“N’wi Landzeni Hi Le Ndzhaku”—Njhani?

A NDZI swi kotanga nikan’we ku hetiseka ku fana na Yesu, ku nga khathariseki leswi ndzi khongerisaka swona kumbe leswi ndzi ringetisaka swona hi matimba.” Tiphesente ta 89 ta lava va vutisiweke hi U.S. Catholic ti pfumelelane ni mhaka yoleyo. Kunene, ku langutela ko famba emikondzweni ya Kriste ku nga vonaka ku ri loku nga kotekiki—ngopfungopfu loko u xiya xivumbeko xa Kriste lexi endliwaka hi tikereke. Mukhatoliki un’wana u te: “Hi nkatsakanyo, ndzi teka Yesu tanihi munhu lonene, wa rirhandzu, la khathalelaka, la amukelaka xin’wana ni xin’wana, loyi a nga laviki swo tala ngopfu eka mina. Kambe loko ndzi ya ekerekeni, Yesu u kombisiwa a ri Xikwembu ku kala ndzi tivona ndzi lahlekile ni ku tsongahatiwa hi ku nga hetiseki ka mina.”

Hambi swi ri tano, tirhekhodo ta mahungu lamanene a ti n’wi ‘humesi a ri Xikwembu’ Kriste. Ti komba leswaku Yesu u velekiwile hi ndyangu lowu nga le ka ntlawa wa le hansi, hayi van’wankumi. Tata wakwe wa muundli Yosefa a a ri muvatli. Hambi leswi ku tivekaka swintsongo hi vuhlangi bya Yesu, xiendlakalo xin’wana hi lexi pfuletelaka swinene. Loko Yesu a ri na malembe ya 12 hi vukhale, vatswari vakwe va fambe na yena eka riendzo ra vona ra lembe na lembe eYerusalema ro ya eka Paseka. Eka xiendlakalo lexi u vile la khomekaka swinene eku vulavurisaneni hi Matsalwa, ivi ndyangu wa ka vona wu suka wu n’wi siya. Yosefa na Mariya lava a swi va fanela ku vilela va n’wi kume endzhaku ka masiku manharhu etempeleni, “a tshamile exikarhi ka vadyondzisi, a va yingisela, ni ku va vutisa swivutiso.” Ku tlula kwalaho, “hinkwavo lava n’wi twaka va hlamala ku tlhariha ka yena ni ku hlamula ka yena.” Anakanya, a ri ni malembe ya 12 hi vukhale ntsena a nga koti ntsena ku vutisa swivutiso leswinene, leswi fambelanaka ni matsalwa kambe a tlhela a nyika tinhlamulo ta vutlhari. Handle ko tilumaluma a pfuniwe hi vuleteri bya vatswari vakwe!—Luka 2:41-50.

Loko u ri muntshwa, xana swa koteka leswaku u landzela ntila wa Kriste ke? Kunene swa koteka! Hikuva Kriste hi yexe u ku siyele ‘ntila leswaku u ta n’wi landza hi le ndzhaku.’—1 Petro 2:21.

Vuntshwa i nkarhi lowunene wo kuma vutivi bya xisekelo bya Xikwembu ni Rito ra xona. I ntiyiso, van’wana lava u va tivaka va nga ha tlanga hi nkarhi wo tala eka tibuku ta switori na TV. Kambe ematshan’wini ya sweswo, hikwalaho ka yini u nga landzeli mikondzo ya Yesu, loyi loko a ha ri mufana a a tsakela ku dyondza hi ta Yehova? Hikwalaho ka rirhandzu rakwe ra swilo swa moya, “Yesu, a kula eku tlhariheni.” (Luka 2:52) Na wena u nga swi kota.

Hi xikombiso: Exikolweni xa laha Afrika Dzonga, thicara u vutisiwile loko a ta swi kota ku kombisa leswaku Bibele i ntiyiso. U vule leswaku a nge swi koti. Mufana lontsongo loyi a a ri un’wana wa Timbhoni ta Yehova, hi xivindzi u te: “Ndzi nga kombisa hi ku tiyiseka leswaku Bibele i ntiyiso!” Njhani? U tsundzuke marungula lawa a a ma dyondzile enkandziyisweni wa sweswinyana wa Xihondzo xo Rindza. Kutani loko a kume mpfumelelo wo vulavula, u hambetile a hlamusela nhlamuselo ya vuprofeta lebyi rhekhodiweke eka Daniel ndzima ya 2. Klasi yi hlamarile loko a ri karhi a kombisa hi laha vuprofeta byi ku vhumbeke ha kona ku tlhomiwa ni ku wa ka tihulumendhe ta misava leti landzelelanaka ni ku lovisiwa ka tona ko hetelela hi Mfumo wa Xikwembu. Vuvulavuri lebyinene byi yise laha a veke ni nkarhi wo hlamula swivutiso swo tala.

Ku Tela Ku Endla Ku Rhandza Ka Xikwembu

Masungulo ya vutivi ni ku twisiseka ka Bibele loku Yesu a ku andlaleke evuntshweni endzhakunyana swi n’wi susumetele ku teka goza ra matimba. “Yesu . . . a ta eYordani eka Yohane ku ta khuvuriwa hi yena.” Se a ku ri nkarhi lowu faneleke wa leswaku a rhwala vutihlamuleri byakwe tanihi mutirheli wa Xikwembu. Nkhuvulo wakwe a wu vula ku titisa ka yena ku ta endla ku rhandza ka Xikwembu.—Matewu 3:13-15.

Hi laha ku fanaka Vakriste va boheka ku tekelela Kriste hi ku khuvuriwa. Nkhuvulo i xikombiso lexi hlawulekeke, mfungho wa le handle wa ku tinyiketa. Loko hi pfumela ku tirhela munhu kumbe feme, hi rhanga hi ku tiyiseka hi swilaveko ni swiyimo naswona hakanyingi hi tiyisa hi ku sayina kontraka. Kambe handle ka nsayino, kontraka a hi leyi bohaka. Swi tano na hi nkhuvulo—wu endla leswaku ku tinyiketa ka hina eka Xikwembu ku tiya. Hi marito man’wana, ku fana na Yesu hi ri: ‘Vona, ndzi tile ku ta endla ku rhandza ka wena, oho Xikwembu!’ (Vaheveru 10:7) Xisweswo hi va malandza ya Xikwembu, vatirheli va xona!—2 Vakorinto 3:5, 6.

Kavula, tanihi Yesu, xo sungula u fanele ku kuma vutivi bya masungulo bya Xikwembu. Kambe Timbhoni ta Yehova ti nga ku pfuna—wena ni vana va wena—ti endla leswi hi dyondzo leyi landzelelanaka ya Bibele.

Ku Rhangisa Vutirheli

Endzhaku ka ku khuvuriwa, Yesu u nghene enkarhini wa ku titsona swakudya, ku anakanyisisa ni xikhongelo. Handle ko tipfinyinga leswi swi n’wi lunghiselele ndzingo lowu endzhakunyana a hlangavetaneke na wona. Sathana Diyavulosi a n’wi nyika ku fuma ehenhla ka “mimfumo hinkwayo ya misava.” Mawaku ntirho-vutomi lowu Yesu a a ta va a ri na wona loko a a lo amukela nyiko ya Diyavulosi! Kriste, hambi swi ri tano, u swi xiyile leswaku ntirho-vutomi wo tano a wu ta va wa nkarhinyana. Kutani hi xihatla u fularhele Sathana ivi ematshan’wini ya sweswo a sungula “ku twarisa Evangeli, a ku: ‘Hundzukani, hikuva Mfumo wa matilo wu kusuhi.’” (Matewu 4:2, 8-10, 17) Vutomi bya yena hinkwabyo bya la misaveni, Kriste a a ri mutirheli wa nkarhi lowu teleke wa Mfumo wa Xikwembu.

Hi ku fanana namuntlha, Mukriste a nga ka a nga pfumeleri misava ya Sathana yi n’wi phasa leswaku a endla mintirho leyi hakelaka mali yo tala ni mintirho ya vutomi xi va xikongomelo xakwe evuton’wini. Phela, loko Yesu a vitane vadyondzisiwa vakwe vo sungula, ‘hi nomu wolowo va sukele tinkoka ta vona va n’wi landza.’ (Marka 1:17-21) Hikwalaho byi nga va vutlhari ku khomeka hi rikoka ra swilo swa misava ke? Yesu u lerisa valandzeri vakwe namuntlha ku ‘twarisa mahungu lamanene ya mfumo.’ (Matewu 24:14) I ntiyiso, u nga ha va u ri ni vutihlamuleri bya ndyangu kumbe swin’wana. Vo tala va Timbhoni ta Yehova hikokwalaho va tirhisa minkarhi ya nimadyambu ni mahelo-vhiki ku rhwala vutihlamuleri bya vona bya Vukriste byo chumayela. Van’wana va swi kota ni ku lunghiselela ku endla tano hi nkarhi lowu teleke!

EAfrika Dzonga jaha rin’wana ri lunghiselele ku ya eYunivhesiti loko ri hetile xikolo. Hambi swi ri tano, endzhaku ka ku kombisa ku tinyiketela ka rona eka Yehova hi nkhuvulo, ri titwe ri boheka ku nghenela vutirheli bya nkarhi lowu teleke. Tata wakwe, la nga riki Mbhoni, eku sunguleni u swi sorile. Kambe endzhaku ka ku vulavurisana ko tala, eku heteleleni u pfumerile leswaku n’wana wakwe a tirha eyindlu-nkulu ya Timbhoni ta Yehova eAfrika Dzonga.

Endzhaku ka malembe ya kaye ya ntsako kwalaho, u tekile ivi a nghenela ntirho wa ku chumayela ka nkarhi lowu teleke ni nsati wakwe lontshwa. Endzhakunyana va kumile n’wana. Ku nga khathariseki, va kombele Yehova ku va pfuna ku ya emahlweni tanihi vatirheli va nkarhi lowu teleke. Va tsundzukile xitshembiso xa Yesu xa leswaku loko munhu a rhangisa Mfumo wa Xikwembu, “hinkwaswo [swilaveko swa nyama] mi ta engeteleriwa swona.” (Matewu 6:33) Leswi swi tikombe wu ri ntiyiso. “Hi tshame hi ri karhi hi tirhisa mali hi malembe yo tala,” ku vula tata wa kona, “kambe hi nyike ntombhi ya hina kaya lero tsakisa ni hinkwaswo swilaveko swakwe swa nyama.”

“Mbilu Yo Rhula Ni Ya Tintswalo”

“Tanani ka mina, n’wina hinkwenu lava karheleke, ni lava tikeriwaka,” ku vula Yesu, “ndzi ta mi wisisa. Rhwalani joko ra mina, mi dyondza eka mina hikuva ndzi ni mbilu yo rhula ni ya tintswalo; kutani mimoya ya n’wina yi ta kuma ku wisa; hikuva joko ra mina ra olova, ni ndzhwalo wa mina wa vevuka.”—Matewu 11:28-30.

Loko a endla mahlori, tanihi ku hlongola mademona, Yesu a nga yisanga ku dzuneka eka yena kambe u pfumele erivaleni leswaku a a endla swilo swo tano “hi moya wa Xikwembu.” (Matewu 12:28) Naswona hambi leswi a a swi kota ku lawula nyingiso wa vayingiseri hi ndlela leyi “a va hlamala hi ku dyondzisa ka yena,” a nga lavanga ku dzunisiwa. (Luka 4:32) Kambe, a ku: “Dyondzo leyi ndzi yi dyondzisaka a hi ya mina, kambe i ya Loyi a ndzi rhumeke.”—Yohane 7:16.

Vakriste va ntiyiso namuntlha va ringeta ku kombisa ku titsongahata loku fanaka. Hi xikombiso, loko va dyondzisa van’wana, a va kokeli miehleketo eka vona vini. Kambe, va hatlisela ku dzunisa Yehova ni nhlengeletano yakwe hikwalaho ka vuswikoti byihi na byihi lebyi va nga na byona byo andlala mahungu ya Rito ra Xikwembu. “Xana u na yini lexi u nga nyikiwangiki xana?” ku vutisa muapostola Pawulo.—1 Vakorinto 4:7.

Ku titsongahata ka Yesu nakambe ku kombisiwe hi ku lava ka yena ku hlanganisa magidi ya timayele, a nga ri egolonyini, kambe a famba hi milenge tanihi muchumayeri la hlanganisaka ndhawu hi ndhawu. Hi nkarhi wun’wana yena ni vadyondzisiwa vakwe a va karhele lerova va lava ku “wisa.” Kambe loko ntshungu lowukulu wu humelela, lowu nga ni ndlala ya xikhutazo xa moya, Yesu u rivale ku karhala kakwe kutani “a [sungula ku] va dyondzisa leswo tala.”—Marka 6:31-34.

ELesotho, eAfrika, mutirheli la famba-fambaka wa Timbhoni ta Yehova (la vitaniwaka mulanguteri wa xifundza) ni vanghana vambirhi, sweswinyana va kombisile moya wo tano. Va fambe maawara ya 22 va tsemakanya tintshava va endzela Vakriste-kulobye va nga ri vangani lava nga ekule. Hi ku karhala ku famba, mulanguteri wa xifundza u ehlekete ku wisa hi siku leri landzelaka. Kambe ntshungu wo tano wu tile eka yena wu ta n’wi xeweta ni ku vutisa swivutiso lerova, hambi leswi a a karhele, u pfukile ivi a va dyondzisa mahungu lamanene ya Mfumo. Ndlela leyi va endleke ha yona yi ve leyi yi khutazaka lerova vafambi lava karheleke va titwe va hakeriwe kahle hikwalaho ka matshalatshala ya vona.

N’wi Encisi!

Muapostola Pawulo u hi khutaza ku ‘languta eka Yesu, Musunguri ni Muhetisisi wa ku pfumela ka hina.’ (Vaheveru 12:2) Leswi hi nga swi endla hi ku hlaya timhaka ta Mahungu Lamanene nkarhi na nkarhi ni ku anakanyisisa hi tindlela leti hi nga encisaka Kriste ha tona. Hi xikombiso, Yesu u kombise xivindzi loko a avanyisa vafundhisi va vukanganyisi ni lava va tiendlaka vo lulama, hambi leswi a swi tiveke leswaku va n’wi venga naswona va ta n’wi dlaya. (Matewu 23:1-36; 26:3, 4) Loko a hlaseriwa u swi kotile ku timiyelela ni ku tikhoma. (1 Petro 2:23) Eku dyondziseni kakwe, u kombise ku twisisa xivumbeko xa munhu ni vuswikoti byo andlala mintiyiso leyi enteke hi ririmi ro olova.

Kambe nyiko leyi xiyekaka swinene ya Yesu a ku ri rirhandzu ra yena. “A ku na munhu la nga ni rirhandzu leri tlulaka ra loyi a nyiketaka vutomi bya yena hikwalaho ka vanakulobye.” (Yohane 15:13) U tlhele a engetela tlhelo rin’wana lerintshwa eka rito leri nge rirhandzu hi ku hi byela ku rhandza valala va hina.—Matewu 5:43-48.

Mawaku xikombiso lexi tlakukeke lexi Yesu a veke xona eka hina! Ku n’wi encisa a swi olovi, naswona hi nga ha khunguvanyeka nkarhi na nkarhi. Kambe a hi fanelanga ku lan’wa nikan’we. (Vagalatiya 6:9) Hikuva ku na timiliyoni leti hi laha ku humelelaka ti ringetaka ku landza Yesu. Phela, yena loyi a ku tiseleke magazini lowu handle ko tilumaluma u le xikarhi ka tona, nakona u ta tsaka ku tlurisa mpimo ku ku pfuna na wena leswaku u landza Yesu—HI LE NDZHAKU!

[Rito leri tshahiweka eka tluka 5]

Hambi loko a ha ri ntsongo, Yesu u kombise ku tsakela lokukulu ka timhaka ta moya. Xana wa n’wi encisa emhakeni leyi?

[Rito leri tshahiweke eka tluka 6]

Kriste u fularhele ntirho-vutomi wa misava hi ku tsakela vutirheli