Bodi Bilong Britel Sta i Save Lukluk

WANPELA kain sta pis long solwara, em britel sta, em i gat narapela kain skin long hap antap we i save lukautim em. Dispela hap bilong bodi i pulap tru long planti liklik ai, olsem ol lens, na i luk olsem wanpela traipela ai.

Tingim: Nius Natural History i tok olsem taim ol saientis i skelim bodi bilong britel sta, ol i lukim “narapela kain mak mak olsem ol liklik buk buk i pas pas tru, sais bilong wanpela liklik buk i liklik (thinner) moa long sais bilong gras bilong man.” Ol dispela liklik buk buk i olsem glas, em i gat kalsiam kaboneit, na ol i gutpela lens tru we i save sutim lait i go long ol nev i stap aninit long skin. Na tu, olgeta lens i mas wankain sais stret bambai ol inap lukim klia samting.

Wanpela savemeri, em Joanna Aizenberg i tok, dispela hap bilong skin bilong britel sta i save mekim tupela wok, na dispela i “kamapim wanpela bikpela samting: long olgeta samting bilong graun i gat laip, planti taim wanpela samting i gat planti wok bilong en.”

Samting ol saientis i lainim long britel sta i helpim ol long kamapim wanpela rot bilong wokim ol lens long kalsiam kaboneit i save kamapim ol lait, na ol i no inap tromoi bikpela mani long wokim. Ol i mekim planti wok long ol dispela lait, na long ol telefon samting tu, we ol i save yusim ol dispela lait bilong sutim signal i go long rot bilong wanpela liklik glas tru.

Yu ting wanem? Bodi bilong britel sta i save lukluk, em i kamap nating o wanpela man i bin wokim?