Xiviko Xa Vahuweleri Va Mfumo

Mintsombano Leyi Hlawulekeke Ya Argentina

“TIMBHONI TA YEHOVA ti dyondze ku hlangana handle ka vukari kumbe mpfilumpfilu, handle ka fole kumbe xihoko, handle ka swilo leswi tlurisaka mpimo swa muxaka wihi na wihi. Handle ko tipfinyinga, i dyondzo eka vandla ro fana ni ra hina, leri hi nawu ri tekiwaka ri ri ra Vukhatoliki, hambi swi ri tano ri ri leri vaka ni swihinga eku khathaleleni ka mintshungu leyikulu eswivandleni swa bolo ku ri hava swiendlakalo leswi onhaka, minkarhi yin’wana swi ri leswi nga tsakisiki,” ku vike magazini wa Flash eArgentina. Nhlamuselo leyi yi endliwile hikwalaho ka wun’wana wa Mintsombano ya mune ya “Vahlayisi va Vutshembeki’’ ya Timbhoni ta Yehova lowu khomiweke eArgentina hi January 1986. Hakunene, vamakwerhu a va tsakile loko va vona 97 736 va va kona emintsombanweni ya mune. A ku ri nkarhi wo tsakisa eka vona ku va ni vamakwavo lava nga vaka 600 lava humaka ematikweni man’wana ya 19 ni matiko-nkulu ya 5 va va kona kun’we na vona. Nakambe, va tsakisiwe hi ku tiva leswaku eka 97 736 wa lava veke kona, kwalomu ka 40 000 a va ri vanhu lava ha ku tsakelaka.—Psalma 122:1.

Maphepha-hungu ya va bumabumele swinene vatsombani hikwalaho ka nhlengeletano ni mahanyelo ya vona lamanene. Phepha-hungu ra La Razon ri tlakuse xihloko lexi landzelaka malunghana ni ntsombano wa Buenos Aires eRiver Plate Stadium laha lava tlulaka 57 000 va veke kona: “Ku hleleka, vutengi ni ku hola loku xiyekaka, i timfanelo . . . Ku va kona ka lava tshembekaka ku kombise nhlengeletano leyi hetisekeke . . . ku hleleka a ku kumeki hi xitalo loko ku tiwa eka mintshungu.”

Phepha-hungu leri nge La Nacion ri hlamuserile ehenhleni ka ntsombano lowu khomiweke eRosario laha 15 000 va veke kona: “Ku nga khathariseki nhlayo ya vanhu lava rhambiweke hi Timbhoni ta Yehova, a ku ri hava phorisa ni rin’we leri a ri ta voniwa kwalaho, naswona ku hleleka a ku hetisekile.”

Vapfhumba va tirhise tindlela hinkwato ta vutleketli leswaku va fika emintsombanweni: swihaha-mpfhuka, switimela, mabazi, mimovha ni swikanyakanya. Mabazi lama tlulaka 870 ni xitimela xin’we swi hirhiwile leswaku swi tisa vapfhumba lava humaka eRio Negro Valley edzongeni wa tiko va ya entsombanweni wa River Plate. Munhu la tsakelaka u khandziye xikanyakanya hi mune wa masiku, 800 wa tikhilomitara, leswaku a va kona entsombanweni eCórdoba.

Ha yini ku endliwa matshalatshala lawa hinkwawo leswaku va va kona? I mhaka ya leswi Timbhoni ta Yehova ti khathalelaka ngopfu xilaveko xa tona xa moya. (Matewu 5:3) Phepha-hungu ra Clarin ri te: “Ndzayo, xikhutazo xa ntumbuluko, tinhlamuselo ta Bibele, swi landzeriwe khwatsi hi magidi ya vavanuna ni vavasati, lava hi ku tsala tinotsi loko rungula ra Bibele ri tshahiwa, va pfuleke Matsalwa layo Kwetsima ivi va languta ku tshahiwa loku.” La Voz del Interior eCórdoba yi xiyile: “Nhlengeletano yi kandziyise xilaveko xo dyondza ndlela yo hetisisa nawu wa Xikwembu hi rixaladza, hambi byi ri vuxokoxoko byo fana ni xinakulobye, vuyi-mbeleri ni maambalele ya munhu hi xiyexe.”

Loko a kombisa vuyelo bya rungula leri nyikeriweke, wanuna un’wana nkarhi wun’wana endzhaku ka ntsombano u te: “Ku sukela esikwini rero [ro va kona entsombanweni] ku ya emahlweni, vutomi bya mina byi cince hi laha ku heleleke. Ndzi hanyisana ku antswa ni swirho swa ndyangu wa mina. Ndzi tirha ku antswa. Ndzi tsake ngopfu leswi ndzi tolovelaneke na n’wina, ku xiya leswaku ka ha ri ni vanhu lavanene, vanhu lava pfunaka vaakelani hi rirhandzu ra Yesu. Vavasati a va ambale hi ku ringanisela, ku ri hava la dzahaka kumbe ku nwa. I paradeylsi ya ntiyiso, leyi nga ni vanhu vo tala lava nga ni vun’we ni lava tikhomaka onge i ndyangu wun’we lowukulu.”

Tinhlamuselo to tano ti hi pfuna ku tlangela leswaku i mhaka ya moya wa Yehova leswi ku hleleka ni rirhandzu ro tano swi kotekaka.