Hlayisa Nomu Wa Wena!

WU NGA ha kariha ku lovisa tanihi tlhari ra nyimpi. Kambe wu nga ha tsokombela ku fana ni vulombe ni ku rhetela tanihi mafurha. Wu nga tisa vutomi, naswona wu nga ha vanga rifu. Xisweswo Bibele yi hlamusela matimba ya ku vulavula ka vanhu.—Swivuriso 12:18; 16:24; 18:21.

Kutani ke, a swi hlamarisi leswi Solomoni a nga te: “L’a tikhomaka nomu o hlayisa moya wa yena, Kambe l’a ṭhamaka a ahlamisa nomu wa yena, o ta wela ku lov̌eni.” (Swivuriso 13:3) Ku twala loku onhiweke, ku dya mbitsi, vuxaka lebyi tsemekeke ni ku vaviseka ka miri—hinkwaswo leswi i mimbuyelo ya ku vulavula ka vuphukuphuku. Handle ko tilumaluma hambi swi ri tano, u munhu la lavaka ku ‘hlayisa moya wa wena.’ Xana u nga dyondza ku hlayisa nomu wa wena ni ku papalata ku onhaka lokukulu njhani?

“E Ku Vulavuleni Lo’ko Tala . . .”

Ndlela yin’wana yo olova i ku hunguta ku vulavula ngopfu! Kumbexana a wu ri na wanuna kumbe wansati loyi a tikombaka a lava ku vula swo karhi eka mhaka yin’wana ni yin’wana. Swi vavisa swonghasi ku va ni munhu wo tano! “Nomu wa šihunguki wu humesa v̌uhunguki,” naswona “šiphukuphuku ši anḍisa marito,” ku vula Bibele. (Swivuriso 15:2; Eklesiasta 10:14) Kavula, leswi a swi vuli swona leswaku munhu un’wana ni un’wana loyi a vulavulaka ngopfu i xiphukuphuku kumbe leswaku un’wana ni un’wana la vulavulaka swintsongo u tlharihile. Kambe swi na khombo ku phyaphyarha. Swivuriso 10:19 yi swi veka hi ndlela leyi: “E ku v̌ulav̌uleni lo’ko tala, ku dyoha a ku pfumaleki, Hikokwalaho, l’a tikhomaka nomu o tlharihile.”

Anakanyisisa U Nga Si Hlamula

Ndlela yin’wana yo hlayisa nomu wa wena i ku anakanya u nga si vulavula. Loko leswi swi vuriwaka swi nga kamberiwi, xivulavuri kun’we ni vayingiseri va xona va nga vaviseka. Mutsari la huhuteriweke u ri: “L’a v̌ulaka ŝa hav̌a wa tlhav̌a kukota tlhari.”—Swivuriso 12:18.

Ku kombisa hi laha swi biheke ha kona ku vulavula marito ya hava, buku ya Bibele ya Yakobo ya hlamusela: “Vonani hi laha xihlahla lexikulu xi nga hisiwaka ha kona hi ndzilonyana lowuntsongo! Ririmi i ndzilo, ku homboloka ka rona ku ringana ni tiko hi vukulu. Ri le xikarhi ka swirho swa hina, kutani ri nyamisa miri hinkwawo, ri chela mpfundze evutomini hinkwabyo bya vanhu, na swona ri kondleteriwa hi ndzilo wa [Gehena].”—Yakobo 3:5, 6.

Gehena yi kuma vito ra yona ri huma eNkoveni wa Hinom lowu nga edzongeni ni le vupela-dyambu bya dzonga wa Yerusalema. Hakanyingi eka matimu ya Israyele, mindzilo a yi tshama yi ri karhi yi pfurha kona ku hisa thyaka ra muti, wu endla leswaku Gehena xi va xifaniso lexi fanelaka xa ndzoviso lowu heleleke. Hambi swi ri tano, xana ririmi leri nga fumiwiki a ri ta “kondleteriwa hi ndzilo wa [Gehena]” hi ndlela yihi? Munhu loyi a vulavulaka mavunwa, u kurisa tidyondzo leti nga xiximiki Xikwembu, kumbexana ku tirhisa ririmi hi ndlela leyo biha ku nga vangela yena ni van’wana ku lahlekeriwa hi musa wa Xikwembu. Mbuyelo ku va wihi? Ndzoviso lowu nga heriki! Hi xikombiso, Yesu Kriste u byele Vafarisi a ku: “Mi ni khombo n’wina vatsari ni Vafarisi, vakanganyisi, hikuva mi rhendzeleka ni malwandle ni matiko, leswaku mi ta kuma mudyondzisiwa un’we ntsena; kutani loko mi n’wi kumile, mi n’wi endla loyi a fanelaka hi [Gehena] ku tlula n’wina kambirhi.”—Matewu 23:15.

Hikwalaho Bibele yi hi nyika xitsundzuxo lexi xo olova: “Mbilu ya l’a lulameke yi anakanya ana a nga si hlamula.” (Swivuriso 15:28) Swa antswa swinene ku anakanya leswi u nga ta swi vula, ku ri na ku vula nchumu wun’wana lowu wu nga ha vavisaka!

“Rito Le’ri Humesiwaka Hi Nkari Lowu Fanekelaka”

Ku vulavula hi nkarhi lowu faneleke i ndlela yin’wana yo hlayisa nomu wa wena. Solomoni u xiyile: “Šilo šiṅwana ni šiṅwana ši ni nkari wa šona . . . nkari wu kona wa ku miyela, wu kona nkari wa ku v̌ulav̌ula.” (Eklesiasta 3:1, 7) Loko munghana wa wena a tikomba a karhele hi siku ro leha ra ntirho kumbe mintirho ya ndyangu, xana wolowo i nkarhi lowu faneleke wo n’wi rhwexa ndzhwalo hi swirhalanganya leswi nga nyawuriki kumbe swikombelo? Kumbexana lowu i “nkari wa ku miyela.”

Hi tlhelo rin’wana, ku na “nkari wa ku v̌ulav̌ula.” Eka Swivuriso 15:23 ha hlaya: “Rito le’ri humesiwaka hi nkari lowu fanekelaka ra nanḍiha ŝonghasi!” Xana u tiva un’wana loyi a karhatiwaka hi swiphiqo ni makhombo? Xana marito lama vuriwaka hi nkarhi lowunene yo khutaza a hi swona ntsena leswi munhu loyi a swi lavaka?

Yesu Kriste a nga kalanga a hluleka ku tirhisa nkarhi a khutaza van’wana. U byele vadyondzisiwa vakwe kan’we a ku: “Tanani hi ya tshama hi ri hexe laha ku nga mananga, mi ta kota ku wisanyana.” Mhaka ya engetela: “Kava loko va nghena ebyatsweni, va ya laha ku nga mananga va ri voxe. Kambe lavo tala va va vona loko va famba, va va tiva, kutani va huma emitini hinkwayo, va tsutsumela kwale hi milenge, va va rhangela emahlweni.” Eka mintshungu leyi, lowu kunene wu vonake wu ri nkarhi lowunene wa marito yo chavelela! Hambi swi ri tano, hi mavonelo ya Yesu ni vadyondzisiwa vakwe, nkarhi wu tikombe wu ri lowu nga hava mpfuno. “Loko Yesu a huma ebyatsweni, a vona ntshungu lowukulu wa vanhu, a va twela vusiwana, hikuva a va fana ni tinyimpfu leti nga riki na murisi; kutani a va dyondzisa leswo tala.” (Marka 6:31-34) Ina, Yesu u hlayise nomu wa yena. U wu tivile nkarhi wo vulavula ni nkarhi wo miyela.—Ringanisa Matewu 26:63; 27:12-14.

Na wena, u nga dyondza ku hlayisa nomu wa wena. Endla matshalatshala ya munhu hi xiyexe yo papalata ku vulavula ngopfu. Papalata ku vulavula u nga ehleketanga leswi nga onhaka ku twala ka wena ni ka van’wana. Kutani u lavisisa minkarhi yo avelana ni van’wana “rito le’ri humesiwaka hi nkarhi lowu fanekelaka.” Ku endla tano swi ta ku pfuna ku ‘hlayisa moya wa wena.’—Swivuriso 13:3.

[Xifaniso eka tluka 23]

Xana u ni mukhuva wo kavanyeta van’wana kumbe ku vula swo karhi emhakeni yihi ni yihi?