‘A ndzi si tshama ndzi hlaya nchumu wo fana na yona’
BUKU leyi nge Life—How Did It Get Here? By Evolution or by Creation? yi pfune vo tala ku twisisa khwatsi ndlela leyi vutomi byi veke kona ha yona emisaveni ni laha byi yaka kona. Munhu un’wana u tsarile a ku: “Ndzi na malembe ya 78 hi vukhale naswona a ndzi ri muhlayi ku sukela loko ndzi ri na malembe mambirhi. Kambe a ndzi si tshama ndzi hlaya nchumu wo fana na Life—How Did It Get Here? Swa hlamarisa hakunene. Rungula leri yi nga na rona ri nyanyula mianakanyo.”
ENew Zealand wanuna un’wana u tsale leswaku buku leyi “yi fanele yi ri yin’wana ya mintirho leyi hlawulekeke swinene evurungurwini bya ku gandlisa ka manguva lawa.” Un’wana, eItaly, u te: “Buku leyi i yinene swinene’ Ndzi yi hlayile handle ko yima naswona handle ko karhala, hi laha swi fanelaka tibuku leti amukelekaka.”
N’wamabindzu eNghilandhi u kumele van’wamabindzu-kulobye tikopi ta 25. Hi ku hatlisa u heleriwe hi tikopi leti kutani a kuma tin’wana ta 25. Naswona mudyondzisi wa swa vukhongeri eUnited States u ode tikopi ta 24 to tlhandlekela leswaku a ti tirhisa etitlasini takwe.
“Sayense Leyinene”
Xichudeni xa le Canada xi te: “Ndzi yi vitana buku yanga ya sayense, naswona ndzi nga mi byela ntiyiso leswaku ndzi dyondze sayense leyinene swinene eka buku leyi ku tlula emasikwini hinkwawo ya mina ya xikolo loko ya hlanganisiwile.”
Emhakeni leyi, wanuna un’wana u tsarile a ku: “Loko ndza ha tsarisile eka nongonoko lowu nyikaka digri wa yunivhesiti, ndzi hakele tidolara to tala ta madzana ehenhleni ka tikhoso to hambana-hambana leti a ti ri hava rungula leri tlulaka buku
leyi nge Life—How Did It Get Here? By Evolution or by Creation? Tikhoso leti a ti vulavula hi metametiki, ntivo-vutomi, ti-jinetiki, dyondzo ya leswi hanyaka ni leswi nga hanyiki ni anthropology. Se ndza swi vona leswaku ingi ndzi hlayise ntsengo lowu xiyekaka hi ku xava buku ya n’wina hi R4,50. Hi nkarhi lowu fanaka, mi hambanise ‘mavele eka mungu.’”
Muleteri wa kholichi ya ntivo-ntirho wa swirho u phofule ku tlangela ka yena hi ku: “Hi wona muxaka wa nhlamuselo ya mhaka leyi hakanyingi a ndzi navela leswaku ndzi va na yona hi ku kongoma. Nkambisiso hinkwawo lowu hakanyingi ndzi tsakeleke leswaku ndzi nga va ni nkarhi wa wona kumbe mboyamelo wo wu endla ndzi endleriwe wona!” Hi ku fanana, munhu un’wana u tsarile a ku: “Ndzi tlangela ndzavisiso hinkwawo lowu xaxametiweke lowu buku leyi yi faneleke yi wu lavile hi xiviri. Ina, swi fanele swi teke tin’hweti ku lavisisa mhaka yin’wana ni yin’wana hi xitalo!”
Ku Aka Ku Tlangela Muvumbi
Loko wanuna a tsarile leswaku a phofula ‘ku hlamala ka yena lokukulu’ ka buku leyi, u tlhandlekerile a ku: “Buku leyi a yo khorwisa ntsena, kambe yi tlhela yi huhutela!” Naswona sweswo hi xona xikongomelo xa yona—ku huhutela ntshembo eka Muvumbi wa rirhandzu loyi a nga ni xikongomelo lexi hlamarisaka hi vanhu.
Xisweswo, wanuna wa ndyangu u tsale leswaku yi “kurise ku tlangela ka yena ka Tata wa hina la hlamarisaka kutani yi swi veka erivaleni, hi laha ku nga hava buku ni yin’we leyi endliweke hi vanhu leyi swi koteke, vutlhari bya Mukunguhati werhu.” Hi ku fanana, wansati u vule leswaku eka tibuku hinkwato leti a ti hlayeke, “leyi yi endle leswikulu eka xinakulobye xakwe na Yehova. Vona Xikwembu lexi chavisaka swonghasi!” Naswona wansati wa le Canada u tsarile a ku: “Ndzi nga ka ndzi nga endli leswinene eka mintlhaveko leyi ndzi yi twaka. Hi leyikulu swinene leyi ndzi nga si vaka na yona yo twisisa rirhandzu lerikulu ra Yehova. Swiyenge swa mina swa le ndzeni swi ndzi susumetela ku halata mihloti loko ndzi vona matimba lawa buku leyi yi nga na wona.”
Eka vanhu lavanene lava va kanakaneke ehenhleni ka vukona bya Muvumbi, papila leri landzelaka ri phofula vuyelo bya buku leyi khwatsi: “Inkomu! Hi malembe yo tala swi ndzi nonon’hwerile ku pfumela eka Muvumbi hikuva a ndzi tshemba hundzuluko. Kambe endzhaku ndzi xave buku ya n’wina leyi nge Life—How Did It Get Here? By Evolution or by Creation? Ndzi titwa ku fana ni bofu leri hanyanyisiweke mahlo khamba ro sungula. Ndzi lavisisile xisekelo lexinene ni ku anakanyisisa lokunene, leswaku ndzi hlamusela masungulo ya vutomi emisaveni kutani eku heteleleni ndzi wa kumile ebukwini ya n’wina. Yi ndzi nyike tinhlamulo hinkwato leti a ndzi ri karhi ndzi ti lavisisa malembe lawa hinkwawo. Ndzi nga ka ndzi nga mi nkhensi swi ringana! Hambetani ni ntirho lowunene!”
Hakunene, buku leyi yi tikombe yi ri leyi nyanyulaka eka vo tala. A swi kanakanisi leswi yi nga ta hambeta yi kongomisa van’wana eka Muvumbi, Yehova Xikwembu, leswaku va ta pfuneka sweswi ni hi laha ku nga heriki emafambiseIweni lamantshwa ya swilo laha henhla ka misava.—2 Petro 3:13.