Vanhu Lava Lamaleke Lava Va Nga Vachumayeri Lava Swi Kotaka
JAHA lero saseka leri fambaka hi tinhonga i munhu la nembulukaka [ku lala] milenge. Wansati loyi wo tsaka i mbeveve leyi feke tindleve. Vavanuna lava vanharhu lava n’wayitelaka hi lava hlaseriweke hi ku tsana ka mimpfimbi. Xana i yini lexi va nga na xona hinkwavo? Ku hluleka ka vona ke? Kumbexana. Vuswikoti bya vona? Kunene! Hinkwavo i vachumayeri lava swi kotaka—vatirheli va maphayona ya nkarhi hinkwawo.
Vanhu lava va vula leswaku va vona swilo swinharhu swi ri swona swi va pfunaka eku humeleleni ka vona tanihi vatirheli va maphayona: (1) vukongomisi lebyinene lebyi humaka eka Yehova Xikwembu hi ku tirhisa nhlengeletano yakwe ya rirhandzu; (2) mpfuno lowu nga tsekatsekiki lowu humaka eka maxaka ya vona ni swirho swa bandlha ra Vukriste; na (3) ku navela lokukulu ka ku kurisa malunghelo ya ntirho wa vona. A hi voneni leswaku hikwalaho ka yini vanhu lava vo lamala va tikombisa va ri vachumayeri lava swi kotaka naswona njhani.
La Nembulukaka Milenge La Nga Ni Vutomi Lebyi Teleke
Hambi loko a nga swi koti ku tirhisa milenge yakwe, Masashi Tokitsu wa malembe ya 35 hi vukhale u vile phayona ra nkarhi hinkwawo hi malembe ya ntlhanu. U kule a ri na milorho yo va mudyondzisi wa swa mintlangu. Kambe milorho yoleyo yi xaxile loko a ri ni malembe ya 15 hi ku chupuka ensimbini yo chinginya ha yona. Loko a vile ni ntokoto wolowo wo vavisa, u vone onge mavoni ya vutomi byakwe ma timiwile. Kambe ma sungule ku tlhela ma pfurha loko a dyondza Bibele. Ntsena, enkarhini lowu a ma ri mavoni ya ntiyiso. (Ringanisa Yohane 1:5.) Hi tin’hweti ta khume, Masashi u khuvuriwile tanihi un’wana wa Timbhoni ta Yehova. Yingisela loko a hi chumbutela leswaku hikwalaho ka yini a vile phayona ni leswaku hi ndlela yihi.
“Ku sukelanyana eku sunguleni, ndzi swi vonile leswaku xikongomelo xa dyondzo ya mina ya Bibele a ku ri ku chumayela eka van’wana. Kutani ndzi tirhisile nkarhi lowu ku vulavula na mani na mani la teke ekaya. Eka mina, maphayona a ku ri vanhu lava navelekaka swinene. Mawaku ku navela loku a ndzi ri na kona ko huma ndzi ya chumayela eka vanhu siku na siku! Lava nembukeke milenge va hlaseriwa hi ku olova hi ku tshoveleleka swirho, kumbe matshumba, naswona a ndzi ri na lerikulu endzhumbyini wa mina leri a ri huma bofu, mati na ngati. Ku cinca swiambalo minkarhi yo tala hi siku a swi dya nkarhi! Ku anakanya leswaku ndzi nga ka ndzi nga vi phayona emafambiselweni lawa ya swilo, a swi ndzi vangela ku khavaxela mihloti loko eka tibuku ta Watch Tower ndzi hlaya marito ya musa, lama khutazaka lama kongomisiwaka eka lava hlulekaka ku phayona.
“Hikwalaho ka matshumba emindzhumbyini ha mimbirhi, ndzi khomiwile hi xirhami. Lexi hlamarisaka, xiyimo lexi a xi hela loko ndzi yile eminhlanganweni ya Vukriste. Manuku hikwalaho ka xitsundzuxo xa vutlhari xa makwerhu la nga dokodela, ndzi endliwile vuhandzuri ematshumbeni. Vuhandzuri bya vumbirhi byi ve lebyi humelelaka hi ku hetiseka, lerova endzhaku ka tin’hweti ta ntlhanu ta ku hlakarhela ndzi sungurile ku tirha tanihi phayona leri pfunaka. Kambe, hi nkarhi wolowo ndzi anakanye leswaku ku khathalela vutihlamuleri bya mina tanihi nkulu wa bandlha, ku phayona ka nkarhi hinkwawo a swi ta va swi tele eka mina. Bandlha a ra ha ku tlhomiwa, naswona a ku ri mina ntsena nkulu.
“Hi nkarhi wu ri wun’we, ndzi naverile ku tekana ni makwerhu un’wana wa xisati, kambe á a nga ndzi rhandzi. Lexi vaviseke, ndzi anakanye leswaku vuyelo lebyi byi fanele byi ri ku rhandza ka Xikwembu, naswona a ku ri hava lexi nga vangelaka ku phofula minsusumeto loko ku ri na swo tala swo khathaleriwa ebandlheni. Ndzi vone onge murhi lowu antswaka eka mina a ku ri ku va ndzi katseka ngopfu entirhweni wa le henhla. Tin’hweti timbirhi endzhakunyana, ndzi tsarise tanihi phayona ra nkarhi hinkwawo. Ku phayona tanihi munhu la nembukeke swirho, ku ringanisela ka vumunhu i ka nkoka ngopfu ku tlula ku ringanisela ka swa nyama. U lava mpfuno ngopfu eka van’wana leswaku u hetisisa leswi u lavaka ku swi endla, kutani swa boha ku dyondza ndlela yo tsakisa yo kuma ntirhisano wolowo. Leswi ndzi swi kotaka ku chayela movha entirhweni wa nsimu, laha swi kotekaka ndzi yima ekusuhi ni nyangwa. Minkarhi hinkwayo ndzi tirha ni muhuweleri un’wana wa Mfumo la tshamaka exitulwini lexin’wana. Mupfuni wa mina u rhwala nkwama wa mina ni ku tsundzuka leswi ndzi swi lavaka eka wona, ni leswaku swi ri hi ndlela yihi.
“Leswi hi fambaka emagondzweni yo lala, minkarhi yin’wana ndzi yima ehekeni ivi ndzi huwelela ephasejini hi rito lerikulu leswaku ndzi koka mianakanyo ya n’wini wa muti. Loko ku ri na swithezi, mupfuni wa mina u ya enyangweni a ya komba n’wini wa yindlu Bibele loko ndzi ri karhi ndzi vulavula ndzi ri ehansi. Loko swi koteka ku ya etindlwini eka layini ya kona, kumbe ku ri na vanhu etindlwini leti nga eka filoro ya le hansi, vanghana hi musa va ti siyela mina teto. Eka ntirho wa timagazini, ndzi vevukisela mupfuni wa mina ndzhwalo hi ku rhwala ntsena nkwama lowu tameleke timagazini na tibroxara.
“Tanihi mulanguteri wa ntirho, ndzi rhandza ku tshama eka tidyondzo ta le makaya ta Bibele. Kutani hi khomela tidyondzo ekaya ka muhuweleri wa Mfumo leri nga ekusuhi, kumbe va ta eka mina. Kutani u nga swi vona leswaku ndzi lava mpfuno lowu humaka eka vamakwerhu. I swa nkoka leswaku vanghana va nga twisisi ndlela ya ku ndzi pfuna ntsena kambe ni leswaku ndzi tiva ndlela yo amukela mpfuno wa vona hi ku nkhensa.
“Loko ndzi sungule ku phayona ro sungula, ndzi vekile vumbhoni swinene hi ku tsala mapapila. Leswi sweswi ndzi swi kotaka ku ambala tinsimbi ta milenge siku hinkwaro handle ka ku vaviseka ko karhi, ku chumayela ka mina hinkwako ku endliwa ndzi ri ni maphayona man’wana ni vahuweleri. Mpfuno wun’wana lowukulu wa siku hinkwaro entirhweni i vusiku hinkwabyo bya ku etlela lokunene. Ku tirhisa Bibele siku na siku ku entisa ku tiyiseka ka mina ka leswaku ndzi ni ntiyiso. Ku va na xiphemu lexi kongomeke eka drama ya siku na siku ya vutomi ni ku vona leswaku i vangani vanhu lava lavaka ntiyiso swi entisa rirhandzu ra mina eka vona. Ku tirha nkarhi hinkwawo ni un’wana naswona swi ndzi nyika minkarhi ya ntirho wa vurisi ni ku ndzi pfuna ku tiva ntlhambi ku antswa.
“Kavula, ndzi rindzele mafambiselo lamantshwa ya swilo ni vutirheli eka Yehova hi miri lowu hanyeke. Kambe a swi kali swi lava ku yimela nkarhi wolowo. Ku n’wi tirhela sweswi, ku ri na swihinga kumbe ku ri hava, i nkarhi lowunene wa lavantshwa ni lavakulu hi ku fanana.”
U Lavisisa Ndleve Leyi Yingiselaka
“Malembe ya mina yo kula a ya tele hi swirilo,” ku vula Katsuko Yamamoto. Endzhaku ka ku hisa miri loku hlanganeke ni manyokani, Katsuko u sale a ri mafa-ndleve loko a ri ni malembe mambirhi. U tsundzuka nhlomulo wa ku ya exikolweni ni wo tiyisela mindzhukano ya tihanyi ya vana van’wana. Hi ku tsakela leswi a veke phayona ku sukela hi 1981, Katsuko u hi byela ndlela leyi a swi endlaka ha yona.
“Hi ku ka ndzi nga swi koti ku vulavula hi nomu, evutirhelini bya nsimu ndzi tirhisa tinotsi ivi ndzi tikomba n’wini wa yindlu. Hakanyingi ndzi kombela makwerhu wa xisati la twaka ku ndzi pfuna ku landzelerisisa a tiyiseka leswaku ndza humelela. Minkarhi yin’wana ndzi endla riendzo ro sungula ro vuyela ndzi ri ndzexe ivi masalandzhaku ndzi kombela makwerhu wa xisati la twaka leswaku a famba na mina eka riendzo ra vumbirhi. Ndzi swi kotile ku sungula tidyondzo ta Bibele hi ndlela yoleyo. Swi ndzi vangela ku tsaka ku kombisa ku tlangela tintswalo ta Yehova hi ndlela leyi.”
“Masiku ya swirilo” ya Katsuko ma hundzile sweswi. Namuntlha, wansati loyi wa rirhandzu wa Mukriste u kuma ntsako wa xiviri evuton’wini byakwe lebyi nga bizi tanihi mutirheli wa phayona.
Vamakwerhu Vanharhu Lava Hlanganyelaka
Vamakwerhu vanharhu va le Tanizono va le malembeni ya vona ya makume mune naswona va ni muxaka wa ku tsana ka mimpfimbi ya le mahlanganweni ya swirho. Loko va nga si dyondza ntiyiso, a va tirhisa vutomi bya vona eka ntirho wo tihanyisa, va tshemba ku rivala ku tsana hakantsongo-ntsongo ka mimpfimbi ni ku fa hi xihatla loku hlawulekisaka vuvabyi lebyi. Un’wana ni un’wana wa vona u sungule dyondzo leyi hambaneke ya Bibele ivi a va ni vutivi bya ntiyiso. Ku kombisa ku tlangela ka vona eka Yehova, xana a va ta endla yini ku antswisa ntirho wa vona? Makwavo lontsongo, Toshimi, wa hi byela:
“Ndzi tshame ni makwerhu lonkulu, Akimi, ni nsati wakwe ku fikela hi 1979. Loko ndzi nga ha swi koti ku tihlayisa, manuku ndzi joyine makwerhu Yoshito ekaya ra vatsoniwa. Kwalaho ndzi sungule ku tirha tanihi phayona leri pfunaka naswona hi malembe ya ntlhanu lama landzeleke ndzi dyondzile Bibele ni vana lava tlulaka 12 eka wadi yoleyo. Un’wana wa vana volavo u sindzisiwe ku tshika ku dyondza loko a siveriwe hi vatswari vakwe, kambe va n’wi tshikile loko a va kombele ku n’wi tshika a tlhela a dyondza. U file a ri na malembe ya 16 a ri ni ntshembo lowu tiyeke wa ku pfuxiwa. Kwalomu ka lembe endzhakunyana, ndzi amukerile riqingho leri humaka eka vatswari lava eku sunguleni a va kaneta. A va ri na swiphiqo hi n’wana wa vona lontsongo wa xisati kutani va vona onge dyondzo yi ta n’wi pfuna.
“Makwerhu Yoshito na mina hi lavile ku va maphayona ya nkarhi hinkwawo. Kambe xana a hi ta swi kota ku fikelela xilaveko xa lembe xa pakani ya maawara ya 1 000 ke? Kunene, a ku ri mhaka yo andzisa nkarhi lowu hi wu tirhisaka evutirhelini hi maawara man’wana ya 30 ntsena n’hweti na n’hweti. Kambe xana mimiri ya hina a yi ta swi tiyisela? Manuku, hi anakanye leswaku, ‘Loko hi nga swi endli sweswi, ku ta fikela laha hi nga ha swi kotiki.’ Marito ya Pawulo eka 1 Vakorinto 9:16 ma humelele ko tala eka mabulo ya hina. ‘Kunene, khombo eka mina loko ndzi nga twarisi Mahungu Lamanene!’ Entiyisweni, hi ni ndzhwalo wo chumayela mahungu lamanene hambi loko hi ri na rihanyo lerinene kumbe e-e. Kutani hi nghenisile swikombelo swa hina ivi hi sungula vuphayona bya nkarhi hinkwawo hi September 1, 1984.”
Yoshito wa engetela: “Loko ndzi ringete vuphayona bya ‘nkarhinyana’ hi January 1976, ndzi onhe rihanyo ra mina kutani ndzi boheka ku etlela emubedweni tin’hweti timbirhi. Ku chava ka mina lokukulu a ku ri leswaku vuphayona bya nkarhi hinkwawo a byi ta ndzi vangela ku vabya ni ku ndzi sindzisa ku lahlekeriwa hi minhlangano. Hi ntsako, hi August 1985 ndzi swi kotile ku fikelela pakani ya mina ya maawara, naswona a ndzi lahlekeriwanga hi nhlangano ni wun’we hi ku phayona ka mina!”
Toshimi wa hlamusela: “Ndlela-nkulu ya hina yo hetisisa vutirheli byerhu i ku tsala mapapila. Hi tsalela lava nga riki kona ekaya, vanghana, maxaka, swirho swa ndyangu leswi nga pfumeriki swa lava nga ebandlheni, ni vaaki-ndhawu va nsimu ya le tintshaveni leyi hlanganisiwaka evutirhelini bya yindlu na yindlu kambirhi ntsena hi lembe. Hi chumayela hi xitshuketa eka madokodela, vaongori, lava va ha dyondzaka exibedlhele, ni vavabyi van’wana. Ku fikela sweswi, tsevu wa vavabyi va dyondzile ntiyiso. Vanharhu va vona va vile vahuweleri va Mfumo naswona a va rindzele nkhuvulo loko va fa. Hi tsakela mimpfuno ya swa nyama leyi tisiwaka hi ku tshama hi ri bizi, ku aneriseka ka mianakanyo hi ku tiva leswaku hi endla ntirho wa ku chumayela, ni ntsako lowukulu lowu vangiwaka hi ku khutaza hi van’wana.”
Yoshito wa engetela: “Tanihi vakulu va bandlha, hi vambirhi ka hina ha swi kota ku vulavula ni lava navelaka ntirho wa vuphayona hi leswi hi swi tokoteke. Loko hi nghenise swikombelo swo va maphayona, vamakwerhu vambirhi va xisati lava kuleke ebandlheni na vona va susumeteleke ku nghenela swivandla leswi. Ndzi tsakile ngopfu-ngopfu ku vula leswaku hi moya wa Psalma 119:71, ndlela ya mina ya khale leyi nga lulamangiki ya mianakanyo yi hundzukele eka ndlela ya Yehova. Ina, ‘Swi lulamile eka mina leswi ndzi nga tsongahatiwa, leswaku ndzi ta dyondza timfanelo ta Xikwembu.’”
Sweswi, makwavo lonkulu wa vulavula. Akimi u ri: “Swi vangiwa hi musa wa vamakwerhu ni nsati wa mina wa rirhandzu, la seketelaka ku kala ndzi swi kota ku endla leswi ndzi swi endlaka hi ndlela ya le henhla. A ndzi swi koti hambi ku ri ku ba goza rin’we. Malembe ya 14 ku ta fika sweswi, vamakwerhu handle ko karhala va ndzi pfunile ku ya enhlanganweni ni le nhlengeletanweni yin’wana ni yin’wana. Ku sukela enkarhini lowu ndzi sunguleke ku dyondza, mintokoto ya maphayona a ku ri leswi ku vulavuriwaka ha swona loko vantshwa va hlengeletanile va hungata. Hi laha swi kombisiweke ha kona eka Vutirheli Bya Hina Bya Mfumo, ndzi anakanye ku ringeta ku phayona lembe rin’we. Hi ku kanakanisiwa hi xiyimo xa miri wa mina, ndzi endle xitshembiso eka Yehova hi xikhongelo, naswona ndzi pfuxetile xitshembiso xexo lembe rin’wana ni rin’wana ku ringana malembe ya ntlhanu. Entirhweni wa nsimu, ndzi tirhisa ximovhana xa mavhilwa manharhu lexi endleriweke vanhu lava lamaleke. Ha xona ndza swi kota ku tshinela ephasejini ya tindlu to tala. Hakanyingi ndzi tshama etindhawini leti nga ni vanhu vo tala vo famba hi milenge. Loko ku hundza vantsongo ntsena, ndzi khongela kwalaho leswaku ndzi kuma loyi ndzi nga vekaka vumbhoni eka yena, ivi ku ta munhu la yingiselaka. Tidyondzo ta Bibele ti ta ekaya ka mina ti ta dyondza, naswona ndzi swi kotile ku pfuna vanhu va nhungu leswaku va ya emahlweni ku fika enkhuvulweni.
“Tanihi mulanguteri la ungamelaka ni mulanguteri wa Xikolo xa Vutirheli bya le Tilweni, ndzi hatla ndzi fika etidyondzweni leswaku ndzi kota ku xeweta vamakwerhu. Leswi ndzi nga swi koteki ku va endzela hi ku olova emakaya ya vona, ku tirhisa nkarhi wa le mahlweni ni le ndzhaku ka minhlangano hi ndlela leyinene i swa nkoka ngopfu. Hakanyingi ndzi tlhela ndzi tirhisa riqingho eku endleni ka ntirho wa vurisi.
“Eka malembe yo hetelela ya mune kumbe ntlhanu, matimba ya nyama ya mina ma herile swinene. Hi nkarhi wa vusiku, hi xiviri a ndzi swi koti ku famba-fambisa mimpfimbi, naswona ntshikilelo wu va hi ndlela leyi ndzi twaka onge ku ni ku tshikileriwa lokukulu eka mina emubedweni. Nsati wa mina u tlakusa swirho swa mina hi vurhonwani leswaku ndzi ta kuma ntshunxeko. Hi le minkarhini yo fana ni leyi laha marito lama khutazaka ni ya rirhandzu ya vamakwerhu ya ndzi pfunaka ku tshama ndzi ri karhi ndzi n’wayitela leswi ndzi tshembaka leswaku swi humesa xiyimo xa mbilu ya mina hayi miri wa mina.”
Ku ya emahlweni ka vuvabyi lebyi sweswi a ku siveleki. Kambe vamakwerhu va le Tanizono va swi vona leswaku ku tshama mimiri ya vona yi khomekile entirhweni wa nsimu, va ri lava xiyaka n’wini wa yindlu ni leswi a swi pfumalaka, va tirha swin’we ni vapfumeri-kulobye, ni ku tokota ku titwa va helerile hi ku tirhela Xikwembu tanihi maphayona swi pfune ku bakanyela ku ya emahlweni ka vuvabyi etlhelo. Mawaku ku nkhensa loku va nga na kona eka Yehova!
Ku Va Lava Lamaleke Kambe Lava Tiyimiseleke
Ku hluleka ka miri a ku tsanisanga rirhandzu ni ku chivirika loku vachumayeri lava vo swi kota va nga na kona ka vutirheli bya nkarhi hinkwawo. Ku tiyimisela ka vona ku fana ni lokuya ka muapostola Pawulo, la tsaleke a ku: “A hi heli mbilu; hambi leswi hi hlakalaka hi tlhelo ra munhu wa hina wa le handle, hi tlhelo ra munhu wa hina wa le ndzeni, hi hundzuka lavantshwa siku rin’wana ni rin’wana.”—2 Vakorinto 4:16.
Kavula, a hi hinkwavo vahuweleri va Mfumo lava lamaleke lava nga vaka vachumayeri va nkarhi hinkwawo. Swiyimo swa hambana hi ku ya hi vanhu. Kambe xin’wana ni xin’wana lexi vanhu vo tano va nga xi endlaka ku dzunisa la nge henhla-henhla ni ku pfuna van’wana emoyeni swi tisa ntsako lowukulu, ku aneriseka ka munhu hi xiyexe, ni mikateko ya Yehova, Xikwembu xa hina xa rirhandzu.
[Xifaniso tluka 23]
Masashi Tokitsu
Katsuko Yamamoto
Akimi Tanizono
Toshimi Tanizono
Yoshito Tanizono