Nkambisiso Wa Mahungu

AIDS—Ku Hakela Nxavo

U.S. Federal Centers for Disease Control yi ringanyeta leswaku avhareji ya tihakelo ta xibedlhele ta siku na siku to ongola swigulana swa AIDS i R1 160—yi phindha liya ya swigulani swin’wana kambirhi. Naswona vatshila va ringanyeta leswaku hakelo leyi heleleke yo ongola xigulana xin’wana ni xin’wana yi nga ha va avhareji leyi tlulaka R200 000. Leswi ni ku kula loku hatlisaka ka nhlayo ya vahlaseriwa va AIDS lava lavaka ku ongoriwa swi endle leswaku vatirhi va le xibedlhele ni va ndzindza-khombo va khumbeka.

American Hospital Association yi vitana ku hangalaka ka xihatla ka AIDS “bomo leyi nga enkarhini’’ ya swibedlhele swa tiko, tanihi leswi tihakelo ta mali ku nga ri khale ti nga ta fikelela magidi ya timiliyoni hi lembe. Mutirhi un’wana wa ndzindza-khombo wa rihanyo u tsundzuxile a ku; “Ndzi xi vona xi ri xiphiqo lexikulu swinene xa timali lexi bindzu ra ndzindza-khombo ra rihanyo ni vutomi ri kalaka ri nga si tshama ri kongomana na xona etikweni leri.” I mani la nga ta rhwala ndzhwalo lowukulu wa timali?

Vahlaseriwa vo tala va AIDS i vasodoma ni vatirhisi va swidzidzirisi, lava hanyelo ra vona ro titsakisa ri va tiseleke vuvabyi. Kambe a hi vona va nga ta hakela timali ta kona. Ematshan’wini ya sweswo, hulumendhe ni vatirhi va ndzindza-khombo va komba leswaku swivandla swa maphorisa ni vahakeri va mindzuvo va ta boheka ku rhwala ndzhwalo hi mithelo leyi tlakukeke. Tlhandla-kambirhi, “dyondzo, vuhlayiseki bya vanhu ni swilaveko swa tiko swi ta xaniseka,’’ ku xiye muhleri wa New York Post.

Eku sunguleni, vahlaseriwa va AIDS lava va kumeke vuvabyi lebyi hikwalaho ka mahanyelo ya vona va nga ha va va sandze mahanyelo lamanene ya Bibele leswaku va yimelela xivumbeko xa vona xo tinyanyula. Vona ku vaviseka lokukulu eka vona ni ku lahlekeriwa ka van’wana ka timali loku a va ta va va ku papalatile! Hambi swi ri tano, nkarhi wa ha ri kona eka un’wana ni un’wana wo tano ku hundzulukela eka mimpimanyeto ya mahanyelo lamanene lama huhuteriweke ya Bibele leyi humaka eka “L’a ku dyonḍisaka, a ku pfuna, a ku fambisa e ndleleni leyi u faneleke ku famba ha yona.”—Esaya 48:17.

Ku Rhula Ni Nsirhelelo—Ku Nga Ri Khale?

Tsalwa leri tivekaka swinene erirhangwini ra Nhlangano wa Matiko ri ri: “Hi mabanga ya v̌ona v̌a ta fula ŝikomu, hi matlhari ya v̌ona v̌a ta fula masikeri; tiko ri nga ka ri nga ha Iwi ni riṅwana, kutani a ku nga ha dyonḍisiwi ku Iwa.’’ Hi ku tshemba ku veka mihandzu eku hetisekeni ka marito wolawo ya vuprofeta, Nhlangano wa Matiko wu twarise 1986 tanihi “Lembe Ra Ku Rhula Ka Matiko Hinkwawo.” Xana xi kona xivangelo xo pfumela leswaku UN yi ta humelela eka pakani ya yona leyi yi hlambanyiweke tanihi muhlayisi la tivuleleke hi yexe wa “ku rhula ni nsirhelelo wa matiko hinkwawo?”

Ku nga khathariseki munyikelo lowu UN yi nga wu endlaka ehenhleni ka ku huwelela loku tshinelaka ka “ku rhula ni nsirhelelo,” ku rhula kwihi na kwihi loku endliweke hi vanhu hakunene ku le xisekelweni lexi khehlekaka. (1 Vatesalonika 5:3) Mali leyi tirhiseriwaka nyimpi sweswi yi ringanyeteriwa ku va leyi tshinelaka eka triliyoni wa tidolara hi lembe emisaveni hinkwayo. Ku sukela eka Nyimpi ya Vumbirhi ya Misava, ku nga katsiwi matlhari ya ntsombano, mali yo endla matlhari ya nyutliya yi ringanyeteriwe eka tidolara ta titriliyoni tinharhu kumbe mune—leswi a swi nga ta languteriwa hi nkarhi lowu UN yi wu vulaka wa ku nyikeriwa ka ku rhula ni nsirhelelo wa misava! Entiyisweni, Vernon Walters, muyimeri wa U.S. eka Nhlangano wa Matiko u ri, “Nhlangano wa Matiko wu tlhentlhile entirhweni wa wona ku endlela ku simeka xiboho xa dzolonga,” wu susa mintshembo ya lava va khoIweke leswaku “UN a yi ta endla leswi tlulaka leswi yi swi endleke hi tlhelo ra xiboho xa dzolonga.”

Hambi swi ri tano, marito lama tsariweke lama tshahiweke eku sungulenl eka Esaya 2:4 ya ta hetiseka—kambe hayi hi 1986, kumbe hi ku tirhisa matshalatshala ya nhlengeletano leyi endliweke hi vanhu. Kambe ke, ku rhula ka ntiyiso ni nsirhelelo swi ta tisiwa ku nga ri khale hi hulumendhe ya le tilweni, leyi murhangeri wa yona loyi a nga vonakiki hakunene a nga “Hosana ya ku Rhula.”—Esaya 9:6, 7.

Ku Tirihisela Ka Nyutliya—I Ku Avanyisa Ka Xikwembu Xana?

Xana ku tirhisiwa ka matlhari ya nyutliya ku nga tsongahatiwa hi ku amukela nhlaselo wa nyutliya ke? Ina, ku vula Free Church of Scotland eka nkandziyiso wa sweswinyana wa magazini wa Kereke ya wona lowu nge, The Monthly Record. Xihloko xa kona xi vule leswaku ku tirihisela ko tano eku heteleleni ku nga tikomba ku ri “ndzoviso lowu nga enawini wa vukari bya Xikwembu” hikwalaho ka “xileriso xa Xikwembu xo tisa vukari byo Iwisana ni vuhomboloki.” The Record nakambe yi vula leswaku vumbhoni bya vona byi katsa ku twarisiwa ka ku avanyisa ka Xikwembu eka “tiko leri . . . ri nga ta wachuta nhlaselo wo sungula enyimpini ya nyutliya.”

Leswaku ku ta va “ni siku ra ku tirihisela ka Šikwembu ša hina” i ntiyiso. (Esaya 61:1, 2) Kambe ku avanyisa ka Xikwembu matiko ya nyimpi ku ta endliwa enkarhini wa kona naswona hi ndlela leyi xi yi hlawulaka. Ematshan’wini ya vukari bya matiko ya misava, ‘vukari bya Xikwembu hi xoxe’ byi ta “herisa lava herisaka misava.” Njhani? Hi ku rhumela “Hosi ya tihosi,” Hosi Yesu Kriste, ‘ku avanyisa ni ku rhangela nyimpi hi ku lulama.’ Mfumo wa xona wa le tilweni wu ta “seletela ni ku herisa ku fuma koloku hikwako.”—Nhlavutelo 11:18; 19:11-21; Daniel 2:44.