Tenpela traib kingdom bilong Israel i gat planti king nogut, tasol Ahap em king nogut tru winim olgeta. Em i maritim meri nogut husat i save lotuim Bal. Nem bilong em Jesebel. Ahap na Jesebel i mekim lotu bilong Bal i go bikpela tru long Israel na ol i kilim i dai ol profet bilong Jehova. Jehova i mekim wanem? Em i salim profet Elaija i go givim wanpela tok long Ahap.

Elaija i tokim King Ahap olsem pasin nogut bilong em i mekim na bai i no gat ren long Israel. Winim tripela yia, ol kaikai i no gro na ol manmeri i stap hangre. Bihain Jehova i salim Elaija i go bek long Ahap. King i tok: ‘Yu man bilong mekim trabel! Em rong bilong yu.’ Elaija i tok: ‘Mi no mekim bikpela san. Yu mekim taim yu lotuim Bal. Bai yumi mekim wanpela tes. Bungim olgeta manmeri na ol profet bilong Bal antap long Maunten Kamel.’

Ol manmeri i bung long maunten. Elaija i tok: ‘Mekim disisen bilong yupela. Sapos Jehova em i God tru, orait bihainim em. Sapos yupela i ting Bal, orait bihainim em. Mi laik salensim yupela. Dispela 450 profet bilong Bal i mas redim ofa na singautim god bilong ol, na mi bai redim ofa na singaut long Jehova. Wanem god i bekim singaut na salim paia em i God tru.’ Ol manmeri i wanbel long dispela.

Ol profet bilong Bal i redim ofa. Long de olgeta, ol i singaut long god bilong ol: ‘O Bal, harim mipela!’ Taim Bal i no bekim, Elaija i tok bilas long em. Elaija i tok: ‘Singaut strong moa. Ating em i slip, na wanpela i mas kirapim em.’ Em apinun, na ol profet bilong Bal i singaut yet. Tasol no gat bekim.

Elaija i putim ofa bilong em long alta na kapsaitim wara long olgeta hap bilong alta. Bihain em i beten: ‘O Jehova, plis larim ol manmeri i save yu God tru.’ Kwiktaim, Jehova i salim paia i kam daun long heven na kukim ofa. Ol manmeri i singaut: ‘Jehova em i God tru!’ Elaija i tok: ‘No ken larim ol profet bilong Bal i ranawe!’ Long dispela de, ol i kilim i dai 450 profet bilong Bal.

Taim liklik klaut i kamap long solwara, Elaija i tokim Ahap: ‘Bikpela ren bai kam. Redim karis bilong yu, na go long haus.’ Blakpela klaut i karamapim skai, win i blo, na bikpela ren i pundaun. Nau, bikpela san i pinis. Ahap i ron spit long karis bilong em. Jehova i helpim Elaija na em i ran spit moa winim dispela karis! Tasol yu ting olgeta hevi bilong Elaija i pinis? Yumi ken painimaut.

Jesebel i harim stori long samting i painim ol profet bilong Bal, na em i belhat tru. Em i salim tok long Elaija: ‘Tumora, yu bai dai wankain olsem ol profet bilong Bal.’ Elaija i pret tru na em i ranawe i go long deset. Em i beten: ‘Jehova, mi no inap moa long karim hevi. Larim mi dai.’ Elaija i taiet na slip aninit long wanpela diwai.

Wanpela ensel i kirapim em na tok isi: ‘Yu kirap na kaikai.’ Elaija i lukim raunpela bret antap long ol ston i hat na wanpela sospen wara. Em i kaikai na dring na i slip gen. Ensel i kirapim em gen na tok: ‘Kaikai. Yu mas i gat strong long wokabaut.’ So Elaija i kaikai gen. Bihain em i wokabaut 40 de na 40 nait, inap em i kamap long Maunten Horep. Long hap, Elaija i go insait long wanpela keiv long slip. Tasol Jehova i toktok long em. Em i tok: ‘Yu mekim wanem long hia, Elaija?’ Elaija i tok: ‘Ol Israel i brukim promis bilong ol long yu. Ol i brukim ol alta na kilim i dai ol profet bilong yu. Na nau ol i laik kilim mi tu.’

Jehova i tokim em: ‘Go na sanap long maunten.’ Pastaim, strongpela win i blo na abrusim keiv. Bihain, graun i guria na paia i kamap. Na nau, Elaija i harim wanpela nek i toktok isi tru. Em i karamapim pes wantaim longpela klos bilong em na sanap ausait long keiv. Jehova i askim em gen long wai na em i ranawe. Elaija i tok: ‘Mi wanpela tasol i stap.’ Tasol Jehova i tokim em: ‘Yu no stap wanpis. I gat 7,000 man long Israel i lotu yet long mi. Go na makim Elisa olsem profet long kisim ples bilong yu. Kwiktaim Elaija i go na mekim samting Jehova i tok long en. Yu ting Jehova bai helpim yu tu long mekim samting em i laik yu mekim? Yes, em inap. Yumi ken painimaut long samting i kamap long taim bilong bikpela san.