Ntsako Exikarhi Ka Vanhu Va Xikwembu

MARITO ya Hosi Davhida, lama rhekhodiweke eka Psalma 68, tindzimana 2-4, ma katsa xirhambo lexi kufumelaka eka varhandzi hinkwavo va ntshunxeko wa ntiyiso: “Yimbelelani Šikwembu, ḍunisani v̌ito ra šona, lunghiselani loyi a fambaka e šikari ka mananga e ndlela! Yehova i v̌ito ra yena; ṭakani e mahlweni ka yena.” I lunghelo rihi lerikulu leri nga vaka kona ku tlula ku tsaka emahlweni ka Xikwembu xa hina? (Esaya 12:2, 3) Hi lembe ra 1986 hinkwaro, Yehova u seketele timbhoni takwe hi laha ku hlamarisaka, tanihi leswi ti hambeteke ti twarisa ntshunxeko eka vanhu va misava.

Matluka lama landzelaka ma nyika nkatsakanyo wa ntirho wa misava hinkwayo wa Timbhoni ta Yehova hi 1986. Mawaku xivangelo xa ntsako! Tanihi laha tifigara ti kombaka ha kona, nhlayo ya nhlohlorhi ya Timbhoni leti chivirikaka ematikweni ya 208 leti vikaka yi tlakukele eka 3 229 022, ku andza ka 6,8 wa tiphesente enkarhini wa lembe. Nhlayo leyi khuvuriweke a ku ri 225 868.

Ku Tsundzuka Rifu Ra Yesu

Lava veke kona eka nhlangano lowukulu wa lembe, Xitsundzuxo xa rifu ra Yesu, va tlakukele kwalomu ka 8 160 597, hambi leswi swiviko swin’wana swi nga amukeriwangiki hikwalaho ka ku nyanya ka swiyimo swa misava. Nhlayo ya lava hlanganyelaka eka swifanekiselo swa Xitsundzuxo yi ehlele eka 8 927 tanihi leswi vanhu lava totiweke lava dyuhaleke va heteke ntirho wa vona wa la misaveni.—Nhlavutelo 2:10.

Vo tala va lava va hlengeletaneke eku yingiseni ka xileriso xa Yesu va kombe xikombiso xa xivindzi. (1 Vakorinto 11:23-26; Yohane 16:33) Etikweni ra Vantima laha ntirho wa Yehova wu yirisiweke, bandlha a ri hlengeletane ekaya ra makwerhu wa xisati leswaku ri tlangela Xitsundzuxo. Timinete ta nhungu ntsena loko nkulumo yi sungurile, vatirhela-mfumo va kwalaho va humelerile leswaku va khoma vamakwerhu. Va va byele ku yimisa nhlangano. Vamakwerhu hi musa kambe hi ku tiya va sindzisile leswaku va fanele ku xixima Xitsundzuxo lexi eka rifu ra gandzelo ra Yesu. Endzhaku ka ku anakanyisisa ni njhekanjhekisano ni maphorisa, va pfumeleriwile ku ya emahlweni ku ri ni maphorisa. Nhlangano wu hetiwe hi ku rhula, kutani hinkwavo ka vona va khomiwile. Endzhaku ka nkarhi wo vutisiwa, ntlhanu va khomiwile. Va tshamile ekhotsweni swa xinkarhana kambe endzhaku va ntshunxiwile, va tsaka leswi va xiyeke Xilalelo xa Hosi!—1 Yohane 5:3, 4.

Nigeria, laha nhlayo ya Timbhoni yi andzeke yi va 128 461, yi ve na lava veke kona eka Xitsundzuxo va 394 370—nhlayo leyi tlulaka hinkwato. Nhlangano wun’wana wa Xitsundzuxo a wu endleriwe endhawini ya ku aka ya muako lowuntshwa wa Bethele eIgieduma, naswona ku tlula 700—kwalomu ka muti hinkwawo wa kwalaho—a va ri kona!

EMexico ku ta xiviko lexi: “Hinkwako laha hi yaka kona emutini, vahuweleri va pupuma hi ku hiseka, naswona tiko hinkwaro ri tikomba ri ri endzilweni hi ntiyiso. Ntiyiso wu funengeta vamakwerhu, kutani vutomi bya vona byi rhendzeleka entiyisweni. Mindyangu hinkwayo yi ta entiyisweni. Phesente leyinene ya vanhu lava dyondzaka yi sungula ku va kona eminhlanganweni hi nkarhi lowu fanaka. Leswi swi va pfuna ku endla nhluvuko wa xihatla.” Mexico ri vike nhlayo leyi veke kona eXitsundzuxweni ya 838 467. Hi August vahuweleri va Mfumo va 198 003 etikweni rolero a va fambisa tidyondzo ta Bibele ta 327 664 emakaya ya vanhu. Mayana ntshembo lowonghasi lowu va nga na wona wa ku andza loku yaka emahlweni!

Ku Andza Kun’wana Ka Misava Hinkwayo

Ku suka exivindzini xa Vujagana ku ta swiviko leswi fanaka swa ku andza. Italy ri fikelele nhlohlorhi leyintshwa ya vahuweleri va 139 570 hi August, naswona 301 009 a va ri kona eku tlangeleni ka Xilalelo xa Hosi. Timbhoni ta Yehova hakunene ‘ti voningela vanhu hi mukhuva wolowo.’ (Matewu 5:16) Hi xikombiso: “Makwerhu wa xisati a a nghenisa mali endzeni ka muchini wa mathikithi ebazini loko loyi a tolovelaneke na yena a n’wi byela leswaku a ku nga ri na xilaveko xo hakela thikithi hikuva riendzo ra yena a ri komile. Makwerhu wa xisati u hlamusele leswaku a swi fanerile ku hakela thikithi, hambi ku ri xitopo xin’we ntsena. Endzhaku ka swoleswo, munghana wakwe u chikile ebazini. Kwalaho, muchayeri wa bazi u hundzulukele eka yena ivi a ku: ‘Xana u un’wana wa Timbhoni ta Yehova?’ ‘Ina,’ ku hlamula makwerhu wa xisati, ‘i yini lexi endleke leswaku u vutisa?’ ‘Ndzi twile ku burisana ka n’wina hi ku hakela thikithi ra bazi, kutani ndza swi tiva leswaku Timbhoni ta Yehova ti le xikarhi ka vanhu va nga ri vangani lava endlaka tano kutani va tshembeka eswilweni hinkwaswo.’ Endzhaku ka tin’hweti ti nga ri tingani, wanuna u tshinelele makwerhu wa xisati enhlanganweni ivi a ku, ‘Xana wa ndzi tiva? Hi mina muchayeri wa bazi loyi a vulavuleke na wena hi ku hakela thikithi. Hi ku xiya mahanyelo ya wena, ndzi kunguhate ku sungula ku dyondza Bibele ni Timbhoni ta Yehova.’”

Britain ri ve ni nhlohlorhi ya vahuweleri va Mfumo va 107 767, ku katsa ni makwerhu loyi lontshwa la ha ku khuvuriwaka: “George sweswi u na malembe ya 84 hi vukhale. Endzhaku ka malembe ya 50 tanihi mufundhisi ekerekeni kwalaho, u kume vutivi bya ntiyiso. Ro sungula, loko a hetile dyondzo yakwe ya Bibele ya le kaya, a a hatlisela ekamareni rin’wana ku ya dzaha fole. A a ri mudzahi wa nkarhi na nkarhi hi malembe ya 70. Kambe endzhaku ka ku dyondza ndzima ya 26 ya buku ya U Nga Hanya Hi Masiku aParadeyisini eMisaveni, a nga ha dzahanga nakambe. George sweswi u na lembe a khuvuriwile naswona wa hiseka entirhweni wa nsimu, u byela van’wana hi mikateko leyi Yehova a nga ta yi tisa emafambiselweni Yakwe lamantshwa ya swilo.”

Federal Riphabliki ra Jarimani ri vika nhlohlorhi ya vahuweleri va 118 645. Nakambe ku na magidi ya Timbhoni leti tshembekaka ‘leti voningaka’ eka Riphabliki leri nga kusuhi ra Jarimani ra Xidemokrati. EJarimani, lava tshembekaka lava kuleke va ala ku veka “fumu ra moya” ehansi. (Vaefesa 6:16, 17) Bandlha ra vika: “Hi na makwerhu wa xisati loyi a nga na malembe ya 103 hi vukhale naswona wa ha tshama a ri yexe. Vakulu va lunghiselele ntlawa wa vamakwerhu va xisati va nkombo ku ya eka nhungu leswaku va cincana eku n’wi hlayiseni vhiki na vhiki. A va ri karhi va endla leswi sweswi hi malembe manharhu ku ya eka mune lama hundzeke. Vakondleteri, lava hakeriwaka hi vaaki, va ta va ta n’wi hlambisa ni ku n’wi cinca. Kambe loko va vabya kumbe va ri eku wiseni, vamakwerhu va xisati va endla ntirho lowu. Vumbhoni lebyi bya rirhandzu ra Vukriste ni ku tinyiketela byi tirhe tanihi vumbhoni lebyinene eka lava nge handle. Makwerhu wa xisati wa malembe ya 103 hi vukhale u tlharihile ebyongweni naswona u teka vakondleteri va ri ‘nsimu’ ya yena. U va chumayela hi ku hiseka loko va ri karhi va n’wi hlambisa ivi a va nyika tibuku.” I ntiyiso, “Misisi ya timpfu i hari ya šitšhav̌o, [loko] yi kumeka e ndleleni ya ku lulama.”—Swivuriso 16:31.

Hambi swi ri tano, xirhambo xo dzunisa Yehova xi ya eka vanhu va malembe hinkwawo—“majaha ni v̌aṅhwana, ŝikoša ni v̌ana.” Vanhu vo tala lavantshwa va ‘anakanya Muvumbi hi masiku ya vuntshwa bya vona.’ (Psalma 148:12; Eklesiasta 12:1) EBrazil, laha a ku ri na nhlohlorhi leyinene leyintshwa ya vahuweleri va 196 948, Sosayiti ya Watch Tower yi amukele papila leri humaka edorobeni leri nga ekule laha vamakwerhu vambirhi lavantshwa va xinuna va vekeke vumbhoni hi tin’hweti ti nga ri tingani. Xiphemu xin’wana xi hlayekisa leswi: “Ndzi rhandza ku mi bumabumela hikwalaho ka vantshwa lavanene lava mi nga na vona evukhongerini bya n’wina. Ndzi mudyondzisi wa xikolo naswona ndzi tirhisana ni vantshwa, kutani ndza swi tiva leswaku a va leswi a va ri swona. Vantshwa va n’wina hakunene i xikombiso. Va yingisa vakulu va vona, va ni xichavo ni ku ambala kahle. Naswona vona ndlela leyi va tivaka Tibibele ta vona ha yona! Byolebyo i vukhongeri hakunene! Swa vavisa hikuva va fanele ku suka.” Mindyangu ya vamakwerhu sweswi yi rhurhela makumu etindhawini tin’wana leti nga kule ku ya khathalela lava tsakelaka.

Xana i nhluvuko muni lowu ntiyiso wu wu endlaka eka tindhawu leti nga riki ta Vukriste? The Wall Street Journal ya July 9, 1986, yi humese nhloko-mhaka yo leha ehansi ka mhaka leyi nge “Misava Leyi nga Tswariki Mihandzu—Varhumiwa Va Vukriste Va Byala Mbewu eJapani Kambe Yi Kula Kantsongo.” Murhumiwa wa United Church of Christ u vikiwe tanihi loyi a nge, “Ku hava ndlela leyi Vukriste hakunene byi nga ta dzima timitsu eJapani ha yona,” naswona muprista wa MuFrancis tanihi loyi a nge, “Siku ra murhumiwa umbe eJapani ri herile.” Hinkwavo va tirhele swa hava hi malembe yo tlula 30. Nhloko-mhaka leyi yi te: “Lava nga ehansi ka 1% ya vaaki-tiko i Vakriste, naswona ku nga khathariseki ntirho hinkwawo wa vurhumiwa, phesente ya ehla.” Ngopfu-ngopfu eka vukhongeri bya Vujagana! Kambe ku vuriwa yini hi Timbhoni ta Yehova, leti dyondzisaka Vukriste lebyi tengeke etikweni rolero? Hi tin’hweti ta 92 leti hundzeke enxaxamelweni, ti andzise nhlayo ya tona ya vatirheli lava chivirikaka ku ya eka nhlohlorhi ya 113 062 (ku katsa ni avhareji ya maphayona ya 46 390 n’hweti na n’hweti). Le Japani tidyondzo ta Bibele ta le makaya ta 146 316 ta fambisiwa ni vanhu lava ha ku tsakelaka. Lawa hakunene i masungulo ya ku andza kun’wana lokunene. Laha, hi vona ku hetiseka loku hanyaka ka Esaya 65:13, 14.

Xivandla Xa Vuphayona

Ku vuriwa yini hi pakani ya ntirho lowu hinkwawo lowukulu—United States of America? Kwalaho a ku ri na nhlohlorhi ya vahuweleri va Mfumo wa 744 919 ensin’wini. Kambe xana hakunene ‘varhumiwa vo tano va kwalaho’ va laveka ke? Hakunene va laveka, tanihi leswi vugevenga, swidzidzirisi, vunghwavava, vuvabyi ni ku onhaka swi andzaka hi mpimo lowu vavisaka ku tlula eka matiko yo tala lama vuriwaka ya vuhedeni. Vanhu lava navelaka swilo swo antswa va lava ku aneriseka ni ntshembo, kutani Timbhoni ta Yehova ti ni mahungu yo tano. (Esaya 61:1, 2; Matewu 24:14) EUnited States, hi 1986, vatirheli lava va nyikele maawara ya 146 673 490 eku twariseni ka mahungu lamanene ya Mfumo. Sweswo swi vanga ku andza ka tiphesente ta 12,6, kumbe maawara lama engetelekeke ya 16 449 229 ku tlula n’waxemu. Nkarhi wolowo wu hetiwe hi laha ku pfunaka, tanihi leswi tibuku ta 6 138 938 ti fambisiweke, leswi ku nga ku andza ka tiphesente ta 23,2 ku tlula lembe leri nga hundza. Hi April yi ri yoxe, ntsengo wa kona a wu tlula tibuku ta 1 000 000 leti hlamuselaka ntshembo wa ntiyiso wa ku rhula ni nsirhelelo.

Xin’wana xa swiendlakalo leswi nyanyulaka swinene swa xiviko xa le United States i ku andza ka ntirho wa vuphayona. Hi April a ku ri na nhlohlorhi ya maphayona ya nkarhi hinkwawo ya 45 786, ku andza ka 23 wa tiphesente ku tlula n’waxemu. Loko u hlanganisa figara yoleyo ni avhareji ya 43 369 ya maphayona yo pfuna ni avhareji ya maphayona yo hlawuleka ya 279, swi vula leswaku n’hweti na n’hweti va kwalomu ka 90 000 a va twarisa Mfumo wa Xikwembu hinkwako entirhweni wa vuphayona. Lava i vantshwa ni lavakulu, lava va tirhisaka nkarhi wa vona hi vutlhari eku dzuniseni ka Yehova.

Ku Nyikela Vumbhoni Lebyinene

Eku dyondziseni erivaleni na hi yindlu na yindlu, muapostola Pawulo u ‘veke vumbhoni lebyinene’ bya mahungu lamanene. (Mintirho 20:20, 21) Vumbhoni lebyi fanaka byi nyikeriwile ematikweni yo tala namuntlha. Hi xikombiso, xiviko lexi xi huma eGuadeloupe: “Eku heleni ka lembe ra ntirho, a hi ri na muhuweleri un’we eka vanhu va 72. A swi kali swi lava ku vuriwa, hi tiveka swinene etikweni hinkwaro! Kahle-kahle, etindhawini to tala, hi ya ensin’wini leyi fanaka vhiki na vhiki. Van’wana va nga vula leswaku hakunene vanhu va karhele hi ku hi vona, kumbe leswaku i xihlovo lexi hetaka matimba ku va ensin’wini leyi fanaka vhiki rin’wana ni rin’wana. Kambe hi laha ku hambaneke, loko hi tirha nsimu swinene, hi kona laha ku tsakela ku pfukaka. Kutani vumbhoni hi byihi? Ee, i nhlohlorhi ya April ya n’waxemu ya tidyondzo ta Bibele ta le makaya ta 7 136 leti fambisiweke hi vahuweleri va hina va 4 558! Sweswinyana magazini a wu ri na xihloko lexi nge: ‘Timbhoni Ta Yehova—Tihosi Ta Yindlu Na Yindlu’! Hi languta sweswo ku ri xichavo. Enkarhini wa lembe ra ntirho, vamakwerhu lavantshwa va xinuna ni va xisati va 458 va khuvuriwile.” Ku tshembeka ni ntsako swi kombisiwile eku tirheni ka nsimu ya hina hi ku phindha-phindha, hi tiva ni ku tolovelana ni vanhu, hi rirhandzu hi susa xihlawu-hlawu xa vona—leswi swi nga yisa eku kumeni ka vanhu vo tala lava fanaka ni tinyimpfu.

Yehova u katekisa malandza ya yena hi laha ku fuweke etikweni ra Vantima laha ntirho wu yirisiweke ni laha nyimpi ya xin’wana-manana yi karihaka. Etikweni rolero vo tala va vamakwerhu va xaniseka emakhotsweni, naswona vantshwa van’wana va Timbhoni va dlayiwile. Kambe, April a yi ri na xiviko lexi xiyekaka, lexi nga ni tinhlohlorhi ta khume ta nkarhi hinkwawo. Figara ya muhuweleri lontshwa i ku andza ka 29 wa tiphesente ku tlula n’waxemu. Mawaku ku chivirika konghasi loku vamakwerhu lava va rhandzekaka va ku kombisaka! Avhareji ya maawara hi April a yi tlula 18 hi muhuweleri, naswona tidyondzo ta Bibele ta le makaya a ku ri 2,6 hi muhuweleri.

Mahungu ya xihundla lama amukeriweke hi hofisi ya rhavi leri khathalelaka nsimu leyi ya ringane ku hundzisela mianakanyo yin’wana ehenhleni ka swiyimo leswi nga kona. Ya hlayekisa leswi: “Ku hisa ku ya emahlweni ku hi hisa. Matshalatshala lama lavekaka ku rhendzeleka ni ku vona un’wana i vumbhoni bya leswaku hi na gandlati ra ku hisa. Kambe ha swi tiva leswaku hi endliwile hi ndlela yo tano yo tekelela mahiselo wahi ni wahi ni mbango wihi na wihi. Ku nga khathariseki hinkwaswo leswi hi swi tiyiselaka, ha tiyisana naswona ha tshemba hi ta pona.” Mayana vutshembeki byo tano!

Vahlayisi va vutshembeki ha un’we-un’we va endla nhlengeletano leyi hlayisaka vutshembeki. Nhlengeletano ya misava hinkwayo ya timbhoni ta Yehova ta 3 229 022 yi tano! Va langutela ku pona “nhlomulo lowukulu” lowu taka ni ku hlanganyela, ehansi ka Mfumo wa Xikwembu, entirhweni lowukulu wa ku hundzula misava yi va paradeyisi. (Nhlavutelo 7:14; 21:3, 4; Esaya 65:17, 21-23, 25) Va tsakile hi ndlela leyi Yehova hambi ku ri sweswi a katekisaka ntirho wa vona wo chivirika, hambi va chumayela rito “hi nkarhi wa kona” kumbe “ku nga ri nkarhi wa kona.” (2 Timotiya 4:2) Matluka lama landzelaka ma komba hi laha va yingiseke xihloko xa ndzimana ya vona ya lembe ya 1986 ha kona: “Famba . . . , twarisa ta Mfumo wa Xikwembu.”—Luka 9:60.

[Bokisi/Xifaniso lexi nga eka tluka 7]

Swiendlakalo swin’wana swa Xiviko xa Misava Hinkwayo xa Timbhoni ta Yehova

Ku Andza:

Nhlohlorhi ya vahuweleri: 3 229 022 6,8%

Avhareji ya n’hweti na n’hweti ya maphayona: 391 294 21,2%

Ntsengo wa maawara yo chumayela: 680 837 042 15,3%

Ntsengo wa nhlayo ya lava khuvuriweke hi 1986: 225 868 19%

[Chati leyi nga eka tluka 10]

XIVIKO XA NTIRHO WA LEMBE RA 1986 WA TIMBHONI TA YEHOVA EMISAVENI HINKWAYO

(See bound volume)

[Swifaniso leswi nga eka tluka 8, 9]

KU VEKA VUMBHONI ‘ERIVALENI NA HI YINDLU NA YINDLU’ “NI KU YA FIKA EMAKUN’WINI YA MISAVA”

Davao Philippines

Venice Italy

Castle Combe Nghilandhi

Kowloon Hong Kong

Gålå Norway

Taipei Taiwan

Queenstown New Zealand

Bolgatanga Ghana

Paris Furwa

Quelzallenango Guatemala

Kerala India

Banff Canada