Swivutiso Swa Vahlayi

◼ Muxe u byele Vaisrayele leswaku “timhaka le’ti hlav̌uteriweke i ta hina ni v̌ana va hina hi laha ku nga heriki.” (Deuteronoma 29:29) Xana ‘timhaka leti ti hlavuteriweke’ ti katsa ni ku vonakala loku voningeke eRitweni ra Xikwembu enkarhini lowu wa masiku ya makumu?

E-e, a swi nga ta va swi lulamile ku veka ku twisiseka ka vuprofeta loku hi nyikiweke kona enkarhini lowu wa masiku ya makumu eka xiyimo lexi fanaka ni “timhaka le’ti hlavuteriweke” leti Muxe a a vulavula ha tona.

Hi ku ya hi mongo wa marito ya Muxe, “timhaka le’ti hlavuteriweke” leti a a vulavula ha tona a ti yelana ni ntwanano wa Nawu. (Deuteronoma 29:25) Muxe u kombise leswaku ‘timhaka leti ti hlavuteriweke’ a ti ri na vutihlamuleri. Ku tsandzeka ku hanya hi vutihlamuleri lebyi a swi ta vangela Yehova leswaku a xupula vanhu vakwe.

Kavula, ntwanano wa Nawu a wu ri nhlavutelo leyi humaka eka Yehova Xikwembu. Yi landzeriwe hi tinhlavutelo tin’wana eka vapatriarka, eka Nowa ni ku tlhelela endzhaku eka Adamu. Muxe u tirhisiwile ku tsala timhaka leti hlavuteriweke ku ta enkarhini wa yena, naswona ti hlayiseriwe hina etibukwini ta ntlhanu to sungula ta Bibele. Endzhakunyana, hi laha xihloko lexi nge “Timhaka Leti Hlavuteriweke I Ta Hina” (Xihondzo xo Rindza, May 15, 1986) xi hlamuseleke ha kona, ‘timhaka leti ti hlavuteriweke’ ti katsa rungula hinkwaro leri rhekhodiweke eBibeleni.—2 Timotiya 3:16.

Xisweswo, Bibele yi tamele ‘switshembiso leswo hlawuleka swa Xikwembu,’ timhaka leti hlavuteriweke hi yena. (Varhoma 3:2) Loko Vayuda va ntumbuluko va tikombise va nga tshembekanga, Vakriste lava totiweke va ve malandza ya ‘timhaka leti ti hlavuteriweke,’ naswona bandlha ra Vukriste ri ve “mhandze leyikulu ni xisekelo” xa vona. (1 Timotiya 3:15; 1 Vakorinto 4:1) Kutani, swirho swa bandlha rolero namuntlha swi nga vula marito ya Muxe hi mfanelo, leswaku “timhaka le’ti hlavuteriweke i ta hina.”

Namuntlha, Yehova u tise ku vonakala lokukulu ‘etimhakeni leti ti hlavuteriweke.’ Hi laha swi profetiweke hi Daniyele ha kona, vanhu va Yehova va ‘kambisise’ Rito leri huhuteriweke, naswona ‘ku tiva kuve loku engetelekeke.’ (Daniel 12:4) Xisweswo, manuku hi tiva xikombiso xa “tinyimpfu tin’wana.” (Yohane 10:16) Hi xiya “ntshungu lo’wukulu.” (Nhlavutelo 7:9-17) Hi vona ku hetiseka ka xifaniso xa tinyimpfu na timbuti. (Matewu 25:31-46) Swilo swo tano swi paluxiwile, kumbe swi twarisiwile, eka hina hayi hi ku twisiseka ka “timhaka le’ti hlav̌uteriweke” hi laha ti rhekhodiweke ha kona eRitweni ra Yehova leri huhuteriweke.

Hikokwalaho ke, a swi nga ta va swi lulamile ku veka ku humelela ko tano ka ku twisisa eka xiyimo lexi fanaka ni tinhlavutelo leti huhuteriweke leti vumbaka “timhaka le’ti hlav̌uteriweke” leti rhekhodiweke eBibeleni. Kambe, hi ku dyondza lokukulu ka Bibele, vanhu va Yehova va lave ku twisisa lokunene ka ‘timhaka teto leti hlavuteriweke.’ Yehova, hi ku tirhisa moya lowo kwetsima, u nyike ku twisisa koloko enkarhini wa yena n’wini lowu faneleke.

Bibele yi hi byela leswaku “ndlela ya la’vo lulama yi kotisa ku v̌onakala, ku hatima ka kona ku engeteleka ku fikela nhlekanhi lowukulu.” (Swivuriso 4:18) Ku vonakala loku engetelekaka loku Yehova a ku voningeleke “timhaka le’ti hlav̌uteriweke” ku komba leswaku “siku” ra tshinela naswona ku kombisa leswaku nkateko wa yena wu le bandlheni ra Vukriste namuntlha.