Yehova U Lunghiselela Swilaveko Swa Trinidad

KU SUKELA eku sunguleni ka wona lokuntsongo hi 1912, ntirho wo chumayela hi Mfumo eTrinidad ni le xihlaleni lexi nga kusuhi na rona xa Tobango wu hundze eka switeji swo tala swo engeteleka. Ku engeteleka ka sweswinyana—hi March 1985—a ku ri ku hetiwa ni ku nyikeriwa ka muako lowuntshwa wa rhavi ehandlenyana ka ntsindza, ePort ya Spain. Miako leyintshwa a yi laveka hakunene, hikuva Trinidad ri vone ku engeteleka ka 79 wa tiphesente eka vahuweleri va Mfumo ku sukela loko miako yo hetelela ya rhavi yi akiwile.

Ku kuma ndhawu leyi fanelaka eka xihlala lexintsongo, lexi taleke hi vaaki a swi nga olovi. Tiko ra durha, naswona minxavo ya swo aka na yona yi tlakukile swinene. Kambe, Yehova u lunghiselele swilaveko leswi hinkwaswo. Xivandla lexinene, lexi nghenekaka xi xaviwile kusuhi ni pato ra xitici xa swihaha-mpfhuka. Vamakwerhu va hlengeletanile emuakweni, va nyikela nseketelo lowukulu swinene. Muhuweleri la nga vaka un’wana ni un’wana wa Mfumo eTrinidad u vile ni xiphemu xo karhi eka ntirho wo aka.

Mugqivela ni Sonto yin’wana ni yin’wana ntlawa lowu humaka eka rin’wana ra mabandlha a wu ta wu ta pfuna hi ntirho, kasi lava va humaka eka rin’wana a va nyikela hi swakudya ni swakunwa. Ntirho wa nivusiku a wu endliwa kambirhi kumbe kanharhu hi vhiki. Ku aka ku yile emahlweni ku fika ni le ka nguva ya timpfula. Loko ku ri nkarhi wo chela filoro yo sungula, vamakwerhu lava tlulaka 350 a va ri kwalaho, va nyiketana mabakiti ya semendhe hi mavoko. Vaakelani va hina va Mahindhu a va hlamarisiwile ntsena! Leswi swi pfule nkarhi wo veka vumbhoni eka vona.

Minxavo ya swo aka yi fikeleriwe hi moya lowu fanaka wa mbilu hinkwayo. Vamakwerhu va xisati va nyikele hambi ku ri hi swingwavila swa vona swa nsuku, leswaku swi xavisiwa ivi swi tirhisiwa emuakweni. Mufana wa malembe ya nhungu hi vukhale u tsarile a ku: “Ndzi rhandza ku tirha eka muako wa rhavi, kambe hikwalaho ka leswi nhlana wa Tatana wu vavaka naswona a nga swi kotiki ku endla ntirho wo tika, ndzi nga ka ndzi nga ti minkarhi hinkwayo. Kutani ndzi rhumela mali leyi ndzi yi hlayiseke leswaku ndzi pfuna hi ntirho.”

Eka muako hinkwawo, mpfuno wa Yehova a wu vonaka. Hilary Charles, mulanguteri wa muako, u tsundzuka nkarhi lowu a va saleriwe hi masaka ya khume ya semendhe ivi a tivisa fektri ya semendhe ku tisa lama engetelekeke. U ri: “Hakunene semendhe a yi tika ku yi kuma. Va vule leswaku hi nge yi kumi ku fikela vhiki leri tlhandlamaka. A ku ri kwalomu ka kaye ni mixo. Hi mbirhi nindzhenga wolowo, ndzi vone lori yi tale hi semendhe yi nghena. Muchayeli wa lori u te: ‘Ndzhwalo wa semendhe a wu ya endhawini yin’wana, ndzi byeriwe leswaku ndzi wu tisa laha.’ A nga swi twisisanga. A ri ri voko ra Yehova.”

Muako wa rhavi wa swithezi swimbirhi wu na xivumbeko xa T, ni ndhawu yo nghena hi yona ehenhla—hi tlhelo ra dzonga. Exineneni xa yindlu leyi kokaka mahlo ya varindzi ku ni Holo ya Mfumo, leyi ku nga tshamaka kwalomu ka 200 wa vanhu. Hofisi leyikulu yi le ximatsini. Eka xiyenge xo leha xa tindlu ta swithezi swa le hansi, ku ni vugandliselo, ndzawulo yo amukela ni yo rhumela swilo kun’we ni vuhlantswelo. Swithezi swa le henhla i khixi, yindlu yo dyela ni tindlu to tshama eka tona—tikamara ta nhungu to etlela, yin’wana ni yin’wana yi ri na bavhu ya yona. Layiburari leyintsongo na yindlu yo wisela eka yona swi akiwile ehenhla ka hofisi.

Hi Mugqivela, March  6, a ku ri siku ro nyikela. Milton G. Henschel wa Huvo Leyi Fumaka ya Timbhoni ta Yehova u nyikele nkulumo. Makwerhu Henschel u te: “Yehova a nga tivi ndlela yo nyika ntsena, kambe u tiva leswi hi swi pfumalaka.” Ina, miako leyintshwa a yi ri nyiko leyi humaka eka Yehova. Nongonoko wu hetiwile hi xikhongelo lexinene xo nyikela eka Yehova. I ntsako muni wonghasi lowu a hi ri na wona!

Timbhoni ta Yehova eTrinidad na Tobango ti tsakela ku engeteleka loku nyikiweke hi Yehova. Naswona ti ya emahlweni, ti languta ku engeteleka loku yaka emahlweni loko ti karhi ti hambeta ti lunghiselela swilaveko swa tona tanihi vahuweleri va Mfumo.