Pas i Kam Long Meksiko
“Yu Ting Jehova i Laikim Tru Mipela Maski Mipela i Indian?”
MELESIO, wanpela man i save mekim tokples bilong lain O’dam, sampela taim em i bin lusim ples maunten na i kam painim wok. Em i bin go long ol miting Kristen na kisim ol buk bilong Baibel i go bek bilong givim long lain bilong em. Em i laik tru bai wanpela i go lukim ol na skulim ol long Baibel.
Lain O’dam i save stap longwe tru long ples maunten long hap not bilong sentral Meksiko—inap 240 kilomita longwe long wanpela kongrigesen bilong ol Witnes Bilong Jehova. Mipela sampela i pasim tok long i go lukim ol.
Mipela i kisim wanpela trak, ol haus sel, blanket, kaikai na petrol bilong yusim long 3-pela de, na mipela i lusim biktaun Durango na i go. Kirap long 4 klok moning, mipela i draiv inap 8-pela aua long maunten rot i go inap long pinis bilong rot. Em maus rot i go long ples bilong lain O’dam. Mipela i mas wokabaut long ples i daun tru na bihain kalapim gen narapela maunten.
Mipela i lusim trak long wanpela viles i stap arere long rot na karim ol kago bilong mipela na wokabaut inap 3-pela aua i go long wanpela ples daun. Mipela i wokim kem long dispela hap na kisim paiawut na wokim paia bilong sakim ol wel animal, na mipela i slip inap 3-pela 3-pela aua bambai mipela i ken was long paia.
Long bikmoning, mipela i kirap wokabaut i go antap long maunten. I gat planti rot na sampela taim mipela i paul long rot. Wanpela bilong mipela i save liklik long mekim tokples bilong lain O’dam, olsem na mipela i autim tok bilong Baibel long ol man i stap long ol haus arere long rot. Mipela i kirap nogut taim ol man i tokim mipela olsem i gat sampela manmeri long Los Arenales—em ples mipela i laik go long en—i kolim ol yet olsem Witnes Bilong Jehova, na ol i save mekim ol miting bilong Baibel. Mipela i kirap nogut long dispela, tasol dispela i strongim mipela.
Taim mipela i kamap long Los Arenales, mipela i gat ol blista long lek. Dispela viles i gat ol brik haus na rup ol i wokim long ol katon—i no gat skul na pawa. Ol i stap longwe tru long ol narapela man na ol manmeri i stap rabis tru, ol i save kaikai tasol bret ol i wokim long kon na sampela liklik kaikai ol inap kamapim. Mipela i bungim Melesio, wanpela yangpela man husat i amamas tru long lukim mipela. Em i singautim mipela i go long haus bilong em na em i tokim mipela olsem em i save beten long olgeta de bambai Jehova i ken salim ol Witnes i kam skulim famili na wanlain bilong em long Baibel. Em i pilim olsem em i no inap bekim olgeta askim bilong ol man.
Lain O’dam i save lotuim ol spirit. Ol i save yusim samting bilong lukautim man olsem ol gras na bun bilong tarangau, lotuim san na ren samting, na ol i save pret tru long ol glasman inap nogutim ol. Melesio i tok taim em i raun i go long biktaun, em i kisim save olsem Jehova em i God tru, na em i bagarapim na rausim olgeta samting bilong lotuim ol giaman god. Olgeta manmeri long komiuniti i ting ol god bai kilim em i dai. Taim dispela samting i no kamap, ol i luksave olsem Jehova i gat bikpela strong moa winim ol god bilong ol. Orait, ol i kirap kam long ol Baibel stadi em Melesio i mekim wantaim famili bilong em long rot bilong ol buk na nius bilong yumi.
Melesio i tok: “Mi tokim ol olsem pastaim ol i mas kukim olgeta paspas na imis bilong ol.” Planti i lusim pasin bilong pret long ol spirit nogut, na namba bilong ol manmeri i kam bung i go antap winim 80. Mipela i amamas long dispela, olsem na mipela i laik mekim wanpela miting long dispela apinun. Long rot bilong ol man i save raun long hos, mipela i salim tok long ol man i save kam bung oltaim long haus bilong Melesio. Maski em namel long wik na mipela i toksave nau tasol, 25 manmeri i kam, sampela i wokabaut na sampela i kam long donki.
Ol man i kamapim ol askim na mipela i bekim long Baibel, na Melesio i tanim tok. Ol i givim kain askim olsem: “Yu ting Jehova i laikim tru mipela maski mipela i Indian?” “Em i save harim beten long tokples bilong mipela?” “Taim Armagedon i kamap, Jehova bai tingim mipela maski mipela i stap longwe tru long ol biktaun?” Mipela i amamas long soim ol dispela manmeri i gat pasin daun long ol tok bilong Baibel olsem Jehova i save tingim tru ol man i daunim nem bilong ol yet, maski ol i mekim wanem tokples o ol i stap long wanem hap. Ol i askim mipela long salim wanpela i kam bilong skulim ol moa.
Bihain long miting, mipela i serim kaikai bilong mipela wantaim ol dispela nupela pren. Long nait, dispela ples antap long maunten i kol tru, olsem na mipela i amamas taim ol i givim wanpela rum long mipela bilong slip long en. Long neks moning, ol i kisim mipela long wanpela sot kat rot i go daun long hap em trak i stap long en, na mipela i go bek long Durango, mipela i taiet, tasol mipela i amamas.
Em i gutpela samting tru long bungim ol dispela gutpela manmeri, planti bilong ol i no inap rit o rait o mekim tokples Spen, tasol ol i laik kisim save long God tru na lotuim em! Bihain long dispela raun bilong mipela, 6-pela Witnes i bin go long dispela komiuniti na i stap 3-pela wik. Ol i helpim 45 manmeri husat i laik mekim wok bilong Jehova. Olgeta dispela manmeri i save kam long olgeta miting.
Narapela gutpela samting em olsem: Liklik stua i stap long Los Arenales i no salim moa ol sigaret, long wanem, planti manmeri i kirap stadi long Baibel na ol i lusim smok. Na tu, planti bilong ol i kirap stretim marit bilong ol.
[Piksa long pes 24]
Melesio wantaim meri bilong em, 4-pela pikinini meri, na tambu mama bilong em
[Ol Piksa long pes 25]
Baibel stadi na miting Kristen long Los Arenales
[Piksa Kredit Lain long pes 25]
Servicio Postal Mexicano, Correos de Mexico