Mpfuxeto Wa Xikolo Xa Vutirheli Bya Le Tilweni
Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi October 25, 2004. Mulanguteri wa xikolo u ta fambisa mpfuxeto wa timinete ta 30 lowu sekeriweke eka rungula ra tinkulumo leti nyikeriweke ku sukela eka vhiki ra September 6 ku ya eka October 25, 2004. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. Hi nga endla njhani leswaku hi vulavula hi ndlela leyi akaka loko hi nyikela nkulumo leyi vulavulaka hi ntirho wo karhi wa Vukreste? [1, be-TS tl. 203 tindz. 3-4] Loko hi tiyiseka leswaku vapfumeri-kulorhi va rhandza Yehovha naswona va lava ku n’wi tsakisa, ku tiyiseka ka hina ku ta vonaka hi leswi hi swi vulaka. (2 Tes 3:4, 5; Film. 21) Hambiloko u fanele u nyikela ndzayo, u ta vulavula hi ndlela leyi akaka hi ku kandziyisa nkoka wa ku papalata xihoxo, ndlela yo tlhantlha xiphiqo ni ndlela leyi hi sirhelekaka ha yona loko hi endla leswi Yehovha a swi lavaka. (Ps. 119:9-11)
2. Swi vula yini ku phindha-phindha naswona ha yini swi ri swa nkoka? [3, be-TS tl. 206 tindz. 1-4] Swi vula ku phindha tinhla leti hi ku kongoma u lavaka leswaku vayingiseri va wena va ti tsundzuka. Yehovha Xikwembu na Yesu Kreste va hi vekele xikombiso lexinene emhakeni leyi ya ku phindha-phindha. (Det. 6:5; 10:12; 11:13; Mar. 9:34-37; 10:35-45) Loko vayingiseri va hina va tsundzuka leswi hi swi vulaka, swi ta kandziyisa leswi va swi pfumelaka ni ku va mpfuno eka ndlela leyi va hanyaka ha yona.
3. Hi nga yi kandziyisa njhani nhloko-mhaka loko hi nyikela tinkulumo? [6, be-TS tl. 210 tindz. 1-5, bokisi] Loko u lunghiselela nkulumo, hlawula tinhla-nkulu ni rungula leri ti seketelaka, leri nga ta pfuna hakunene leswaku u ndlandlamuxa nhloko-mhaka ya wena. Loko u ri karhi u ya emahlweni ni nkulumo ya wena, u fanele u pfa u phindha marito-nkulu kumbe mongo wa nhloko-mhaka ya wena.
4. Hi nga ti tivisa ku yini tinhla-nkulu ta nkulumo leyi hi averiweke yona? [7, be-TS tl. 212 tindz. 1-4] Hi nga ti tiva hi ku rhanga hi anakanya leswi vayingiseri va hina va swi tivaka mayelana ni mhaka leyi hi vulavulaka ha yona. Xa vumbirhi, hi fanele hi tiyiseka leswaku hi yi tiva kahle pakani leyi hi lavaka ku yi fikelela loko hi vulavula ni vayingiseri va hina. Tinhla letimbirhi ti ta hi pfuna ku khutulela rungula leri nga lavekiki ivi hi sala ni leri lavekaka ntsena.
5. Ha yini hi fanele hi tivonela leswaku hi nga vi ni tinhla-nkulu to tala? [8, be-TS tl. 213 tindz. 2-4] I swa nkoka leswaku u nyika vayingiseri va wena nkarhi wo anakanyisisa hi yinhla-nkulu ha yin’we leswaku yi ta dzika emianakanyweni ya vona. Loko tinhla ta wena ti xaxametiwe kahle ehansi ka tinhloko-mhaka ti nga ri tingani kutani u ti ndlandlamuxa hi ku landzelelana ka tona, nkulumo ya wena yi ta landzeleleka hi ku olova naswona vayingiseri va nge yi rivali hi ku hatlisa.
NKULUMO NO. 1
6. I yini leswi a swi endleka emahlweni ka Ndhambhi leswi nga vaka swi endle leswaku vanhu va nga kholwi leswaku swilo hinkwaswo leswi va swi vonaka swi ta lovisiwa? [1, w02-TS 3/1 matl. 5-6] Vanhu va le mahlweni ka Ndhambhi a va vulavula ririmi rin’we. (Gen. 11:1) Vanhu a va kota ku hanya madzana ya malembe kutani a va kota ku tirhisa vutivi lebyi va byi kumeke eka malembe-xidzana lama hundzeke. Kayini u kote ku aka muti. (Gen. 4:17) Vanhu va kote ku endla swifaniso swo xonga. (Gen. 4:21) Va endle nhluvuko lowukulu eka swa vumaki. (Gen. 4:22) Nhluvuko lowu ni ndlela leyi vanhu a va hanya ha yona swi endle leswaku swi tika ku yingisa Nowa loko a ri karhi a chumayela “ku fikela loko ndhambi yi fika yi va kukula hinkwavo.” (Mat. 24:38, 39; 2 Pet. 2:5)
7. Ha yini a swi fanela leswaku vanhu va le nkarhini wa Yesu va n’wi vitana “Mudyondzisi” ku ri ni ku n’wi vitana “Muhanyisi”? (Luka 3:12; 7:40) [2, w02-TS 5/1 tl. 4 ndz. 3; tl. 6 ndz. 5] Yesu u tshungule vanhu mavabyi yo hambana-hambana, a hanyisa ni lava lamaleke kutani sweswo swi kombise leswaku hi yena Mesiya. Swi tlhele swi endla leswaku vanhu va va ni ripfumelo eka switshembiso swa leswaku va ta hanyisiwa ni le nkarhini lowu taka. (Esa. 33:24) Hambiswiritano, ntirho wa nkoka lowu Yesu a a wu endla a ku ri ku dyondzisa vanhu hi Mfumo wa Xikwembu, wu nga wona ntlhantlho lowu nga heriki wa swiphiqo swa vanhu. (Luka 4:43)
8. Xana buku ya Swivuriso 11:24, 25 yi wu kandziyisa hi ndlela yihi nkoka wa ku hlanganyela hi xitalo ensin’wini? [3, w02-TS 7/15 tl. 30 tindz. 2-4] “La hangalasaka” hi ku chumayela ni ku dyondzisa Rito ra Xikwembu u kurisa ku twisisa ni ku tlangela ka yena Rito ra Xikwembu. Kambe loyi a nga byi tirhisiki vutivi bya yena, u le khombyeni ra ku lahlekeriwa hi leswi a nga na swona. Hikwalaho loko hi nga chavi ku vulavula ni ku dyondzisa van’wana ensin’wini, hi ta vuyeriwa hi tlhela hi vuyerisa ni van’wana.
9. Xana ku xandzuka ka le Edeni ku tlakuse mphikamakaneta yihi naswona vuyelo bya kona byi ve byihi? (Gen. 3:1-6) [5, w02-TS 10/1 tl. 6 ndz. 1, 3-4] Mphikamakaneta leyi tlakukeke yi endle leswaku mfanelo ya Yehovha yo fuma swivumbiwa swa yena yi kanakaniwa. Xana Muvumbi a a ri ni mfanelo yo langutela leswaku vanhu va n’wi yingisa hilaha ku heleleke? Xana vanhu a va ta tiphina loko a vo tilawula? Ku xandzukela vuhosi bya Yehovha ku tisele vanhu xidyoho ni rifu leri vangiwaka hi nyimpi, ku kala vululami, ntshikilelo ni ku xaniseka, leswi veke tshamelo-maxelo ematin’wini ya vanhu.
10. Xana hi nga ri kumisa ku yini siku leri vugandzeri bya ntiyiso byi sunguleke ku yisiwa emahlweni nakambe eYerusalema? [6, si-TS tl. 285 ndz. 5] Lembe leri Korexe a tshameke ha rona exiluvelweni ri sungule endzhaku ka loko a hlule Babilona hi 539 B.C.E. Hi lembe ro sungula ra ku fuma ka yena (leri sunguleke hi Nisani 538 B.C.E. ku ya fika hi Nisani 537 B.C.E.), Korexe u lerise leswaku Vayuda va ntshunxiwa. (Ezra 1:1-3) Hi “n’hweti ya vukombo” Vayuda se a va fikile emitini ya vona. (Ezra 3:1) Leswi swi pfumelelana ni mhaka ya leswaku Vayuda va fanele va teke nkarhinyana va ri karhi va longa leswaku va ta khoma ndlela. Kutani xixikana xa 537 B.C.E. xi vuriwa siku leri vugandzeri lebyi tengeke byi sunguleke ku yisiwa emahlweni nakambe eYerusalema.
KU HLAYA KA BIBELE KA VHIKI NI VHIKI
11. Leswi Yehovha a byeleke Balama leswaku a famba ni vanhu va Balaka, ha yini A hlundzukile loko Balama a fambe na vona? (Tinhl. 22:20-22) Yehovha u byele Balama leswaku a nga fanelanga a rhukana Vaisrayele kambe muprofeta loyi wa makwanga u ye hi xikongomelo xo ya va rhukana leswaku a ta hakeriwa hi Balaka Hosi ya Mumowabu. (2 Pet. 2:15; Yudha 11) Hi swona leswi endleke leswaku Xikwembu xi hlundzukela Balama. Ku fana na Kayini, Balama u honise ku rhandza ka Xikwembu hi vomu. (Gen. 4:6-8) [1, w84 4/15 tl. 30 ndz. 2]
12. Xana nuna wa wansati la nga Mukreste a nga tshikisa nsati wa yena xiboho lexi a xi hlambanyeke? (Tinhl. 30:6-8) A nge n’wi tshikisi hikuva valandzeri va Yesu a va le hansi ka Nawu. Sweswi munhu ha un’we u ni vutihlamuleri bya ku tiendlela xiboho lexi hlambanyiweke eka Yehovha kutani nuna wa wansati la nga Mukreste a nga na yona mfanelo yo tshikisa nsati wa yena xiboho lexi a xi endleke kumbe a n’wi sivela ku xi hetisisa. Nilokoswiritano, wansati la nga Mukreste a nga fanelanga a endla swiboho leswi hlambanyiweke leswi lwisanaka ni Rito ra Xikwembu kumbe leswi n’wi sivelaka ku endla mintirho leyi Matsalwa ma n’wi lerisaka leswaku a yi endlela nuna wa yena. (Ekl. 5:2-6) [3, w84 4/15 tl. 30 ndz. 4]
13. Xana ‘miti ya vutumbelo’ yi yimela yini namuntlha? (Tinhl. 35:6) [4, w95-TS 11/15 tl. 17 ndz. 8] A yi yimeli tindhawu to karhi leti nga kona emisaveni namuntlha. Kambe, yi yimela lunghiselelo ra Xikwembu ro hi sirhelela eka rifu loko hi tlule nawu wa yena emhakeni ya ku kwetsima ka ngati. (Gen. 9:6)
14. Xana xileriso lexi kumekaka eka Deteronoma 6:6-9 lexi nge u ‘tsimba nawu wa Xikwembu evokweni, naswona wu fanele wu va vamba emombyeni’ xi fanele xi tekiwa hi ndlela ya xiviri? Doo, xi fanele xi twisisiwa hi ndlela yo fanekisela. (Eks. 13:9; Swiv. 7:2, 3) Vaisrayele a va fanele va hlayisa swileriso swa Xikwembu minkarhi hinkwayo. A va fanele va hlayisa Nawu wa Xikwembu etimbilwini ta vona, va wu dyondzisa vana va vona, naswona swiendlo swa vona (ku nga ku tsimba nawu evokweni) swi kombisa leswaku va tikarhatela ku hanya hi wona. Loko vanhu va va languta, a swi fanele swi va erivaleni leswaku va namarhela Nawu wa Yehovha, onge hiloko wu tsariwe tanihi vamba ra le mombyeni exikarhi ka mahlo ya vona. [6, w84 7/15 tl. 24 ndz. 1]
15. Xana marito lama nge “nkhancu wa wena a wu hlakalanga” ma vula leswaku Vaisrayele a va tshama va ri karhi va nyikiwa swiambalo leswintshwa? (Det. 8:4) Doo! Lunghiselelo ra manna a ri nga heli. Swi tano ni hi mhaka ya ku nga hlakali ka swiambalo swa vona ni ya ku nga pfimbi ka milenge ya vona loko va ri karhi va yingayinga malembe ya 40 emananga. Loko swiambalo swa vona a swi hlakarile ivi va boheka ku kuma swin’wana, swoleswo a swi nga ta vuriwa singita. [7, w84 7/15 tl. 24 ndz. 2]