Kombisani Rirhandzu Ni Ripfumelo Minkarhi Hinkwayo
“Loyi a tshamaka erirhandzwini, ú tshame eka Xikwembu, na Xikwembu xi tshama eka yena.” “Kutani ku hlula loku hlulaka misava i ku pfumela ka hina.”—1 YOHANE 4:16; 5:4.
1, 2. I timfanelo tihi leti ngopfu-ngopfu ti kandziyisiweke eka 1 Yohane 4:7-5:21?
YEHOVA i xikombiso xa rirhandzu, kutani lava navelaka ku n’wi tsakisa va fanele ku kombisa mfanelo leyi ya Xikwembu. Muapostola Yohane u veka leswi erivaleni eka xiphemu xo hetelela xa tsalwa rakwe ro sungula leri huhuteriweke.
2 Vakriste va ntiyiso na vona va fanele va kombisa ni ripfumelo. I ndlela leyi ntsena leyi nga endlaka leswaku va hlula misava ivi va tshama va sirheletekile etintswalweni ta Yehova. Manuku, loko hi ri karhi hi dyondza xiyenge xo hetelela xa tsalwa ra Yohane, a hi xiyisiseni ntikelo wa ku kombisa rirhandzu ni ripfumelo hi xikhongelo.
‘A Hi Rhandzaneni’
3, 4. Ku kombisa rirhandzu ku na vuxaka byihi ni ku tiva ka hina Xikwembu?
3 Yohane u kandziyisa ntikelo wa rirhandzu. (Hlaya 1 Yohane 4:7, 8.) “Varhandziwa” va Vukriste va khutaziwa ku ‘hambeta va rhandzana, hikuva rirhandzu i ra Xikwembu,’ Yehova hi yena Xihlovo xa rona. “Un’wana ni un’wana loyi a nga ni rirhandzu u tswariwile hi Xikwembu, [tanihi munhu la tswariweke hi moya] naswona u tiva Xikwembu,” a tolovelana ni timfanelo ni swikongomelo swa Yehova, ni ndlela leyi a kombisaka rirhandzu ha yona. Namuntlha ku ‘tiva loku ka Xikwembu’ ku kumiwa na hi “ntshungu lowukulu” wa “tinyimpfu tin’wana” ta Kriste.
4 Ku tiva Xikwembu swi vula ku tlangela timfanelo ta xona hakunene, hi xi rhandza hi laha ku heleleke, hi namarhela eka xona tanihi Hosi ya hina. Kambe “loyi a nga riki na rirhandzu, a nga xi tivi Xikwembu.” Lava va nga kombisiki rirhandzu ra Vukriste a va “xi tivi Xikwembu, hikuva Xikwembu i rirhandzu.” Ina, rirhandzu i mfanelo leyikulu ya Yehova, leyi yi vonakaka eka malunghiselelo yakwe ya moya ni ya nyama eka vanhu.
5. Hi byihi vumbhoni lebyikulu bya leswaku “Xikwembu i rirhandzu”?
5 Leswi landzelaka i vumbhoni lebyikulu bya leswaku “Xikwembu i rirhandzu.” (Hlaya 1 Yohane 4:9, 10.) Yohane u ri: “Rirhandzu ra Xikwembu ri vonakisiwile eka hina hi ndlela leyi [tanihi vadyohi lava lulameriwaka hi rifu], hi leswaku Xikwembu xi rhumile N’wana la nga un’we wa xona ku ta laha misaveni, leswaku hi ta kota ku hanya hikwalaho ka yena.” Yesu i “N’wana la nga un’we” wa Yehova hi mhaka ya leswi a a ri xivumbiwa xo sungula lexi kongomeke xa Xikwembu. (Yohane 1:1-3, 14; Vakolosa 1:13-16) Nakona Yesu ‘u rhumeriwile emisaveni’ hi ku va munhu, a hetisisa vutirheli byakwe erivaleni, kutani a fa rifu ra gandzelo. (Yohane 11:27; 12:46) ‘Ku kuma vutomi lebyi nga heriki ha yena,’ etilweni kumbe emisaveni, swi lava ripfumelo leri titshegeke hi gandzelo ra nkutsulo wa yena.
6. Loko ha ha ri vadyohi i mani loyi a a nga rhandzi Xikwembu, naswona u endle yini?
6 A ha ha ri vadyohi lava va nga rhandziki Xikwembu loko “xi hi rhandzile, kutani xi rhumele N’wana wa xona ku va mhamba ya swidyoho swa hina.” Gandzelo ra Kriste ri endle leswaku swi koteka eka hina ku tlheriseriwa evuxakeni lebyinene ni Xikwembu. (Varhoma 3:24, 25; Vaheveru 2:17) Xana u tlangela xikombiso lexi xikulukumba xa rirhandzu leri nga ku fanelangiki hi tlhelo ra Tata wa hina wa le tilweni ke?
7. (a) Leswi hi nga swi kotiki ku vula leswaku hi rhandza Yehova hikwalaho ka ku va hi n’wi vonile, hi nga kombisisa ku yini leswaku ha n’wi rhandza ke? (b) Xana ku kombisa ka hina rirhandzu ra vamakwerhu swi kombisa yini ke?
7 Rirhandzu ra Xikwembu eka hina ri fanele ri khumba ndlela leyi hi langutanaka ha yona. (Hlaya 1 Yohane 4:11-13.) Leswi a hi rhandzeke ha ha ri vadyohi, “na hina hi fanele ku rhandzana.” Exikarhi ka vanhu, “ku hava na munhu na un’we la tshamaka a vona Xikwembu.” Kutani hi nga ka hi nga vuli leswaku hi rhandza Yehova hi mhaka ya leswi hi n’wi voneke. (Eksoda 33:20; Yohane 1:18; 4:24) Hambi swi ri tano, hi ku kombisa rirhandzu, hi kombisa leswaku hi rhandza Xihlovo xa mfanelo leyi. Rirhandzu ra hina ra vamakwerhu ri kombisa leswaku “Xikwembu xi tshame eka hina ni leswaku rirhandzu ra yena ri hetisekile,” kumbe ku fikelela xikombiso lexi heleleke, eka hina. Kutani ha swi tiva leswaku “hi tshame eka” Yehova ‘hikuva u hi nyikile swa moya wakwe.’ Ku kombisa ka hina rirhandzu ra vamakwerhu swi kombisa leswaku moya wa Yehova wa tirha eka hina, hikuva rirhandzu hi wun’wana wa muhandzu ya wona. (Vagalatiya 5:22, 23) Leswi swi komba leswaku hi tiva Xikwembu naswona ha amukeleka eka xona.
8. I vumbhoni byihi lebyi engetelekeke lebyi nga kona bya leswaku “hi tshame eka Xikwembu”?
8 Ku ni vumbhoni lebyi engetelekeke bya leswaku hi “tshame eka Xikwembu.” (Hlaya 1 Yohane 4:14-16a.) Hi ku “tiva” leswi Yesu a nga swi endla emisaveni ni ndlela leyi a xanisekeleke vanhu ha yona, Yohane u swi kotile ku ‘veka vumbhoni bya leswaku Tatana u rhumele N’wana ku va Muponisi wa misava’ ya vanhu lava dyohaka. (Yohane 4:42; 12:47) Ku tlula kwalaho, ‘Xikwembu xi tshama eka hina na hina eka xona’ loko hakunene-nene hi vula leswaku Yesu Kriste i N’wana wa xona. Leswi swi lava ku kombisa ripfumelo ni ku nyikela vumbhoni bya le rivaleni bya leswaku Yesu i N’wana wa Xikwembu. (Yohane 3:36; Varhoma 10:10) Ntshembo wa hina eka “rirhandzu leri Xikwembu xi nga na rona eka hina” wu hi nyika vumbhoni byin’wana bya leswaku hambi hi va masalela lama totiweke kumbe va “tinyimpfu tin’wana” hi tshame eka Yehova.
9. (a) Rirhandzu ra Xikwembu ri nga ‘endliwa leri hetisekeke’ hi langutelo rihi, naswona leswi swi ta khumba vuxaka bya hina ni van’wana hi ndlela yihi? (b) Rirhandzu leri “hetisekeke” ri kurisa yini?
9 Yohane u ya emahlweni a kombisa leswaku rirhandzu ri nga va leri “hetisekeke.” (Hlaya 1 Yohane 4:16b, 17.) Hi tsundzuxiwa leswaku “Xikwembu i rirhandzu.” Hi ku va hi ‘tshama erirhandzwini,’ hi kombisa muhandzu lowu wa moya wa Yehova, hi ‘van’we ni Xikwembu.’ Loko rirhandzu ra ku rhandza Yehova “ri hetisekile eka hina,” ri tikombe hi xitalo eka yena, hi ta rhandza vapfumeri-kulorhi. (Ringanisa ndzimana 12.) Rirhandzu leri “hetisekeke” ri kurisa ni ku “tiya nhlana” eka Xikwembu exikhongelweni sweswi ni le “sikwini ra ku avanyisa” leri fambisanaka ni vukona bya Kriste. Lava va kombisaka rirhandzu ro tano enkarhini wolowo va nge vi na xona xivangelo xo chava leswaku ku avanyisa ka Xikwembu ku nge tsetseleri. Loko hi kombisa rirhandzu, hi ndlela yoleyo tanihi “leswi [Yesu] a nga swona, na hina hi swo leswi hi nga swona laha misaveni.” Ina, hi fana na yena hi ku tsakela musa tanihi vana va Xikwembu emisaveni leyi ya vanhu lava va nga rhandziki Xikwembu.
10. I yini lexi lava rirhandzu ri endliweke leri “hetisekeke” eka vona va nga xi tokotiki?
10 Lava rirhandzu ri “hetisekeke” eka vona a va tokoti ku chava loku sivelaka xikhongelo. (Hlaya 1 Yohane 4:18, 19.) “Ku chava ku fambelana ni ku biwa” loku a ku ta hi sivela ku tshinelela Yehova hi ku ntshunxeka. Kutani loko hi tokota ku chava ko tano, ‘a hi hetisekanga erirhandzwini.’ Kutani loko hi “hetisekile erirhandzwini,” mfanelo leyi yi tata timbilu ta hina, yi hi susumetela ku endla ku rhandza ka Xikwembu ni ku hi vangela ku tshama hi ri kusuhi na Tata wa hina wa le tilweni hi xikhongelo. Hakunene hi ni xivangelo xo rhandza Yehova ni ku khongela yena, tanihi leswi Yohane a nge, ‘Hina hi ni rirhandzu hikuva ku rhangile Xikwembu xi hi rhandza.’
11. Hikwalaho ka yini swi twala leswaku hi yingisa nawu lowu nge: “Loyi a rhandzaka Xikwembu, u fanele naswona ku rhandza makwavo”?
11 Kavula, a swi enelanga ku vula ntsena leswaku hi rhandza Xikwembu. (Hlaya 1 Yohane 4:20, 21.) Un’wana ni un’wana la nge, “Ndzi rhandza Xikwembu” kambe a venga makwavo wa moya “i muhembi.” Leswi hi nga vonaka makwerhu ni ku xiya mikhuva ya yena ya vugandzeri, ku n’wi kombisa rirhandzu swi fanele ku olova ku tlula ku rhandza Xikwembu lexi nga vonekiki. Hakunene, “la nga rhandziki makwavo loyi a n’wi vonaka hi mahlo, a nge swi koti ku rhandza Xikwembu lexi a nga xi voniki.” Kutani swa twala leswaku hi yingisa “nawu” lowu: “Loyi a rhandzaka Xikwembu, u fanele naswona ku rhandza makwavo.”
I Mani La Hlulaka Misava Xana?
12. Leswi hi rhandzaka Xikwembu, i rirhandzu rihi rin’wana leri nga rindzeriwaka leswaku hi va na rona?
12 Yohane u ya emahlweni a komba leswi ku rhandza Xikwembu swi vulaka swona hakune’ne. (Hlaya 1 Yohane 5:1-5.) Xo sungula, muapostola u komba leswaku “un’wana ni un’wana la pfumelaka leswaku Yesu hi yena Kriste,” (Mesiya, kumbe Mutotiwa wa Yehova) “u tswariwile hi Xikwembu,” kumbe u tswariwe hi moya hi Yehova. Ku tlula kwalaho, un’wana ni un’wana la rhandzaka Mutswari, Yehova, u rhandza un’wana ni un’wana ‘la tswariweke hi yena.’ Ina, vana hinkwavo lava totiweke va Xikwembu va xi rhandza naswona va rindzeriwe ku rhandzana. Rirhandzu ro tano ra vamakwerhu nakambe i mfungho wa “ntshungu lowukulu” wa “tinyimpfu tin’wana” lowu wu nga ni mintshembo ya laha misaveni.—Yohane 10:16; Nhlavutelo 7:9.
13. (a) Hikwalaho ka yini milawu ya Yehova yi nga “tiki” eka hina? (b) Hi ‘hlula misava’ hi ndlela yihi xana?
13 ‘Ha swi tiva leswaku hi rhandza vana va Xikwembu loko hi rhandza Xikwembu ni ku yingisa milawu ya xona.’ Entiyisweni, ‘ku rhandza Xikwembu swi vula leswi: leswaku hi hlayisa milawu ya xona.’ Leswi hi rhandzaka Xikwembu ni ku lulama, ha tsakela ku hlayisa milawu ya xona. Yohane u ri a yi “tiki” eka hina “hikuva xin’wana ni xin’wana lexi tswariweke hi Xikwembu, xi hlula misava.” “Xin’wana ni xin’wana” swi nga ha vula matimba lama humaka eka Xikwembu yo ‘hlula misava,’ kumbe ku hlurisisa ehenhla ka vandla ra vanhu lavo biha ni miringo ya vona yo tshova milawu ya Yehova. (Yohane 16:33) “Ku hlula loku hlulaka misava” i ku “pfumela ka hina” eka Xikwembu, eRitweni ra xona ni N’wana wa xona. Loko hi ri ni “ripfumelo leswaku Yesu i N’wana wa Xikwembu,” hi ‘hlula misava’ hi ku ala ku ehleketa ka yona loku hoxeke ni tindlela ta vunghwavava kutani hi hlayisa milawu ya Xikwembu.
14. (a) Yesu u te njhani “hi mati ke”? (b) Xana Kriste u kombisiwe ku yini a ri N’wana wa Xikwembu “hi ngati”? (c) Xana moya lowo kwetsima ‘wu veke vumbhoni’ hi ndlela yihi ehenhleni ka Yesu Kriste ke?
14 Leswi ripfumelo eka Yesu ri nga ra nkoka emhakeni ya ku va ka hina ‘lava hlulaka misava,’ Yohane u tshaha vumbhoni lebyi nyikeriweke ehenhleni ka Kriste hi ‘timbhoni tinharhu.’ (Hlaya 1 Yohane 5:6-8.) Xo sungula Yohane u vula leswaku Yesu “hi la teke hi mati.” Loko Yesu a khuvuriwa ematini a a kombisa ku tinyiketa ka yena eka Xikwembu, Yehova u te: “Loyi i N’wananga la rhandzekaka, loyi ndzi n’wi tsakelaka swinene.” (Matewu 3:17) Nakambe Yesu u kombisiwe a ri N’wana wa Xikwembu “hi ngati” leyi a yi chululeke eku feni ka yena tanihi nkutsulo. (1 Timotiya 2:5, 6) Ku tlula kwalaho, Yohane u ri, “moya [lowo kwetsima] i mbhoni ya swona, hikuva Moya i ntiyiso.” Ku ehlela ka moya eka Yesu loko a khuvuriwa ku n’wi kombise a ri N’wana wa Xikwembu. (Matewu 3:16; Yohane 1:29-34) Moya wa Yehova wu pfune Yesu ku hetisisa xileriso xakwe ni ku endla mintirho ya matimba. (Yohane 10:37, 38; Mintirho 10:38) Hi moya, Xikwembu xi endle munyama lowu nga tolovelekangiki, ku tsekatseka ka misava ni ku handzuka ka nguvu ya tempele loko Yesu a fa, naswona endzhaku hi moya lowu Xikwembu xi n’wi pfuxile eku feni.—Matewu 27:45-54.
15. “Timbhoni tinharhu” i yini xana?
15 Xisweswo “ku na timbhoni tinharhu” ta leswaku Yesu i N’wana wa Xikwembu. Tona i (1) moya lowo kwetsima, (2) mati ya ku khuvuriwa ka Yesu ni leswi a ya yimela swona (ku tinyiketa ka yena eka Yehova), na (3) ngati leyi a yi chululeke eku feni ka yena tanihi nkutsulo. Hi vunharhu ka tona “ta twanana” eku nyikeleni ka vumbhoni bya leswaku Yesu i N’wana wa Xikwembu, eka loyi hi faneleke ku va ni ripfumelo ra ntiyiso eka yena loko hi lava ku amukela vutomi lebyi nga heriki.—Ringanisa Deuteronoma 19:15.
Vumbhoni Lebyi Vekiweke Hi Xikwembu
16. Xana Yehova u veka vumbhoni mayelana na Yesu hi ndlela yihi?
16 Xikwembu hi xoxe xi veke vumbhoni mayelana ni N’wana wa xona. (Hlaya 1 Yohane 5:9-12.) “Loko hi amukela vumbhoni bya vanhu [lava nga hetisekangiki] [tanihi lebyi nga ntiyiso hi mukhuva lowu hi endlaka ha wona emabulwini ni le hubyeni], vumbhoni bya Xikwembu i byikulu ku tlula sweswo.” (Yohane 8:17, 18) Leswi ‘Xikwembu xi nga hembiki’ hi nga veka ku tshemba loku heleleke eka ‘vumbhoni lebyi xi byi vekeke mayelana ni N’wana wa xona.’ Naswona Yehova u vule leswaku Yesu Kriste i N’wana wa yena. (Tito 1:2; Matewu 3:17; 17:5) Ku tlula kwalaho, Xikwembu a xi seketela “timbhoni tinharhu,” ku nga Moya wa xona lowo kwetsima, mati ya ku khuvuriwa ka Yesu ni ngati leyi halakeke ya Yesu.
17. I ndlela yihi ntsena leyi ku ponisiwa ku kotekaka ha yona ke?
17 “Loyi a pfumelaka eka N’wana wa Xikwembu, vumbhoni byi le ka yena,” kumbe “eka yena,” hikuva vumbhoni hinkwabyo byi n’wi khorwisa leswaku Yesu i N’wana wa Xikwembu. Kambe “loyi a nga pfumeriki Xikwembu” tanihi mbhoni leyi tshembekaka mayelana ni N’wana wa xona u endla leswaku Yehova a vonaka a ri muhembi. Kavula, ntsengo wa vumbhoni lebyi nyikeriweke “hi leswaku Xikwembu xi hi nyikile vutomi lebyi nga heriki, ni leswaku vutomi lebyi byi le ka N’wana wa xona.” Ku poniseriwa evuton’wini lebyi nga heriki ku endleka hi ku pfumela eka Yesu ntsena tanihi N’wana wa Xikwembu. (Yohane 11:25, 26; 14:6; 17:1-3) Kutani “loyi a nga na N’wana” hi ku tshemba eka yena u na nyiko leyi nga fanelangiki ya vutomi lebyi nga heriki. (Yohane 20:31) Kambe “vutomi lebyi” byi nge tsakeriwi hi mani na mani la nga riki na ripfumelo eka Yesu tanihi N’wana wa Xikwembu.
Xikhongelo Xa Tirha
18. Hikwalaho ka yini Yohane a tsale “timhaka leti”?
18 Yohane u ya emahlweni a nyika xikongomelo-nkulu xa papila rakwe kutani a vulavula hi xikhongelo. (Hlaya 1 Yohane 5:13-15.) U tsale “timhaka leti” leswaku swi ta tiveka ‘leswaku hi ni vutomi lebyi nga heriki.’ Loku i ku tiyimisela ka hina tanihi lava va vekaka ripfumelo eka “vito” ra N’wana wa Xikwembu. (Ringanisa 1 Yohane 3:23.) Naswona vagwinehi, lava va nga riki va ka hina, va nge ri herisi ripfumelo rolero.—1 Yohane 2:18, 19.
19. (a) Hi ku ya hi 1 Yohane 5:14, 15, hi ni ntshembo wihi eka Xikwembu? (b) I timhaka tihi tin’wana leti hi nga ti khongelelaka hi ku kongoma ke?
19 Hi ni “ntshembo,” kumbe ‘ku tiyiseka’ eka Xikwembu, leswaku ku nga khathariseki leswaku hi kombela yini hi xikhongelo “hi ku rhandza ka xona, xa hi twa.” Hi khongela’ khwatsi hi timhaka to tanihi ku hlawulekisiwa ka vito ra Yehova, moya wa yena, vutlhari bya le henhla ni ku kutsuriwa eka lowo biha. (Matewu 6:9, 13; Luka 11:13; Yakobo 1:5-8) Naswona “ha swi tiva leswaku leswi hi swi kombeleke eka xona hi swi kumile,” “la yingisaka mikhongelo.”—Psalma 65:2.
20, 21. (a) Xana “xidyoho lexi nga yisiki eku feni” i yini? (b) Hikwalaho ka yini swi hoxile ku khongelela “xidyoho lexi yisaka eku feni”?
20 Ku ya emahlweni Yohane u vulavula hi xikhongelo ni tinxaka timbirhi ta xidyoho. (Hlaya 1 Yohane 5:16, 17.) “Xidyoho lexi nga yisiki eku feni” a hi xa ha vomu, naswona swi nge vi swi hoxile ku khongelela leswaku mudyohi la hundzukeke a rivaleriwa. (Mintirho 2:36-38; 3:19; Yakobo 5:13-18) Kambe a swi ta va swi hoxile ku khongelela “xidyoho lexi yisaka eku feni” hikuva lexi i xidyoho xa ha vomu lexi Iwisanaka ni moya lowo kwetsima, laha ku rivaleriwa ku nga kotekiki. (Matewu 12:22-32; Vaheveru 6:4-6; 10:26-31) Vadyohi vo tana va ya eGehena, va tokota ku lova loku nga heriki eka “rifu ra vumbirhi” (Nhlavutelo 21:8; Matewu 23:15) Kutani leswi Yehova a nga muavanyisi wo hetelela, a hi rengeti ku ka hi nga n’wi tsakisi hi ku khongelela mudyohi loko vumbhoni byi kombisa leswaku u ni nandzu wa “xidyoho lexi yisaka eku feni” ha vomu.
21 Kutani ke, “loko munhu [ngopfu ngopfu nkulu loyi a totiwile hi moya] a vona makwavo a endla xidyoho lexi nga yisiki eku feni, [“rifu ra vumbirhi”], u ta khongela, kutani [Xikwembu] xi ta n’wi nyika [vutomi],” a n’wi ponisa eku lovisiweni loku nga heriki. Phela “ku homboloka hinkwako i ku dyoha,” kumbe ku hupha mfungho mayelana ni mimpimanyeto ya Xikwembu yo lulama. “Kambe ku ni xidyoho lexi nga yisiki eku feni” hikwalaho ka leswi xi humaka eku nga hetisekeni ka hina ha hundzuka, ivi xidyohi xi funengetiwa hi gandzelo ra Kriste.
Tinhla Ta Papila Ra Yohane
22. I mani ‘a nga n’wi khumbiki’ Mukriste la tshembekaka, naswona i yini lexi munhu wo tano a nga xi khongelelaka hi ku tiyiseka?
22 Manuku Yohane u katsakanya tinhla to sungula epapileni rakwe. (Hlaya 1 Yohane 5:18-21) Un’wana ni un’wana “la tswariweke hi Xikwembu” tanihi Mukriste loyi a totiweke hi moya “a nga tshameli ku dyoha.” Yesu Kriste, “la tswariweke hi Xikwembu” hi moya lowo kwetsima “wa n’wi hlayisa, kutani lowo biha [Sathana] a nga n’wi khumbi.” Mukriste wo tano la tshembekaka ni loyi a totiweke a nga khongelela ku kutsuriwa eka lowo biha hi ku tiyisela, naswona a nga swi kota hi ku tirhisa “xitlhangu xa ripfumelo,” a pona ku onhaka ka moya loku humaka eka “miseve leyi pfurhaka” ya Sathana.—Matewu 6:13; Vaefesa 6:16.
23. ‘Misava hinkwayo yi le hansi ka lowo biha’ hi ndlela yihi xana?
23 Leswi lava totiweke va nga ni vumbhoni bya leswaku i vana va moya wa Yehova, va nga vula leswaku, “Ha swi tiva leswaku hi va Xikwembu.” Ntiyiso wa leswaku va ni ripfumelo eka Kriste naswona a va tshameli u dyoha ku kombisa leswaku i vana va Xikwembu lava Sathana a nga swi koteki ku va “khumba.” “Kambe misava hinkwayo [vandla ra vanhu vo homboloka] yi le hansi ka matimba ya lowo biha,” Sathana Diyavulosi. (Vaefesa 2:1, 2; Nhlavutelo 12:9) Misava yi amukele minkucetelo leyo biha ni vulawuri bya Sathana, yi nga ma endli matshalatshala yo tintshunxa leswaku yi ta endla ku rhandza ka Xikwembu.
24. Xana Yesu u “hi nyike ku twisisa” ku fikela kwihi?
24 Vadyondzisi van’wana vo hemba va vule leswaku Kriste a a nga tanga emisaveni. (2 Yohane 7) Kambe vumbhoni lebyi tshahiweke epapileni leri byi pfune Yohane leswaku a swi kota ku vula a ku, “Ha swi tiva leswaku N’wana wa Xikwembu u tile.” (1 Yohane 1:1-4; 5:5-8) Ku tlula kwalaho, Yesu “u hi nyike ku twisisa,” kumbe ‘mianakanyo leyi twalaka,’ leswaku “hi ta tiva yena loyi a nga wa ntiyiso,” ku twisisa ka Xikwembu loku hambetaka. (Matewu 11:27) Kutani “hi le ka yena loyi a nga wa ntiyiso [Yehova Xikwembu], naswona hi le ka N’wana wa yena Yesu Kriste.”—Ringanisa Yohane 17:20, 21.
25. Tanihi Vakriste hi nga tirhisa ndzayo leyi nga eka 1 Yohane 5:21 hi ndlela yihi xana?
25 Lava va nga van’we ni Xikwembu xa ntiyiso, Yehova, hambi hi lava va masalela lama totiweke kumbe va “tinyimpfu tin’wana,” va navela ku xi tsakisa hi tindlela hinkwato. Kambe miringo ya ku gandzela swikwembu swa hava yi ve kona eka lembe xidzana ro sungula, tanihi leswi yi nga kona namuntlha. Kutani hi laha ku fanelaka Yohane u heta papila ra yena hi ndzayo ya tatana a ku: “Vana lavantsongo! Hambanani swinene ni swikwembu swa hava!” Tanihi Vakriste, a hi nkhinsami emahlweni ka swifaniso. (Eksoda 20:4-6) Nakambe ha swi tiva leswaku a swi ta va swi hoxile ku veka hina hi hexe, ntsako kumbe xin’wana ni xin’wana ematshan’wini ya Xikwembu. (2 Timotiya 3:1, 2, 4) Naswona ku tinyiketela ka hina eka xona ku hi sivela ku gandzela “xivandzana” ni “xifaniso” xa xona xa politiki. (Nhlavutelo 13:14-18; 14:9-12) Kutani hi langutelo ro tsakisa Tata wa hina wa le tilweni ni ku amukela nyiko ya yena ya vutomi lebyi nga heriki, a hi papalateni ku gandzela swikwembu swa hava hinkwaswo eku tiyimiseleni ka hina, hi nga ku pfumeleli ku onha vuxaka byerhu lebyi vangamaka na Yehova ha Yesu Kriste.
Mpfuno Lowu Hambetaka Eka Hina
26. Hi tihi timhaka tin’wana ta nkoka ta Yohane wo sungula?
26 Papila ro sungula leri huhuteriweke ra Yohane ri pfune Vakriste vo sungula ku papalata ku gandzela swikwembu swa hava. Ri va pfune ku Iwisana ni vunwa bya vagwinehi, naswona ri hetisisa xikongomelo lexi fanaka namuntlha. Hi xikombiso, ri komba leswaku Yesu Kriste u hanye tanihi munhu ivi a fa tanihi “mhamba” ya swidyoho. Papila leri ri kombisa “Nala wa Kriste” ivi ri hambanisa vana va Xikwembu ni va Diyavulosi. Ri kombisa ndlela yo kambisisa “mimoya” ku vona loko hakunene yi huma eka Yehova. Ku tlula kwalaho, marito ya Yohane ya hi khorwisa leswaku “Xikwembu i rirhandzu,” leswaku ripfumelo ra ntiyiso ri hlula misava, ni leswaku Yehova u twa swikhongelo swa timbhoni ta yena leti tshembekaka.
27. Papila ro sungula ra Yohane leri huhuteriweke hi Xikwembu ri nga hi pfuna hi tindlela tihi xana?
27 Ehansi ka miringo ya misava, i vutlhari swonghasi ku tsundzuka xitsundzuxo xa Yohane xo lwisana ni ku rhandza misava. Loko ku hambana ka munhu hi xiyexe ku veka xihinga evuxakeni bya hina ni vapfumeri-kulorhi van’wana, marito ya muapostola ya nga hi tsundzuxa leswaku hi nga tikombisa hi ri varhandzi va Xikwembu hi ku kombisa rirhandzu ra vamakwerhu. Hi ku pfuniwa hi Xikwembu na hi ku tirhisa ndzayo ya Yohane, hi nga papalata ku endla xidyoho naswona hi nga hlayisa ripfumelo leri hlulaka misava. Kutani a hi kombiseni ku tlangela ka hina ka papila leri ri huhuteriweke loko hi ri karhi hi famba eku vonakaleni ka Xikwembu, hi hambeta hi hanya tanihi vana va Xikwembu, naswona hi kombisa rirhandzu ni ripfumelo minkarhi hinkwayo leswaku ku dzunisiwa Yehova, Tata wa hina wa le tilweni.
U Nga Hlamula U Ku Yini?
◻ Loko hi rhandza Yehova, leswi swi fanele ku khumba vuxaka bya hina ni vapfumeri-kulorhi hi ndlela yihi?
◻ Xana hi nga ’hlula misava’ hi ndlela yihi?
◻ Xana “timbhoni tinharhu” malunghana ni N’wana wa Xikwembu i yini?
◻ Malunghana ni xikhongelo, i “ntshembo” wihi lowu hi nga vaka na wona?
◻ Yohane wo Sungula a nga hi pfuna hi tindlela tihi ke?
[Rito leri tshahiweke eka tluka 22]
Leswi Yehova a hi rhandzeke ha ha ri vadyohi, ‘na hina hi fanele ku rhandzana’
[Rito leri tshahiweke eka tluka 23]
Ripfumelo ra hina eka Xikwembu, Rito ra xona, ni N’wana wa xona la nga un’we swi hi pfuna ku ‘hlula misava’
[Xifaniso eka tluka 25]
Moya lowo kwetsima, mati ya ku khuvuriwa ka Yesu, ngati ya yena leyi halatiweke na Yehova hi yexe swi veka vumbhoni bya leswaku Yesu Kriste i N’wana wa Xikwembu