Wa Tsundzuka Xana?

Xana u yi kambisisile minkandziyiso ya sweswinyana ya Xihondzo xo Rindza? Loko swi ri tano, swi ta ku tsakisa ku pfuxeta leswi landzelaka:

◻ Hi swihi swivutiso swin’wana leswi Vakreste vambirhi va nga tivutisaka swona va nga si ehleketa hi ku vutana?

‘Xana ndzi byi tiva kahle vumoya ni ku tinyiketela ka munhu loyi eka Xikwembu? Xana ndzi tianakanya ndzi ri karhi ndzi tirhela Xikwembu ni munhu wo tano vutomi bya mina hinkwabyo? Xana se hi kombane kahle vumunhu bya hina? Xana ndza tiyiseka leswaku hi ta fanelana vutomi hinkwabyo? Xana swiendlo swa hina swa nkarhi lowu hundzeke ni swiyimo swa sweswi, hi swi tiva kahle?’—8/15, tluka 31.

◻ Xana Yesu a a vula yini eka valandzeri va yena loko a ku: “N’wina mi munyu wa misava”? (Matewu 5:13)

Yesu a a vula leswaku ku chumayela ka valandzeri va yena hi Mfumo wa Xikwembu a ku ta ponisa vutomi bya lava va va yingisaka. Hakunene lava va yingiseke marito ya Yesu a va ta sirheleriwa eka mahanyelo yo biha ni ku onhaka hi tlhelo ra moya emisaveni.—8/15, tluka 32.

◻ Xana vanhu lava va rhandzanaka va nga wu papalata njhani ntlhamu wa ku tikhoma loko biha ka rimbewu?

Loko mi rhandzana, mi ta va mi endla kahle loko mi papalata ku va swenu laha ku nga fanelangiki. I swinene leswaku mi va swin’we ni van’wana kumbe mi va laha mi voniwaka hi vanhu. Tivekeleni swipimelo eka tindlela leti mi nga ta kombisana rirhandzu ha tona, hi ku xixima mintlhaveko ni ripfalo ra un’wana.—9/1, tluka 17, 18.

◻ Ku Twisisa I Yini?

I vuswikoti byo kambisisa mhaka kutani u xiya ndlela leyi yi nga xiswona, xisweswo u kumisisa xivumbeko xa yona. (Swivuriso 4:1)—9/15, tluka 13.

◻ Xana Yehovha u lava yini eka hina namuntlha?

Kahle-kahle, leswi Yehovha a swi lavaka eka hina i ku yingisa N’wana wa Yena ni ku landzela xikombiso ni tidyondzo ta yena. (Matewu 16:24; 1 Petro 2:21)—9/15, tluka 22.

◻ Xana I vamani ntsena lava nga kumaka ku rhula?

Leswi Yehovha a nga “Xikwembu lexi nyikaka ku rhula,” ku rhula ku nga kumiwa ntsena hi vanhu lava rhandzaka Xikwembu ni ku xixima swinene misinya ya xona yo lulama. (Varhoma 15:33)—10/1, tluka 11.

◻ Xana Yosefa u xi kume njhani xivindzi xa ku ala nsati wa Potifaro siku na siku?

Yosefa a a teka vuxaka bya yena na Yehovha byi ri bya nkoka swinene ku tlula ku titsakisa ka xinkarhana. Ku engetela kwalaho, hambileswi a a nga ri ehansi ka nawu wa Xikwembu, Yosefa a yi twisisa kahle misinya ya milawu ya mahanyelo. (Genesa 39:9)—10/1, tluka 29.

◻ Xana i swa nkoka ku fikela kwihi ku tiyimisela ka hina ku rivalela vamakwerhu?

Ntshembo wa hina wa ku hambeta hi rivaleriwa hi Xikwembu wu titshenge swinene hi ku tiyimisela ka hina ku rivalela van’wana. (Matewu 6:12, 14; Luka 11:14)—10/15, tluka 17.

◻ Xana i swidyoho swa muxaka muni leswi Matewu 18:15-17 yi vulavulaka ha swona, naswona i yini leswi kombisaka sweswo?

Swidyoho leswi Yesu a a vulavula ha swona laha a ku ri swidyoho leswikulu, lerova swi nga endla leswaku mudyohi a langutiwa a ri “munhu wa matiko ni muluvisi.” Vayuda a va nga tihlanganisi ni vanhu va Matiko, naswona a va papalata valuvisi. Hikwalaho, Matewu 18:15-17 yi vulavula hi swidyoho leswikulu, ku nga ri swihoxo kumbe swidyoho leswi nga nyawuliki leswi u nga swi rivalelaka munhu hi ku olova kutani u rivala hi swona. (Matewu 18:21, 22)—10/15, tluka 19.

◻ Xana swi vula yini ku rhandza Rito ra Xikwembu hakunene?

Ku rhandza Rito ra Xikwembu swi susumetela munhu ku hanya hi ku pfumelelana ni swilaveko swa rona. (Pisalema 119:97, 101, 105) Leswi swi lava leswaku munhu a tshama a ri karhi a lulamisa miehleketo ni mahanyelo yakwe.—11/1, tluka 14.

◻ Leswi hi kumeke swilo swo tala swinene eka Yehovha, xana hi nga yi nyika yini Hosi ni Munyiki lonkulu?

Bibele yi paluxa leswaku nyiko leyikulu leyi hi nga yi nyikaka Yehovha i “xitlhavelo xa ku vonga.” (Vaheveru 13:15) Ha yini? Hikuva xitlhavelo lexi xi fambisana hi ku kongoma ni ku ponisa vutomi, ku nga nchumu lowu Yehovha a khathalaka ha wona ngopfu enkarhini lowu wa makumu. (Ezekiyele 18:23)—11/1, tluka 21.

◻ Xana Solomoni a a vula yini loko a tsala leswi: “Marito ya lavo tlhariha ma fana ni tinsungunu ta havi”? (Eklesiasta 12:11)

Marito ya lava va nga ni vutlhari byo kombisa ku chava Xikwembu ma susumetela vahlayi kumbe vayingiseri ku endla nhluvuko malunghana ni marito ya vutlhari lawa va ma hlayeke kumbe ku ma twa.—11/15, tluka 21.

◻ Xana i yini ku twisisa loku kombisaka ku chava Xikwembu?

I vuswikoti byo hambanisa swo lulama eka leswi nga lulamangiki kutani u hlawula ndlela leyinene. Ku dyondza ni ku tirhisa Rito ra Xikwembu swi nyika ku twisisa.—11/15, tluka 25.

◻ Xana ku tiyimisela ku amukela vutihlamuleri swi fanele swi fambisana na yini? (2 Timotiya 3:1)

Leswi swi fanele swi fambisana ni langutelo lerinene. A nga kona loyi a faneleke a teka swiavelo swo tala lerova a lahlekeriwa hi ntsako entirhweni wa Yehovha. Moya wo tinyiketela wa tlangeriwa, kambe ku tinyiketela koloko ku fanele ku kombisa ku titsongahata ni “mianakanyo yo hluteka.” (Tito 2:12; Nhlavutelo 3:15, 16,)—12/1, tluka 28.

◻ Xana ntlhontlho wo kurisa vana ku nga langutaniwa njhani na wona?

Xikwembu xi laya vatswari leswaku va va xikombiso, vanghana, va kota ku vulavurisana, ni ku va vadyondzisi. (Deteronoma 6:6, 7)—12/1, tluka 32.