Insait long oganaisesen bilong mipela, mipela i no gat ol pris pasto i kisim pe bilong mekim wok, nogat. Olsem ol i bin mekim long taim kongrigesen Kristen i kirap long pastaim, ol i save makim ol wasman bilong “lukautim kongrigesen bilong God.” (Aposel 20:28) Spirit bilong God i stiaim ol dispela elda long go pas long kongrigesen, na lukautim ol sipsip bilong God. Ol i ‘no mekim olsem wanpela i subim ol long mekim, nogat, ol i amamas long mekim. Ol i no mekim bilong kisim ol samting bilong helpim ol yet, nogat. Ol i gat bikpela laik long mekim dispela wok.’ (1 Pita 5:​1-3) Ol i save mekim wanem ol wok bilong helpim mipela?

Ol i was na lukautim mipela. Ol elda i save yusim tok bilong Baibel long helpim na stiaim kongrigesen long stap klostu long Jehova. Ol i save olsem God i bin givim dispela bikpela wok long ol, na ol i no bosim strong lain bilong God, nogat, ol i helpim kongrigesen long stap gut na amamas. (2 Korin 1:24) Olsem ol wasman i save tingim gut olgeta wan wan sipsip bilong ol, ol elda i save wok strong long kisim save long olgeta wan wan insait long kongrigesen.​—​Sindaun 27:​23.

Ol i skulim mipela long mekim laik bilong God. Long olgeta wik, ol elda i lukautim ol miting bilong kongrigesen bilong strongim bilip bilong mipela. (Aposel 15:32) Ol dispela man i go pas tu long wok autim tok, wok wantaim mipela, na skulim mipela long bihainim olgeta kain rot bilong autim tok.

Ol i strongim mipela wan wan. Bilong helpim mipela wan wan long strongim pasin bilong mipela long pas gut wantaim Jehova, ol elda i ken visitim mipela long haus bilong mipela, o toktok wantaim mipela long Haus Kingdom bilong helpim na strongim mipela long rot bilong ol tok bilong Baibel.​—​Jems 5:​14, 15.

Ol elda i gat wok bilong kongrigesen, na tu, planti bilong ol i mas lusim taim bilong ol long mekim wok mani na lukautim famili. Yumi mas rispek long ol dispela brata husat i save wok strong.​—​1 Tesalonaika 5:​12, 13.

• Ol elda bilong kongrigesen i mekim wanem ol wok?

• Long wanem ol rot ol elda i soim olsem ol i tingim mipela wan wan?

Baibel i stori long tupela lain man Kristen husat i lukautim ol wok bilong kongrigesen​—“ol wasman na ol wokman bilong kongrigesen,” olsem ol kongrigesen sevan. (Filipai 1:1) Long planti kongrigesen i gat planti kain brata olsem. Ol kongrigesen sevan i save mekim wanem ol wok bilong helpim mipela?

Ol i helpim lain elda. Ol kongrigesen sevan i pas gut wantaim Jehova, yumi ken bilip long ol, ol i mekim gut wok bilong ol, na sampela bilong ol i yangpela, na sampela i lapun. Ol i save mekim sampela wok bilong kongrigesen na wok bilong lukautim Haus Kingdom. Dispela i helpim ol elda na ol i ken mekim gut wok tisa na wok sepeding.

Ol i mekim ol wok i helpim kongrigesen. Ol i makim sampela kongrigesen sevan long mekim wok atendan na tok welkam long olgeta husat i kam long ol miting. Sampela sevan i lukautim saun, lukautim litresa, ol akaun bilong kongrigesen, na ol i makim ol teritori we kongrigesen bai autim tok long en. Ol i helpim tu wok bilong lukautim na stretim Haus Kingdom. Ol elda inap askim ol sevan long helpim ol lapun. Maski ol kongrigesen sevan i kisim wanem ol wok, ol i redi long mekim, na dispela i kirapim kongrigesen long rispek long ol.​—1 Timoti 3:13.

Ol i stap gutpela piksa olsem ol man Kristen. Ol kongrigesen sevan i gat ol gutpela pasin Kristen, olsem na ol i winim mak bilong mekim dispela wok. Taim ol i lukautim sampela hap bilong ol miting, ol i strongim bilip bilong yumi. Ol i go pas long mekim wok autim tok, na dispela i kirapim mipela long givim bel long wok. Ol i gat pasin bilong wok gut wantaim, olsem na ol i strongim pasin bilong stap amamas na wanbel. (Efesus 4:16) Bihain, ol tu i ken winim mak na kamap elda.

•  Ol kongrigesen sevan i wanem kain man?

•  Olsem wanem ol sevan i helpim kongrigesen long ron gut?

Ol Skripsa Grik i stori planti long Barnabas na aposel Pol. Dispela tupela man i mekim wok wasman raun, olsem ol i visitim ol kongrigesen. Bilong wanem ol i mekim olsem? Ol i tingim tru i stap bilong ol wanlotu bilong ol. Pol i tok, em i laik “go lukim ol brata” bilong painimaut ol i stap olsem wanem. Em i redi long raun inap planti handret kilomita bilong i go long ol na strongim ol. (Aposel 15:36) Ol wasman raun bilong mipela long nau i laik mekim wankain.

Ol i kam bilong strongim mipela. Wasman sekit i save visitim 20 kongrigesen samting, inap 2-pela taim long yia em i stap wantaim wan wan kongrigesen inap 1-pela wik. Mipela inap kisim bikpela helpim long save bilong ol dispela brata na meri bilong ol, sapos ol i marit. Ol i laik kisim save long ol yangpela na ol lapun, na ol i amamas long wok wantaim mipela long wok autim tok na go lukim ol Baibel stadi bilong mipela. Ol dispela wasman i mekim ol sepeding visit wantaim ol elda, na ol i save mekim ol gutpela tok long ol miting na ol kibung bilong strongim mipela.​—Aposel 15:35.

Ol i tingim mipela olgeta wan wan. Ol dispela wasman sekit i tingim tru i stap bilong kongrigesen long sait bilong bilip. Ol i bung wantaim ol elda na ol kongrigesen sevan bilong skelim wok bilong kongrigesen i kamap gutpela olsem wanem, na ol i givim sampela gutpela edvais long pasin bilong mekim wok bilong ol. Ol i helpim ol painia long mekim gut wok autim tok, na ol i amamas long kisim save long ol nupela man i kam long miting, na harim stori long olsem wanem ol i wok long kamap strong long tok i tru. Olgeta dispela brata i givim ol yet olsem ‘wanwok bilong mipela bilong helpim mipela.’ (2 Korin 8:23) Yumi mas bihainim pasin bilong ol long bilip na givim bel long wok bilong God.​—Hibru 13:7.

•  Bilong wanem ol wasman sekit i visitim ol kongrigesen?

•  Olsem wanem visit bilong ol inap helpim yu?

Taim ol disasta i kamap, wantu ol Witnes Bilong Jehova i save stretim wok bilong helpim ol brata bilong ol husat i kisim bagarap. Long dispela rot, mipela i soim olsem mipela i laikim tru narapela narapela. (Jon 13:​34, 35; 1 Jon 3:​17, 18) Mipela i save givim helpim long wanem ol rot?

Mipela i givim mani. Taim bikpela hangre i kamap long Judia long bipo, ol Kristen long Antiok i salim mani bilong helpim ol Kristen long Judia. (Aposel 11:​27-30) Na olsem tasol, taim mipela i harim olsem ol brata bilong mipela long narapela hap bilong graun i bungim bikpela hevi, mipela i salim mani long rot bilong kongrigesen long helpim ol brata long samting ol i nidim.​—2 Korin 8:​13-15.

Mipela i givim helpim. Ol elda long dispela hap we disasta i kamap long en, ol bai painimaut sapos olgeta wan wan bratasista bilong kongrigesen i stap orait o nogat. Ating wanpela rilif komiti bai stretim rot bilong givim kaikai, klinpela wara bilong dring, klos, ples slip, na marasin samting. Planti Witnes husat i gat save long mekim wok, ol i save volantia na yusim mani bilong ol long mekim rilif wok o stretim ol haus na ol Haus Kingdom i bagarap. Oganaisesen bilong mipela i gat pasin wanbel na mipela i lain long pasin bilong wok bung wantaim, olsem na taim hevi i kamap, mipela inap kirap kwik long mekim ol samting. Tru, mipela i save helpim “ol wanbilip” bilong mipela, tasol sapos mipela inap, mipela i save helpim tu ol narapela man maski ol i bilong wanem lotu.​—Galesia 6:10.

Mipela i mekim gut bel bilong ol long rot bilong Baibel na helpim ol long karim bel hevi. Ol lain i kisim hevi long wanpela disasta, ol i nidim tok bilong mekim gut bel bilong ol. Long kain taim olsem, mipela i save kisim strong long Jehova, em “God bilong mekim isi bel.” (2 Korin 1:​3, 4) Mipela i amamas long autim ol tok promis bilong Baibel long ol lain i bungim bikpela hevi, na tokim ol olsem klostu nau Kingdom Bilong God bai pinisim olgeta kain disasta i kamapim pen na hevi.​—Revelesen 21:4.

•  Bilong wanem ol Witnes inap kirap kwik long mekim ol samting long taim bilong disasta?

•  Olsem wanem mipela inap mekim gut bel bilong ol man long taim bilong disasta?

Paslain liklik long Jisas i dai, em i toktok wantaim 4-pela disaipel bilong em​—​Pita, Jems, Jon, na Andru. Taim Jisas i tok profet long mak we i soim olsem em i kam i stap long taim bilong las de, em i kamapim wanpela bikpela askim: “Husat tru em i gutpela wokboi i gat savetingting? Bosman bilong en i bin makim em long lukautim ol arapela wokboi na givim kaikai long ol long taim stret.” (Matyu 24:3, 45; Mak 13:3, 4) Olsem “bosman” bilong ol, Jisas i tokim ol disaipel bilong em olsem em bai makim sampela long taim bilong las de long givim kaikai long ol disaipel, olsem ol gutpela tok i kam long God. Husat i insait long dispela wokboi i gat savetingting?

Em sampela disaipel bilong Jisas em God i bin makim ol long holi spirit. Dispela wokboi em Gavening Bodi bilong ol Witnes Bilong Jehova. Long taim stret bilong en, dispela “wokboi” bai givim ol gutpela tok i kam long Jehova long ol lain i lotuim em. Long rot bilong dispela gutpela wokboi i gat savetingting, mipela i save kisim ‘kaikai inap long mipela long taim stret.’—Luk 12:42.

Wokboi i lukautim lain bilong God. (1 Timoti 3:15) Jisas i givim bikpela wok long wokboi i gat savetingting long lukautim oganaisesen bilong Jehova hia long graun—olsem ol Haus Kingdom, ol Haus Kibung na ol brens ofis samting. Ol i stiaim wok autim tok, na skulim mipela long rot bilong kongrigesen. Olsem na bilong givim mipela ol samting mipela i nidim long taim stret, “gutpela wokboi i gat savetingting” i givim ol gutpela tok i kam long God long rot bilong ol buk na nius mipela i tilim, na tu, long rot bilong ol tok i kamap long ol miting na kibung bilong mipela.

Dispela wokboi i stap gut long tok i tru bilong Baibel na long wok bilong en long autim gutnius, na em i bihainim savetingting taim em i lukautim olgeta samting bilong Krais hia long graun. (Aposel 10:42) Jehova i blesim hatwok bilong dispela wokboi na em inap kamapim planti gutpela tok i kam long God.—Aisaia 60:22; 65:13.

• Jisas i makim husat long givim ol gutpela tok i kam long God long ol disaipel bilong em?

• Dispela wokboi i stap gut long wanem samting, na olsem wanem em i bihainim savetingting?

Long taim bilong ol aposel, wanpela liklik lain, “ol aposel na ol hetman long Jerusalem” i bosim ol Kristen. Ol i wokim ol bikpela disisen bilong kongrigesen Kristen God i bin makim. (Aposel 15:⁠2) Bilong ol i ken wanbel na wokim disisen, pastaim ol i skelim ol tok long buk bilong God na larim spirit bilong God i stiaim ol. (Aposel 15:25) Gavening Bodi i bihainim wankain pasin long nau.

God i yusim dispela lain bilong mekim laik bilong em. Ol brata em holi spirit i makim ol na ol i insait long lain Gavening Bodi, ol i gat bikpela laik long save gut long Tok Bilong God. Ol i gat ekspiriens long stretim gut wok bilong mipela, na bekim ol askim long sait bilong lotu. Ol i save bung long olgeta wik na skelim ol samting lain bratasista long olgeta hap i nidim. Olsem long taim bilong ol aposel, ol i givim ol tok em Baibel i as bilong en long rot bilong ol pas, ol wasman raun, o ol arapela. Dispela bai helpim lain bilong God long tingting na mekim ol samting long pasin wanbel. (Aposel 16:​4, 5) Gavening Bodi i bosim wok bilong redim ol buk na nius bilong Baibel, strongim olgeta long mekim wok bilong autim tok bilong Kingdom, na i bosim wok bilong makim ol brata long mekim wok.

Dispela lain i larim spirit bilong God i stiaim ol. Gavening Bodi i askim King Bilong Heven na Graun, em Jehova, na Het bilong kongrigesen, em Jisas, long stiaim wok bilong ol. (1 Korin 11:3; Efesus 5:23) Ol memba bilong dispela lain i no tingim ol yet olsem ol lida bilong lain bilong God, nogat. Dispela lain wantaim olgeta Kristen God i bin makim, ol i save ‘bihainim Pikinini Sipsip [Jisas] maski wanem hap em i go long en.’ (Revelesen 14:⁠4) Gavening Bodi i tenkyu long yumi taim yumi tingim ol na wok bilong ol long beten bilong yumi.

•  Husat i bosim ol Kristen long taim bilong ol aposel?

•  Lain Gavening Bodi long nau i mekim wanem na bai God i stiaim wok bilong ol?

Long tok Hibru, Betel i makim “haus bilong God.” (Stat 28:17, 19) Dispela nem i stret long ol bilding em ol Witnes Bilong Jehova i wokim long olgeta hap bilong graun. Long ol dispela bilding, ol i save stiaim na sapotim wok bilong autim tok. Gavening Bodi i wok long hetkota long New York, Amerika, na ol i bosim wok bilong ol brens ofis i stap long planti kantri. Ol lain i wok long ol brens ofis, ol i kolim ol olsem Betel famili. Olsem wanpela famili, ol i stap na wok wantaim, kaikai wantaim, na ol i stap wanbel na stadi long Baibel.—Song 133:1.

Em wanpela spesel ples we Betel famili i givim ol yet bilong helpim wok. Long olgeta brens ofis, i gat ol Kristen man na meri husat i givim bel long mekim laik bilong God na helpim wok bilong Kingdom fultaim. (Matyu 6:33) I no gat wanpela bilong ol i kisim pe long wok, nogat, tasol olgeta i gat ples slip na kaikai, na ol i kisim liklik mani bilong baim ol samting bilong ol yet. Olgeta long Betel i gat wok, sampela i wok long ofis, sampela long haus kuk, o daining rum, long ples bilong prinim na wokim ol buk na magasin, klinim haus, wasim klos, wok meintenens, na ol narapela wok.

Em wanpela bisi ples i helpim wok bilong autim tok bilong Kingdom. Nambawan wok bilong olgeta Betel em bilong stretim rot na bai planti man tru inap save long tok i tru bilong Baibel. Dispela buklet em wanpela bilong ol samting ol Betel i wokim bilong helpim ol man. Gavening Bodi i bosim wok bilong raitim dispela buklet, na planti handret trenslesen tim i stap long olgeta hap bilong graun i kisim ol tok bilong en long rot bilong kompiuta, na long sampela Betel i gat ol bikpela printa masin na ol i prinim dispela buklet, na salim i go long winim 110,000 kongrigesen. Taim ol i mekim ol dispela wok, ol Betel famili i sapotim nambawan bikpela wok—em wok bilong autim gutnius.—Mak 13:10.

• Husat i wok long Betel? Ol i kisim wanem ol helpim long sait bilong skin?

• Olgeta Betel i sapotim wanem bikpela wok?

Lain insait long Betel famili i save wok long narapela narapela dipatmen, ol i lukautim wok bilong autim tok long wanpela o planti kantri. Sampela i wok long ol trenslesen tim, prinim ol magasin, wokim ol buk, bungim na salim ol buk na nius i go, wokim ol rekoding na DVD samting, o lukautim ol narapela wok.

Brens Komiti i bosim wok. Gavening Bodi i putim wok bilong lukautim brens ofis long han bilong Brens Komiti. Insait long komiti i gat 3-pela o sampela elda moa husat i winim mak bilong mekim wok. Brens Komiti i toksave long Gavening Bodi long wok i go bikpela olsem wanem long dispela kantri em komiti i lukautim, na tu, ol i toksave long ol hevi we inap kamap. Ol kain ripot olsem i helpim Gavening Bodi long save long wanem ol tok i gutpela long stori long en long ol magasin, na long ol miting na kibung. Ol mausman bilong Gavening Bodi, ol i save visitim ol brens ofis na helpim Brens Komiti long mekim wok bilong ol. (Sindaun 11:14) I gat spesel program i save kamap we mausman bilong hetkota i mekim tok bilong strongim olgeta bratasista i stap long hap em brens i bosim.

Brens i sapotim ol kongrigesen. Ol brata long brens ofis i givim tok orait long kamapim ol nupela kongrigesen. Ol brata i bosim tu wok bilong ol painia, ol misineri, na ol wasman sekit husat i wok long hap em brens i bosim. Ol i stretim ol kibung, wok bilong sanapim ol nupela Haus Kingdom, na salim ol buk na nius i go long ol kongrigesen. Olgeta wok ol i mekim long brens ofis, i helpim ol kongrigesen na bai wok autim tok bilong ol i ken ron gut.​—1 Korin 14:​33, 40.

•  Olsem wanem Brens Komiti i helpim Gavening Bodi?

•  Brens ofis i lukautim wanem ol wok?

Bilong autim “gutnius” long “olgeta kantri, na olgeta lain, na olgeta tokples, na olgeta lain pipol,” mipela i save wokim ol buk na nius long winim 700 tokples. (Revelesen 14:6) Olsem wanem mipela inap mekim dispela bikpela wok? Bilong mekim olsem, mipela i gat ol man bilong raitim ol atikol em ol i stap long planti kantri na mipela i gat winim 3,300 trensleta—olgeta i Witnes Bilong Jehova.

Pastaim ol i raitim ol tok long tok Inglis. Gavening Bodi i bosim wok bilong Dipatmen Bilong Raitim Tok i stap long hetkota bilong mipela. Dispela dipatmen i givim ol asainmen long ol brata bilong raitim ol atikol, na ol i stap long hetkota na long sampela brens ofis. Ol dispela brata bilong raitim ol atikol ol i bilong kain kain hap, olsem na ol buk na nius bilong mipela i gat ol stori bilong kain kain kalsa, na ol man bilong olgeta hap i amamas long ritim.

Ol i salim ol atikol i go long ol trensleta. Taim ol i stretim pinis ol atikol na Gavening Bodi i givim tok orait long ol, orait ol bai salim ol atikol long rot bilong kompiuta i go long ol trenslesen tim long olgeta hap. Ol trensleta bai tanim tok, sekim gut, na ritim na skelim gut tok ol i tanim. Ol i wok strong long yusim ol “trupela tok” we bai kamapim gut mining bilong tok Inglis long tokples ol i tanim tok long en.—Saveman 12:10.

Ol kompiuta i hariapim wok. Ol kompiuta i no inap kisim ples bilong ol man i raitim tok na ol man i tanim tok. Tasol ol kompiuta program i helpim ol long mekim hariap wok bilong ol. Ol Witnes Bilong Jehova i bin wokim wanpela kompiuta program ol i kolim MEPS (Multilanguage Electronic Publishing System). Long rot bilong en, ol inap raitim tok bilong planti handret tokples, putim ol piksa, na redim bilong prinim.

Bilong wanem mipela i mekim kain bikpela wok olsem, maski mipela i mas tanim tok i go long ol tokples em sampela tausen manmeri tasol i save mekim? Mipela i mekim olsem, bikos Jehova i laik “kisim bek olgeta kain man na em i laik bai ol i kisim stretpela save long tok i tru.”—1 Timoti 2:3, 4.

• Wanem ol samting i insait long wok bilong raitim ol buk na nius bilong mipela?

• Bilong wanem mipela i tanim ol buk na nius bilong mipela long planti tokples tru?

Oganaisesen bilong mipela i save wokim na tilim planti handret milion Baibel na ol narapela buk na nius long olgeta yia, na mipela i no askim ol man long baim. Mipela i save wokim na lukautim ol Haus Kingdom na ol brens ofis. Mipela i sapotim planti tausen bratasista i wok long Betel na ol misineri, na mipela i helpim ol man long taim bilong disasta. Olsem na ating yu tingting, ‘Ol Witnes i kisim mani we bilong mekim ol dispela samting?’

Mipela i no salim plet, o askim ol man givim long namba 10 hap. Tru, mipela i tromoi bikpela mani bilong sapotim wok autim tok, tasol mipela i no save singaut long mani. Winim 100 yia i go pinis, namba 2 Wastaua ol i bin wokim i tokaut olsem mipela i bilip olsem Jehova bai sapotim mipela, na mipela “bai no askim o singautim ol man long givim mani”—na tru tumas, mipela i no bin mekim olsem!—Matyu 10:8.

Mani ol man i givim long laik bilong ol yet i sapotim wok bilong mipela. Planti man i amamas long wok bilong mipela long skulim ol man long Baibel, na ol i givim mani bilong helpim dispela wok. Ol Witnes yet i amamas long givim taim, strong, na mani samting bilong ol, bilong mekim laik bilong God long olgeta hap bilong graun. (1 Stori 29:9) Long Haus Kingdom na long ol kibung bilong mipela, i gat ol kontribiusen boks we ol man husat i laik sapotim wok bilong mipela, ol i ken putim mani long en. Bikpela hap mani i kam long ol lain i no maniman, olsem wido meri em Jisas i tok amamas long en, dispela meri i putim 2-pela liklik koin long bokis mani bilong tempel. (Luk 21:1-4) Olsem na olgeta kain man inap “putim sampela mani i stap” bilong givim “samting ol i pasim tok long bel long givim.”—1 Korin 16:2; 2 Korin 9:7.

Mipela i bilip olsem Jehova bai wok yet long kirapim bel bilong ol man husat i laik ‘kisim ol namba wan hap kaikai i mau na givim long Bikpela bilong givim biknem long em,’ na long dispela rot ol i sapotim wok bilong Kingdom bambai laik bilong Jehova i ken kamap.—Sindaun 3:9.

• Wanem samting i mekim na oganaisesen bilong mipela i narapela kain long ol narapela lotu?

• Mipela i save mekim wanem long mani ol man i givim long laik bilong ol yet?

Olsem dispela nem Haus Kingdom i makim, nambawan tok bilong Baibel mipela i save toktok long en long Haus Kingdom, em Kingdom Bilong God—em bikpela tok Jisas i bin autim.—Luk 8:1.

Ples bilong mekim lotu i tru. Haus Kingdom em ples we mipela i save stretim wok bilong autim gutnius bilong Kingdom. (Matyu 24:14) Sais na stail bilong ol Haus Kingdom i narapela narapela, na ol i no gat planti bilas long en na ol i no traipela tru. Planti taim i gat planti kongrigesen i yusim wanpela Haus Kingdom. Inap sampela yia nau, mipela i bin sanapim planti tausen nupela Haus Kingdom (olsem 5-pela long olgeta wan wan de), bikos namba bilong ol pablisa na kongrigesen i wok long i go antap. Olsem wanem mipela inap wokim ol Haus Kingdom?—Matyu 19:26.

Mipela i wokim ol long ol kontribiusen ol man i givim. Kongrigesen i salim ol dispela kontribiusen i go long brens ofis na brens inap givim mani long ol narapela kongrigesen i laik sanapim o stretim Haus Kingdom. Ol i kisim mani olsem dinau, no gat wok long baim interes.

Olgeta kain lain i volantia na insait long wok bilong sanapim ol Haus Kingdom. Long planti kantri, i gat ol Grup Bilong Sanapim Ol Haus Kingdom. Ol konstraksen tim na ol volantia bilong wokim ol Haus Kingdom, i save go long ol narapela kongrigesen insait long wanpela kantri, na long ol longwe ples tu. Ol i helpim ol kongrigesen long ol dispela hap long wokim Haus Kingdom bilong ol. Long sampela kantri ol i makim sampela Witnes long bosim wok bilong sanapim na stretim ol Haus Kingdom long wanpela hap. Maski i gat planti brata bilong dispela eria i gat save long wok na ol i volantia, bikpela wok tru em ol bratasista bilong kongrigesen yet i mekim. Spirit bilong Jehova na pasin bilong lain bilong em long givim bel long wok i mekim na ol dispela samting inap kamap.—Song 127:1; Kolosi 3:23.

• Bilong wanem mipela i kolim ol ples bilong mekim lotu olsem Haus Kingdom?

• Olsem wanem mipela inap sanapim ol Haus Kingdom long olgeta hap bilong graun?

Nem holi bilong God i stap long olgeta Haus Kingdom bilong ol Witnes Bilong Jehova. Olsem na mipela i pilim olsem wok bilong klinim na stretim gut dispela haus i wanpela gutpela wok tru, na em i wanpela bikpela hap bilong wok lotu bilong mipela. Olgeta i ken insait long dispela wok.

Volantia long klinim Haus Kingdom bihain long miting. Bihain long olgeta miting, ol bratasista i amamas long klinim Haus Kingdom. Wanpela taim long wik, mipela i save klinim gut Haus Kingdom. Wanpela elda o kongrigesen sevan i bosim dispela wok, planti taim ol i bihainim wanpela lista i kolim ol wok mipela i mas mekim. Ol bratasista i save volantia long swipim na mopim plua, rausim das, stretim ol sia, klinim toilet, wasim ol windo na mira, rausim pipia, na katim gras na klinim banis. Mipela i makim wanpela de long yia long mekim bikpela wok bilong klinim Haus Kingdom. Mipela i kirapim ol pikinini bilong mipela long insait long mekim sampela wok, na dispela i skulim ol long rispektim ples bilong mipela long mekim lotu.​—Saveman 5:1.

Volantia long mekim wok meintenens. Long olgeta yia, ol brata i save sekim gut insait na ausait bilong Haus Kingdom. Sapos samting i bruk, mipela i save mekim wok meintenens na bai Haus Kingdom i stap gut, na mipela i no tromoi nating bikpela mani. (2 Stori 24:13; 34:10) Haus Kingdom i klin na i stap stret, i gutpela ples bilong lotuim God bilong mipela. Taim mipela i insait long dispela wok, mipela i soim olsem mipela i laikim tru Jehova na lotu i bikpela samting long mipela. (Song 122:1) Ol manmeri long komiuniti tu i amamas long lukim klinpela Haus Kingdom.​—2 Korin 6:3.

•  Bilong wanem mipela i mas lukautim gut ples bilong mekim lotu?

•  Olsem wanem mipela i stretim wok bilong klinim Haus Kingdom?

Olsem wanem? Yu laik mekim sampela wok painimaut bilong kisim sampela save moa long Baibel? Yu laik save gut moa long wanpela skripsa, wanpela man, wanpela ples, o wanpela samting em Baibel i stori long en? O yu laik save sapos Tok Bilong God inap helpim yu long karim hevi bilong yu o nogat? Sapos olsem, yu ken yusim laibreri bilong Haus Kingdom.

Laibreri i gat ol samting i helpim yu long mekim wok painimaut. Ating yu no gat olgeta buk na nius bilong Baibel em ol Witnes Bilong Jehova i bin wokim long tokples bilong yu. Tasol laibreri bilong Haus Kingdom i gat ol nupela buk na nius bilong mipela. Ating long laibreri i gat ol narapela narapela Baibel trenslesen, gutpela dikseneri, na sampela narapela buk. Yu ken yusim laibreri paslain na bihain long miting. Sapos i gat kompiuta long laibreri, ating kompiuta i gat Watchtower Library long en. Dispela em i wanpela kompiuta program i gat planti buk na nius bilong mipela long en, na i isi long yusim bilong mekim wok painimaut long wanpela tok o skripsa.

Laibreri i helpim ol sumatin bilong Skul Tiokratik Bilong Autim Tok. Sapos yu insait long skul, ating yu inap mekim gutpela wok long laibreri bilong Haus Kingdom taim yu redim tok bilong yu. Wasman skul i lukautim laibreri. Em wok bilong em long stretim gut ol buk samting na putim ol nupela buk na nius long laibreri. Wasman skul o Baibel tisa bilong yu inap soim olsem wanem yu inap mekim wok painimaut. Tasol no ken kisim na karim i go ol buk i stap long laibreri. Na taim yu ritim ol dispela buk, holim gut na no ken putim sampela mak long en.

Baibel i tok olsem bilong “save gut long God,” yumi mas redi long painim dispela kain save olsem yumi painim “mani samting ol i bin haitim.” (Sindaun 2:​1-5) Laibreri bilong Haus Kingdom inap helpim yu long mekim olsem.

•  Laibreri bilong Haus Kingdom i gat wanem ol samting bilong helpim yumi long mekim wok painimaut?

•  Husat inap helpim yu long yusim laibreri?

Jisas Krais i tokim ol disaipel bilong em olsem: “Lait bilong yupela i mas stap ples klia long ai bilong ol man, na bai ol inap lukim ol gutpela wok bilong yupela na givim glori long Papa bilong yupela long heven.” (Matyu 5:16) Bilong mekim olsem, mipela i save mekim gutpela wok long teknoloji, na Intenet tu. Web-sait bilong mipela long Intenet, jw.org, i givim save long ol man long ol bilip na wok bilong ol Witnes Bilong Jehova. Wanem ol samting i stap long dispela Web-sait?

Ol bekim bilong Baibel long ol askim planti man i gat. Yu inap painim bekim bilong ol bikpela askim ol man i gat. Bekim bilong 6-pela kain askim olsem i stap long liklik nius Yu Laik Save Long Tok i Tru?, we i stap nau long Web-sait bilong mipela long winim 400 tokples. Na tu, dispela Web-sait i gat Baibel New World Translation long winim 100 tokples na i gat planti buk bilong stadi long Baibel, olsem buk Tru Tru Baibel i Tok Wanem? na ol nupela Wastaua na Kirap!x Yu inap ritim o harim rekoding bilong planti bilong ol dispela buk na nius, na tu, yu ken daunlodim long odio, PDF o EPUB format. Yu inap prinim tu sampela pes na givim long wanpela man long tokples bilong em yet! I gat ol buk na nius i stap long vidio long planti tokples sain. Yu inap daunlodim Baibel ritim, ol Baibel drama, na ol naispela musik bilong yu ken harim.

Ol stori tru long wok bilong ol Witnes Bilong Jehova. Long dispela Web-sait i gat tu ol sotpela vidio na stori long wok bilong mipela long olgeta hap, na ol samting i painim ol Witnes Bilong Jehova, na ol stori bilong rilif wok mipela i save mekim. I gat toksave bilong ol kibung bai kamap na atres bilong ol brens ofis bilong mipela.

Long ol dispela rot, mipela i mekim lait bilong tok i tru i kamap klia long ol longwe hap bilong graun. Ol manmeri bilong olgeta kontinen, na Antaktika tu, i kisim helpim. Mipela i beten olsem “tok bilong Jehova i ken wok yet long spit i go” long olgeta hap bilong graun, bilong litimapim nem bilong God.—2 Tesalonaika 3:1.

• Olsem wanem jw.org i helpim planti manmeri moa long kisim save long tok i tru bilong Baibel?

• Yu laik lukim wanem samting long Web-sait bilong mipela?