Longwe liklik long Babel, i gat wanpela taun nem bilong en Ur, we ol manmeri i save lotuim planti narapela god na ol i no lotuim Jehova. Tasol i gat wanpela man long Ur, dispela man i lotuim Jehova wanpela tasol. Nem bilong em Abraham.

Jehova i tokim Abraham: ‘Lusim ples bilong yu, ol wanblut bilong yu, na go long graun em mi bai soim yu long en.’ Na God i tok promis olsem: ‘Lain tumbuna bilong yu bai kamap planti tru, na long rot bilong yu mi bai mekim ol gutpela samting long planti manmeri bilong graun.’

Abraham i no save long hap em Jehova bai salim em i go long en, tasol em i trastim Jehova. Olsem na Abraham, meri bilong em Sara, papa bilong em Tera, na nefiu bilong em Lot, ol i bihainim tok na kisim ol kago na kirap long wokabaut i go.

Abraham i gat 75 krismas taim em na famili bilong em i kamap long ples em Jehova i laik bai ol i lukim. Baibel i kolim olsem graun bilong Kenan. Long dispela hap, God i toktok long Abraham na mekim dispela promis: ‘Olgeta dispela graun yu lukim, bai mi givim long lain tumbuna pikinini bilong yu.’ Tasol Abraham na Sara i lapun na ol i no gat pikinini. So hau bai Jehova i mekim tok promis bilong em i kamap tru?

Abraham na Sara i bin marit inap planti yia. Ol i bin lusim gutpela sindaun bilong ol long Ur na stap long haus sel. Tasol Sara i no komplein, bikos em i trastim Jehova.

Sara i laikim tru wanpela pikinini, na em i tokim Abraham: ‘Sapos wokmeri bilong mi Hagar i karim pikinini, em bai kamap olsem pikinini bilong mi yet.’ Bihain Hagar i karim wanpela pikinini man. Nem bilong em Ismael.

Planti yia bihain, taim Abraham i gat 99 krismas na Sara i gat 89 krismas, tripela visita i kam lukim ol. Abraham i tokim ol long malolo aninit long diwai na kaikai wantaim em. Yu save husat ol dispela visita? Em ol ensel! Ol i tokim Abraham: ‘Neks yia long seim taim, yu na meri bilong yu bai gat wanpela pikinini man.’ Sara i stap insait long haus sel na putim yau long ol. Na em i lap long em yet na tingting: ‘Tru tru mi inap karim wanpela pikinini, maski mi lapun tru?’

Long neks yia, Sara i karim pikinini man, olsem ensel bilong Jehova i bin tok promis. Abraham i kolim nem bilong em Aisak, mining bilong en “Lap.”

Taim Aisak i gat klostu 5-pela krismas, Sara i lukim Ismael i wok long tok bilas long Aisak. Em i laik protektim pikinini bilong em, so em i go long Abraham na tokim em long salim Hagar na Ismael i go. Pastaim Abraham i no laik mekim. Tasol Jehova i tokim Abraham: ‘Harim tok bilong Sara. Mi bai lukautim Ismael. Tasol long rot bilong Aisak, mi bai mekim ol tok promis bilong mi i kamap tru.’