Bilong Helpim Ol Meri Em Ol Narapela i Mekim Nogut Long Ol

Ol dispela tok i stap long fes paragraf bilong atikol “Seifti Bilong Ol Meri—Tok Baibel i Mekim Long Dispela” long jw.org. Wanpela link i stap long pinis bilong dispela atikol bai helpim yu long daunlodim PDF bilong dispela atikol, na yu ken foldim i go long 4-pela hap bilong mekim i kamap olsem wanpela liklik nius. Wanpela sista nem bilong em Stacey long Amerika, em i tok: “Mi wantaim wanpela sista i prinim ol kopi bilong dispela nius na karim i go long wanpela hap em ol meri tasol i save stap long en long teritori bilong kongrigesen bilong mipela.”

Wanpela wokmeri long dispela hap i askim mipela sapos mipela inap prinim sampela moa kopi bilong dispela liklik nius na karim i go long ol meri i save stap long dispela hap. So mipela i bringim 40 liklik nius na 30 kontek kat na givim long ol. Long neks visit bilong mipela, maneja bilong dispela hap i askim mipela long soim ol meri long dispela hap long pasin bilong mekim Baibel stadi.

Stacy na tupela narapela sista i mekim wankain wok long narapela hap em ol meri i save stap long en na ol i tilim 5-pela kopi bilong dispela liklik nius na ol meri i askim long kisim sampela moa. Wanpela wokmeri i tok: “Dispela liklik nius bai helpim tru ol meri long hia.” Na em i tok moa olsem: “Mipela i nidim tru dispela liklik nius.” Long narapela visit bilong mipela, planti narapela meri i bung wantaim i stap na mipela i soim ol long pasin bilong stadi, na tupela bilong ol i tok ol i gat laik long kam long miting long Haus Kingdom long wiken.

Stacy i tok: “Mipela i amamas tru long lukim hau ol meri i amamas long kisim dispela liklik nius. Taim mipela i prinim na foldim, em i kamap olsem naispela wei bilong autim gutnius bilong Kingdom long ol meri em ol narapela i mekim nogut long ol. Mipela i pilim tru pasin bilong ol long putim gut yau na amamas long ritim nius, na mipela i amamas long lukim hau Jehova bai blesim wok bilong mipela long painim ol kain meri olsem na autim gutnius long ol.”