Jehova i tokim Samuel: ‘Go long haus bilong Jesi. Wanpela pikinini man bilong em bai kamap neks king bilong Israel.’ So Samuel i go long haus bilong Jesi. Taim em i lukim fes pikinini man bilong Jesi, em i tingting: ‘Ating em dispela yangpela man God i makim.’ Tasol Jehova i tokim Samuel, i no dispela man. Jehova i tok: ‘Mi save skelim bel bilong man, na i no lukluk bilong man.’

Jesi i bringim 6-pela pikinini moa long Samuel. Tasol Samuel i tok: ‘Jehova i no makim wanpela bilong ol. Yu gat sampela moa pikinini man?’ Jesi i tok: ‘Mi gat wanpela moa, laspela pikinini, Devit. Em i lukautim ol sipsip bilong mi.’ Taim Devit i kam, Jehova i tokim Samuel: ‘Em dispela man tasol mi makim!’ Samuel i kapsaitim oil long het bilong Devit, na anointim em olsem neks king bilong Israel.

Sampela taim bihain, ol Israel i pait wantaim ol Filistia, ol i gat wanpela traipela man bilong pait, nem bilong em Goliat, em i save mekim pait bilong ol. Long olgeta de, Goliat i save tok bilas long ol Israel. Em i singaut: ‘Salim wanpela man i kam pait long mi. Sapos em i win, mipela bai kamap sleiv bilong yupela. Tasol sapos mi win, yupela bai kamap sleiv bilong mipela.’

Devit i kam long kem bilong ami bilong ol Israel long givim kaikai long ol brata bilong em, ol i soldia. Em i harim Goliat na tok: ‘Mi bai pait wantaim em!’ King Sol i tok: ‘Tasol yu mangi nating.’ Devit i tok: ‘Jehova bai helpim mi.’

Sol i laik givim klos pait bilong em long Devit, tasol Devit i tok: ‘Mi no inap werim dispela klos na pait.’ Devit i kisim rop na i go long wara. Em i kisim 5-pela raunpela ston na putim long beg. Na Devit i ran i go long Goliat. Dispela traipela man i singaut: ‘Kam hia, liklik mangi. Mi bai givim bodi bilong yu long ol pisin na wel animal.’ Devit i no pret. Em i tok: ‘Yu holim bainat na spia na kam pait long mi, tasol mi kam long yu long nem bilong Jehova. Yu no pait long mipela; yu pait long God. Olgeta man i stap hia bai lukim olsem Jehova i gat bikpela strong moa winim bainat o spia. Em bai givim yupela olgeta long han bilong mipela.’

Devit i putim wanpela ston long rop na swingim strong long Goliat. Jehova i helpim em na ston i paitim poret bilong Goliat na i go insait. Dispela traipela man i dai na pundaun long graun. Olgeta Filistia i pret na ranawe. Yu trastim Jehova, olsem Devit?

Bihain long Devit i kilim i dai Goliat, King Sol i makim em long lukautim ami bilong em. Devit i winim planti pait, na planti manmeri i save long em. Taim Devit i kam bek long pait, ol meri i save danis na singsing: ‘Sol i kilim i dai planti tausen man, na Devit i kilim i dai planti planti tausen!’ Sol i jeles long Devit na i laik kilim em.

Devit i save gut long pilaim harp. Wanpela de, taim Devit i pilaim harp long Sol, king i tromoi spia bilong em long Devit. Devit i abrusim spia, na spia i go pas long wol. Bihain long dispela, planti taim Sol i traim long kilim Devit. Bihain, Devit i ranawe na hait long deset.

Sol i kisim 3,000 ami na i go painim Devit. Em i go insait long keiv we Devit na lain bilong em i hait i stap. Lain bilong Devit i tokim em: ‘Nau em sans bilong yu long kilim Sol.’ Devit i wokabaut isi isi i go klostu long Sol na katim liklik hap bilong longpela siot bilong king. Tasol Sol i no save. Bihain, Devit i bel hevi olsem em i no soim rispek long king em Jehova i anointim. Em i no larim lain bilong em i kilim Sol. Devit i singaut long Sol, na tok em inap kilim Sol, tasol em i no mekim. Yu ting Sol inap senisim tingting bilong em long Devit?

Nogat. Sol i wok yet long painim Devit. Wanpela nait, Devit na nefiu bilong em Abisai i hait na go long kem bilong Sol. Wasman bilong Sol, Apner i slip indai pinis. Abisai i tok: ‘Em sans bilong yumi! Larim mi kilim em.’ Devit i tok: ‘Jehova yet bai mekim save long Sol. Yumi kisim spia na sospen wara bilong em na go.’

Devit i go antap long maunten na lukluk i go daun long kem bilong Sol. Em i singaut: ‘Apner, wai na yu no protektim king bilong yu? Spia na sospen wara bilong Sol i stap we?’ Sol i harim nek bilong Devit na tok: ‘Yu inap kilim mi, tasol yu no mekim. Mi save yu bai kamap neks king bilong Israel.’ Sol i go bek long haus king bilong em. Tasol i no olgeta long famili bilong Sol i heitim Devit.