“Ha Va Tlangela Lava Kuleke!”

“SWIKOXA swi ni vutlhari, ni va malembe yo tala, vanhu vo twisisa,” ku vula Yobo. (Yobo 12:12) Solomoni hi ku fanana u xiyile: “Misisi ya timpfu i hari ya šitšhav̌o, yi kumeka endleleni ya ku lulama.” (Swivuriso 16:31) Marito lawa ma vuriwile enkarhini lowu lava kuleke a va dzunisiwa ni ku xiximiwa. Naswona Bibele hi ku phindha-phindha yi komba ndlela leyi vantshwa emasikwini wolawo a va pfuneka ha yona hi ku tolovelana ni lava kuleke.

Hi xikombiso, Ruti u vile ni nkarhi wa malembe yo xiya ni ku vona xikombiso lexi vekiweke hi n’wingi wakwe, Naomi. Ku tolovelana loku ku endle leswaku Ruti a va ni ku navela ko gandzela Yehova. Kutani loko a nyikiwile nkarhi wo hambana na Naomi ivi a tlhelela etikweni ra rikwavo ra vagandzeri va swifaniso, hi ku tiyiseka Ruti u te: “Nḍi ta ya laha u yaka kona, nḍi ta ṭhama laha u nga ta ṭhama kona; tiko ra wena ri ta v̌a tiko ra mina, Šikwembu ša wena ši ta v̌a Šikwembu ša mina.” (Ruti 1:16, 17) Ina, hikwalaho ka xinakulobye xa yena na Naomi, Ruti u vile “nsati lonene.”—Ruti 3:11.

Timotiya a a ri un’wana loyi a pfunekeke hi ku tolovelana ni munhu la kuleke. U hete malembe yo tala a ri karhi a famba na muapostola Pawulo. Ni loko khotso ri va hambanisile, Timotiya u amukele mapapila lama humaka eka Pawulo lama a ma ri xikhutazo xo ‘kondletela nyiko ya Xikwembu’ leyi a yi ri eka Timotiya. (2 Timotiya 1:6-8) Hikwalaho Timotiya u dyondze kahle eka Pawulo lerova loko a tsalela Vafilipiya, Pawulo u hlamusele leswaku u ‘hava un’wana loyi a fanaka na yena [Timotiya] la hisekelaka ku va pfuna hi mbilu hinkwayo ya yena.’—Vafilipiya 2:20.

Namuntlha, hambi swi ri tano, ku xixima lava kuleke ku vonaka ku nyamalarile ematikweni man’wana. Kambe, swi tano exikarhi ka Vakriste ke? Ni kantsongo. Vakriste va ntiyiso namuntlha va tama va tlangela leswaku lava kuleke va na swo tala leswi va nga swi nyikelaka hi mhaka ya ripfumelo, ku tinyiketa ni ntokoto wa vona evuton’wini. Hi xikombiso, makwerhu un’wana wa xisati wa tsala: “Nkarhi na nkarhi loko ndzi titwa ndzi tshikileriwa hi mafambiselo lawa, ndzi tikuma ndzi ri karhi ndzi lava-lava lava kuleke ebandlheni, ndzi khutaziwa hi ku tiya ka vona.” Makwerhu lontshwa, wa malembe ya 34 hi vukhale, hi ku fanana u vulavula hi vakulukumba lava tshembekaka a ku: “Va ndzi pfunile etimhakeni hinkwato ta vutomi. Hi xikombiso, ndzi lavile ku tiva ndlela yo kuma ku ringanisela. Kutani, makwerhu wa 72 wa malembe hi vukhale a ku, ‘Tiyiseka leswaku u endla swilo leswi Yehova a lavaka leswaku wena u swi endla ku sungula. I nyimpi ya nkarhi na nkarhi. Kambe ku ringanisela ku ta loko u rhanga u lava Mfumo.’”

Emhakeni yin’wana, makwerhu wa 87 wa malembe hi vukhale u tlhavekile a vabya swinene. Nkulu, kun’we ni makwerhu la holeke eripfumelweni, va n’wi endzerile. Hi ku rila, makwerhu la holeke eripfumelweni u te, “A wu ri munghana lonene. Ndzi ta ku pfumala.” Laha mukhalabye loko a hlamula a nga te, “Ndzi ta ku pfumala na mina.” A ri karhi a rila, makwerhu la holeke eripfumelweni a ku, “Ndzi ta ku vona eMafambiselweni Lamantshwa—loko ma tata.” Hambi leswia a tsanile, makwerhu la kuleke u pfukile a tshama ivi a vula hi ku tiyisa a ku: “Ma ta ta.” Hambi loko loyi a holeke eripfumelweni a hlulekile ku vula xa nchumu hi xikhutazo lexi, ripfumelo ra mukhalabye ri khumbe mbilu ya nkulu la voneke leswi. Wa tsundzuka: “Ripfumelo rakwe ri ndzi pfune ngopfu.”

Vamakwerhu va xinuna ni va xisati lava kuleke hakanyingi va humesa ntokoto wa vona evuton’wini bya Vukriste ni ku nyikela xitsundzuxo lexinene ni xo olova. “Tlakula vana va wena lavantsongo u va xinga,” ku tsundzuxa munhu un’wana la kuleke, “hikuva ku nga ri kungani va ta va lava kuleke. Va hlayise ku sungula. I vadyondzisiwa va wena va nkoka.” “Loko mintshikilelo ya mafambiselo lawa yi ku wela kumbe loko Sathana a ku ringa,” un’wana wa tsundzuxa, “u nga tshuki u sukela ntiyiso. Tshama u ri karhi u wu tirhisa, hikuva wu ta ku tisela ntsako.” Mpatswa wun’wana lowu kuleke lowu tirheke hi ku tshembeka endhawini yin’wana ya New Zealand hi malembe lama nga vaka 43 wu nyikela xitsundzuxo lexi xinene: “Loko u swi kota, i swinene ku tshama exivandleni xin’we, ematshan’wini yo ya ehenhla ni le hansi. Ntiyiso wu ni matimba lamakulu evanhwini, naswona wu endla leswaku u wu landzelela, xisweswo wu ku tiyisa.”

I ntiyiso, vunyingi bya vamakwerhu va xinuna ni va xisati lava kuleke a byi swi koti ku tirha ntirho wa yindlu na yindlu tanihi lavantshwa. Van’wana va tshama va etlele. Van’wana va xanisiwa hi mavabyi lama xumbadzaka. Makwerhu un’wana wa xisati la kuleke u te, “Ku dyuhala a swi ndzi vilerisi. Leswi ndzi nga swi rhandzeki hi leswi ku dyuhala ku taka na swona.” Hambi swi ri tano wa ha swi kota ku kombisa ku chivirika ka Vukriste!

Xana u heta nkarhi u tolovelana ni vamakwenu va xinuna ni va xisati lava kuleke? Xana u lava ku tekelela timfanelo leti va ti kombisaka, timfanelo leti ringiweke tanihi nsuku hi nkarhi ni ntokoto? Kunene vamakwerhu va xinuna ni va xisati lava kuleke va Vukriste i xihlovo xa risima loko ntsena hi tirhisa nkarhi ku va xiya ni ku vulavula na vona. Muntshwa un’wana wa Mukriste u te: “Swidyuhati leswi tshembekaka eka mina yi vile mintila yo namarhela entiyisweni, erirhandzwini ra ntiyiso, eripfumelweni leri hanyaka, eku tsakelaneni na ku hisekela ntirho wa Xikwembu. Eka mina ku xonga ka vona ku fana ni mirhi leyi balekeke swiluva hi xitalo, naswona va fana ni ndzilo lowu kufumelaka evusikwini byo titimela.” Kunene, hi ni xivangelo xo tlangela swidyuhati swa hina!