Vantshwa—Mi Nga Kanganyisiwi
“Na yena Sathana, ú tinyika nghohe ya ntsumi ya ku vonakala.”—2 VAKORINTO 11:14.
1. (a) I tindlela tihi leti vo tala va hina va kanganyisiweke ha tona? (b) Hi ntolovelo, i vamani lava va kanganyisiwaka hi ku olova?
HANDLE ko kanakana hinkwerhu ka hina hi tshama hi xisiwa nkarhi wun’wana. Kumbexana a wu tlanga ntlangu lowu eka wona mutlangi loyi u phikizanaka na yena hi endlelo ro kanganyisa a ku suseke exiyin’weni xa wena ivi xisweswo a howisa leswaku a wina ntlangu. Kumbe u nga ha va u xave nchumu lowu langutekaka wu sasekile wo ambala, ivi endzhaku ko wu ambala no wu hlantswa u xiya leswaku nguvu leyi a yi nga ri ya nkoka tanihi leswi a yi langutekisa xiswona. Kahle-kahle, i vamani lava kanganyisekaka hi ku olova, hi leswaku, va phuntisiwa kumbe ku xisiwa? Xana a hi lava va nga ni ntokoto wuntsongo? Naswona hakanyingi vuyelo bya kona i byikulu swinene ku tlula ku lahlekeriwa hi ntlangu ntsena kumbe ku xisiwa eku xaveni ka swin’wana.
2. Vantshwa van’wana va nghenisiwe eka xidyoho lexikulu hi ndlela yihi?
2 Hi xikombiso, Julie, loyi a a ri na malembe mambirhi ntsena exikolweni xa le henhla, hi ku vula ka yena,a a “rhandzana” ni “jaha ro xonga ni leri dumeke swinene exikolweni hinkwaxo.” U hlamuserile a ku: “Ndzi n’wi byele leswaku a ndzi nga si tiyimisela leswi a a swi lava; kambe u hambete a ndzi byela ndlela leyi a a ndzi rhandza ha yona, ni leswaku hinkwaswo a swi ta lungha. Loko ndzi hambetile ndzi ku e-e, hi loko a ehlisa rito. U te, ‘Hakunene a ndzi tikarhata ha wena, naswona ndzi ehlekete leswaku na wena u titwa hi laha ku fanaka. Loko u nga swi kombisi eka mina, ndzi ehleketa leswaku hi ta fanela ku tshika ku vonana.’” Kutani Julie u pfumerile ivi a endla vuoswi. Hi siku leri tlhandlamaka, loko a tshubule leswaku mufana u tidzunisile hi ku “hlula” ka yena, u xiye ndlela leyi a kanganyisiweke ha yona hi laha ku heleleke. U fanele a swi tivile leswaku loko ku ri leswaku mufana loyi a a n’wi rhandza hakunene, a a ta va a nga swi endlanga.
3. (a) Hikwalaho ka yini vuoswi byi ri xihoxo xo tano lexikulu? (b) Xikongomelo xa Sathana Diyavulosi hi xihi?
3 Leswi Julie a xisiweke kumbe ku kanganyiseriwa ku swi endla a ku ri ku tshova lokukulu ka nawu wa Xikwembu. Hikwalaho ka xivangelo xexo Bibele ya khongotela yi ku: “Chavani vuoswi!” Naswona yi swi veka erivaleni yi ku: “Ku hava munhu ni un’we la nga ta averiwa ndzhaka eMfun’weni wa Kriste ni wa Xikwembu, loko a ri la oswaka.” (1 Vakorinto 6:18; Vaefesa 5:5) Kutani hambi loko Sathana Diyavulosi a nga khathali loko u hlula kumbe loko u hluriwa eka ntlangu wa bolo kumbe u xava hi vutlhari kumbe e-e, u ringeta ku ku hambukisa hi laha ku heleleke leswaku u tshova nawu wa Xikwembu. Bibele ya tsundzuxa yi ku: “Nala wa n’wina a nga Diyavulosi, wa rhendzeleka-rhendzeleka ku fana ni nghala leyi bongaka, yi lava loyi yi nga n’wi dyaka.” (1 Petro 5:8) Hakunene, u tirhisa mano ya yena hinkwawo ya vutlhari, ku katsa ni ku tivula ntsumi ya ku vonakala, leswaku a hi humesa eku tirheleni ka Yehova Xikwembu! Xana yoleyo a hi mianakanyo yo kanganyisa?—2 Vakorinto 11:14.
Dyondza Eka Leswi Swi Endlekeke Eka Evha
4. Ha yini ku nga vuriwaka leswaku vantshwa i xitirho lexi hlawulekeke xa Sathana?
4 Kambe eka n’wina lavantshwa, leyi i mianakanyo leyi kanganyisaka ku tlula mpimo: Mi xitirho xo hlawuleka xa Sathana. Ha yini swi ri tano? Hikwalaho ka vuntshwa bya n’wina, mi vile ni nkarhi wuntsongo wo kuma vutivi ni vutlhari, naswona Sathana u olela lava nga ni ntokoto wuntsongo. U endle sweswo eku sunguleni ka vuxandzuki byakwe. Tsundzuka leswaku u tshinelele Evha entangeni wa Edeni, hayi nuna wa yena Adamu loyi a vumbiweke nkarhinyana emahlweni kakwe. Naswona Sathana u humelerile. Ina, u xisile, a hambukisa Evha lontsongo ni la nga ni ntokoto lowu nga nyawuriki, hi swivumbeko swa yena swa vunwa. Bibele ya hlamusela yi ku: “Hikuva ku rhangile Adamu a vumbiwa, ku landza Evha. Na swona, a hi Adamu loyi a kanganyisiweke, kambe i wansati la kanganyisiweke, kutani a wela eku dyoheni.”—1 Timotiya 2:13, 14.
5. (a) I yini leswi hi nga fanelangiki ku kuceteriwa ku swi anakanya? (b) Muapostola Pawulo a a khathalela yini, naswona ha yini a swi fanela?
5 Mi nga tshuki mi xisiwa mi ehleketa leswaku maendlelo ya Sathana ma nge tirhi eka n’wina, leswaku a nge mi endli leswaku mi tshova milawu ya Xikwembu. Tsundzuka xitsundzuxo xa Xikwembu xa leswaku “Sathana, ú tinyika nghohe ya ntsumi ya ku vonakala.” (2 Vakorinto 11:14) Muapostola Pawulo a a swi xiya khwatsi leswaku N’wini wa Vukanganyisi a a ta humelela eku tshineleleni ka yena Vakriste-kulobye va Pawulo lava nga ni ntokoto wuntsongo. Pawulo u tsarile a ku: “Kambe, kukota leswi nyoka yi kanganyiseke Evha hi mano ya yona, ndza chava leswaku hi tindlela tin’wana mianakanyo ya n’wina yi nga onhiwa, kutani mi nga ha swi koti ku landzela Kriste hi ku tinyiketa ni ku tenga.”—2 Vakorinto 11:3.
6. Xana swi vula yini ku kanganyisiwa?
6 Xiya leswaku Evha a nga lo xisiwa kumbe ku kanganyisiwa ntsena, nakambe u ringiwile. Leswi swi vula leswaku u nghenisiwe endleleni leyi lovisaka hi vukanganyisi kumbe ndzingo lowu phasaka. Hi ku ya Webster’s Third New International Dictionary, ku ringa swi vula “ku khutaza ku xandzuka,” “ku kokela kumbe ku kuma kumbe onge hi loko ku ri hi mano yo tsakisa.” Hi ku kongoma, dikixinari leyi yi ri, ku ringa swi vula “ku khongotela (wansati) ku va ni nhlangano wa rimbewu khamba ro sungula.” Hi nga pfuneka hi ku pfuxeta endlelo ra Sathana ro xisa Evha (hambi leswi nhlangano wa rimbewu a wu nga katseki eka mhaka leyi), na hi ku xiya maendlelo lawa a ma tirhisaka namuntlha.
7, 8. (a) Xikongomelo xa xivutiso xa Sathana eka Evha a ku ri xihi? (b) Sathana u endle leswaku ku dya emurhini ku vonaka ku tsakisa hi ndlela yihi?
7 Hi mano, eku sunguleni ka ku tshinelela kakwe, Sathana u tirhise nyoka ku vangela Evha leswaku a sungula ku kanakana nawu wa Xikwembu. Hi marito lama kunguhatiweke hi vukheta leswaku ya pfuxa mivilelo ni ku kanakana, u vutisile a ku: “Kunene Xikwembu ši te: Mi nga ṭhuki mi dya muri ni wuńwe wa ntanga?” Hi xivutiso lexi xo chavisa, Sathana a a ringanyeta leswaku a swi twisa ku vava leswi a a nga ta dya eka mirhi hinkwayo ya ntanga. Entiyisweni, u kanete leswaku, ematshan’wini ya ku fa hi laha Xikwembu xi vuleke ha kona leswaku a a ta fa, a swi ta n’wi pfuna hakunene ku dya eka murhi lowu yirisiweke. Sathana u n’wi tshembisile a ku, “Šikwembu ši tiv̌a leŝaku siku mi nga ta dya, mahlo ya ṅwina ma ta pfuleka, mi ta kotisa Šikwembu, mi tiv̌a ŝo saseka ni ŝo biha.”—Genesa 3:1-5.
8 Lebyi a byi ri vukanganyisi lebyo biha swinene, byo ringanyeta leswaku Xikwembu a xi ringeta ku tsona Evha vutivi lebyi pfunaka! Hi ku ya hi Sathana, Xikwembu a xi tirhisa nxungeto lowu nga tirhiki wa rifu ku endla leswaku a nga tirhisi vuswikoti byo tibohela kungu. Hikwalaho ke, u byele Evha a ku: ‘Heyi, wa kayeriwa! U nga ka u nga fi. U nga tiphina hi leswi Xikwembu hi xoxe xi swi tsakelaka. U nga tikunguhatela leswinene kumbe leswo biha.’ Swi tsakisile eka Evha ku kota ku tiendlela makungu ya yena n’wini handle ko tihlamulela eka un’wana.
9. Hi laha swi kombisiweke ha kona eka Yakobo 1:14, 15, i nxaxamelo wihi wa swiendlakalo lowu vangeleke xidyoho xa Evha ivi eku heteleleni ku va rifu?
9 Hikwalaho ke, Evha u sungule ku languta murhi hi ku wu navela. “E wansati, kute loko a v̌ona leŝaku muri a wu nanḍiha, ni leŝaku wu nav̌etisa mahlo, ni leŝaku wu nav̌etisa ku tlhariha, a kha mihanḍu ya wona, a dya.” (Genesa 3:6) Kambe endzhaku ka kwalaho, loko Evha a tshubule leswaku a nga amukelanga leswi tshembisiweke, u hlamuserile a ku: “I nyoka leyi nga nḍi kanganyisa.” (Genesa 3:13) Entiyisweni, nakambe yi n’wi kanganyisile, yi n’wi fambisa hi ntlhamu lowu phasaka kumbe ndzingo ku kondza loko ku navela ka vutianakanyi ku endla leswaku a dyoha, kutani eku heteleleni a fa.—Yakobo 1:14, 15.
Tivonele Eka Marhengu Ya Sathana
10. Hikwalaho ka yini hi nga fanelanga ku honisa marhengu ya Sathana, naswona i swiletelo swihi leswi hi tlhariheke loko hi swi landzela?
10 Sathana u tirhisa marhengu lama fanaka, hi leswaku, tindlela, vukanganyisi ni vuxisi, leswaku a kanganyisa ni ku xisa vantshwa namuntlha. Kambe leswi Bibele yi nyikaka vurunguri lebyinene bya tindlela ta Sathana ta vukanganyisi, a wu fanelanga ku honisa marito ya yena. (2 Vakorinto 2:11) Lexi u xi lavaka i langutelo lerinene ro khathalela switsundzuxo ni swiletelo leswi Yehova Xikwembu a swi nyikelaka hi ku tirhisa Rito ni nhlengeletano yakwe.—Swivuriso 2:1-6; 3:1-7, 11, 12; 4:1, 2, 20-27; 7:1-4.
11. Hakanyingi Sathana u kanganyisa ni ku xisa vantshwa leswaku va dyoha hi ndlela yihi?
11 Xana Sathana hakanyingi u kanganyisa ni ku phasa lavantshwa leswaku va dyoha hi ndlela yihi? U endla tano hi ku endla leswi Xikwembu xi swi solaka, mintirho leyi nga yisaka eku lahlekeriweni hi ku amukeriwa hi Xikwembu, yi vonaka yi ri leyi kokaka, kambe hi nkarhi lowu fanaka yi nga vavisi, hi laha muhandzu wu vonakeke ha kona eka Evha. Kutani hi laha a endleke ha kona eka Evha, u ta ringeta ku kurisa mianakanyo ya leswaku u kayiveriwa hi nchumu lowu tsakisaka swi nga fanelanga. Xisweswo, hi ndlela leyi kanganyisaka, leyi hambukisaka Sathana u tikarhatela ku tsanisa ku xixima ka wena ka Rito ra Yehova, kun’we ni swiletelo leswi nyikeriweke hi vatswari va wena lava chavaka Xikwembu ni nhlengeletano ya Xikwembu. Kutani hi xivangelo lexinene Bibele ya khutaza yi ku, “[Yimani] mi Iwa ni mano layo biha [kumbe, hi laha The Kingdom Interlinear Translation of the Greek Scriptures yi vulaka ha kona, “mintirho ya vukanganyisi”] ya Diyavulosi.”—Vaefesa 6:11.
12. (a) I mhaka yihi ehenhleni ka Sathana leyi hi faneleke ku yi teka hi matimba hinkwerhu ka hina, naswona hikwalaho ka yini? (b) U swi languta njhani leswi vuriweke eka 1 Yohane 2:15 na Yakobo 4:4? (c) Sathana u ta lava ku ku kanganyisa leswaku u pfumela yini?
12 Entiyisweni, Evha a a ri xihunguki hi ku pfumela vunwa bya Sathana. Kambe xana vantshwa vo tala namuntlha hi ku fanana a va teki switsundzuxo swa Rito ra Yehova kumbe leswi swi nyikeriwaka hi vatswari va vona kumbe vakulu va Vukriste hi ku olova ke? Ku vuriwa yini ha wena? Hi xikombiso, xana u teka mhaka ya leswaku Sathana Diyavulosi i mufumi wa misava leyi ni leswaku, tanihi xikwembu xa mafambiselo lawa ya swilo, u pfala mianakanyo ya vanhu hi ku olova ke? (1 Yohane 5:19; Yohane 12:31; 14:30; 16:11; 2 Vakorinto 4:4) Xana hakunene u ringeta ku khathalela nawu wa Xikwembu lowu nge: “Mi nga rhandzeni misava, kumbe swilo leswi nge misaveni”? (1 Yohane 2:15) Kutani tivutise: ‘Xana hakunene ndzi tshemba nhlamuselo ya Matsalwa leyi nge, “Loyi a tinyeketaka eku rhandzeni ka swa misava, u tiendla nala wa Xikwembu”’? (Yakobo 4:4) Sathana u ta lava ku ku kanganyisa ku endlela ku u pfumela leswaku misava yi hava nxungeto, leswaku mintirho leyi yi yi kurisaka a yi onhi nchumu. Kambe tivonele! U nga kanganyisiwi!
Mintlhamu Leyi Kanganyisaka Namuntlha
13. I mukhuva wihi lowu veke lowu tolovelekeke etindhawini to tala, naswona Sathana u ta lava leswaku hi pfumela yini malunghana na wona?
13 Hakanyingi Sathana u phasa vanhu leswaku va dyoha hi swilo leswi eka swona swi nga ha vaka swi nga hoxanga kumbe leswi swi nga soriwiki hi laha ku heleleke eBibeleni. Hi xikombiso, hambi leswi mimpatswa yo tala leyi tekaneke yi nga ni mianakanyo leyi tsakisaka hi minkarhi leyinene leyi yi tiphineke ha yona emasikwini ya yona yo gangisana, ku ni makhombo lamakulu loko vanhu va ri voxe eku endleni ka xinghana. Kahle-kahle, ku tolovelana i mukhuva wa manguva lawa lowu sunguleke ku toloveleka etindhawini to tala endzhaku ka Nyimpi yo Sungula ya Misava ntsena. Sathana u ta lava ku endla u tshemba leswaku mukhuva lowu i xivumbeko lexi nga hava xihoxo xo tirivatisa lexi pfumelelaka leswaku vantshwa va tolovelana ni swirho swa rimbewu leri hambaneke hi ringhana-nghana. Kambe ke, entiyisweni, mukhuva lowu wu tele hi makhombo lama hlaselaka mahanyelo lamanene.
14. (a) Mukhuva wa xinghana-nghana wu nga kurisisiwa ku yini? (b) I mintlhaveko yihi leyi nga vaka kona exiyin’weni xo tolovelana?
14 Vakriste lava kuleke, lava vupfeke, hikwalaho ka ntokoto wa vona, va xiyisisa makhombo lawa swinene naswona hikwalaho va nga nyika vukongomisi lebyi pfunaka. (Swivuriso 27:12) Kambe kumbexana u vona onge ku hava khombo eku tolovelaneni ni leswaku vatswari va sivela-sivela ngopfu, va ku tekela ntsako. Kambe hi laha vanhu va nga avanyisiwaka hi mihandzu leyi va yi vekaka, mikhuva yo tolovelana na yona yi tano. (Swivuriso 20:11; Matewu 7:16) Hi xikombiso, wanhwana wa malembe ya 18 hi vukhale loyi a endleke xinghana xa nkarhi na nkarhi, ni loyi a tikeke u xiyile a ku: “A ndzi ri un’wana wa magidi ya vana lava anakanyeke leswaku swi nga ka swi nga humeleli eka mina.” U pfumerile leswaku endzhaku ko endla xinghana nkarhinyana “ku khomana hi mavoko ni ku ntswontswana swi tinyika matimba.” Hi ku fanana, nhwanyana wa malembe ya 17 hi vukhale loyi hakanyingi a endleke xinghana, wa vika: “Ku ntswontswana ni ku namarhelana swa kula ku kondza loko ndzi lava leswaku mufana a rhandzana na mina hi laha ku heleleke.” Xana i ku titwa loku nga tolovelekangiki? Nikantsongo.
15. I marhengu wahi lawa ku tolovelana ku faneleke ku rhwala vutihlamuleri lebyi xiyekaka eka wona?
15 Loko vantshwa lava va nyanyulanaka emirini va tihambanisa, hi laha swi tolovelekeke ha kona loko ku endliwa xinghana, ku navela ka rimbewu ku nga vumbeka ku kondza loko ku susumetela ni vantshwa lava nga ni xikongomelo lexinene leswaku va tshova nawu wa Xikwembu. Xiya leswaku vanhwanyana lava tlulaka miliyoni va kondlo-a-ndzi-dyi eUnited States va tika emirini lembe na lembe ni leswaku madzana ya magidi ya vona va xixa tinyimba kumbe va kurisa vana va vona ehandle ka xiboho xa vukati. Khombo ra kona, minkarhi yin’wana van’wana va vanhwanyana lava va kondlo-a-ndzi-dyi i vana va Timbhoni ta Yehova naswona swi tano na hi vafana lava va katsekaka na vona. Mukhuva wa manguva lawa wa xinakulobye wu fanele ku rhwala vutihlamuleri lebyi xiyekaka bya marhengu lawa, kumbe xana ni le ka timiliyoni ta timhaka letintshwa ta vuvabyi lebyi hundziseriwaka hi rimbewu lembe na lembe.
16. (a) Hi kwihi ntsena laha ku navela ka rimbewu ku hetisisiwaka khwatsi kona? (b) I yini lexi humelelaka eka vo tala va vanhu va Xikwembu?
16 Xikwembu xi kunguhate leswaku ku navela ka rimbewu ku hetisisiwa exikarhi ka swiboho swa vukati, laha ku nga tisaka ntsako ni ku aneriseka lokunene. (Vaheveru 13:4; Swivuriso 5:15-19) Kambe, Sathana hi mano u tirhise nyiko leyi humaka eka Xikwembu ku kanganyisa vanhu ku tirhisa rimbewu hi ndlela yo biha ni ku endla vuoswi. Eminkarhini ya khale, 24 000 wa Vaisrayele va dlayiwile hi siku rin’we hikwalaho ka mhaka leyi yo dyohela Xikwembu, naswona sweswi magidi ya susiwa lembe na lembe ebandlheni ra Vukriste hikwalaho ka vuoswi. Kutani tlharihani. Yingisani ndzayo ni vukongomisi. Mi nga tipfumeleli leswaku mi kanganyisiwa.—Tinhlayo 25:1-9, 16-18; 31:16.
17. (a) I langutelo rihi leri kanganyisaka leri Sathana a ri kuriseke malunghana ni swilo swo tanihi mintlangu, vuyimbeleri ni ku cina? (b) Hikwalaho ka yini ku tirivatisa ka misava ku tisa nxungeto wo tano eka vanhu va Xikwembu?
17 Nakambe, xalamukelani marhengu man’wana ya Sathana. Hi xikombiso, mintlangu, vuyimbeleri ni ku cina, swi ve xiyenge lexikulu xa ku tirivatisa ka misava yakwe. I ntiyiso, swilo leswi hi swoxe a swi hoxanga nikantsongo naswona swi nga tsakisa ni ku va leswi pfunaka. (1 Timotiya 4:8; Zakaria 8:5; Luka 15:25) Hambi swi ri tano, Sathana hi mano u kurise langutelo ra leswaku swi hava nxungeto ni ku vavisa, hambi loko swi endliwa nkarhi na nkarhi kun’we ni vanhu va misava. Kambe Rito ra Xikwembu ra tsundzuxa: “Mi nga pfumeli ku xisiwa: Vanghana lavo biha, va borisa mikhuva leyinene.” (1 Vakorinto 15:33) Anakanya ha swona. Loko vukhongeri ni tipolitiki swi ri xiyenge xa mafambiselo ya Sathana, xana a hi vuhunguki ku pfumela leswaku ku tirivatisa loku kurisiwaka hi misava ku hava nkucetelo wa yona? Mi fanele ku tivonela nkarhi na nkarhi leswaku “Mi nga landzi hanyelo ra nguva leyi.”—Varhoma 12:2.
Malunghiselelo Yo Sirheleta Vantshwa
18. Hikwalaho ka yini u fanele ku tlangela vatswari lava ku letelaka ni ku ku kongomisa?
18 Yehova Xikwembu u endle malunghiselelo ya rirhandzu yo sirhelela n’wina vantshwa leswaku mi nga kanganyisiwi. Xo sungula, u mi nyike vatswari va n’wina leswaku va mi letela ni ku mi kongomisa. Naswona mi nga tsaka loko va swi endla. Un’wana wa malembe ya 18 hi vukhale la nga ni gome, loyi a kumeke n’wana ehandle ka xiboho xa vukati, u vilerile a ku ingi swi nga humelelanga “loko vatswari va mina a va lo endla ntirho wa vona hi laha vatswari va faneleke ku endla ha kona, kutani va ndzi byela swihoxo swa ku va ni munghana un’we wa mufana, ivi va ndzi sivela ku va ni un’we ntsena.” Kutani tlangela loko u ri ni vatswari lava chavaka Xikwembu. A va ringeti ku ku bohelela ivi va endla leswaku vutomi byi nga tsakisi hi minsivelo leyi va yi vekaka eka wena. Hi laha ku hambaneke, va ku rhandza naswona va lava ku ku sirhelela. Tirhisa ntokoto ni vutlhari bya vona hi ku lava ndzayo ya vona.
19. I mimpfuno yihi leyi tlhandlekelaka leyi lunghiseleriweke ku sirheleta vantshwa?
19 Ku tlhandlekela, Yehova u lunghiselele nhlengeletano yakwe ya laha misaveni ku yi ku pfuna. Hi xikombiso, nkandziyiso wun’wana ni wun’wana wa Xinghezi wa Awake! wu ni nxaxamelo lowu nge “Vantshwa Va Vutisa . . .” lowu kombaka ku twisiseka ka milawu ya Yehova. Hi ku fanana, broxara leyi nge Xikolo Ni Timbhoni Ta Yehova yi lunghiseleriwile leswaku yi ku pfuna ku fambisana ni milawu kun’we ni misinya ya milawu ya Xikwembu ematshamelweni ya Xikolo. Xikhutazo ni ndzayo yin’wana swa nyikeriwa hi ku tirhisa matluka ya Xihondzo xo Rindza ni le minhlanganweni ya bandlha, etinhlengeletanweni ta xifundza ni le mintsombanweni ya muganga. Hakunene, yona mhaka leyi nge, “Vantshwa—Mi Nga Kanganyisiwi,” a yi ri nkulumo entsombanweni wa sweswinyana wa muganga kun’we ni nhloko-mhaka ya xiyenge xa Nhlangano wa Ntirho.
20. (a) Hikwalaho ka yini mpfuno lowukulu wu lunghiseriwe vantshwa? (b) I langutelo rihi leri nga ta ku pfuna ku lwisana ni matshalatshala ya Sathana yo ku kanganyisa?
20 U nga tshuki u anakanya leswaku hi mianakanyo leyi hinkwayo hi ringeta ku kunguhata ku ku tekela ntsako wa wena. Kambe ke, nhlengeletano ya Xikwembu ya ku rhandza, naswona xin’wana ni xin’wana lexi gandlisiwaka ni ku vuriwa xi endleriwa ku ku sirhelela—ku ponisa vutomi bya wena! Dyondza ku tlangela malunghiselelo lawa. Endla dyondzo ya Bibele hi ku tirhisa tibuku ta Sosayiti mukhuva; mintiyiso ya Bibele a yi ku nyanyule hi ku tlangela. Onge u nga va ni langutelo ra un’wana wa malembe ya 18 hi vukhale loyi, endzhaku ko xiyisisa ndzayo leyinene leyi kongomisiweke eka vantshwa, a tsaleke a ku: “Swi endle leswaku ndzi vona ndlela leyi hina vanhu lavantshwa hi katekeke ha yona hi ku va entiyisweni! Ku hava nhlengeletano yin’wana emisaveni leyi khathalelaka ni ku rhandza vantshwa va yona swinene!” Onge hi nga namarhelana kutani hi alela matshalatshala ya Diyavulosi yo hi kanganyisa, hikuva ha ya vona marhengu ya yena!
BOKISI RA MPFUXETO
◻ Hikwalaho ka yini vantshwa vari xitirho lexi hlawulekeke xa Sathana?
◻ Sathana ukanganyise Evha leswaku a dyoha hi ndlela yihi?
◻ Sathana, namuntlha, hakanyingi u kanganyisa vantshwa leswaku va dyoha hi ndlela yihi?
◻ I malunghiselelo wahi lama nga kona yo sirheleta vantshwa?
[Xifaniso eka tluka 10]
Tanihi leswi Sathana a laveke ku kanganyisa Evha, loyi a a ri na ntokoto wuntsongo ku tlula Adamu, vantshwa i xitirho lexi hlawulekeke xa Sathana
[Xifaniso eka tluka 13]
Loko vantshwa va tihambanisa, ku navela ka rimbewu ku nga kula ivi ku va yisa eku tshoveni ka nawu wa Xikwembu