Vutomi Ni Vutirheli Bya Yesu

U Soriwile eHenhleni Ko Titsona Swakudya

SE KU hundze lembe ku sukela loko Yesu a ve kona eXilalelweni xa 30 C.E. Sweswi, Yohane Mukhuvuri u khotsiwile tin’hweti to hlayanyana. Hambi leswi a laveke leswaku vadyondzisiwa vakwe va va valandzeri va Kriste, a hi hinkwavo lava veke vona.

Manuku van’wana va vadyondzisiwa lava va Yohane la khotsiweke va ta eka Yesu kutani va vutisa va ku: “Swi endlisa ku yini leswaku hina ni Vafarisi hi titsona swakudya hakanyingi xana? Kasi vadyondzisiwa va wena, vona, a va titsoni.” Vafarisi va titsona swakudya kambirhi hi vhiki tanihi mihivani ya vukhongeri bya vona. Kutani vadyondzisiwa va Yohane kumbexana va landzela mukhuva lowu fanaka. Nakambe swi nga endleka leswaku va titsona swakudya ku endlela ku rilela ku khotsiwa ka Yohane naswona va hlamala mhaka leyi ha yona vadyondzisiwa va Yesu va nga hlanganyeriki na vona eka xikombiso lexi xa nhlomulo.

Loko a hlamula Yesu wa hlamusela: “Xana tinxangwani ta muteki ti nga rila loko muteki a ha ri na tona ke? Kambe masiku ma ta ta, lama muteki a nga ta susiwa eka tona; hi kona ti nga ta titsona swakudya.”

Vadyondzisiwa va Yohane va fanele ku tsundzuka leswaku Yohane hi byakwe u vulavule hi Yesu tanihi Muteki. Kutani ke, loko Yesu a ha ri kona, Yohane a a nga ta swi vona swi ri leswi fanelaka ku titsona swakudya, na vona vadyondzisiwa va Yesu a va swi vonisi sweswo. Endzhakunyana, loko Yesu a fa, vadyondzisiwa va rila ni ku titsona swakudya. Kambe loko a pfuxiwile eku feni ivi a tlhandlukela etilweni, va hava xivangelo xin’wana xa ku titsona swakudya hi ku rila.

Ku ya emahlweni, Yesu u vulavula hi swifaniso leswi: “A ku na munhu la rhungelaka xitiva lexintshwa engubyeni ya khale, hikuva xitiva xa kona xi ta handzula nguvu, kutani ku handzuka ka kona ku ta ya ku engeteleka. Naswona vanhu a va cheli vhinyo leyintshwa eminkwameni ya khale, hikuva loko va endlisa sweswo, minkwama yi ta handzuka kutani vhinyo yi halaka, na yona minkwama yi onhaka; kambe vhinyo leyintshwa va yi chela eminkwameni leyintshwa.” Swifaniso leswi swi yelanisa ku yini ni ku titsona swakudya?

Yesu a a pfuna vadyondzisiwa va Yohane ku tlangela leswaku ku hava loyi a faneleke ku langutela valandzeri vakwe ku fambisana ni mikhuva ya khale ya Xiyuda, yo fana ni mihivani yo titsona swakudya. A nga telangi ku lulamisa ni ku yisa mafambiselo lama ku nga khale ya tirhisiwa emahlweni yo gandzela lama a ma ri kusuhi ni ku hehsiwa. Vukriste byi nga ka byi nga endliwi leswaku byi pfumelelana ni Vuyuda bya siku ra kona ni mikhuva ya byona ya vanhu. Doo, ku nga ka ku nga vi xichidzi lexintshwa eka nguvu ya khale kumbe ku fana ni loko vhinyo leyintshwa yi ri enkwameni wa khale. Matewu 9:14-17; Marka 2:18-22; Luka 5:33-39; Yohane 3:27-29.

◆ I vamani lava a va titsona swakudya, naswona hi xikongomelo xihi?

◆ Hikwalaho ka yini vadyondzisiwa va Yesu va nga titsonanga swakudya loko a ha ri na vona, naswona endzhaku xivangelo xo titsona swakudya xi nyamalahse ku yini hi ku hatlisa?

◆ I swifaniso swihi leswi Yesu a swi vuleke, naswona swi vula yini?

[Xifaniso lexi heleleke eka tluka 8]