Xiviko Xa Vahuweleri Va Mfumo

Ku Andza Ka Timhaka Ta Mfumo eVenezuela

HI MASIKU yo tala ku hisa a ku ri loku tshikilelaka hi ndlela leyi nga tolovelekangiki. Vahundzi va ndlela a va hlamarisiwa hi ku vona vatirhi va tirha ehansi ka dyambu leri hisaka ni vusose laha mani na mani a ta tiwisela endzhutini kumbe endlwini leyi nga ni xiphyuphyisi. Ha kantsongo-ntsongo, tiphuphu ta muako lowuntshwa ti sungule ku humelela. Hi tin’hweti tinharhu ni hafu, vavanuna lava va hetile muako wa swithezi swa mune—xiengetelo lexintshwa xa muako wa rhavi wa Sosayiti ya Watch Tower eLa Victoria, aVenezuela.

Leswi kahle-kahle a ku ri khamba/khambi ra vumbirhi rhavi ra Venezuela ri engeteriwa ku sukela loko ri pfuriwile hi 1946, loko ku ri ni vahuweleri va Mfumo va 13 ntsena etikweni leri. Hi 1977, nhlayo ya vona yi kule ku kondza yi tlula 13 000. Hikokwalaho, muako lowuntshwa wa rhavi wu hetiwile ni ku nyikeriwa eLa Victoria lembe rero. Ku sukela kwalaho, nhlayo ya Timbhoni etikweni leri yi engeteleke ku tlula kambirhi. A wu ri nkarhi wa ku andza nakambe.

Xiengetelo lexintshwa (exineneni endzhaku exifanisweni), ni swikwere-fidi leswi tlulaka 20 000 (1 900 sq m) swa la hansi, swi le henhla ka ntsengo wa vuandlalo bya rhavi kambirhi-mbirhi. Ndlela leyi nghenaka hi le xineneni swinene yi ya egarajini ya mimovha ya 15 hala hansi. Vugandliselo byi susiwile eka muako wa 1977 (muako wo leha exikarhi) byi yisiwa eka filoro yo sungula ya xiengetelo lexintshwa, laha xivandla xa vuhlayisi ni xa vuvatli ni tihofisi tin’wana swi nga kona. Muako lowuntshwa hinkwawo wu endla byetlelo bya ndyangu wa Bethele.

Muako lowuntshwa wu na thanki ra wona n’wini ro hlayisa mati ni muchini wa magezi wa xilamulela mhangu, tanihi leswi ku kayivela ka mati ni ku tsemeka ka gezi swi tolovelekeke exiphen’wini lexi xa misava. Naswona leswaku wu tirhisa masana ya dyambu ya nkarhi hinkwawo ni rimoyana hi xitalo, ndhawu yo hlantswela yi le henhla ka muako.

Xana vanhu va kwalaho va anakanya yini hi muako lowuntshwa ke? Hambi leswi van’wana va hlamarisiwaka hi ku lahleka ka ntanga lowu xongeke lowu a wu ri kwalaho, vo tala va vona muako lowu wu engetela ku xiximeka ka xivumbeko xa vaakelani. Mutsari la tivekaka swinene wa tipulani, la tweke swo tala hi ta muako lowu ku kala a ta a ta tivonela hi yexe, u byele vamakwerhu a ku: “Handle ko tipfinyinga lowu i muako lowu endliweke ku antswa eLa Victoria.” Loyi a nyanyuriweke hi ndlela leyi fanaka a ku ri munjhiniyere wa masipala, loyi hi ku tsaka a humeseke mpfumelelo wa ndhawu ivi a ku: “I ku xixima ku humesa mpfumelelo wa xivandla xa muako wo fana ni lowu.”

Timbhoni eVenezuela ti tsakile hi April 21, 1985, loko 15 802 wa vona va hlengeletanile eValencia ya le kusuhi leswaku va wu nyikela, ni loko 38 059 va hlengeletanile emadorobeni man’wana ya ntlhanu leswaku va twa nongonoko wa kona hi riqingo. Lava veke kona a va tlula nhlayo ya vahuweleri etikweni rero. Va tlangela ni ku tsakela lunghiselelo leri ra Xikwembu ro va ambexa ku antswa leswaku va ma chumayela khwatsi mahungu lamanene ya Mfumo ku nga si fika makumu ya mafambiselo lawa.—Matewu 24:14.