Mulweri La Tshembekaka Wa Ntiyiso

MARTIN POETZINGER, xirho xa Huvo leyi Fumaka ya Timbhoni ta Yehova, u hete pfhumba ra yena ra la misaveni tanihi Mukriste la totiweke hi madyambu ya Ravumune, June 16, 1988. U ve ni rihanyo leri nga tsakisiki nkarhi wo lehanyana kambe u fe handle ka xitlhavi lexi xiyekaka eBethele ya Brooklyn. Gertrud, nsati wakwe, u n’wi seketerile eku vabyeni ka yena hinkwako.

Makwerhu Poetzinger u velekiwe hi July 25, 1904, eMunich, le Jarimani. U khuvuriwe hi October 2, 1928, ivi a nghenela ntirho wa vuphayona hi October 1, 1930. Hi xixikana xa 1933, Sosayiti ya Watch Tower yi n’wi avele ku langutela timhaka ta Mfumo eBulgaria, kambe ku nga si hela lembe Timbhoni leti a ti nga tshami kona ti hlongoriwile. Ku rhurha loku landzeleke ka Makwerhu Poetzinger a ku ri ka ku ya eHungary. Loko a khomeriwe mavunwa kutani a hlongoriwa eka tiko rero, endzhaku u nyikiwe vulanguteri bya ntlawa wa maphayona eYugoslavia. Endzhaku ka vuvabyi lebyi tinyikeke ntamu, byi lava ku tshama nkarhi wo leha exibedlhele eZagreb, u tlhelele eJarimani.

Makwerhu wa xinuna ni makwerhu wa xisati Poetzinger va tekane hi 1936, kambe hi rona lembe rero u rhumeriwe ekampeni ya nxaniso hikwalaho ka ku ala ku landzula ripfumelo rakwe. Nsati wakwe u khotsiwe kun’wana, kambe yena u rhumeriwe eDachau ivi ku suka kwalaho a yisiwa ekampeni ya ndzoviso eMauthausen, le Upper Austria. Kona Gestapo yi tirhise swakudya leswi khomisaka ndlala, ku ba hi swimoko ni tihanyi leti nga hlamuselekiki ku vangela yena ni Timbhoni tin’wana ku tshova vutshembeki bya vona eka Yehova Xikwembu. Kambe Makwerhu Poetzinger u namarhele ripfumelo ra ntiyiso.

Endzhaku ka malembe ya kaye ya ku khotsiwa ka tihanyi, Makwerhu wa xinuna ni Makwerhu wa xisati Poetzinger va tlhele va hlangana hi 1945. Hi ku hatlisa endzhaku ka leswi, u sungule ku tirha entirhweni wo famba-famba eJarimani, naswona endzhakunyana Gertrud u famba-fambe na yena, a tirha hi ku gingiriteka ensin’wini loko yena a ri karhi a tirhela mabandlha. Hi 1958 u ve kona eXikolweni xa Bibele xa Watch Tower xa Gilead, naswona eku vuyeni ka yena eJarimani, yena na nsati wa yena va ye emahlweni entirhweni wo famba-famba ku kondza loko va nghenele ntirho wa Bethele kona hi 1977. Hi September 1977, Makwerhu Poetzinger u hlawuleriwe eka Huvo leyi Fumaka naswona u swi kotile ku ta eyindlu-nkulu ya misava ya Sosayiti eBrooklyn, New York, kwalomu ka ku tlula lembe endzhakunyana. U tirhe na Komiti ya Ntirho ya Huvo leyi Fumaka na Komiti ya Ndzawulo ya Ntirho.

Makwerhu Poetzinger a a ri mulweri wa ntiyiso la nga ni xivindzi. Ku tshembeka ni ku seketela ka yena nhlengeletano ya Yehova na ntirho wa Mfumo hi ku chivirika hakunene a ku ri xikombiso. Kutani ha tiyiseka leswaku u le xikarhi ka lava marito lama ma tirhaka eka vona: “Ku katekile vafi lava, ku sukela sweswi, va felaka eHosini. . . . [Ina,] ku vula Moya . . . mintirho ya vona yi famba swin’we na vona.”—Nhlavutelo 14:13.