Wa Tsundzuka Xana?

Xana u kumile timagazini ta sweswinyana ta Xihondzo xo Rindza ti ri ta nkoka? Kutani vona loko u nga tsundzuka leswi landzelaka:

◻ Hikwalaho ka yini ku nga vuriwaka leswaku Bibele i buku ya vanhu hinkwavo?

Ku sukela eku sunguleni ka yona, Bibele yi kombisa malangutelo ya misava loko swi ta eka vumundzuku bya vanhu. (Genesa 1:28) Yi susa rivengo hinkwaro ra tinxaka, vutiko ni swilo swin’wana leswi hambanisaka leswi hlaselaka vanhu. Yi vulavula ni vanhu va matiko hinkwawo ni ku vulavula hi misava tanihi kaya rin’we ra rixaka hinkwaro ra vanhu. (Mintirho 17:26)—4/15, tluka 5.

◻ Xana Yesu a a vula yini loko a te: “Hikwalaho, loko tihlo ra wena ri ri rinene, miri hikwawo wa wena wu ta v̌oningiwa”? (Matewu 6:22, Bibele ya Xitsonga)

Rito leri nge “rinene” ri huma eka rito ra Xigriki leri kahle-kahle ri vulaka vun’we bya mianakanyo kumbe ku tinyikela eka xikongomelo xin’we. Hi ku endla ku rhandza ka Xikwembu yi va pakani ya hina evuton’wini, hi ta lava ku kombisa mahungu lamanene lama dzunekaka hi ta Mfumo eka swilo hinkwaswo swa vutomi bya hina.—5/1, matluka 12, 13.

◻ Ku vuriwa yini hi ku va ka Yehova wa matimba hinkwawo ni la tivaka hinkwaswo?

Yehova u byele Abrahama a ku: “Hi mina Šikwembu ša matimba hikwawo.” (Genesa 17:1) Hi ku va wa matimba hinkwawo, Yehova a nga tirhisa matimba ya yena ku susa swiphiqo swihi na swihi eku hetisiseni ka switshembiso ni swikongomelo swa yena. Nakambe Yehova u tiva hinkwaswo, u ni vutlhari hinkwabyo. Xisweswo a nga vona swihi na swihi leswi a navelaka ku swi vona swi nga si endleka. Timfanelo leti timbirhi ti endla leswaku swi nga koteki leswaku Yehova a hluleka. (Esaya 14:24)—5/15, tluka 4.

◻ Hi nga komba ku titsongahata loko hi khongelela van’wana erivaleni hi ndlela yihi?

Hi nga komba ku titsongahata hi mpfumawulo wa marito ya hina—hi nga vuli marito yo nonon’hwa kumbe yo swi hundzeleta. A hi fanelanga ku sindzisa leswaku Yehova a endla swilo swo karhi. Ku ri na sweswo, hi fanele ku kombela Yehova hi ku pfumelelana ni ku rhandza ka yena, naswona marito ya hina minkarhi hinkwayo ya fanele ku xiximeka ni ku va ni ntikelo, hi xiya nkoka wa hina. (Matewu 6:5; Esaya 66:2)—5/15, matluka 21, 22.

◻◻ Xana Mukriste a nga hlayisa langutelo lerinene ehansi ka ku xanisiwa hi ndlela yihi?

A nga fanelanga ku pfumelela miehleketo ya yena yi tshama eka swilo leswo biha. Ku ri na sweswo, u fanele ku anakanyisisa hi leswi malandza man’wana lama tshembekaka ya Yehova ya swi endleke eminkarhini ya ku ringiwa. A va ri na ripfumelo leri heleleke ni ntshembo eka Yehova, va tshemba vuswikoti bya yena byo va pfuxa ni ku va hakela. (Nhlavutelo 2:10) Hi laha ku fananaka, Mukriste loyi a xanisiwaka namuntlha a nga tshama a ri karhi a ehleketa hi ntshembo wakwe wa le mafambiselweni lamantshwa yo lulama ya Yehova ya swilo. (Ringanisa Vaheveru 12:2.)—6/1, tluka 30.

◻ I mhaka yihi yin’we ya risima leyi Hus, Wycliffe na Luther va yi pfumeleke?

Hinkwavo ka vona va pfumele leswaku Rito ra Xikwembu a ri fanele ku rhanga, ku nga khathariseki leswi mianakanyo ya vanhu yi nga swona. Vakriste vo sungula va ve ni malangutelo lama fanaka hikuva a va dyondzisiwile hi Yesu Kriste hi yexe. (Mintirho 5:29; Yohane 17:17)—6/15, tluka 31.

◻ Xana nhlonge ya ntima i mbuyelo wa ndzhukano wa Xikwembu lowu vekiweke eka Kanana ni vatukulu-xinghuwe va yena ke?

E-e. Rixaka ra ntima a ri humanga eka Kanana kambe eka Kux naswona ngopfu-ngopfu Put. Ku hava ndzhukano lowu vekiweke eka un’wana wa vatukulu lava vambirhi va Nowa. (Genesa 9:24, 25; 10:1, 6)—7/1, tluka 4.

◻ Xana Yesu a a vula yini loko a vulavula hi ku venga swirho swa ndyangu wa munhu hambi ku ri yena n’wini? (Luka 14:26)

Yesu a a vula leswaku loko ku ringanisiwa rirhandzu ra munhu ra Xikwembu ni ku tinyiketela eka Kriste, vuxaka bya munhu ni maxaka yakwe byi nga ha vonaka byi fana ni rivengo. (Ringanisa Matewu 12:46-50.)—7/1, tluka 27.

◻ Xana Yesu a a ri “Hosi ya Savata” hi ndlela yihi, hi laha swi hlamuseriweke ha kona eka Matewu 12:8?

Yesu a a kombetela eka Mfumo wakwe wo rhanga wa gidi ra malembe. Nawu lowukulu wa Savata wa Kriste wu ta va nkarhi wo wisa eka maxangu hinkwawo ni ntshikilelo.—7/15, tluka 9.

◻ Hikwalaho ka yini byi nga ri vutlhari eka n’wana ku tivekela tipakani ta yena n’wini evuton’wini?

Ntokoto wa vana i wuntsongo swinene eka vona ku tivekela tipakani ta vona vini evuton’wini. Loko vatswari va nga va pfuni ku veka tipakani to tano, un’wana u ta swi endla—kumbexana vana exikolweni kumbe mukhomi wa xikolo. Vatswari va Vukriste va nga pfuna vana va vona ku veka tipakani leti twananaka ni ku tlangela ka vona ka swilo swa moya.—8/1, tluka 28.