Baibel i Tok Wanem?
Givim Pen Long Bodi Em i Helpim Yu Go Klostu Long God?
PLANTI man i no laik givim pen long bodi bilong ol yet. Tasol sampela lotu lain i bin givim pen long bodi bilong ol yet, olsem wipim ol yet, tambu long kaikai inap planti de, na pasim klos i gat mosong i sikirapim skin. Dispela i mekim na ol man i litimapim nem bilong ol olsem ol i man bilong aninit long God. Dispela kain ol pasin i no samting bilong bipo tasol, nogat. Sampela nius ripot long nau i tok, sampela bikman bilong lotu long nau ol tu i bin givim pen long bodi bilong ol yet.
Wanem samting i kirapim ol man long mekim kain pasin olsem bilong lotuim God? Mausman bilong wanpela oganaisesen em ol i tok ol i Kristen, em i tok: “Taim yumi kisim pen long laik bilong yumi yet, dispela em i wanpela rot bilong pas wantaim Jisas Krais na pilim ol pen em i bin kisim long laik bilong em yet bambai em i ken kisim bek yumi long sin.” Tasol maski ol bikman bilong lotu i tok olsem, Baibel i tok wanem?
Laikim Tru Bodi Bilong Yu
Baibel i no tok long givim pen long bodi taim yumi lotuim God, na em i no orait long dispela pasin. Baibel i kirapim ol man i save daun long God long ol i mas lukautim gut bodi bilong ol. Skelim tok Baibel i mekim long pasin i stap namel long man marit na meri bilong em taim Baibel i stori long pasin bilong man long tingim tru bodi bilong em yet, olsem: “Ol maritman i mas laikim meri bilong ol olsem ol i laikim bodi bilong ol yet. . . . I no gat wanpela man i save heitim bodi bilong em yet, nogat. Em i save givim kaikai long en na tingim olsem samting i dia tumas, olsem Krais i save mekim long kongrigesen.”—Efesus 5:28, 29.
Dispela tok long man i mas laikim meri bilong em olsem em i save laikim bodi bilong em yet, ating dispela tok bai i no gat as sapos ol man i lotuim God ol i mas givim pen long bodi bilong ol taim ol i mekim lotu, a? I klia tru, ol man bilong laikim tumas ol stiatok bilong Baibel ol i mas tingim gut na laikim bodi bilong ol yet, na ol i mas mekim tu dispela pasin long poroman marit bilong ol.
Olsem na i gat planti stiatok bilong Baibel i helpim yumi long tingim gut bodi bilong yumi yet. Olsem: Baibel i tok pasin bilong mekim eksasais inap long skel, dispela bai helpim bodi. (1 Timoti 4:8) Baibel i soim olsem sampela kaikai i gat gutpela marasin bilong helpim bodi, na tu, sapos man i no was gut long kaikai o dring, dispela bai nogutim bodi. (Sindaun 23:20, 21; 1 Timoti 5:23) Baibel i kirapim ol man long stap helti, long wanem, taim ol i mekim olsem, ol bai gat strong long mekim ol narapela samting long i stap bilong ol. (Saveman 9:4) Sapos ol man bilong ritim Baibel i gat wok long lukautim bodi bilong ol, orait wai na ol i mas givim pen tu long bodi bilong ol yet?—2 Korin 7:1.
Kristen i Mas Bihainim Wankain Pasin Olsem Jisas na Karim Pen?
Tasol long nau sampela lain i popaia na i toktok tasol long ol pen Jisas na ol disaipel bilong pastaim i bin karim bilong kirapim ol man long givim pen long bodi bilong ol yet. Tasol long Baibel, ol wokman bilong God i no stori olsem Jisas i bin givim pen long bodi bilong em yet, nogat. Taim ol Kristen i raitim Baibel, ol i stori long pen Krais i bin karim, ol i laik kirapim ol Kristen long sanap strong na karim ol hevi ol i kisim taim ol man i mekim nogut long ol, na i no bilong kirapim ol long mekim nogut long bodi bilong ol yet. Olsem na ol man i givim pen long bodi bilong ol yet, ol i no bihainim pasin bilong Jisas Krais.
Yumi ken tok piksa olsem: Yu lukim wanpela bikhetlain i belhat na i toknogutim wanpela gutpela pren bilong yu na paitim em. Yu lukim olsem pren bilong yu i stap isi na karim pen, na em i no bekim pait o bekim tok nogut long ol. Sapos yu laik bihainim pasin bilong pren bilong yu, bai yu kirap paitim nabaut skin bilong yu na toknogutim yu yet? Nogat, a? Sapos yu mekim olsem, bai yu bihainim pasin bilong dispela bikhetlain. Sapos bihain wanpela lain i mekim nogut long yu, bai yu abrusim pasin bilong bekim nogut long ol.
Em nau, i klia tru olsem lain bilong Krais i no gat wok long givim pen long bodi bilong ol yet bilong bihainim pasin bilong ol bikhetlain em ol i mekim nogut long Jisas na i laik kilim em i dai. (Jon 5:18; 7:1, 25; 8:40; 11:53) Ol i mas bihainim pasin bilong Jisas long stap isi na karim hevi taim ol man i mekim nogut long ol.—Jon 15:20.
Wanpela Pasin Em Baibel i No As Bilong En
Paslain long taim bilong ol Kristen, ol tok bilong Baibel i bosim i stap na lotu bilong ol Juda na i pasim ol long mekim ol samting i bagarapim skin bilong ol. Olsem: Lo i tambuim ol Juda long katim nabaut skin bilong ol, em wanpela pasin ol lain i no Juda i bin mekim long bipo. (Wok Pris 19:28; Lo 14:1) Sapos God i no laik bai ol i katim nabaut skin bilong ol, orait yumi save em i no laik bai ol i wipim skin bilong ol na ol mak bilong en i stap long skin. Lo bilong Baibel i klia tru—God i no orait long man i givim pen long bodi bilong em yet.
Wanpela atis i laik bai ol man i rispektim wok bilong em, olsem tasol God Jehova em Krieta bilong yumi, i laik bai yumi rispektim bodi bilong yumi, em samting em yet i bin wokim. (Song 139:14-16) Tru tumas, pasin bilong givim pen long bodi i no inap helpim yumi long pas gut wantaim God—em i pasim rot bilong yumi long mekim olsem, na i paulim tok bilong Gutnius.
Spirit bilong God i stiaim aposel Pol long stori long dispela kain bilip ol man yet i bin kamapim na i nogutim man, em i tok: “Taim man i . . . mekim wanpela kain pasin bilong lotu em yet i makim na giaman long bihainim pasin daun na mekim samting i nogutim bodi, i luk olsem em i bihainim savetingting. Tasol ol dispela lo i no inap helpim man liklik long daunim laik bilong bodi.” (Kolosi 2:20-23) Em nau, pasin bilong givim pen long bodi “i no inap” helpim yumi liklik long i go klostu long God. Ol samting God i laik bai yumi mekim bilong lotu tru long em i save givim nupela strong long yumi, na i gutpela na i no givim hevi long yumi.—Matyu 11:28-30.
YU LAIK SAVE?
● God i ting olsem wanem long bodi bilong yumi man?—Song 139:13-16.
● Sapos yu givim pen long bodi bilong yu, dispela inap helpim yu long daunim ol laik nogut bilong skin?—Kolosi 2:20-23.
● Yu ting God i laik bai lotu i tru i mas givim pen na hevi long yumi?—Matyu 11:28-30.
[Rait long pes 11]
Lo bilong Baibel i klia tru —God i no orait long man i givim pen long bodi bilong em yet
[Piksa long pes 10]
Wanpela lotuman i wokabaut long skru i go long haus lotu
[Kredit Lain]
© 2010 photolibrary.com