Vuphayona I Gondzo Leri Yisaka eParadeyisini

Hl SIKU lerinene, leri xiyekaka ra March eNew Jersey, lava va nga vaka 4 300 va hlengeletanile eHolweni ya Nhlengeletano ya Jersey City ya Timbhoni ta Yehova. Va tile va huma eUnited States hinkwayo kun’we ni le matikweni man’wana yo tala. Nhlangano lowu wo hlawuleka wu vangiwe hi swiendlakalo leswi humeleleke eka malembe ya 43 lama hundzeke, loko xikolo lexi hlawulekeke xo letela varhumiwa xi simekiwile ehansi ka vukongomisi bya muungameri wa nkarhi wolowo wa Watch Tower Bible and Tract Society, Nathan H. Knorr.

Nhlangano lowu wa March a wu ri wa ku thwasisiwa ka ntlawa wa vu-80 wa Xikolo xa Bibele xa Watchtower xa Gilead. Kambe i yini lexi susumeteleke ntshungu wo tano ku ta etidyondzweni to thwasisa xana? I ntikelo lowu a wu languteriwile wa nongonoko wa kona.

Malangutelo Ya Varhumiwa—Xilotlelo Lexi Yisaka Eku Humeleleni

Mutshami wa xitulu wa nongonoko a ku ri Karl Klein, xirho xa Huvo leyi Fumaka ya Timbhoni ta Yehova. U tivise xivulavuri xo sungula, khale ka murhumiwa eJapani, Lloyd Barry, loyi sweswi a nga xirho xa Huvo leyi Fumaka, loyi a vulavuleke hi mhaka leyi nge “Engetela Mintirho eRipfumelweni Ra Wena.’’ U tshinyile a ku: ‘Endzhaku ka ntlhanu wa tin’hweti ta vuleteri lebyikulu bya Gilead, rirhandzu ni ripfumelo ra n’wina swi kurile. Manuku ke, loko mi ri karhi mi ya eswiavelweni swa n’wina, mi fanele ku engetela mintirho.’ (Yakobo 2:22, 23) U vule leswaku ku fana na Yehova va fanele ku ‘pfuka nimixo’ ivi va tirhisa siku leri heleleke kahle entirhweni wa yena.—Yeremia 7:25.

Daniel Sydlik, xirho xin’wana xa Huvo leyi Fumaka, u nyike ndzayo leyi khutazaka hi mhaka leyi nge “U Nga Swi Kota Ku Hlakulela Langutelo Leri Faneleke.” U te, eka xiyimo xihi na xihi, u nga teka langutelo lerinene kumbe lero biha. A ri karhi a seketela tinhla takwe eka Malakia 3:15, 16, u kombise ndlela leyi swi olovaka ha yona ku kuma swihoxo eka tiko lerintshwa. U hambetile a ku: “U nga hatliseli ku kuma swihoxo. Vana ni langutelo leri tsakisaka leri Xikwembu xi nga ta ri katekisa.”

Swivulavuri swin’wana, ku katsa na Ulysses Glass, mutsarisi wa xikolo, swi kandziyise xilaveko xa ku tiyisela, ku aneriseka entirhweni ni xivindzi. Jack Redford, khale ka murhumiwa ni un’wana wa valeteri va xikolo, u nyikele ndzayo leyi tirhaka ehenhleni ka ku hlayisa mianakanyo leyi pfulekeke. Tsundzuka, u te, “Vavanuna lava tlhariheke va cinca miehleketo ya vona, swihunguki a swi yi cinci!” Kutani u tsundzuxe varhumiwa lavantshwa ku va lava hundzu-hundzukaka ku fana na muapostola Pawulo, loyi a a swi kota ni ku tshaha swiphato swa kwalaho. (Mintirho 17:28) U hetelele hi ku: “Balekani swiluva laha mi byariweke kona. . . . Hlayisani mianakanyo ni mbilu leyi pfulekeke.”

Nkulumo-nkulu yo thwasisa yi nyikeriwe hi muungameri wa Watch Tower Society, Frederick W. Franz, loyi sweswi a nga ni 92 wa malembe hi vukhale. Ehansi ka nhloko-mhaka leyi nge “Vuphayona Se I Gondzo Lerl Yisaka aParadeyisini eMisaveni,” u tsundzuxe ta ku sunguriwa ka Xikolo xa Gilead, “xihlangi xa nyimpi ni n’wana wa ripfumelo” loyi a sunguleke exikarhi ka Nyimpi ya Vumbirhi ya Misava. A tirhisa Esaya 62:10 tanihi ndzimana ya xihloko xakwe, u kombe ndlela leyi varhumiwa lavantshwa a va ta hlanganyela ha yona entirhweni lowu wukulu wo aka gondzo lerikulu, leri tiyeke leri lavantshwa lava taka evugandzerini bya ntiyiso a va ta famba eka rona endleleni ya vona leyi yaka eParadeyisini leyi pfuxetiweke. Ku dlayelela nongonoko wa nimixo, tidiploma ti nyikiwe mathwasani ya 24.

Nongonoko wa ndzhenga wu katse ku pfuxeta loku tsakisaka ka mathwasani ka swilo leswi va swi dyondzeke exikolweni, kun’we ni ku vona mintlhontlho ya nkarhi lowu taka leyi a va ta kongomana na yona. Nongonoko wu hetelele hi drama ya Bibele leyi nga ni mpahla leyi heleleke leyi kombiseke swinene ndlela leyi Rahava, naswona endzhakunyana ku va Vagibiyoni, va kombiseke ripfumelo leri yisaka eku kutsuriweni ha yona.—Yoxuwa, tindzima 2 ku ya eka 6 na 9.

Kun’we ni mathwasani ya 24 ya ntlawa wa vu-80 wa Xikolo xa Gilead, ntsengo wa varhumiwa va 6 234 wu hangalakile emisaveni hinkwayo ku ya rhangela ntirho wo chumayela eku hetisekeni ka Matewu 24:14.