Swivutiso Swa Vahlayi

◼ I mani kumbe i yini lexi faniseriwaka hi “Leviatan” wa Esaya 27:1?

Esaya 27:1 yi ri: “Hi siku rero, Yehova o ta ba hi ripanga ra yena ro tika, le’rikulu, ra matimba, e Leviatan, e nyoka ya matambo, Leviatan, nyoka ya makhinya-khinya; kutani o ta dlaya dragona le’yi nge lwandle.” Hi twisisa vuprofeta lebyi tanihi lebyi tirhaka eka Sathana Diyavulosi kun’we ni nhlengeletano ya yena leyo biha emisaveni.

Xihondzo xo Riindza, xa October 15, 1985, xi hlamusele leswaku Esaya ndzima 27 i vuprofeta bya ku pfuxeta. Ku hetiseka ka byona ko sungula ku katse rixaka ra Israyele ra khale, leri a ri ta tlheriseriwa eka tiko-xikaya ra rona endzhaku ka malembe ya 70 ya vuhlonga eBabilona. Hambi leswi vunyingi bya mahlonga a byi huma eBabilona, van’wana a va ta vuya hi le Egipta ni tiko ra Asiriya. Yehova Xikwembu u tiyise leswaku vanhu va yena a va fanele ku ntshunxiwa, kutani matiko yo tano a ya nga ta n’wi sivela hi matshalatshala lama ntshunxekeke kumbe lama hlanganeke. Va nga ha va va tikombe eka vanhu va ri na matimba ni mano, ku fana na Leviatan wa khale loyi kahle-kahle (a ku ri ngwenya), kambe Yehova a a ta humelela eku lweleni ka Israyele wa khale.—Ringanisa Yobo 41:1-34.

Kutani ke, “Leviatan” a a ta fanekisela yini eku hetisekeni lokukulu ka Esaya ndzima 27? Hi ku twisiseka, Sathana Diyavulosi u ta emiehleketweni, hikuva Nhlavutelo 12:9 yi n’wi hlamusela tanihi “dragona leyikulu” ni “nyoka ya khale.” Ku sukela khale a a ri nala wa Xikwembu ni vanhu va Xona. Ku ya emahlweni, Matsalwa ya swi veka erivaleni leswaku Sathana u ta herisiwa. Xikwembu xi veke siku ro tirhisa matimba ya xona hi N’wana wa xona ku herisa Diyavulosi. Kutani “dragona” kumbe “nyoka” yoleyo yi ta herisiwa hi tlhari lerikulu lera matimba.—Vaheveru 2:14; Nhlavutelo 20:1-3, 10.

Kambe, tsundzuka leswaku valala lavakulu lava langutaneke na Israyele wa khale a va ri vakaneti lava vonekaka va matiko, yo tanihi Egipta, Asiriya na Babilona. Hi ku fanana namuntlha malandza ya Xikwembu ya Vukriste emisaveni hinkwayo ya langutana ni vakaneti lavakulu exikarhi ka lwandle leri kariheke ra vanhu lava hambukeke eka Xikwembu. (Nhlavutelo 17:1, 15) Sathana u lwela nhlengeletano ya misava hinkwayo leyi a yi tirhisaka ku kavanyeta lava “hlayisaka milawu ya Xikwembu ni ku humesa vumbhoni bya Yesu.” (Nhlavutelo 12:17) Nhlengeletano leyi yi fumiwaka hi Diyavulosi yi tikombe yi ri ni mano ni ku leva, ku fana na Leviatan. Kambe, eku sunguleni ka lembe xidzana leri “Leviatan” loyi u lahlekeriwe hi ku lawula kakwe ka Israyele wa moya, ku nga, timbhoni leti totiweke ta Yehova ta Vukriste. Naswona u ta herisiwa hi laha ku heleleke loko, Yesu a khandziya hanci a ri ni “banga lero kariha, leri a nga ta tsema matiko ha rona.”—Nhlavutelo 19:11-16.

Kutani hambi loko hi ndlela yin’wana Sathana a tekiwa tanihi Leviatan wa Esaya 27:1, vuprofeta byolebyo byi katsa ku tlula “nyoka ya khale.” Yi hlamusela ngopfu-ngopfu nhlengeletano leyi vonekaka ya laha misaveni leyi fumiwaka hi yena. Xisweswo, Xihondzo xo Rindza lexi boxiweke laha henhla xi swi kotile ku kombetela enkarhini lowu “mafambiselo lama nga kona yo biha ya swilo lawa Sathana Diyavulosi a ya fumaka tanihi xikwembu xa wona, ma nga ta ka ma nga vi kona. Yehova u ta va a kokele nyingiso wa yena eka Leviatan wo fanekisela, nyoka ya makhinya-khinya, leyi nga exikarhi ka lwandle ra vanhu. Yena ni matiko, hambi ku ri minhlangano ya matiko, swi ta va swi nga ha ri kona.”