Vutomi Ni Vutirheli Bya Yesu

Xikhongelo, Ni Ku Tshemba Xikwembu

LOKO Yesu a ya emahlweni ni dyondzo yakwe, u sola vukanganyisi bya vanhu lava kombisaka ku chava ka vona Xikwembu ka nomu. “Loko u nyika,” hi ku vula ka yena, “u nga tidzunisi ha swona kukotisa leswi vakanganyisi va swi endlaka.”

“Naswona,” Yesu u hambeta a ku, “loko mi khongela, mi nga kotisi vakanganyisi; hikuva vona va rhandza ku khongela va yimile emasinagogeni ne mahlanganeni ya tindlela, leswaku va voniwa hi vanhu.” Kambe ke, wa lerisa: “Loko u khongela, nghena endlwini ya wena; kutaku loko u pfarile nyangwa, khongela Tata wa wena la nge xihundleni.” Yesu hi byakwe u endle swikhongelo swa le rivaleni, kutani a nga swi soli leswi. Leswi a swi solaka i swikhongelo leswi vuriwaka leswaku swi tsakisa vayingiseri kutani swi koka ku hlamala ka vona.

Yesu u ya emahlweni a tsundzuxa a ku: “Loko mi khongela, mi nga bokoxeli kukota vamatiko.” Yesu a nga vuli swona leswaku ku phindha-phindha hi koxe ku hoxile. Nkarhi wun’wana, yena hi byakwe hi ku phindha-phindha u tirhise “rito leri fanaka” loko a khongela. Kambe leswi a swi solaka i ku vula marito lama nhlokohatiweke ‘hi ku phindha-phindha,’ ku fana ni lava va rhungaka hi mavoko loko va ri karhi va phindha swikhongelo swa vona hi ku phindha-phlndha.

Leswaku a pfuna vadyondzisiwa vakwe ku khongela, Yesu u nyika xikhongelo xa xikombiso lexi katsaka swikombelo swa nkombo. Leswi swinharhu swo sungula swi xiyisisa vuhosi bya Xikwembu ni swikongomelo swa xona. I swikombelo swa ku kwetsimisiwa ka vito ra Xikwembu, ku ta ka Mfumo wa xona ni leswaku ku rhandza ka xona ku endleka. Leswa mune leswi seleke i swikombelo swa munhu hi xiyexe, hi leswaku, swakudya swa siku na siku, ku rivaleriwa swidyoho, ku ka munhu a nga ringiwi hi leswi tlulaka ku tiyisela kakwe ni ku ka a nga nyiketiwi eka lowo biha.

Loko a ya emahlweni, Yesu u vulavula hi ntlhamu wo kandziyisa swilo leswi vonekaka swi nga fanelanga. Wa khutaza a ku: “Mi nga tihlengeleteli xuma emisaveni, laha tinsumba ni ku kurha swi dyaka kona, ni laha makhamba ya tshovaka kona, ma yiva.” Xuma xo tano a xo va lexi herisekaka ntsena kambe a xi vumbi vuxaka ni Xikwembu.

Kutani ke, Yesu u ri: “Kambe tihlengeleteleni xuma etilweni.” Leswi swi endliwa hi ku rhangisa ntirho wa Xikwembu evuton’wini bya wena. Ku hava loyi a nga tekaka vuxaka lebyi kumisiweke xisweswo ni Xikwembu kumbe hakelo ya byona leyinene. Manuku Yesu wa engetela: “Laha xuma xa wena xi nga kona, hi laha mbilu ya wena yi nga ta va kona na yona.”

Loko a ya emahlweni a vulavula hi ntlhamu wa rifuwo, Yesu u nyika xikombiso: “Rivoni ra miri i tihlo; hikwalaho, loko tihlo ra wena ri hanya, miri wa wena hinkwawo wu ta va eku vonakaleni. Kambe loko tihlo ra wena ri nga lulamanga, miri hinkwawo wa wena wu ta va emunyameni.” Tihlo leri tirhaka khwatsi ri fana ni rivoni leri lumekiweke emirini exivandleni xa munyama. Kambe leswaku ri vona kahle, tihlo ri fanele ku va lerinene, hi leswaku, ri fanele ku languta eka nchumu wun’we. Tihlo leri nga voneki khwatsi ri yisa eku ringanyeteni loku hoxeke ka swilo, eku rhangiseni ka timhaka ta rifuwo emahlweni ka ntirho wa Xikwembu, leswi endlaka leswaku “miri hinkwawo” wu va emunyameni.

Yesu u chaputa mhaka leyi hi xifaniso xa matimba lexi nge: “A ku na munhu loyi a nga kotaka ku tirhela tihosi timbirhi; hikuva u ta venga yin’wana, a rhandza yin’wana, kumbe u ta namarhela yin’wana, a sandza yin’wana. Mi nge koti ku tirhela Xikwembu ni rifuwo ra misava.”

Endzhaku ko nyika xitsundzuxo lexi, Yesu u tiyisekisa vayingiseri vakwe leswaku a va fanelanga ku vilela ehenhleni ka swilaveko swa vona swa nyama loko va rhangisa ntirho wa Xikwembu. U ri; “Langutani tinyanyana leti hahaka empfhukeni: A ti byali, a ti tshoveli, a ti hlengeleti nchumu eswitlatini; kasi Tata wa n’wina wa le tilweni wa ti fihluta.” Manuku wa vutisa a ku: “Xana n’wina a mi ti tluri ngopfu ke?”

Loko a ya emahlweni, Yesu u kombetela eka swiluva swa le nhoveni ivi a xiya leswaku “Hambi a ri Solomoni evukosini bya yena hinkwabyo, a nga ambalanga tanihi xin’wana xa swona,” u ya emahlweni a ku, “kutani leswi Xikwembu xi ambexaka hi ndlela leyi byanyi bya nhova, . . . xana ngopfu-ngopfu a xi nga mi ambexi, n’wina vanhu va ku pfumela lokuntsongo ke?”

Kutani Yesu u dlayelela hi ku: “Mi nga vileri mi ku: ‘Xana hi ta dya yini?’, kumbe: ‘Hi ta nwa yini?’ kumbe: ‘Hi ta ambala yini ke?’ . . . Kutani tata wa n’wina wa le tilweni wa swi tiva leswaku swilo leswi hinkwaswo ma swi pfumala. Rhangani mi tilavela Mfumo wa yena ni ku lulama ka yena, kutani sweswo hinkwaswo mi ta engeteleriwa swona.” Matewu 6:1-34; 26:36-45.

◆ I swileriso swihi ehenhleni ka xikhongelo leswi Yesu a swi nyikeleke?

◆ Hikwalaho ka yini rifuwo ra le tilweni ri ri lerikulu, naswona ri kumisiwa ku yini?

◆ I swifaniso swihi leswi nyikeriweke ku pfuna munhu leswaku a papalata rifuwo?

◆ Ha yini Yesu a vule leswaku ku hava xilaveko xo vilela?