Vito Ra Xikwembu Ri Tlheriseriwa

“SWI teke malembe ya kwalomu ka 60 leswaku vito ra Xikwembu, ‘JHWH,’ loyi ku nga riki Xikwembu xa Vayuda ntsena kambe ni xa Vakriste, leswaku ri tlheriseriwa laha eku sunguleni mupendi a a ri veke kona.” Sweswo hi leswi phepha-hungu ra Jarimani, Schwarzwälder Bote ri vulaka swona hi ku tlheriseriwa ka vito ra Xikwembu emahlweni ka holo ya doroba ra Horb, edzongeni wa Jarimani. Kambe hikwalaho ka yini vito leri ri susiwile?

Phepha-hungu ri vika leswaku vuhandle bya holo ya doroba a byi sasekisiwe hi ku pendiwa hi swifaniso leswi sasekisaka emahlweni ka yona. A a ku ri na Tetragrammaton, maletere ya mune ya Xiheveru lama vulaka vito ra Xikwembu.

Phepha-hungu ri ya emahlweni ri ku: “Vito leri, leri humelelaka ku tlula minkarhi ya 6 000 eBibeleni, i ‘Jehova’ kumbe swin’wana leswi fanaka na sweswo hi Xijarimani. Mapeletelo lamanene a ya tiveki kahle hikuva Xiheveru lexi tsariweke a xi tirhisa switatisi ntsena. Switwari a swi nghenisiwa hi vahlayi.”

Hambi swi ri tano, vayimeri wa Ntlawa wa Manazi hi 1934 va anakanye leswaku Tetragrammaton yoleyo a “yi nga yelani ni ndhavuko wa sweswinyana” kutani a yi fanele yi pendiwa. Lexi tsakisaka, Tetragrammaton sweswi yi tlheriseriwile. Phepha-hungu ra hlamusela: “Namuntlha emahlweni ka [holo ya doroba] laha ku khavisiweke hi swivono swa matimu, mfungho wa tiko ni swifaniso, ‘i’ ndhawu leyi munhu a fanelaka ku yi vona eHorb.”