Xiviko Xa Vahuweleri Va Mfumo

‘Leswi Rhandzekaka Swa Nghena’

MUPROFETA Hagayi u tsale marito lawa hi 520 B.C.E.: “Nḍi ta ṭekaṭekisa ni matiko hikwawo, kutani le’ŝi ranḍekaka ŝa matiko hikwawo ŝi ta ta kwala, nḍi v̌a nḍi tata yindlu leyi hi ku kweṭima, ku v̌ula Yehova wa mav̌andla.” (Hagai 2:7) “Le’ŝi ranḍekaka” swa matiko hinkwawo leswi tataka yindlu ya Yehova hi ku kwetsima i vagandzeri va yena lava chavaka Xikwembu. Vanhu vo tano va timbilu letinene va amukela mahungu lamanene eItaly, lerova sweswi ku na Timbhoni ta 166 000 leti dyondzisaka vanhu Bibele etikweni rero. Vafundhisi va Khatoliki eItaly va xiya ku kula ka hina loku xiyekaka ku ri “endlelo ra ku engeteleka hi xihatla” leri va “vilerisaka ni ku va heta matimba.” Mulavi un’wana wa ntiyiso kwalaho u hlamusele leswi n’wi humeleleke.

“A ndzi ri muchumayeri la anakanyisisaka ni vanhu hi malembe ya khume, naswona a ndzi khorwisekile leswaku leyi a ku ri ndlela yo phofula rirhandzu ra mina eka Xikwembu ni vaakelani ha yona. Hambi leswi a ndzi ri ni munghana loyi a a ri un’wana wa Timbhoni ta Yehova, a ndzi kalanga ndzi teka nkarhi wo yingisela rungula ra Bibele. Hambi swi ri tano, siku rin’wana loko Timbhoni ti ndzi endzela, ndzi ti rhambele ku nghena. A ndzi lava ku va byela leswaku va nga ha n’wi endzeli n’wingi wa mina nakambe, tanihi leswi a a twa a ri ni ku kanakana. Ematshan’wini yo endzela vanhu lavadyuhaleke,’ ndzi va byerile, ‘vulavulani ni vanhu vo fana na mina.’ Ku sukela hi nkarhi wolowo ku ya emahlweni va tile ekaya ra mina nkarhi na nkarhi, kambe nkarhi wun’wana ni wun’wana loko va khumba yinhla ya dyondzo ya kereke, a ndzi va kombela ku tshika bulo ku kondza loko endzhakunyana ndzi lavisisa mhaka.

“Ndzi vulavule ni vaprista vo hambana-hambana kutani ndzi xiya leswaku a va nga ri na nhlamulo ya Bibele. Un’wana wa vona, murhumiwa, u ndzi byele leswaku kahle-kahle a swi nga ri swa nkoka ngopfu ku va kona eka Xilalelo xa Rhoma Khatoliki. U te, ‘phela, ematikweni yo fana na Brazil, hi xikombiso, vanhu va endla swilo swin’wana ematshan’wini yo ya eXilalelweni xa Rhoma Khatoliki. Xilo xa nkoka i ku tirhela Xikwembu hi laha munhu a nga swi kotaka ha kona.’ Marito lawa ma ndzi nyike matimba yo tsema vuxaka bya mina na Rhoma Khatoliki. Mufundhisi un’wana u byele nuna wa mina, loyi na yena a a ri Mukhatoliki, leswaku loko ndzi lava ku va un’wana wa Timbhoni ta Yehova, ú fanele a ndzi pfumelela ku endla tano hikuva Timbhoni ta Yehova to va na xihoxo xin’we ntsena, lexiya xo hiseka ngopfu. Ndzi khuvuriwe sweswinyana kun’we ni un’wana wa vana va mina va majaha. Nuna wa mina na yena u dyondza Bibele naswona u kombisa ku tsakela rungula ra Mfumo.”

Leswi Yehova a tsekatsekisaka matiko hi ku endla leswaku ku avanyisa ka yena ku twarisiwa emisaveni, vanhu vo tala lava tiyimiseleke vululami va tshika mikhuva leyi nga tshembekangiki leswaku va landzela misinya ya milawu ya Bibele. Loko a nga si dyondza ntiyiso, wanuna un’wana wa Muntariyani u nghene exikweletini lexikulu, a ehleketa leswaku a a ta kota ku tlhela a hakela xikweleti xa yena hi mali ya muholo wa yena wa nkarhi na nkarhi ni “tinyiko ta mali” leti nga tshembekangiki leti a a ti amukela. Loko a kume vutivi bya ntiyiso, u bohe kungu ro nonon’hwa ivi a tshika ku amukela “tinyiko ta mali” leti nga tshembekangiki. Yena ni nsati wa yena va khuvuriwile ivi ku sukela kwalaho va sungula ku tirha evutirhelini bya nkarhi hinkwawo. Exibedlhele lexi a tirhaka eka xona, hakanyingi u boheka ku funungula mintsumbu, naswona nkarhi na nkarhi a a kuma mintsengo leyikulu ya mali eka swona. Hi xikombiso, siku rin’wana u kume ti-lira ta 150 000 (kwalomu ka R290), naswona enkarhini wun’wana u kume ti-lira ta 600 000 (kwalomu ka R1 160). Hi ku tshembeka, u tlherise mali, naswona leswi swi n’wi nyike nkarhi wo vulavula ni valawuri va xibedlhele ni madokodela ehenhleni ka ntiyiso. Valawuri va xibedlhele va n’wi rhumele mapapila ya xibumabumelo hi mahanyelo ya yena yo tshembeka ni ya vutihlamuleri.

Mintokoto leyi yi humaka eItaly ko va swikombiso ntsena swa ndlela leyi ha yona “le’ŝi ranḍekaka” swi tshikaka mafambiselo lawa yo homboloka, ya vukari ivi swi ta enhlengeletanweni ya Yehova leyi tengeke, ya ku rhula a nga si tsekatsekisa mafambiselo ya Sathana ya politiki ya ya eku lovisiweni eku heteleleni eArmagedoni.