inapim olgeta lain man long ol samting ol i mas kisim. Inap 3,000 yia i go pinis, wanpela man i bin skelim gut pasin bilong ol man na em i tok: “Mi tingting gen long olkain pasin i no stret, ol manmeri bilong graun i save mekim. Ol man nogut i save daunim planti manmeri, na ol dispela manmeri i krai nogut tru. Tasol i no gat man bilong helpim ol. Na gavman tu i no helpim ol. Long wanem, strong bilong gavman i helpim ol man nogut tasol.” (Saveman 4:⁠1) Nau long dispela taim bilong planti mani samting, sampela lain bilong bosim mani i wok yet long daunim ol lain i stap rabis.

Planti milion manmeri long nau i no gat rot long lusim pasin bilong i stap rabis. Tasol planti man i bin lain pinis long karim hevi bilong i stap rabis. Na ol i wetim tu gutpela taim bai kamap bihain we i stap bilong ol i gutpela.

[Blok long pes 5]

Hatwok Bilong Painim Mani

Long buk bilong em (The Working Poor​​—⁠Invisible in America), David K. Shipler i givim sampela tingting long yumi long i stap bilong sampela man long Amerika, em ol i sot tru long mani na klostu ol i kamap rabis. Em i tok: “Taim famili i sindaun long haus i laik bagarap, sik sotwin bilong pikinini i go bikpela, na ol i mas kisim em i go long haus sik, na pe bilong baim dokta i bikpela na mama i mas dinau, na i gat bikpela interes bilong baim dinau bilong ka, olsem na em i mas baim olpela ka i no wok gut, na dispela i mekim na mama i kam leit long ples wok, na nau ol i no laik givim wok long em i gutpela moa na i gat bikpela pe, na em wantaim pikinini i mas sindaun yet long haus nogut.” Pikinini na mama ol i stap nogut na i luk olsem taim nogut tru bai painim tupela, maski ol i sindaun long kantri i gat planti mani tru, winim olgeta narapela kantri.

[Blok long pes 6]

Tingting Long Helpim Ol, Em Inap?

Long Novemba 1993, insait long wanpela ofis bilong gavman long Washington, D.C., wanpela lain i wok strong long stretim wanpela bikpela hevi. I gat planti milion dola i stap, na ol i laik helpim ol lain long Amerika em ol i no gat ples slip. Taim ol i toktok i stap, sampela polis, paiaman, na ol lain bilong ambiulens ol i bung long ples bilong kisim bas long hapsait bilong rot. Ol lain bilong ambiulens i kisim bodi bilong wanpela meri i dai pinis, em i no gat ples slip. Em i bin dai long ai bilong wanpela ofis bilong gavman i bilong painim haus bilong ol man i no gat ples slip.

Bihain wanpela niusman bilong The New York Times i toktok wantaim wanpela wokman bilong dispela dipatmen, na em i stori long bikpela lain wokman bilong helpim ol man na ol ambiulens samting i bin bung long ples bodi bilong meri i stap long en. Em i tok: “Em i narapela kain tru long lukim bikpela helpim ol man i save kisim taim ol i dai pinis​—⁠tasol taim ol i stap laip yet ol i no gat helpim.”

[Piksa long pes 4, 5]

Wanpela mama wantaim 3-pela pikinini bilong em long taim bilong bikpela hevi bilong mani long 1932 samting

[Kredit Lain]

Dorothea Lange, FSA Collection, Library of Congress

[Piksa long pes 6, 7]

Long ol faktori olsem dispela, ol wokman i save kisim 14 dola tasol long mun, na sampela taim ol i mas wok inap 70 aua long wanpela wik

[Kredit Lain]

© Fernando Moleres/Panos Pictures

Rot Namba 4

Kamapim Klia Ol Lo Bilong Famili na Kirapim Ol Kwik Long Bihainim

Bilong wanem yu mas mekim olsem? Ronald Simons, em wanpela tisa i gat namba long University of Georgia, em i tok: “Ol pikinini i save kamap gutpela sapos ol i klia gut long ol lo na ol i save long samting bai kamap sapos ol i bikhet. Sapos ol pikinini i no gat lo ol i mas bihainim, ol bai kisim pasin bilong tingim ol yet tasol, na bai ol i no amamas​—⁠na ol narapela i stap klostu long ol, ol tu bai i no amamas.” Baibel i tok klia: “Sapos papa i laikim pikinini, orait em i save strong long stretim em.”​—⁠Sindaun 13:⁠24.

Hatwok bilong en: Bilong putim mak ol pikinini i no ken kalapim, na putim olsem lo ol i mas bihainim, yu mas lusim hap taim na strong na yu no ken les. Em pasin bilong ol pikinini long traim papamama​—⁠tupela bai larim ol i kalapim dispela mak o nogat. Mike na Sonia i gat tupela pikinini, na ol i save gut long dispela na ol i tok: “Ol pikinini i gat ol tingting na laik bilong ol yet, na pasin bilong mekim sin i stap pinis long skin bilong ol.” Dispela tupela papamama i laikim tumas tupela pikinini meri bilong ol, tasol ol i tokaut olsem: “Sampela taim het bilong ol pikinini i strong na ol i tingim ol yet tasol.”

Wanem samting inap helpim yu? Bihainim pasin Jehova i bin mekim long lain Israel. Wanpela rot bilong soim olsem em i laikim tru ol, em i kamapim klia ol lo em i laik bai ol i mas bihainim. (Kisim Bek 20:​2-​17) Na em i kolim klia ol samting bai kamap long ol sapos ol i no bihainim ol dispela lo.​—⁠Kisim Bek 22:​1-9.

Olsem na yu ken raitim wanpela lista bilong ol lo bilong haus, o sampela lo yu pilim olsem ol pikinini i mas bihainim. Sampela papamama i ting i gutpela long raitim 5-pela o 6-pela lo tasol. Sapos yu raitim sotpela lista tasol bilong ol lo yu bin skelim gut na makim, bai yu no hatwok tumas long putim olsem lo ol i mas bihainim, na ol inap putim gut long tingting. Klostu long ol dispela lo, raitim ol samting bai kamap sapos ol i no bihainim. Makim strafe inap tasol long mak bilong ol pikinini na yu inap givim long ol. Sampela taim kolim gen ol dispela lo na bai olgeta insait long famili​—⁠mama na papa wantaim⁠​—⁠​i klia gut long ol samting ol i mas mekim.

Sapos ol pikinini i brukim ol dispela lo, givim strafe long ol kwiktaim, tasol mekim long pasin isi, na yu mas strong na no ken surik long mekim, na mekim olsem yu bin tok. Harim: Sapos yu belhat, wetim bel i kol pastaim na nau yu ken stretim pikinini. (Sindaun 29:22) Tasol no ken surikim taim bilong stretim ol. Yu no ken larim tok bilong pikinini i daunim yu na yu no stretim em gut. Sapos yu mekim olsem, orait pikinini bai ting ol dispela lo i no bikpela samting. Baibel i tok olsem: “Ol man i no kisim bekim kwiktaim long rong bilong ol, olsem na . . . ol i strong long mekim pasin nogut.”​—⁠Saveman 8:⁠11.

Yu ken mekim wanem samting moa bilong bosim ol pikinini long pasin i helpim gut ol?