Xiviko Xa Vahuweleri Va Mfumo
Ku Hlengeleta “Tinyimpfu Tin’wana” Ta Hosi eAustralia
“NḌI TA ṭekaṭekisa ni matiko hikwawo, kutani le’ŝi ranḍkaka ŝa matiko hikwawo ŝi ta ta kwala,” ku tsale muprofeta Hagayi malembe lama tlulaka 2 500 lama hundzeke. (Hagai 2:7) Namuntlha, leswi rhandzekaka hakunene a va hlengeletana endlwini ya Yehova ya vugandzeri. Hambi swi ri tano, minkarhi yin’wana, swi nga ha vonaka eku sunguleni swi nga rhandzeki, tanihi loko swi kombiwile hi ntokoto lowu wo huma eAustralia:
◻ Makwerhu loyi a a ya hi movha wakwe enhlengeletanwini hi Sonto yin’wana u endle nchumu lowu a nga zangiki a wu endla nikan’we: U yimile a khandziyisa munhu loyi a a kombela ku khandziya a nga ri na mali. Makwerhu loyi a nga swi tivanga leswaku hikwalaho ka yini a swi endlile, tanihi leswi jaha ra kona a ri ri na misisi yo leha leyi nga kamiwangiki ni malepfu, a a nga ambalangi kahle, naswona hambi ku ri ku wu yimisa hi rintiho a a nga swi endlanga. Hi ku hatlisa makwerhu loyi u lo titwa a fanele ku yima a n’wi khandziyisa. Loko munhu loyi a khandziyile emovheni, u te: “U ya ekerekeni, a hi swona xana?” Hi ku hlamala, makwerhu u hlamurile: “Ina, ndzi ya eHolweni ya Mfumo.” “Ndzi famba na wena,” ku vula lowa jaha.
Hikwalaho ka ku languteka kakwe, makwerhu u ringete ku n’wi heta matimba. Kambe jaha leri ri ale ri ku ra ya ivi ri hlamusela mhaka leyi: U suke ekaya a ri na malembe ya 16 hi vukhale naswona ku sukela kwalaho u katseke hi matimba eka mahlungu ni vunghwavava. A a tshama ehansi ka phepha ra plastiki endzhaku ka ndhundhuma ya sava ra le kusuhi ni ribuwu. Loko a ri kwalaho, u sungule ku ehleketa swinene hi nkoka wa vutomi. A a nga swi rhandzi leswi a hundzukeke swona, kutani u kombele ku pfuniwa hi Xikwembu. U vule leswaku u byele Xikwembu a ku u ta ya epatwini ivi a khongela leswaku xi kongomlsa un’wana ku n’wi teka ivi a n’wi yisa ekerekeni ya ntiyiso. Mimovha a yi tali ku famba eka patu leri. I mimovha minharhu ntsena yi hundzeke endzhaku ka tiawara to tala, naswona ku hava ni yin’we leyi yimeke ku n’wi teka. A a ri kusuhi ni ku lan’wa loko makwerhu a ta ivi a n’wi teka.
U hlanganyele eka tidyondzo hinkwato vhiki rolero kutani a sungula ku tibasisa. U suse ni xihambano lexi a a xi ambarile enhan’wini yakwe. U ehlekete ku tlhelela ekaya kakwe eTasmania, laha a heteke n’hweti hinkwayo a ri karhi a hlaya Bibele ni ku khongela. A swi twisisa leswaku a a lava mpfuno wa xiviri leswaku a kula ku ya emahlweni, u ye eka rhavi ra hofisi ya Sosayiti ya Watch Tower eAustralia. Maphayona man’wana ma rhumeriwe ku ya dyondza na yena, kutani u endle nhluvuko wa xihatla. Ntiyiso lowu humaka eBibeleni wu endle leswaku vutomi byakwe byi va bya ntikelo ni ku n’wi nyika ntshembo wa vumundzuku. (Swivuriso 10:28) Hi tin’hweti ta nkombo u khuvuriwile ivi a va phayona ro pfuneta, kutani sweswi u tirha tanihi phayona ra nkarhi hinkwawo eSydney.
◻ Hi nga “komba ku saseka ka leswi dyondzisiwaka hi tlhelo ra Xikwembu Muponisi wa hina,” hi ku namarhela milawu ya Bibele emahanyelweni ya hina. (Tito 2:10) Leswi swi kombisiwe emhakeni ya makwerhu loyi a thoriweke efemeni laha ku bulukeke ku kanetana ehenhleni ka ku ponisiwa ka tinyimpfu ni tihomu. Mutirhi un’wana ni un’wana u komberiwe ku nyikela dolara yin’we ku pfuna eku seketeleni ka njhekanjhekisano. Loko makwerhu a arile, mutirhela-mfumo u n’wi chavisile a ku u ta lahlekela hi ntirho wakwe. Makwerhu u hlamusele leswaku, hikwalaho ka ripfalo, a nga ka a nga seketeli dzolonga leri a ri hlanganyetiwa. Mutirhela-mfumo u n’wi nyike awara leswaku a ti ehleketa.
Kutani makwerhu u ve xihlekiso eka vatirhi-kulobye. U va hlamusele leswaku a ku nga ri hi mhaka ya dolara, kambe leswi van’wana va lava katsekeke eku phikizaneni va nga na swibamu ni swigiya, a a ta va ni nandzu wa ngati loko a va seketela kutani un’wana a vaviseka kumbe ku dlawa. Mutirhi un’wana u te a a nga si tshama a twa mavonelo wolawo nikan’we kutani a lava ku tiva swo tala. Hi ku famba ka nkarhi, makwerhu u swi kotile ku sungula dyondzo ya Bibele ni mutirhi, naswona hambi ku ri na ku kanetiwa hi nsati wakwe, wanuna loyi hi ku hatlisa u sungule ku va kona etidyondzweni. Namuntlha i un’wana wa vamakwerhu lava tinyiketeleke. Loko a ri mutirhela-mfumo, a nga ha tlhelanga a ta vutisa makwerhu loyi.
Hakunene, lava va rhandzaka Xikwembu ni ku lulama, hi ndlela yo karhi, va ta endliwa leswaku va hlangana ni ntiyiso naswona va ta wu xiya. Yesu u te: “Ndzi ni tinyimpfu tin’wana . . . ndzi fanele ku ti vuyisa; ti ta yingisa rito ra mina.” (Yohane 10:16) Ku hundza 42 000 wa ‘tinyimpfu leti tin’wana’ eAustralia ti se ti yingise rito ra Murisi Lonene, kutani siku na siku to tala ta karhi ku hlengeletiwa evokweni ra xinene ra tintswalo ta Yesu.—Matewu 25:31-34.
[Rito leri tshahiweke eka tluka 22]
Hi nga “komba ku saseka ka leswi dyondzisiwaka hi tlhelo ra Xikwembu Muponisi wa hina” hi mahanyelo ya hina lamanene