Xiviko Xa Vahuweleri Va Mfumo

Tinxaka Leti Nga Ni Vun’we eAfrika Dzonga!

IMBALI i lokhixi ra vantima leri nga ehandle ka Pietermaritzburg, aNatal, eAfrika Dzonga. Loko mabandlha mambirhi ya Imbali ya Timbhoni ta Yehova ya nyikiwe xiphemu xa tiko, vakulu va mabandlha ya vo basa ni makhaladi ePietermaritzburg hi ku hatlisa va hlangane kun’we ku pulana hi laha va nga pfunaka vamakwavo va vantima ku aka Holo ya Mfumo hi nkarhi lowu kotekaka wo koma. Hambi leswi ntirho wo aka wu heteke ku tlula tin’hweti ta kaye, kahle-kahle swi lo teka ntsena masiku yo tirha ya 48 ku heta ntirho, lowu hakanyingi a wu endliwa hi Migqivela.

Eka vaaki-ndhawu va Imbali, muako wa Holo leyi ya Mfumo wu kombe swin’wana leswi va faneleke va ehleketile leswaku a swi koteki. Ehleketa makume-kume ya vo basa, Makhaladi na Timbhoni ta Maindiya ya ya elokhixini ya huma ePietermaritzburg na Durban naswona ya tirhisana ni mabandlha ya Vantima! (Ringanisa Sofonia 3:9.) Vavanuna, vavasati ni vana hinkwavo a va hundziselana nhundzu ni switirho, naswona a va dya swakudya etafuleni rin’we. Vun’we byo tano bya tinxaka a byi twiwi emalokhixlni ya Vantima, ngopfu-ngopfu enkarhini lowu wa minkitsikitsi! Hakunene, lebyi i vumbhoni lebyi nga hava ku kanetiwa bya leswaku Timbhoni ta Yehova i vanhu lava nga ni vun’we lava hakunene va khathalelanaka.

Loko a hlamusela hi vun’we lebyi, muakelani un’wana u te: “Ku vona vo basa, vantima, makhaladi ni maindiya va tirha hi ntwanano swi hi hlamarisile. A hi byi voni vun’we byo tano etikerekeni ta hina.’’ Meyara wa Imbali, Mr. Pakkies, u ve kona eku nyikeriweni ka holo hi November 10, 1985, naswona u hlamarisiwile hi vun’we ni ku tiyimisela ka Timbhoni ku heta muako wo tano lowukulu hi voxe. U katsakanye hi laha va endleke ha kona hi ku, “swi nga endliwa ntsena hi rirhandzu.” I ntiyiso swonghasi! Kutani Yesu hi yexe a nga vulanga a ku: “Hi rirhandzu leri mi rhandzanaka ha rona, hinkwavo va ta tiva leswaku mi vadyondzisiwa va mina.”?—Yohane 13:35, The Jerusalem Bible.

Loko makumu ya mafambiselo ya sweswi ya swilo ma ri karhi ma tshinela hi ku hatlisa, Timbhoni ta Yehova eAfrika Dzonga hinkwayo ta xi vona xilaveko xo aka Tiholo ta Mfumo emalokhixini ya vantima ni le tindhawini ta le handle hi ku hatlisa hi laha swi nga kotekaka ha kona. Holo ya Mfumo yo sungula eSoweto yi nyikeriwe hi February 1985. Tin’wana to hlaya ta ha lava ku akiwa. Eka mabandlha ya 700 ensin’wini ya vantima, lama nga vaka 70 ma ni Tiholo ta wona ta Mfumo, kutani ku na xilaveko lexikulu ngopfu lexi faneleke ku tatiwa. Holo ya Imbali yi pfuna ku tata xilaveko xolexo. Yi ringana ku tshamisisa vanhu va 400, lava, hi ku aneriseka, va nga tekaka swakudya swa moya swa nkoka leswi phameriwaka kwalaho. Ina, etindhawini to tano ta dyondzo ya Bibele, varhandzi va ku lulama va dyondza hi laha va nga ponaka makumu ya mafambiselo lawa ya swilo ha kona va kuma vutomi emafambiselwenl lamantshwa ya Xikwembu laha tinxaka hinkwato ta vanhu ti nga ta hanya hi laha ku nga heriki tanihi ndyangu wun’we lowu hlanganeke!