Nkambisiso Wa Mahungu

Ndyangu Lowu Avaneke

Yesu u vule leswaku “loko ndyangu wu avene hi le xikarhi,” wu nga ka wu nga yimi. (Marka 3:25) Leyi i ndlela leyi United Church of Canada, kereke leyikulu ya Protestente ya tiko rero, yi tikumaka yi ri eka mphikamakaneta ya vusodoma ni ku vekiwa ka vavanuna ni vavasati va vusodoma ha yona.

Xiboho lexi amukeriweke hi Huvo leyi Tolovelekeke ya vu-32 ya United Church of Canada xi pfumelela lava endlaka vusodoma ku tirha tanihi vafundhisi. Hi ku ya hi The Globe and Mail, nyuziphepha ya le Canada, xiboho xi vula leswaku ku nga khathariseki ku hisekela ka vona rimbewu, hinkwavo “lava vulaka leswaku va pfumela eka Yesu Kriste ni ku N’wi yingisa va amukeriwa ku va kumbe ku sungula ku va swirho leswi teleke swa Kereke,” naswona “swirho hinkwaswo swa Kereke swi faneriwa hi ku hlawuleriwa vutirheli lebyi lawuriwaka.” Xiviko xa United Church xa matluka ya 125 xi ri: “Ku ni tinxaka leti hambaneke ta ku hisekela rimbewu: vusodoma, rimbewu-mbirhi, rimbewu leri hambaneke. Leswi swi fanele swi xiyiwa tanihi leswi swi nga swa ntumbuluko na nyiko leyi humaka eka Xikwembu.”

Loko yi vulavula hi makungu ya kereke yo amukela vasodoma tanihi vafundhisi, Globe yi hlamusela leswaku “mphikamakaneta leyikulu a ku ri ku humelela ka kereke.” Ku sukela hi 1972, swiviko swi paluxa leswaku kereke a yi ri karhi yi lahlekeriwa hi vuxirho hakantsongo-ntsongo naswona yi le khombyeni ra swa timali. Xivangelo ke? Mufundhisi John Tweedie u tshaha “ku suka loku yaka emahlweni ka le kerekeni tanihi leswi vanhu va yi vonaka yi hambukela ekule ni swisekelo swa yona swa Vukriste.” “Hikwalaho,“’ ku vika The Post ya le Canada, “ku amukela ka vona ka swilo swo tanihi vusodoma, rimbewu ra le handle ka xiboho xa vukati, ku susa makhwiri loku sindzisiwaka ni vukati lebyi nga tiyangiki i masungulo eka rixaka lerintsongo.”

Hambi swi ri tano, xana ku yingisa Kriste ku pfumelela ku hundzuka ka misinya ya milawu ya Bibele? Hi laha ku hambaneke, Rito ra Xikwembu ri le rivaleni: “Mi nga tikanganyisi; vanhu lava nga tinghwavava . . . lava onhiweke hi vusodoma . . . ku hava na un’we wa lava loyi a nga ta kuma Mfumo wa Xikwembu.”—1 Vakorinto 6:9, 10, Today’s English Version.

Ku Tirhisa Nhonga

“U Nga Xupuli, Kambe Xiya Vuyelo” a ku ri nhloko-mhaka ya xihloko lexi humeleleke eka The Natal Mercury, nyuziphepha ya le Afrika Dzonga, leyi tsetseleleke mukhuva wa manguva lawa wo tshika ku xupula vana emirini ekaya ni le xikolweni. I mani la nga na vutihlamuleri eka langutelo leri ri hundzuriweke eka ku xupula? Profesa Smythe, mutivi wa swa mirhi ya vana eYunivhesiti ya Natal, Afrika Dzonga u sola vativi va miehleketo ya vana hi ku kongoma. “Hakanyingi eku handzisiseni ka timitsu ta ntlhontlho wa ntlhaveko,” ku hlamusela Smythe, “munhu u kuma ku hundzuka elangutelweni leri sungulaka hi dyondzo ya ntivo-miehleketo. Eku sunguleni yi lwisane swinene ni xivumbeko xihi na xihi xa ku xupula ka le mirini, loku hi nkarhi wolowo a ku xungetiwa hi vuyelo bya ku pfumala ku layiwa loku humaka eka nawu wa leswaku a ku laveki minsivelo naswona a ku laveki swiyila.”

Smythe u yimelela ku ringanisela. “Ku pfumelela ku tlula mpimo ku bihe ku fana na ku xupula ku hundzisa xikalo,“’ wa xiya, “kambe ntiyiso wa leswaku ku tshinya ka olova eka n’wana la layiwaka ngopfu ku tlula la nga layiwiki wu hlawula ku voyamela etlhelweni ro laya loko u kanakana.” Profesa u kandziyisa leswaku nsusumeto wo nyika ku xupula ka le nyameni wu fanele ku va ku khathalela ka rirhandzu ka ku hlayiseka ka n’wana ka namuntlha ni ka nkarhi lowu taka.

Xitsundzuxo xo tano a hi xintshwa kambe i ku tlhelela endzhaku eka vukongomisi bya Bibele lebyi pfumalaka xihoxo lebyi nge: “L’a pfumataka ṅwana wa yena e nhonga, o ṅwi v̌engile, kambe l’a ṅwi ranḍaka a ṅwi laya.”—Swivuriso 13:24; nakambe vona Swivuriso 23:13, 14.

Xana Ku Tlanga Hi Mali A Hi Xidyoho Ke?

Kereke ya Rhoma Khatoliki ya ha ku va nhlengeletano yo sungula ya vukhongeri eWisconsin, U.S.A., ku kombela mpfumelelo wo xavisa mathikithi yo winisa nhundzu, ku vika The Sheboygan Press. Hambi leswi minxavo yi hlamuseriwaka tanihi matshalatshala yo “bindzurisa” minhlengo ya vhiki na vhiki, Press yi xiya leswaku xivangelo lexikulu lexi tlulaka ku xavisa loku kunguhatiweke ka mathikithi yo winisa nhundzu “i ku andzisa nhlayo ya vanhu eka mintlangu ya vona ya bingo.” Kereke ana se yi vikiwa tanihi leyi tirhisaka mintlangu ya bingo leyi nga ni mimbuyelo leyi “sukelaka eka R2 000 ku ya eka R2 500” vusiku byin’wana ni byin’wana.

Loko a vutisiwile loko hakunene ku tlanga hi mali ku ri xidyoho, muprista wa kereke Robert Fleishman u hlamurile a ku: “A ndzi swi tivi.” Hambi leswi a pfumeleke leswaku ku tlakusa ka kereke ka bingo kumbe ku xavisiwa ka mathikithi yo winisa nhundzu “kumbexana a ku twanani ngopfu ni xirhambo xa hina hinkwaxo xa moya,” u engetele leswaku “loko va nga ti kona laha, va ta ya kun’wanyana” ku ya tlangisa mali ya vona.

Xana murhangeri wa vukhongeri la tivulaka mulandzeri wa Kriste u fanele ku tlakusa ku tlanga hi mali? Doo! Ku tlanga hi mali eka xivumbeko xihi na xihi ku katsiwa eka yin’wana ya timfanelo to biha swinene eka vanhu—makwanga. Lava va ku tlakusaka va khutaza vanhu ku pfumela leswaku swi lulamile ku vuyeriwa eka ku lahlekeriwa ka van’wana. Hambi swi ri tano, Rito ra Xikwembu leri huhuteriweke ri vula erivaleni leswaku vanhu va makwanga va nga ka va nga dyi ndzhaka ya Mfumo wa Xikwembu.—1 Vakorinto 6:9, 10; Vaefesa 4:19; 5:3.