Xana Xikhongelo Xa Pfuna?

HI RAVUNTLHANU, May 31, 1985, nongonoko wa swidzedze wu hlasele xiphemu xa le dzongeni wa Ontario, eCanada. Mufundhisi la tshamaka eximutanini xa Grand Valley a ri hava xo xi endla u hlalele bubutsa loko ri ri karhi ri hahlula lwangu endlwini ya yena. Hi laha swi vikiweke ha kona eka phepha-hungu, u “vone mahlori ni makhombo swi humelela hi matlhelo hinkwawo loko a vone tihanyi ta ntumbuluko leti nga lawulekiki.”

Entiyisweni, varhandziwa ni vanghana va vanhu vambirhi lava dlayiweke hi swidzedze va vone leri ri ri khombo leri chavisaka. Swi ve tano hi gidi ni ku tlula ra lava siyiweke va ri hava makaya hi swidzedze leswi onhaka. Hi tlhelo rin’wana, vo tala va lava poneke ri ahlamile kumbe ku vaviseka lokukulu va hlamusela ku pona ka vona tanihi “hlori.” Ron na mutirhi-kulobye a va ri vambirhi va lava. Va fike exiphen’wini lexi tiyeke ku antswa xo hlayiseka xa muako wa vona wa hofisi hi xitsundzuxo xa tisekene ta mune ntsena. Endzhaku ko hlamusela ku pona ka vona rifu loku hlamarisaka, Ron u te: “Ina, a ndzi pfumela eka Xikwembu eku sunguleni naswona sweswi ndzi pfumela eka Xikwembu hakunene.”

Ku vuriwile leswaku enkarhini wa khombo ra xitshuketa, leri nga rindzeriwangiki, ‘lava alaka vukona bya Xikwembu va va vantsongo, loko va ri kona.’ Naswona loko ku ri na nkarhi wo ringana eswiendlakalweni swo tano, swikhongelo swo tala swa xiviri swa nsirhelelo ni ku pona swa endliwa.

Hi Sonto, July 21, 1985, ku tlula dzana ra vavanuna, vavasati ni vana a va hlanganile leswaku va gandzela eHolweni ya vona ya Mfumo eSydney, Australia. Endzhaku ka risimu ro dzunisa Xikwembu, xikhongelo xi endleriwe bandlha. Loko mutirheli a ha nyikele nkulumo ya yena ya Bibele timinete ta 15 emixweni wolowo wa Sonto, bomo yi bulukile hi xitshuketa yi herisa ku rhula, yi n’wi vavisa swinene, yi dlaya wanuna loyi a a tshame emahlweni ka Holo naswona yi endla leswaku 40 wa vanhu va yisiwa exibedlhele.

[Bokisi/Swifaniso leswi nga eka tluka 3]

Xana Xikhongelo Xi Endla Ku Hambana Ko Karhi?

Swiendlakalo swimbirhi leswi swa ha ku hlamuseriwaka—xin’we xi hlamuseriwe tanihi “tihanyi ta ntumbuluko leti nga lawulekiki” naswona xin’wana tanihi xiendlo xa vugevenga—swi tlakusa swivutiso mayelana ni nkoka wa xikhongelo. Hi wihi nkoka wa ku khongela? Xana xikhongelo xa tirha hakunene? Xana ku khongela swa pfuna?