Xiviko Xa Vahuweleri Va Mfumo

Xana Wa Byi Tlangela Vutirheli Bya Le Rivaleni?

VUTIRHELI bya yindlu na yindlu i bya Matsalwa, naswona Timbhoni ta Yehova ti tiviwa emisaveni hinkwayo hi xiendlakalo lexi xa ntirho wa vona wa le rivaleni. (Mintirho 20:20, 21) Yesu u byele valandzeri vakwe: “Kambe mi ta nyikiwa matimba, siku moya lowo kwetsima wu taka ehenhla ka n’wina; kutani mi ta va timbhoni ta mina kwala Yerusalema, ni le tikweni hinkwaro ra Yudiya, ni ra Samariya, ni ku ya fika emakun’wini ya misava.” (Mintirho 1:8) Mintirho 5:42 yi komba leswaku Vakriste volavo vo sungula a va famba hi “yindlu na yindlu” va nga tshiki.

EHaiti a ku ri ni ku kanetana mayelana ni vutirheli bya yindlu na yindlu bya Timbhoni ta Yehova. Leswi swi humelele loko phayona ro hlawuleka ri hlangane ni wansati la tshembekaka wa Muprotestanti. Enkarhini wa ku vulavurisana, makwerhu u kombe leswaku i Timbhoni ta Yehova ntsena ti chumayelaka hi yindlu na yindlu tanihi laha Bibele yi kombaka ha kona. Wansati u hlamurile leswaku swirho swa kereke yakwe swi nga famba hi yindlu na yindlu naswona swi endle tano hi minkarhi yin’wana. Kutani, Mugqivela lowu landzelaka, Mbhoni yi hlangane ni ntlawa lowu fambaka hi yindlu na yindlu, wu kongomisiwa hi wansati loyi. A ku ri na vo ringana dzana entlaweni. Wansati, hi ku tikukumuxa hi ntirho lowu, u rhambe makwerhu ku ta vona xiendlo lexi.

Endzhaku ka vhiki, wansati wa kona u fambise ntlawa wun’wana naswona a a tsakile ku wu komba makwerhu. Hambi swi ri tano, u vule leswaku a ku ri ni kwalomu ka hafu ntsena ya nhlayo ya vhiki leri hundzeke ra kona. Hi Mugqivela wa vumune ntlawa wa kona wu hunguteke wu va 20, naswona hi Mugqivela wa vuntlhanu nsati loyi a a ri swakwe. Hi ku titsongahata, u tile eka makwerhu kutani a pfumela: “I Timbhoni ta Yehova ntsena ti nga na ntiyiso, leswi ti swi kotaka ku hambeta entirhweni wo veka vumbhoni vhiki na vhiki.”

Phayona ro hlawuleka ri nyikele wansati dyondzo ya Bibele leyi a yi ta n’wi komba leswaku ha yini Timbhoni ti swi kota ku hambeta ti chumayela hi yindlu na yindlu ni leswaku ha yini van’wana va nga swi koti. Wansati u pfumerile. Yena ni nuna wakwe va sungule ku dyondza naswona va endle nhluvuko lowunene. Hinkwavo ka vona sweswi va hlanganyela ni Timbhoni ta Yehova hi ku chivirika va twarisa Mfumo erivaleni na hi yindlu na yindlu!

Vutirheli bya le rivaleni bya yindlu na yindlu ni mikhuva yin’wana i lunghiselelo ro hlamarisa ra rirhandzu leri Yehova a ri lunghiseleleke ku lava lava nga ni timbilu leti tshembekaka ni ku va pfuna ku dyondza hi swilaveko swakwe swo kuma vutomi. Hi laha ku faneleke, Timbhoni ta Yehova hi ntsako ti hlanganyela eka rona ni le timhakeni tin’wana ta ntirho wa vona wo hlawuleka eka Xikwembu. Langutelo ra vona ri fana ni leriya ra muapostola Pawulo, loyi a nga te: “Ndzi nkhensa loyi a ndzi nyikeke matimba yo tirha ntirho lowu, yena Kriste Yesu Hosi ya hina; hikuva u ndzi vonile ndzi ri loyi a tshembekeke, hi ku ndzi veka entirhweni wa yena.”—1 Timotiya 1:12.