Xana U Famba eMintileni Ya Muponisi?
KU DZUNEKA kun’wana lokunene loku u nga ku nyikaka munhu i ku n’wi tekelela. Vana hakanyingi va tekelela vatswari va vona. Vana va kondlo-a-ndzi-dyi va nga ha landzelela vatlangi lava dumeke, lavakulu va landzelela varhangeri lava dumeke eswivandleni swa bindzu ni swa tipolitiki. Kambe i vangani lava ringetaka ku tekelela murhangeri lonkulu eka matimu ya vanhu—Yesu Kriste?
Nhlangano wa sweswinyana lowu rhangeriweke hi nhlengeletano ya Gallup wu hlavuterile: “Vaamerika va nhungu eka 10 va vule leswaku va endla matshalatshala yo karhi leswaku va landzelela xikombiso xa Yesu.” I ‘tiphesente ta khumembirhi ntsena leti vuleke leswaku a ti endla matshalatshala lamakulu lama kotekaka.’
Hambi swi ri tano, i yini lexi endlaka Yesu a faneriwa ngopfu hi ku landzeriwa ku tlula vavanuna van’wana va nkucetelo? Hi xikombiso hi laha, The World Book Encyclopedia yi xiyeke ha kona, Yesu Kriste “kumbexana u kucetele vanhu ku tlula un’wana ni un’wana loyi a tshameke a hanya.” Kambe ku hambana ni vavanuna van’wana lava nga ni nkucetelo, Kriste a nga ya yisanga mavuthu enyimpini leswaku a endla mindzhundzuluko yo sindzisa. A a nga tshembeli eka vunwa lebyikulu tanihi leswi ku endlaka vavuri va rito lava tivekaka ngopfu namuntlha. Naswona a nga seketelanga ntlawa wun’wana ni wun’wana wa politiki. Nkucetelo wa yena a wu ri hikwalaho ka matimba yo tenga ya rungula rakwe ni ndlela ya yena yo ri vulavula.—Matewu 7:28, 29; Yohane 7:46.
Yesu u susumetele vanhu leswaku va endla ku hundzuka lokukulu evuton’wini bya vona, emoyeni ni le mahanyeIweni. I mani wanuna un’wana la nga ni nkucetelo la kuceteleke vo tala hi laha ku pfunaka ke? Nakambe, i murhangeri wihi un’wana wa vanhu loyi a nga hlamuseriwaka tanihi “lowo hlawuleka, wo pfumala nandzu, wo kala xivati, wo hambana ni vadyohi?” (Vaheveru 7:26) Hikokwalaho xikombiso xa Yesu hi lexi hetisekeke—ku hambana ni xa wanuna un’wana ni un’wana loyi a tshameke a famba emisaveni!
Van’wana va vutisa va ku: ‘Hambi swi ri tano, xana vanhu lava tsaneke ni lava nga hetisekangiki va landzela xikombiso xo tano hi ndlela yihi?’ N’wamatimu H. G. Wells ebukwini ya yena leyi nge The Outline of History u xiya leswaku ku sukela eku sunguleni vanhu va tsandzeke ku landzelela Kriste. Wells u ri: “Hikuva ku teka [Kriste] a ri wa ntikelo, a ku ri ku nghena evuton’wini byo hlamarisa ni lebyi nyanyulaka, ku tshika mikhuva, ku lawula rintumbuluko ni minyanyuko; leswaku u ringeta ntsako lowukulu.” Wells wa hetelela: “A swi hlamarisi leswi eka siku leri Mugaleliya loyi [Kriste] a nga nkulukumba ngopfu etimbilwini ta hina letintsongo.”
Kambe sweswo i ntiyiso hakunene? Ina, ku landzela Kriste hi ku hetiseka swi nge koteki. Hambi swi ri tano muapostola Petro u vule leswaku Kriste ‘u hi boxele ntila leswaku hi wu landza hi le ndzhaku.’ (1 Petro 2:21) Xiya, a nga vulanga leswaku hi ku ‘hetiseka’ kambe hi le “ndzhaku.” Kutani i ntila wa njhani lowu Yesu a hi siyeleke wona? Xana hi nga wu tekelela hi ndlela yihi ke?