Xana Xi Kona Lexi Nga Ku Hambanisaka Ni Rirhandzu Ra Xikwembu?

“Hikuva ndzi kholwa swinene ngopfu leswaku hambi ri nga va rifu kumbe vutomi, hambi ti nga va tintsumi kumbe matimba ya mademona, hambi swi nga va leswi nga kona sweswi kumbe leswi nga ta ta, hambi yi nga va mimoya ya matimba leyi nge henhla empfhukeni kumbe leyi nge hansi ka misava, hambi xi nga va xivumbiwa xihi na xihi, ndzi ri: Ku hava lexi nga ta kota ku hi hambanisa ni rirhandzu ra Xikwembu leri nga kombisiwa ha Kriste Yesu, Hosi ya hina.”—VARHOMA 8:38, 39.

1. Rirhandzu ra Xikwembu ri kombisiwa siku na siku hi tindlela tihi?

XIKWEMBU i rirhandzu. Leswi swa kombisiwa eka hina siku na siku hi tindlela leti hanyisaka. Moya lowu hi wu hefemulaka, mati lama hi ma nwaka, swakudya leswi hi swi dyaka—hinkwaswo swi ta tanihi swikombiso swa rirhandzu ra Xikwembu. Ku tlula kwalaho, swi ta eka lavanene ni lavo biha hi laha ku fanaka, hambi swi tlangeriwa kumbe e-e. Yesu u tiyise leswi loko a vulavule hi Tata wakwe wa le tilweni a ku: “U tsuvukisa dyambu ra yena ehenhla ka lavo biha ni lavanene, u nisa mpfula ehenhla ka lavo lulama ni lavo homboloka” (Matewu 5:45) Xivumbiwa xin’wana ni xin’wana lexi hanyaka emisaveni xi kolota minkhenso eka Xikwembu hikwalaho ka ku wundliwa ka xona.—Psalma 145:15, 16.

2. Rirhandzu lerikulu ra Yehova eka vanhu ri kombisisiwe ku yini, naswona Yesu u kombe ku tlangela ka leswi Yehova a swi laveke hi ndlela yihi?

² Eka swivumbiwa leswi nga vanhu rirhandzu ra Xikwembu ri kule ku tlula ku wundla vutomi bya sweswi lebyi nyamalalaka ku fana ni xiluva ni ku hlanhleka ku fana ni byanyi. (1 Petro 1:24) Xi endle lunghiselelo eka vanhu leswaku va hanya hi laha ku nga heriki: “Hikuva Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” (Yohane 3:16) Lunghiselelo leri ri endliwe hi nxavo lowukulu eka Tatana ni N’wana. Le Getsemane evusikwini lebyi rhangeleke rifu ra yena, Yesu u nkhinsamile ivi a khongela hi ku vaviseka ko tano lerova “nyuku wa yena wu ko wu xiririka, wu fana ni mathonsi ya ngati lama tshonelaka emisaveni.” Enkarhini lowu wa nhlomulo, Yesu a a vavisiwa hi ndzhukano lowu vekiweke evitweni ra Xikwembu, kutani a kombela ni leswaku xinwelo xi hundza kule na yena. Kambe u tlhandlekerile a ku: “Ntsena ku nga endliwi ku rhandza ka mina, kambe a ku endliwe ku rhandza ka wena.” (Luka 22:44; Marka 14:36) Hambi leswi Yesu a a ri eku vavisekeni lokukulu, leswi Yehova a a lava swona swi te ku sungula. Hambi ri ri langutelo ra nxaniso ni rifu leri taka hakantsongo-ntsongo hi ku beleriwa emhandzini ya nxaniso a ri swi kotanga ku n’wi hambanisa ni rirhandzu ra Xikwembu.

3. I marito wahi ya Pawulo lama Timbhoni ta Yehova namuntlha ti ma tirhisaka eka tona, naswona hi vuyelo byihi eka tona?

³ Nakambe leswi Yehova a swi lavaka swi ta ku sungula eka Timbhoni ta Yehova leti namuntlha ti fambaka emintileni ya Yesu. Va ri, “loko Xikwembu xi yima na hina,” va teka marito ya muapostola Pawulo, “i mani la nga lwaka na hina xana? I mani loyi a nga ta hi hambanisa ni rirhandzu ra Kriste? Xana ma nga va maxangu, kumbe nhlomulo, kumbe ku xanisiwa, kumbe ndlala, kumbe vusweti, kumbe makhombo, kumbe fumu xana? E-e! Eka sweswo hinkwaswo, hi hlula hi va hi hlurisisa hikwalaho ka yena loyi a hi rhandzeke.” (Varhoma 8:31, 35, 37) Eka lembe xidzana leri Timbhoni ta Yehova ti hlaseriwile, ti biwa, ti pyitliwa xikontiri ni ku tlhometeriwa tinsiva, ti onhiwa emirini, ti pfinyiwa, ti sikisiwa hi ndlala, ti dlayiwa hi masocha lama baleselaka, va tsemiwa ni tinhloko etikampeni ta nxaniso ta Vunazi—hinkwaswo leswi hi mhaka ya ku ala ka vona ku tihambanisa ni rirhandzu ra Xikwembu.

4. Ku ala ka jaha rin’wana ku tihambanisa ni rirhandzu ra Xikwembu ku ku nyanyula hi ndlela yihi?

⁴ Malembe ya makume mune-mune lama hundzeke, jaha rin’wana ra Timbhoni ta Yehova, ri tsalele vatswari va rona ri ri ekampeni ya nxaniso ya Vunazi, hi ku komisa ri ku:

“Se i 9 ehenhla ka nhloko ya siku ra ku ringiwa ka mina, kambe ndzi fanele ku rindza ku kondza ku va 11:30. Ndzi tsala tilayeni leti ndzi ri ekhotsweni ra huvo ya vuthu ra tiko. Ndzi ni ku rhula lokukulu, loku hakunene ku nga kholwekiki; kambe ndzi yise hinkwaswo eka Hosi, kutani ndzi nga rindza awara leyi hi ku rhula naswona ndzi ri etinketanini ta nkarhi na nkarhi. Va mi byele leswaku ndzi nga ka ndzi nga bohiwi hi tinketana. I mavunwa! Nhlikanhi ni vusiku: loyi a ambalaka ni ku hluvula ni ku basisa khotso hi loyi a nga bohiwangiki hi tinketana . . .

“12:35. Hinkwaswo se swi hetisekile. Hi mhaka ya leswi ndzi hlayiseke ku ala ka mina [xikombelo xa vona xa leswaku a tshika vugandzeri byakwe bya Yehova Xikwembu], xigwevo xa rifu xi kunguhatiwile. Ndzi yingiserile, ivi manuku endzhaku ndzi vula marito lama nge ‘Tshembeka ku fika eku feni’ ni marito man’wana ma nga ri mangani ya Hosi ya hina, hinkwaswo a swi hetisekile. Kambe mi nga ha karhatiwi hi sweswo sweswi. Ndzi ni ku rhula lokukulu, ku tshamiseka ko tano, loku mi nga ta ka mi nga ku anakanyi. . . . Ku rhula loku, ku nga ntsako lowu ana se wu teke eka mina ekamareni ya huvo, lowu misava yi nga ta ka yi nga wu twisisi, wu ndzi ririsile wu tlhela wu ndzi tsakisa loko’ndzi ri karhi ndzi tlhela ndzi nghena ekhotsweni ra mina . . . Mi nga rili. . . . Leswi hi swona leswi antswaka leswi ndzi nga mi nyikaka swona, ni vamakwerhu hinkwavo namuntlha, Sonto yo hetelela emahlweni ka ku dlayiwa ka mina (ku tsemiwa nhloko), ku nga siku ndzi ntshunxiweke tinketana ha rona.”a

‘Xi Ta Mi Tiyisa, Mi Nga Tsekatseki’

5, 6. I switshembiso swihi leswi nyikeriweke hi Pawulo na Petro leswi chavelelaka lava ringiweke swinene hikwalaho ko namarhela rirhandzu ra Xikwembu?

⁵ Jaha leri ri hambanisiwe ni vutomi kambe hayi ni rirhandzu ra Xikwembu. Tihanyi leti fanaka ti kombisiwe Timbhoni ta Yehova hi malembe xidzana. Vuswikoti bya malandza ya Xikwembu byo tiyisela minxaniso yo tano, hambi ku ri ku fikela eku feni, a hi matimba ya vona vini kambe i ya Xikwembu. “Xikwembu xa tshembeka,” hi tiyisekisiwa hi Pawulo, “xi nga ka xi nga pfumeli leswaku mi humeleriwa hi ndzingo lowu wu mi hlulaka; kambe loko ndzingo wu ta, xi ta mi nyika ndlela ya ku huma eka wona, leswaku mi ta kota ku wu rhwala.” (1 Vakorinto 10:13) Loko ti ri ehansi ka ndzingo, Timbhoni leti tshembekaka ta Yehova ti swi kotile ku vula hi laha Pawulo a vuleke ha kona loko a ri ekhotsweni ti ku: “Hosi yi yimile na mina yi ndzi tiyisa.”—2 Timotiya 4:17.

⁶ Muapostola Petro, endzhaku ko hi tsundzuxa leswaku hi tivonela eka Diyavulosi, loyi a rhendzelekaka ku fana ni nghala leyi bongaka yi lava ku hi dya, u nyika xitiyisekiso lexi: “Kutani endzhaku ka loko mi twisiwile ku vava nkarhinyana, Xikwembu xa tintswalo hinkwato lexi xi mi vitaneke ku nghena eku kwetsimeni ka xona loku nga heriki, eka Kriste, xona hi xiviri xa xona xi ta mi pfuxeta, xi mi aka ni ku mi tiyisa, mi nga tsekatseki.” (1 Petro 5:8-10) Ku xiyisisa nseketelo lowu hinkwawo wa Xikwembu, nchumu wun’we i ntiyiso: Rirhandzu ra Xikwembu a ri hluleki; ku tihambanisa kwihi na kwihi na rona ku ta va xihoxo xerhu, hayi xa xona.

7. I marhengu wahi lawa Sathana a ma tirhiseke eka Yesu, naswona Yesu u n’wi hlurise ku yini?

⁷ Sathana a nga hlaseli ku fana ni nghala leyi bongaka minkarhi hinkwayo. Minkarhi yo tala u ta tanihi ‘nyoka leyi kanganyisaka’ na hambi ku ri tanihi “ntsumi ya ku vonakala” ya mugwinehi. U ni marhengu layo biha ehenhla ka hina, naswona hi fanele ku xalamuka leswaku a nga hi fikeleli. Hi fanele ku ambala matlhari hinkwawo ya Xikwembu “leswaku hi ta kota ku yima hi Iwa ni mano layo biha ya Diyavulosi.” (Genesa 3:1, The Jerusalem Bible; 2 Vakorinto 2:11; 11:13-15; Vaefesa 6:11, nhlamuselo ya Ref. Bi.) Eku sunguleni ka vutirheli bya Yesu, Sathana u tile eka yena a tshaha matsalwa, a ma tirhisa hi ndlela yo hoxa hi matshalatshala yo ringa Yesu leswaku a endla leswo biha. U ringe Yesu hi makhamba manharhu ivi a hluleka ka nharhu. Yesu u hundzule ku hambukisa ka Sathana ka Matsalwa hi tindzimana leti tirhisiweke khwatsi. Manuku Yesu u byele Sathana leswaku a suka. Kambe Sathana “a n’wi tshika, a yimela ku kuma nkarhi wun’wana lowunene.”—Luka 4:13; Matewu 4:3-11.

8, 9. I tindlela tihi leti kanganyisaka leti Sathana a tlheleke a ta hlasela Yesu ha tona, naswona Pawulo u hi kongomisa ku endla yini leswaku hi sirheleteka?

⁸ Sathana wa phikelela. U hambeta a vuya hi swivumbeko leswi hambaneke. U tlhelele eka Yesu hi ku tirhisa vafundhisi va vukhongeri va nkarhi wolowo. Yesu u swi twisisile leswi ivi a va byela hi ku kongoma a ku: “N’wina mi huma eka tata wa n’wina, a nga Diyavulosi.” Vanhu van’wana va nga ha hetisisa makungu ya Sathana va nga swi xiyi. Muapostola Petro u swi endlile leswi loko, hambi leswi a swi twala, a tshinye Yesu, a ku: “We Hosi! Swilo leswi, swi nga ka swi humeleri.” Yesu u boheke ku tshinya Petro swinene a ku: “Suka ka mina Sathana! U xikhunguvanyiso eka mina.” (Yohane 8:44; Matewu 16:22, 23) Hi ku fanana, swikongomelo swa Sathana swi nga ha hetisisiwa hi muthori a nga tiyimiselanga, mutirhi-kulorhi, munghana wa xikolo, munghana, xaka, mutswari kumbe munghana wa vukati. Nkarhi na nkarhi hi fanele ku tivonela leswaku hi nga pfumeleli nchumu wu tsanisa xinakulorhi xerhu na Yehova.

⁹ Kutani i swa nkoka ku ‘havaxela swisirhelelo ni matlhari hinkwawo lawa Xikwembu xi mi nyikaka wona, leswaku mi ta kota ku yima mi Iwa ni mano layo biha ya Diyavulosi. Hikuva a hi lwi ni vanhu va nyama ni ngati, kambe hi Iwa ni mimoya leyo biha leyi nge henhla emimpfhukeni.’—Vaefesa 6:11, 12.

Ku Namarhela Ka Xidyoho eNyameni Leyi Tsaneke

10. Rito leri nge “xidyoho” ri vula yini, naswona i mikhuva yihi leyi yi nga ta hi hambanisa ni rirhandzu ra Xikwembu?

¹⁰ Sathana u hlasela laha hi tsaneke kona. Entiyisweni u endla leswaku mboyamelo wa hina wa nyama eku dyoheni wu va xitirho lexikulu. (Psalma 51:5) Rito ra Xigriki leri hundzuluxeriweke va ku xidyoho i ha·mar·tiʹa. Riendli i ha·mar·taʹno, leri entiyisweni ri vulaka ‘ku hupha mfungho.’ (Varhoma 3:9, nhlamuselo ya Ref. Bi.) Loko hi hupha mfungho ivi hi hluleka ku hlayisa milawu ya Xikwembu, hi laha hi hambukaka swinene erirhandzwini ra Xikwembu, hikuva “ku rhandza Xikwembu swi vula leswi: Hi leswaku hi fanele ku hlayisa milawu ya xona.” (1 Yohane 5:3) Vuoswi, vumbhisa, ku hiseka ka rimbewu, minhlaselo ya vudakwa, minkhuvo leyikulu, ku tilawula loku ntshunxekeke ka ku navela ka nyama, mavondzo, vukari, makwanga ya rifuwo—swilo swo tano hinkwaswo swi hi hambanisa ni rirhandzu ra Xikwembu, naswona “lava endlaka leswo tano, va nga ka va nga vi na ku averiwa eku fumeni ka Xikwembu.”—Vagalatiya 5:19-21.

11. Xidyoho xi nga hambeta xi hi namarhela hi ndlela yihi, eku heteleleni xi va ni vuyelo byihi ke?

¹¹ Tibayisikopo, tibuku, mintlangu, minongonoko ya TV—leswi hlanganisiweke ni rifuwo, mina ku sungula, van’wamabindzu lava gondzomberiweke hi rimbewu—swi kurisa ku phikelela ntsako lowu nga lawuriwiki ni lowu nga siveriwiki. Xidyoho xo sungula xi endla leswaku xa vumbirhi xi olova, xa vunharhu ni xa vumune swi landzela, kutani hi ku hatlisa ku nghena eka swa misava ku ta hi ku anghwetla lokukulu. Eku heteleleni, lava va “rhandzaka ku tiphina ku tlula ku rhandza Xikwembu” va khomeka swinene hi ku ‘kunguhatela ku navela ka nyama ka ha ri emahlweni.’ (2 Timotiya 3:4; Varhoma 13:14) Lavakulu ni lavantsongo va kukuriwa hi xidyoho, naswona mapfalo ya vona ya dlayiwa hi laha ku heleleke. “Kutani a va ha ri na tingana; va tinyiketile emikhuveni ya manyala, va endla swa thyaka hinkwaswo, va nga koti ku tikhoma.”—Vaefesa 4:19; 1 Timotiya 4:2.

12. I matsalwa wahi lama kombisaka matimba ya xidyoho ehenhla ka hina, naswona Pawulo u ririsiwile hi leswi hi ndlela yihi?

¹² Lava va tiyimiseleke ku ka va nga hambanisiwi ni rirhandzu ra Xikwembu va fanele ku titiyisa leswaku va lwisana ni ku namarhela ka xidyoho eka nyama leyi tsaneke. I nala lonkulu, hi laha Bibele hi ku phindha-phindha yi kandziyisaka ha kona: “Un’wana ni un’wana la endlaka xidyoho, i hlonga ra xidyoho,” “hinkwavo va fumiwa hi ku dyoha,” “hinkwavo va dyohile,” “ku dyoha ku nga tshuki ku fuma emirini wa n’wina lowu faka,” “mi mahlonga ya loyi mi n’wi yingisaka,” “ku dyoha ka hakela, hakelo ya kona i rifu,” naswona hinkwaswo swi “bohiwile hi vudyoho.” (Yohane 8:34; Varhoma 3:9, 23; 6:12, 16, 23; Vagalatiya 3:22) Pawulo a a “fumiwa hi ku dyoha,” “mubohiwa enawini wa ku dyoha,” leswi n’wi endleke leswaku a rila a ku: “Leswinene leswi ndzi navelaka ku swi endla, a ndzi swi endli, kambe leswo biha leswi ndzi nga naveliki ku swi endla, ndza swi endla.” (Varhoma 7:14, 19, 23) Kutani wa rila a ku: “Yo! Mina munhu wa khombo leronghasi! I mani la nga ta ndzi ntshunxa emirini lowu wu ndzi yisaka eku feni xana?” Manuku ku ta nhlamulo yo tsakisa leyi nge: “A ku nkhensiwe Xikwembu ha Yesu Kriste, Hosi ya hina!”—Varhoma 7:24, 25.

13, 14. (a) I yini lexi hi ntshunxeke exidyohweni? (b) Hi nga tshama erirhandzwini ra Kriste hi ndlela yihi?

¹³ Ku kondza loko Kriste Yesu a tile, ‘xidyoho xi fume tanihi hosi hi rifu.’ (Varhoma 5:14, 17, 21) Kambe eku feni ni le ku pfuxiweni ka Yesu, hosi xidyoho u herisiwile eka lava va amukelaka nyiko ya Xikwembu ya rirhandzu ya N’wana wa xona. U hi ponisile eswidyohweni swa hina, u swi hlantswile, u hi basisile eka swona, u hi ntshunxile eka swona, naswona u hi susele swona hi laha ku heleleke. (Matewu 1:21; Mintirho 3:19; 22:16; 2 Petro 1:9; 1 Yohane 1:7; Nhlavutelo 1:5) Xisweswo a hi muapostola Pawulo ntsena kambe hinkwavo lava kombisaka ripfumelo engatini leyi chuluriweke ya Kriste Yesu va fanele ku nkhensa Xikwembu ha Yesu Kriste Hosi ya hina hikwalaho ka ku hi pfulela ndlela yo hi ntshunxa evuhlongeni lebyi chavisaka bya nyama bya xidyoho ni rifu.

¹⁴ Kutani i swa nkoka ku ka u nga papalati ku tihambanisa kwihi na kwihi na rirhandzu ra Xikwembu ntsena kambe ni ku tshama erirhandzwini ra Kriste. Ndlela yo tshama ekusuhi na Yesu ni ya ku tshinelela Xikwembu ya fana. Yesu u kombise leswi, a ku: “Tanihi leswi Tatana a ndzi rhandzeke, na mina ndzi mi rhandzile; tshamani erirhandzwini ra mina. Loko mi hlayisa milawu ya mina, mi ta tshama erirhandzwini ra mina tanihi laha na mina ndzi hlayisaka milawu ya Tata wa mina, kutani ndzi tshama erirhandzwini ra yena.”—Yohane 15:9, 10.

Khombo Ro Hambuka

15. I yini lexi hi hlaselaka hi ku olova, naswona hi fanele ku endla yini ku papalata khombo ra kona?

¹⁵ U nga lahlekeriwi hi ntshunxeko lowu evuhlongeni bya xidyoho ni rifu hi ku tlhelela endzhaku kumbe ku hambuka. Swi nga humelela hakantsongo-ntsongo lerova hi nga ha hambukisiwa hi nga swi voni. Hi laha Vagalatiya 6:1 yi vulaka ha kona yi ri: “Vamakwerhu, na loko un’wana a kumiwa a ri karhi a endla xihoxo, n’wina lava mi nga va Moya, n’wi vuyiseni hi moya wa musa. Tivonele leswaku na wena u nga ringiwi.” Hambi ku ri ndlela leyi munhu a tshinyaka un’wana ha yona, u fanele ku ‘tivonela hi yexe.’ Hinkwerhu hi hlaseleka hi ku olova! “Hikokwalaho, hi fanele ku hlayisa swinene timhaka leti hi ti tweke, leswaku hi taka hi nga hambuki endleleni ya tona.”—Vaheveru 2:1.

16, 17. I yini lexi kombisaka khombo ro hambuka emoyeni, naswona hi fanele ku endla yini ku ri papalata?

¹⁶ Ku hambuka ku hava matshalatshala. Hi yona mhaka leyi ku olovaka swinene—naswona ku ni khombo ngopfu, hi tlhelo ra moya. U nga tikuma u tihambanisa ni rirhandzu ra Xikwembu u nga si swi vona. Swi fana ni nyimpfu leyi lahlekaka. Yi lahlekisa ku yini xana? Murisi wa hlamusela: ‘Yi dya yi ri karhi yi lahleka. Yi vona swijumba swa byanyi bya rihlaza magoza ma nga ri mangani etlhelo rin’wana, yi famba yi ya dya kona. Yi vona xivandla xin’wana lexi nga eka khume ra magoza ku suka kwalaho kutani yi ya dya kona. Xivandla xa vunharhu xi vonaka xi kokela, kutani nyimpfu yi ya dya eka xona. Hi ku hatlisa yi va kule ni ntlhambi. Yi dya yi ri karhi yi lahleka.’

¹⁷ Swi tano ni le ka lava va hambukaka emoyeni. Swi nga ha sungula ku ri hava xihoxo hi swilo swi nga ri swingani leswi vonekaka, kumbe swinakulobye swa misava, kumbe mimpimanyeto ehenhleni ka matsalwa man’wana. Kambe hakantsongo-ntsongo, vanhu vo tano va suka va ya ekule ni ntlhambi wa Xikwembu, kutani hi ku hatlisa va tihambanisa ni bandlha ni rirhandzu ra Xikwembu. A va xi khathalelanga xikhutazo xa Pawulo lexi nge: “Yanani emahlweni mi tikamba, ku vona loko ma ha ri eku pfumeleni, yanani emahlweni mi tikamba.”—2 Vakorinto 13:5.

18, 19. Xana hi endla leswaku Diyavulosi a hi sukela hi ndlela yihi, naswona hi xi tshinelerisa ku yini Xikwembu?

¹⁸ “Alelani Diyavulosi,” ha byeriwa, “kutani u ta mi siya a tsutsuma.” Hi ku tirhisa ‘fumu ra moya, hi leswaku, rito ra Xikwembu’ hi vutlhari, hi nga hlula minhlaselo ya miringo ya Sathana. Yoleyo hi yona ndlela leyi Yesu emananga a endleke leswaku Sathana a famba ha yona. Nakambe ha byeriwa: “Mi va kusuhi ni Xikwembu kutani xi ta tshinela kusuhi na n’wina.” (Yakobo 4:7, 8; Vaefesa 6:17) Ku fana ni vatsari va Tipisalema, hi fanele ku tshama kusuhi ni Xikwembu hi ku namarhela vito ra xona leri nge: “V̌umboni bya Yehova bya ṭhembeka, byi tlharihisa šihunguki.” “Nḍi hlayisa ku lerisa ka wena ŝinene. . . . Rito ra wena i riv̌oningo e milengeni ya mina, ni ku vonakala e ndleleni ya mina. . . . Kambe a nḍi hambukanga ku ṭunḍušeni ka wena.”—Psalma 19:7; 119:95, 105, 157.

¹⁹ Hi xikhongelo, hi ku dyondza Rito ra Xikwembu, hi ku rhandza vamakwerhu ni ku hlangana na vona nkarhi na nkarhi, hi ku byela van’wana hi ta Mfumo wa Xikwembu—hi tindlela leti hinkwato hi tshinelela Xikwembu ni rirhandzu ra xona hi laha ri kombisiweke ha kona eka Kriste Yesu Hosi yerhu.—1 Vatesalonika 5:17; Varhoma 12:2; Vaheveru 10:24, 25; Luka 9:2.

20. I ku tiyimisela kwihi loku Pawulo a ku twariseke loku Timbhoni ta Yehova namuntlha ti ku endlaka ka tona?

²⁰ Eka xiboho lexi susumetaka ni lexi nga ni matimba, Pawulo u phofule ku tiyimisela ka Timbhoni hinkwato leti tshembekaka ta Yehova emisaveni namuntlha, a ku: “Hikuva ndzi nga kholwa swinene ngopfu leswaku, hambi ri nga va rifu kumbe vutomi, hambi ti nga va tintsumi kumbe matimba ya mademona, hambi swi nga va leswi nga kona sweswi, kumbe leswi nga ta ta, hambi yi nga va mimoya ya matimba leyi nge henhla empfhukeni kumbe leyi nge hansi ka misava, hambi xi nga va xivumbiwa xihi na xihi, ndzi ri: Ku hava lexi nga ta kota ku hi hambanisa ni rirhandzu ra Xikwembu leri nga kombisiwa ha Yesu Kriste, Hosi ya hina.”—Varhoma 8:38, 39.

[Nhlamuselo ya le hansi]

Wa Tsundzuka Xana?

◻ Rirhandzu ra Yehova ri kombisisiwe ku yini emalunghiselelweni yakwe ya vutomi?

◻ Leswaku a hambanisa Timbhoni ta Yehova ni rirhandzu ra Xikwembu, i tindlela tihi leti Sathana a ti ringeteke?

◻ I matsalwa wahi lama kombaka ku namarhela ka xidyoho eka hina, naswona ku namarhela loku ku nga ha hlurisiwa ku yini?

◻ Hikwalaho ka yini ku hambuka ku ri ni khombo, naswona ku nga hlurisiwa ku yini?

[Xifaniso eka tluka 13]

Nyimpfu yi tsendzeleka hakantsongo-ntsongo ku kondza yi lahleka