Vutomi Ni Vutirheli Bya Yesu

Masingita Yo Tala eKapernawume

SAVATA leyi landzelaka loko Yesu a vitane vadyondzisiwa vakwe vo sungula va mune—Petro, Andriya, Yakobo na Yohane—hinkwavo va ya esinagogeni ra kwalaho eKapernawume. Kwalaho Yesu a sungula ku dyondzisa, kutani vanhu va hlamala hikuva u va dyondzisa kukotisa la nga ni vuhosi, ku nga ri kukota vatsari.

Hi Savata leyi munhu loyi a nga ni mademona u kona. Endzhaku ka nkarhinyana, u huwelela hi rito leri tlakukeke: “Mhaka ya hina na wena hi yihi, Yesu wa Nazareta? Xana u tele ku ta hi lovisa xana? Ndza ku tiva leswaku u mani, u lowo Hlawuleka wa Xikwembu.”

Demona leri lawulaka munhu loyi hakunene hi yin’wana ya tintsumi ta Sathana. Loko a tshinya demona, Yesu u ri: “Miyela! Huma ka munhu yoloye!”

Hi loko demona ri n’wi tlumbela ehansi kutani ri huwelela hi rito leri tlakukeke, kambe ri huma eka munhu loyi handle ko n’wi vavisa. Hinkwavo va hlamala! “Hi leswo yini leswi?” va vutisa. “U lerisa ni mimoya ya thyaka hi matimba, na yona yi n’wi yingisa!” Mahungu ya leswi ya hangalaka matlhelo hinkwawo ya tiko.

Loko a huma esinagogeni, Yesu ni vadyondzisiwa vakwe va ya ekaya ka Simoni, kumbe Petro. Kwalaho mana wa nkata Simoni u vabya ngopfu hi ku hisa miri. ‘N’wi pfune,’ va kombela. Kutani Yesu a n’wi tshinelela, a n’wi khoma voko, kutani a n’wi pfuxa. A hola kan’we-kan’we kutani a sungula ku va lunghisela swakudya!

Endzhaku, loko dyambu ri perile, vanhu lava humaka hinkwako va sungula ku ta endlwini ya Petro ni vavabyi va vona. Hi ku hatlisa muti hinkwawo wu hlengeletana enyangweni! Kutani Yesu a horisa hinkwavo vavabyi va vona, ku nga khathariseki leswaku mavabyi ya vona hi wahi. A a ntshunxa ni lava nga ni mademona. Loko ya huma, mademona lama a ma hlongoleke ma huwelela: “U n’wana wa Xikwembu.” Kambe Yesu wa ya tshinya kutani a nga ma pfumeleli ku vulavula hikuva ma swi tiva leswaku hi yena Kriste. Marka 1:21-34; Luka 4:31-41; Matewu 8:14-17.

◆ Ku humelela yini esinagogeni hi Savata endzhaku ka loko Yesu a vitanile vadyondzisiwa vakwe va mune?

◆ Yesu u ya kwihi loko a suka esinagogeni, naswona i singita rihi leri a ri endlaka kwalaho?

◆ Ku humelela yini endzhaku madyambu wolawo?

[Swifaniso eka tluka 9]