Xingheniso

Buku leyi ya Matsalwa Ya Mahanyelo Ya Vakreste yi ta endla swi ku olovela ku kuma tindzimana ta le Bibeleni ni swiendlakalo leswi nga ta ku pfuna u kota ku hlula mintlhontlho leyi u langutanaka na yona. Yi ta tlhela yi ku pfuna u kuma tindzimana ta le Bibeleni leti nga khutazaka van’wana ni ku va pfuna va kota ku endla swiboho leswi nga ta dzunisa Yehovha. Hlawula nhokomhaka leyi ku tsakisaka. Nhlokomhaka ha yin’we yi ni swivutiso leswi pfunaka ni tinhlamuselo to koma ta swiendlakalo swa le Bibeleni. (Vona bokisi nhlokomhaka leyi nge, “Ndlela Yo Tirhisa Buku Leyi.”) U ta kuma matsalwa lama nga ta ku nyika switsundzuxo ni nchavelelo lowu u wu lavaka. Nakambe u ta kuma minsinya ya milawu ya le Bibeleni leyi u nga yi tirhisaka ku pfuna ni ku khutaza van’wana.

Ndlela yo Tirhisa Buku Leyi

Loko u lava ku kuma nhlokomhaka yo karhi, u nga yi secha kunene kumbe u ya eka nxaxamelo wa tinhlokomhaka. Buku leyi ya Matsalwa ya Mahanyelo ya Vakreste yi ni swiyenge leswi swa nkombo: Mintlhontlho, Mahanyelo, Vandlha, Vutomi Bya Siku Ni Siku, Ndyangu, Vuxaka Bya Hina Na Yehovha na Vumunhu. Eka xin’wana xa swiyenge sweswo u ta kuma nhlokomhaka leyi u yi lavaka. Nghena eka xiyenge kutani u hlawula nhlokomhaka leyi u yi lavaka. Loko u nga tiyiseki leswaku u ta tikuma kwihi tinhlokomhaka leti u titsakelaka, nghena eka swiyenge Hinkwaswo kutani u hlawula nhlokomhaka leyi u yi lavaka. Eka tinhlokomhaka tin’wana, u ta kuma tinhlakulu leti byihatiweke. Tin’wana i swivulwa; tin’wana i swivutiso. Loko u ri karhi u hlaya tindzimana leti byihatiweke leti nga ehansi ka nhlokomhaka, ehleketisisa hi ndlela leyi tiseketelaka xivulwa kumbe tihlamulaka xivutiso hayona. Tinhlokomhaka tin’wana tiavanyisiwe hi swiyenge leswaku u ta hatla u kuma rungula leri u ri lavaka. Mikarhi yin’wana ku hoxiwa xiga lexi nge, “Nakambe vona” leswaku ku hoxiwa matsalwa lama engetelekeke. Leswi swi ku pfuna ku kuma matsalwa man’wana lama fambisanaka ni leswi ku dyondziwaka hiswona. Mikarhi yo tala u ta kuma xiyenge lexi nge, “Swikombiso swa le Bibeleni leswi nga hi pfunaka.” Endzhaku ka xivulwa xexo ku ni xivulwa lexi hlamuselaka yinhlakulu ya matsalwa lama kombisiweke. Xivulwa xexo xi ta ku pfuna u tiva leswi u nga swi kumaka loko u ri karhi u hlaya matswala wolawo.

Buku leyi a yi xaxameti matsalwa hinkwawo lama vulavulaka hi nhlokomhaka leyi nyikeriweke. Ku ri na sweswo, i masungulo ya kahle yo endla ndzavisiso. (Swiv 2:1-6) Leswaku u endla ndzavisiso, tirhisa swikombo swa matsalwa na study notes xa xinghezi eka New World Translation of the Holy Scriptures. Leswaku u dyondza swo tala hi nhlamuselo ya matsalwa ni ndlela leyi u nga ma tirhisaka hayona tirhisa Buku leyi nge, Nkongomiso Wo Endla Ndzavisiso Wa Timbhoni Ta Yehovha kumbe Watch Tower Publications Index. Kambisisa minkandziyiso leyi ya ha ku humesiwaka leswaku u vona loko tidyondzo ta kona ti fambisana ni matsalwa lama ha ku antswisiwaka.

Buku leyi ya Matsalwa Ya Mahanyelo Ya Vakreste yi ta ku pfuna u kuma vutlhari, vutivi ni ku twisisa leswi nga eka Matsalwa Yo Kwetsima. Loko u ri karhi u tirhisa buku leyi, u ta ya u tiyiseka leswaku “rito ra Xikwembu ra hanya naswona ri ni matimba.”—Hv 4:12.