Askim Bilong Ol Rida
Wanem taim wok autim tok yumi mekim long nau bai pinis?
Jisas i tok: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.” (Mat. 24:14) Dispela tok “pinis” long dispela ves, na long ves 6 na 13, long tok Grik ol i tanim olsem teʹlos. Em i makim pinis bilong graun bilong Satan long pait bilong Armagedon. (Rev. 16:14, 16) Olsem na yumi bai wok yet long autim gutnius i go inap long haptaim klostu long pait bilong Armagedon i kirap. Dispela i senisim save yumi gat pinis.
Pastaim yumi bin tok olsem yumi bai stop long autim gutnius taim traipela hevi tru i kirap, em long taim Bikpela Babilon i bagarap na pinis olgeta. (Rev. 17:3, 5, 15, 16) Yumi bilip olsem taim traipela hevi tru i kirap, dispela bai makim pinis bilong “yia bilong Jehova i mekim gut long ol manmeri.” (Ais. 61:2) Na tu, yumi ting olsem ol lain em ol i abrusim bagarap bilong traipela hevi tru, ol i bin soim pinis olsem ol i stap gut long Jehova paslain long dispela bikpela hevi i kirap. Yumi bin tok ol i wankain olsem ol Juda em ol i abrusim bagarap taim Jerusalem i bagarap long 607 B.C.E. Ol dispela manmeri i bin kisim mak bilong abrusim bagarap bikos paslain long dispela bikpela hevi i kamap, ol i bin lotuim Jehova na ol i heitim ol pasin nogut. (Ese. 5:11; 9:4) Tasol dispela tingting i no stret wantaim tok bilong Jisas long Matyu 24:14 we i soim olsem rot i op yet long ol manmeri i ken bilip long gutnius i go inap long haptaim klostu long taim bilong pinis, em long pait bilong Armagedon.
Nupela save yumi kisim long Matyu 24:14 i senisim tu save yumi gat long tok profet i stap long Revelesen 16:21, we i stori long strongpela tok yumi bai autim i olsem ren ais. Sampela moa wok painimaut i kamapim klia olsem dispela tupela skripsa i sapotim narapela narapela. Wai na yumi tok olsem? Bikos Baibel i stori long pasin ol manmeri bai mekim taim ol i harim gutnius bilong Kingdom. Aposel Pol i tok, “ol man em God bai kisim bek ol,” tok yumi autim em i gutnius long ol na “i olsem smel bilong laip.” Tasol long ol birua bilong God, dispela em i nius nogut long ol na “i olsem smel bilong dai.” (2 Kor. 2:15, 16) Ol i heitim gutnius bilong Kingdom bikos em i kamapim klia olsem dispela graun ol i laikim i pulap long ol pasin nogut, em i stap aninit long wok bos bilong Satan, na klostu taim em bai bagarap na pinis olgeta.—Jon 7:7; 1 Jon 2:17; 5:19.
Yumi luksave tu olsem dispela tok piksa bilong ren ais em Revelesen 16:21 i stori long en, em bai kamapim “bikpela bagarap tru.” So long taim bilong traipela hevi tru, ating yumi bai autim strongpela tok tru, dispela i makim olsem yumi bai kamapim klia nem bilong Jehova winim olgeta narapela taim bipo. (Ese. 39:7) Long dispela taim—bihain long Bikpela Babilon i bagarap—yu ting sampela manmeri bai laikim tok yumi autim wankain olsem ol i laikim wanpela naispela smel? Dispela samting inap kamap. Ating ol bai tingim i go bek o kisim save olsem planti yia i go pinis, ol Witnes Bilong Jehova i bin tokaut olsem olgeta lotu giaman bai bagarap na pinis olgeta.
Skelim samting i bin kamap long Isip bihain long Tenpela Bikpela Hevi i bin kamap. Bihain long Jehova i “mekim save long olgeta god bilong ol Isip,” “planti kain kain lain manmeri” em ol i no bilong lain Israel, ol i joinim ol manmeri bilong em. (Kis. 12:12, 37, 38) Ating ol dispela manmeri i kirap bilip long Jehova taim ol i lukim tok lukaut Moses i bin mekim long Tenpela Bikpela Hevi i kamap tru.
Ol manmeri em ol i bilip long Jehova bihain long Bikpela Babilon i bagarap, rot bai op long ol inap sapotim ol brata bilong Krais em ol i stap yet long graun long dispela taim. (Mat. 25:34-36, 40) Wok bilong skelim ol manmeri olsem ol i sipsip o nogat bai pinis paslain liklik long pait bilong Armagedon i kirap, em long taim ol Kristen God i makim em ol i stap yet long graun i go long heven.
Dispela nupela save yumi kisim i kamapim klia bikpela pasin laikim na pasin marimari bilong Jehova. Yes, “em i no laik bai wanpela i kisim bagarap. Em i laik bai olgeta i tanim bel.”—2 Pita 3:9.